Gud Nius Ya We Oli Wantem Yu Yu Harem

TAEM Jisas i stap long wol, ol disaepol oli kam long hem mo oli askem se: “?Wanem saen bambae i soemaot we yu yu stap mo we en blong fasin blong laef blong wol ya i kam?” Blong ansa long kwestin ya, Jisas i talem se bambae i gat ol faet we plante neson oli tekpat long hem, bambae ol man oli sot long kakae, bambae i gat plante rabis sik, mo bambae graon i seksek. Hem i talem se plante moa man bambae oli brekem loa, ol lida blong giaman skul bambae oli lidim ol man oli go krangke, mo ol trufala man blong hem bambae oli fesem hadtaem from we narafala i no laekem olgeta mo i kilim olgeta. Mo hem i talem tu se, plante plante man bambae oli no moa laekem ol fasin we oli stret. Taem olgeta samting ya oli kamtru, ale hemia saen se Kraes i sidaon finis long jea blong king mo rul blong Kingdom i klosap. !Hemia wan nambawan nius! !Yes hem i wan gudfala nius! Taswe taem Jisas i tokbaot saen ya, hem i talem tu se: “Gud nius ya blong Kingdom, bambae ol man oli talemaot long olgeta ples long wol, blong oli witnes long hem long fes blong olgeta man, nao biaen bambae en i save kam.”—Matiu 24:3-14, NW.

Ol samting we oli stap hapen long wol naoia oli nogud tumas, be i gat gudfala risen from wanem i olsem, hemia from we Jisas i stap nao olsem King. Olgeta samting we yumi ridim long haf antap, oli stat kamtru long 1914, yia ya we ol Witnes oli bin talemaot finis bifo. Long yia ya 1914, wan longfala taem we Baebol i kolem se Taem blong ol Hiten man, hem i finis. Ale naoia yumi stap long wan taem we bigfala jenis bambae i kamaot, hemia se rul blong man bambae i lus mo Taosen Yia Rul blong Kraes bambae i stat.

Ol vas blong Baebol olsem Ol Sam 110:1, 2 mo Revelesen 12:7-12 oli soemaot se i gat wan taem we jenis i kamtru long saed blong rul. Ol vas ya oli talem se Kraes i sidaon long raet saed blong God long heven, mo i wet gogo kasem taem we God i putumap hem i King. Nao taem hem i kam King hem i faet agensem Setan mo i sakemaot hem long heven i kamdaon long wol, taswe wol i trabol tumas. Be ol enemi blong God oli no ded yet taem Kraes i stap rul. Rabis fasin wetem ol rabis man bambae oli lus fulwan long taem blong “bigfala trabol” we long en blong hem bambae i gat faet blong Amagedon. Biaen long hemia, Taosen Yia Rul blong Kraes bambae i stat, nao bambae i gat pis.—Matiu 24:21, 33, 34; Revelesen 16:14-16.

Baebol i talem se: “Yu mas save samting ya se, taem blong ol las dei bambae i strong tumas, bambae i had blong winim ol trabol. From we bambae ol man oli save laekem olgeta nomo, bambae oli laekem mane tumas, oli man blong mekem flas, tingting blong olgeta i antap tumas, bambae oli tok nogud long God, oli no obei long papa mama blong olgeta, oli no man blong talem tangkiu, mo oli no gat fasin blong stap tru long God mo long narafala man. Bambae oli no gat filing long ol narafala man, oli blokem tingting blong olgeta blong no agri wetem narafala, oli man blong spolem nem blong narafala, oli no save bos long tingting blong olgeta, oli wael olgeta. Bambae oli no laekem ol samting we oli gud, oli man blong spolem fren blong olgeta, oli stronghed, mo oli fulap long flas. Bambae oli laekem moa ol pleplei, i winim we oli laekem God. Long fes blong ol man, i luk olsem we oli stap fasgud long God, be oli giaman nomo, oli no wantem nating we paoa blong God i wok long laef blong olgeta. Ol man olsem, bambae yu no go klosap nating long olgeta.”—2 Timoti 3:1-5, NW.

Maet sam man oli save talem se: “Rabis fasin mo trabol i stap hapen oltaem nomo long wol, stat bifo olgeta i kam kasem tede, i no gat samting i niu.” I tru se rabis fasin mo trabol i stap longtaem finis long wol, be neva oli hapen semtaem tugeta mo long fasin we i bigwan olsem tede. Ol man we oli stadi long histri mo sam narafala man bakegen oli talem finis se i neva gat wan taem long wol ya we man i bin luk samting olsem we i stap hapen stat long 1914 i kam. (Lukluk pej 7.) Bigfala soasore we i kasem ol man i bigbigwan tumas i bitim olgeta taem bifo. Mo i gud blong makem sam samting long saed blong saen blong las dei we Jisas i tokbaot. I gat sam haf blong saen ya we i hapen nomo tede, i neva hapen bifo: Wok blong talemaot se Kraes i King finis mo Kingdom i stanap long heven, i kasem ful wol. Hemia i bitim enitaem bifo. Mo tu, i no gat wan narafala taem bifo we ol man oli agensem wok blong prij olsem we oli mekem long ol Witnes blong Jeova tede. Plante taosen Witnes oli ded long ol rabis kalabus blong ol Nasi. Tede yet, i gat sam kantri we gavman i putum tabu long wok blong ol Witnes blong Jeova, mo long sam kantri ol man oli stap arestem ol Witnes, putum olgeta long kalabus, givim kil blong spolem bodi blong olgeta, mo kilim olgeta i ded tu. Olgeta samting ya oli laenap stret wetem saen ya we Jisas i tokbaot.

