Lesen 14

Ol Fren Blong God Oli Stap Longwe Long Ol Samting Nogud

Setan i traem pulum ol man blong mekem samting we i nogud. Wan man we i wantem kam fren blong God, hem i no mas laekem ol samting we Jeova i no laekem. (Ol Sam 97:10) Hemia sam long ol samting we ol fren blong God oli traehad blong blokem:

Ol sin long saed blong seks. “Yufala man [no woman] we i mared, bambae yufala i no mas go slip wetem narafala woman [no man].” (Eksodas 20:14) Fasin blong slip tugeta bifo mared, hemia tu i rong.—1 Korin 6:18.

Fasin blong drong. “Man we i stap dring we i lusum hed . . . bambae [i] no save go insaed samtaem long niufala wol ya we God i king long hem.”—1 Korin 6:10.

Kilim man i ded, Kilim pikinini long bel. “Bambae yufala i no mas kilim man i ded.”—Eksodas 20:13.

Fasin blong stil. “Bambae yufala i no mas stil.”—Eksodas 20:15.

Fasin blong giaman. Jeova i no laekem nating “fasin blong giaman.”—Ol Proveb 6:17.

Raf fasin mo Fasin blong no bos long Kros. “[Jeova] i no laekem nating olgeta we oli laekem tumas blong mekem faet.” (Ol Sam 11:5) “Fasin blong ol man we oli stap mekem ol rabis samting we tingting blong olgeta i wantem, hem i klia. Olgeta oli . . . stap kros.”—Galesia 5:19, 20.

Fasin blong plelaki. “Yufala i no mas go joen wetem ol man ya we oli . . . stap wantem tumas samting.”—1 Korin 5:11.

Fasin blong no laekem man blong narafala kala no laen. “Yufala i mas lavem ol enemi blong yufala, mo yufala i mas prea from olgeta we oli stap mekem i nogud tumas long yufala.”—Matiu 5:43, 44.

Ol samting we God i talem long yumi oli blong mekem i gud long yumi. I no isi oltaem blong stap longwe long ol samting we oli nogud. Wetem help blong Jeova mo wetem help blong ol Witnes blong hem, yu save stap longwe long ol samting we oli mekem God i harem nogud.—Aesea 48:17; Filipae 4:13; Hibrus 10:24, 25.