Ol Plan Mo Wok We Oli Folem Raon Long Wol

I GAT wan rod we ol Witnes oli folem blong lidim wok blong prij long bitim 230 kantri. Rod ya i kamaot long Hed Kampani we i stap long hed ofis long Brooklyn, New York. Evri yia, Hed Kampani ya i sanem wanwan man i go long wanwan branj ofis raon long wol. Long branj ofis i gat Branj Komiti blong tri no seven man we oli lukluk long wok we i stap gohed long kantri we i stap aninit long hem. Sam branj ofis oli mekem wok blong printim buk, mo samfala oli gat ol bigfala mesin we oli save printim plante buk. Branj ofis i seraotem kantri we i stap long han blong hem, long ol haf we oli kolem distrik. Biaen, oli seraotem distrik ya long smosmol haf bakegen we oli kolem ol seket. Wan seket i save gat samting olsem 20 kongregesen insaed long hem. Ale, branj ofis i jusum wan man we bambae hem i distrik elda blong visitim wanwan seket insaed long wan distrik. Wanwan seket ya i gat tu asembli blong hem long wan yia. Branj ofis i jusum wan narafala man blong mekem wok blong seket elda. Seket elda i visitim wanwan kongregesen insaed long wan seket, tu taem wan yia. Wok blong hem i blong halpem ol Witnes blong mekem gudfala plan mo blong gohed gud long wok blong prij long ol teritori blong kongregesen blong olgeta.

Kongregesen we i mekem miting long Haos Kingdom long ples blong yu, hem nao i mas mekem wok blong talemaot gud nius long ol man long komuniti blong yu. Kongregesen ya i seraotem ol eria long komuniti blong yu i go long ol smosmol haf we oli kolem ol map. Ale, wanwan Witnes blong Jeova i save karem wan map ya mo go long olgeta haos we oli stap long map ya blong storian wetem ol man. Wan kongregesen i save gat kasem 200 Witnes long hem, mo i gat ol elda we oli lukaot defdefren wok insaed long kongregesen ya. Long ogenaesesen blong ol Witnes blong Jeova, olgeta wanwan man blong talemaot gud nius oli impoten tumas. Olgeta Witnes blong Jeova evriwan, nomata sipos oli wok long hed ofis long Brooklyn, long ol wanwan branj ofis, no sipos oli gat wok insaed long kongregesen, be evriwan i mas mekem wok ya blong tokbaot Kingdom blong God long ol narafala.

Evri yia, ripot blong wok blong olgeta Witnes blong Jeova raon long wol i mas kasem hed ofis long Brooklyn. Ale oli printimaot ripot ya long wan buk we i kamaot evri yia, buk ya nem blong hem Yearbook, mo i kamaot tu long Wajtaoa blong Jenuware 1 blong evri yia. Ripot ya i givim save long saed blong wok we i stap gohed long evri kantri blong givim witnes long saed blong Jeova mo Kingdom blong hem we Jisas Kraes i rulum. Long ol yia we oli jes pas, ripot ya i soem se samwe long 16,000,000 Witnes mo narafala man oli stap kam long Memoriol blong tingbaot ded blong Jisas. Ol Witnes blong Jeova oli spenem moa long 1,000,000,000, aoa evri yia blong talemaot gud nius, mo tu, evri yia, i gat moa long 300,000 man we oli baptaes. Mo oli givimaot plante handred milian buk mo magasin.