Ansa Blong Fo Kwestin Long Saed Blong En Blong Wol

JISAS KRAES i talem se ‘en bambae i kam.’ Hem i tokbaot taem ya se: “Long taem ya, bambae i gat bigfala trabol tumas, we neva man i luk olsem bifo, i stat long taem we God i mekem wol ya, i kam kasem tede. Mo bambae i no moa gat bigfala trabol olsem bakegen samtaem.”—Matiu 24:14, 21, NW.

Tok ya blong Jisas long saed blong en, mo sam narafala vas blong Baebol we oli tokbaot taem ya, oli mekem yumi tingbaot sam impoten kwestin. I gud yu openem Baebol blong yu mo yu ridim ansa we Baebol i givim long ol kwestin ya.

1 ?En Blong Wanem Samting?

Baebol i no tijim se God bambae i spolem wol ya we yumi stap long hem. Man blong raetem Ol Sam i talem se: “[God i] putum wol ya i stap strong long fandesen blong hem, we bambae hem i no save muf nating.” (Ol Sam 104:5) Mo Baebol i no tijim tu se olgeta laef samting bambae oli lus long wan bigfala faet we i kamaot long fulwol. (Aesea 45:18) Jisas tu i talem se bambae i gat sam man we oli no ded taem en i kam. (Matiu 24:21, 22) ?Be Baebol i talem se wanem samting bambae i finis?

En blong ol gavman blong man we oli no rul gud nating. God i pulum profet Daniel blong raetem se: “God ya we i stap long heven bambae i stanemap wan king we rul blong hem bambae i no save finis samtaem. Bambae i no gat wan king i save winim hem. Bambae hem i save flatemgud paoa blong ol narafala king, nao bambae hem i rul oltaem gogo i no save finis.”—Daniel 2:44.

En blong faet mo ol fasin we oli stap spolem wol. Long Ol Sam 46:9, Baebol i tokbaot samting we God bambae i mekem, i se: “Hem i stap mekem ol faet i finis long olgeta ples long wol. Hem i stap brekem ol bonara, i stap spolem ol spia, mo i stap bonem ol sil long faea.” Baebol i tijim tu se God bambae i “spolem ol man ya we oli stap spolem wol.”—Revelesen 11:18.

En blong ol man blong brekem loa mo ol man we oli mekem i no stret. Tok blong God i promes se: “Ol stret man we yu save trastem olgeta, bambae oli save stap gud long ples ya blong yumi. Be ol man nogud we oli stap mekem ol rabis fasin, bambae God i tekemaot olgeta oli gowe long ples ya. Hem bambae i rutumaot olgeta, olsem we man i stap rutumaot ol smosmol tri long garen.”—Ol Proveb 2:21, 22.

2 ?Wetaem Bambae En i Kam?

Jeova God i putum wan stret “taem” blong finisim ol rabis fasin, mo blong mekem se Kingdom blong hem i rul long fulwol. (Mak 13:33) Be Baebol i soemaot klia se yumi no save kaontem ol dei, blong faenemaot stret dei we en bambae i kam. Jisas i talem se: “Dei blong samting ya, mo taem blong hem, i no gat man i save. Ol enjel blong heven, mo mi tu we mi Pikinini blong God, be mifala i no save. Papa blong mi, hem nomo i save.” (Matiu 24:36) Be Jisas mo ol disaepol blong hem oli talemaot finis wanem ol samting we bambae oli kamaot long wol ya, bifo we God i tekem aksen. Taem olgeta samting ya oli stap hapen long sem taem mo long fulwol, hemia i soemaot se en i klosap nomo. Olgeta samting ya hemia:

