Stadi 10
Ol Fasin We God i No Laekem Nating
?Yu mas tingting olsem wanem long ol samting we God i talem se oli nogud? (1)
?Wanem sam fasin long saed blong seks we oli rong? (2)
?Ol Kristin oli mas ting wanem long fasin blong gyaman? (3) ?plelaki? (3) ?stil? (3) ?raf fasin? (4) ?wok wetem ol rabis speret? (5) ?drong? (6)
?Olsem wanem wan man i save lego ol nogud fasin? (7)
1. Ol man blong God oli laekem ol samting we i gud. Be oli mas lanem tu, blong no laekem nating ol samting we oli nogud. (Ol Sam 97:10) Samting ya i minim se oli mas stap longwe long ol fasin we God i no laekem. ?Wanem sam long ol fasin ya?
2. Slip Olbaot: Fasin blong slip tugeta bifo mared, stilim waef no hasban blong narafala, slip wetem ol anamol, slip wetem wan narafala memba blong famle, mo man i slip wetem man bakegen, olgeta fasin ya oli ol bigfala sin agensem God. (Levitikas 18:6; Rom 1:26, 27; 1 Korin 6:9, 10) Man mo woman we tufala i stap tugeta be tufala i no mared, tufala i mas seraot, sipos no, tufala i mas mekem mared blong tufala i stret folem loa.—Hibrus 13:4.
3. Fasin Blong Gyaman, Plelaki, Stil: Jeova God i no save gyaman. (Taetas 1:2) Ol man we oli wantem se God i glad long olgeta, oli no mas gyaman. (Proveb 6:16-19; Kolosi 3:9, 10) Olkaen fasin blong plelaki oli joen wetem griri fasin. Taswe ol Kristin oli no joen long enikaen fasin blong plelaki, olsem lotri, winim mane long resis blong hos, mo bingo. (Efesas 5:3-5) Mo ol Kristin oli no stil. Oli no pem wan samting we narafala i stilim, mo oli no tekem wan samting we oli no askem fastaem.—Eksodas 20:15; Efesas 4:28.
4. Fasin Blong Kros Bigwan, Raf Fasin: Fasin blong kros bitim mak i save lidim man blong mekem raf fasin. (Jenesis 4:5-8) Wan man we i gat raf fasin i no save stap olsem fren blong God. (Ol Sam 11:5; Proveb 22:24, 25) I rong blong givimbak no blong mekem nogud long narafala from wan nogud samting we hem i bin mekem long yumi.—Proveb 24:29; Rom 12:17-21.
5. Majik Mo Wok Wetem Ol Rabis Speret: Sam man oli traem yusum paoa blong ol speret man blong winim sik. Sam narafala oli yusum majik blong mekem ol enemi blong olgeta oli sik no blong kilim olgeta i ded. Paoa we i stap biaen long olkaen wok ya, hemia Setan. Taswe, ol Kristin oli no mas joen nating long olgeta. (Dutronome 18:9-13) Nambawan rod blong blokem rabis paoa ya we narafala i save yusum agensem yumi, i blong stap kolosap long Jeova.—Proveb 18:10.
6. Fasin Blong Drong: I no rong blong dring smol waen, bia, no wan narafala dring olsem. (Ol Sam 104:15; 1 Timote 5:23) Be, fasin blong dring bitim mak mo drong, hem i no stret long tingting blong God. (1 Korin 5:11-13; 1 Timote 3:8) Fasin blong dring bitim mak i save spolem helt blong yu, mo i save mekem trabol i kamaot long famle blong yu. Mo tu, hem i save mekem se i isi nomo blong yu foldaon long ol narafala traem.—Proveb 23:20, 21, 29-35.
7. Ol man we oli folem fasin we God i talem se i nogud, bambae oli “no save go insaed long nyufala wol ya we God i king long hem.” (Galesia 5:19-21) Sipos yu rili laekem God mo yu wantem mekem hem i glad, yu mas lego ol fasin ya. (1 Jon 5:3) Lanem fasin blong no laekem nating ol samting we God i talem se oli nogud. (Rom 12:9) Kampani wetem ol man we oli gat ol fasin we God i laekem. (Proveb 13:20) Ol Kristin fren we oli bigman long saed blong speret, oli save halpem yu bigwan. (Jemes 5:14) Antap long olgeta samting ya, tru long prea, dipen long God blong i halpem yu.—Filipae 4:6, 7, 13.
[Tok blong pija long pej 20]
God i no laekem nating fasin blong drong, stil, plelaki, mo ol fasin we oli raf