Revelesen 11:18 i talem finis se ‘ol man we oli no save Jeova, oli kros tumas’ long ol gudfala Witnes blong Jeova, mo samting ya i min se i no longtaem bambae Jeova tu i soemaot “kros” blong hem long olgeta. Vas 18 i gohed, i talem se God bambae i “spolem ol man ya we oli stap spolem wol.” Long ol taosen yia we man i laef long wol, taem blong yumi nao we man i spolem moa ol tri, win, mo solwota, mo from samting ya, laef long wol i stap long bigfala denja. Plante saentis oli givim woning finis se sipos ol man oli gohed blong sakem doti olbaot, i no longtaem bambae man i no moa save laef long wol ya. Be Jeova i ‘wokem wol ya blong man i save stap long hem.” Taswe, bifo we ol man oli spolem wol ya fulwan, bambae Jeova i mas spolem ol man ya.—Aesea 45:18.

OL BLESING WE KINGDOM BAMBAE I KAREM LONG WOL

Plante man we oli bilif long Baebol oli ting se taem God i sevem ol man, bambae hem i tekem olgeta evriwan oli go long heven. Taswe, oli harem se i narakaen taem yumi talem se sam man bambae oli laef long wol ya aninit long Kingdom blong God. Baebol i soem se i gat wan stret namba blong man nomo we bambae oli go long heven. Mo olgeta we bambae oli laef olwe long wol ya oli plante we oli plante, i no gat wan stret namba blong olgeta. (Ol Sam 37:11, 29; Revelesen 7:9; 14:1-5) Wan profet tok long buk blong Daniel long Baebol, i soemaot se Kingdom blong God we Kraes i King long hem, bambae i rulum ful wol.

Long profet tok ya, Daniel i luk wan ston i kamaot long wan bigfala hil, ston ya i pija blong Kingdom we Kraes i rul long hem mo bigfala hil ya i minim hae rul blong Jeova. Ston ya i kilim mo brekem wan bigfala pija blong man. Pija ya i minim olgeta gavman blong wol we oli holem bigfala paoa long wol. Taem ston ya i kilim leg blong pija ya finis “ston ya i gru i go antap we i kam wan bigfala hil we i kavremap olgeta ples long wol.” Ale profet tok ya i gohed se: “Nao long taem blong ol king ya, God ya we i stap long heven bambae i stanemap wan king we rul blong hem bambae i no save finis samtaem. Bambae i no gat wan king i save winim hem. Bambae hem i save flatemgud paoa blong ol narafala king, nao bambae hem i rul oltaem gogo i no save finis.”—Daniel 2:34, 35, 44.

Hemia nao samting we ol Witnes blong Jeova oli wantem talem long yu. Oli wantem tokbaot Kingdom ya wetem hop we Baebol i tokbaot, se yumi save laef gogo i no save finis long wan wol we i klin mo i naes bakegen. Plante milian man we oli laef naoia, wetem plante plante milian moa man we oli stap slip long beregraon, bambae oli gat janis blong laef olwe long wan wol olsem. Ale, long Taosen Yia ya we Jisas Kraes i rul long hem, stamba tingting we Jeova i gat long saed blong wol ya bambae i kamtru. Taem ol man oli stap long Paradaes, bambae oli neva les long laef. Bambae oli mekem wok blong lukaot long wol ya, olsem we Adam i bin gat wok blong lukaot long garen blong Iden. Bambae i gat plante wok blong mekem blong lukaot long graon, ol tri mo flaoa mo ol anamol tu. Yes, “ol samting we olgeta oli hadwok long hem, bambae oli save harem gud long hem longtaem.”—Aesea 65:22; Jenesis 2:15.

I gat plante vas blong Baebol we oli soemaot se laef bambae i olsem wanem taem prea blong Jisas i kamtru we i se: “Yu mekem kingdom blong yu i kam. Plis yu mekem samting we yu yu wantem i kamaot long wol, olsem we i kamaot long heven.” (Matiu 6:10, NW) I gat plante vas be ating yumi save ridim wan long ol vas ya naoia, hemia we i se: “Nao mi harem wan tok we i kamaot long bigfala jea blong God, we i singaot bigwan, i talem se, ‘!Yu luk! Naoia God i mekem ples blong hem wetem ol man. Hem bambae i stap oltaem wetem olgeta, mo olgeta bambae oli man blong hem. God bambae i kampani wetem olgeta, mo hem bambae i God blong olgeta. Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.’ Nao Man ya we i stap sidaon long bigfala jea blong hem i talem se, ‘!Yu luk! Mi mi stap mekem olgeta samting oli kam niuwan bakegen.’ Nao hem i talem long mi bakegen se, ‘Yu raetem tok ya, from we tok blong mi i tru, mo ol man oli save bilif long hem.’”—Revelesen 21:3-5.

[Tok blong makem poen long pej 15]

“Taem blong ol las dei bambae i strong tumas,”

BE ‘biaen bambae en i kam’

[Tok blong pija long pej 18]

Netalan

[Tok blong pija long pej 18]

Naejeria