Ol bigbigfala jenis long politik, long weta, graon, mo solwota, mo long fasin blong ol man. Taem ol disaepol blong Jisas oli askem kwestin long hem long saed blong en, Jisas i ansa se: “Ol man bambae oli mekem faet long ol narafala man. Mo ol kantri bambae oli mekem faet long ol narafala kantri. Olbaot long wol bambae graon i seksek. Mo ol man bambae oli gat hadtaem blong kasem kakae. Be ol samting ya i olsem we woman i stat harem we bak blong hem i soa blong i bonem pikinini.” (Mak 13:8) Aposol Pol i raetem se: ‘Long taem ya we bambae i klosap long ol las dei, laef long wol ya bambae i kam strong tumas. Bambae ol man oli save tingbaot olgeta nomo, mo bambae oli wantem mane tumas. Bambae oli man blong tok flas, we tingting blong olgeta i go antap tumas, mo oli save tok nogud long ol man. Bambae oli no save ona long papa mo mama blong olgeta, oli no man blong talem tangkiu, mo oli no save tingbaot God. Bambae oli no man blong gat sore long man, mo oli man blong mekem i strong tumas oltaem long ol narafala man. Bambae oli man blong spolem nem blong narafala man, mo oli man blong lusum hed, mo oli wael olgeta. Bambae oli no wantem ol fasin ya we i gud, oli agens long hem. Bambae oli man blong spolem ol fren blong olgeta, mo oli man we oli no kea, mo oli praod tumas. Bambae oli man we oli wantem tumas ol samting we oli stap harem gud long hem, i winim we oli stap lavem God.’—2 Timoti 3:1-5.

Wok blong prij i stap gohed long plante lanwis mo i goraon long fulwol. Jisas i talem se: “Bambae ol man oli stap talemaot gud nius ya, se God i King blong olgeta man. Bambae oli talemaot long olgeta ples long wol, blong oli witnes blong hem long fes blong olgeta man. Nao biaen, bambae Lasdei [“en,” NW] i save kam.”—Matiu 24:14.

3 ?Wanem Bambae i Hapen Afta We En i Kam?

Baebol i no tijim se olgeta gudfala man bambae oli go laef long heven blong olwe. Defren olgeta, Jisas i tijim se tingting we God i gat fastaem long saed blong ol man, bambae i mas kamtru. Jisas i talem se: “Olgeta we oli kwaet man oli save harem gud, from we God bambae i givim wol ya long olgeta.” (Matiu 5:5, futnot; 6:9, 10) Long saed blong olgeta we oli ded bifo we en i kam, Baebol i promes se bambae oli laef bakegen long fiuja. (Job 14:14, 15; Jon 5:28, 29) ?Wanem bambae i hapen afta we en i kam?

Jisas bambae i rul antap long wol, olsem King long Kingdom blong God long heven. Profet Daniel i raetem se: “Nao long vison ya, mi luk wan man we i olsem man blong wol ya [Jisas we i laef bakegen]. Hem i stap kam stret long mi, mo klaod i stap raonabaot long hem. Nao hem i go stanap long fes blong Olfala ya [Jeova God] we i stap fastaem bifo olgeta, mo bambae i stap gogo i no save finis. Nao Olfala ya i putumap man ya i king, i leftemap nem blong hem [Jisas] i hae we i hae, mo i givim bigfala paoa long hem, blong bambae olgeta man blong olgeta kantri mo olgeta kala mo olgeta lanwis oli wok blong hem. Hem i king we paoa blong hem bambae i stap oltaem nomo, mo rul blong hem bambae i no save finis samtaem.”—Daniel 7:13, 14; Luk 1:31, 32; Jon 3:13-16.

Ol man we bambae oli laef aninit long rul blong Kingdom blong God, oli gat gudfala helt, oli no moa fraet long wan samting, mo oli gat laef we i no save finis. Profet Aesea i raetem se: “Man we i wokem haos blong hem, hem bambae i save stap gud long hem. Bambae i no moa gat narafala man i save kam tekemaot haos ya. Man we i planem plantesen blong grep, hem bambae i dring waen blong ol grep ya. Bambae i no moa gat narafala man i save kam stilim ol waen blong hem.” (Aesea 65:21-23) Aposol Jon i tokbaot taem ya i se: “!Yu luk! Naoia God i mekem ples blong hem wetem ol man. Hem bambae i stap oltaem wetem olgeta, mo olgeta bambae oli man blong hem. God bambae i kampani wetem olgeta, mo hem bambae i God blong olgeta. Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”—Revelesen 21:3, 4.

4 ?Yu Mas Mekem Wanem Blong Yu Save Stap Laef Taem En i Kam?

Aposol Pita i talem se samfala we oli laef klosap long en bambae oli laf, mo oli talem se God i no save mekem wan samting, mo se hem i no save finisim ol rabis fasin blong wol ya. (2 Pita 3:3, 4) Nating se ol man ya oli mekem olsem, Pita i pulum yumi we yumi laef naoia blong mekem samting ya:

Lanem samting from ol man long taem bifo. Pita i raetem se: “God i no letem ol man ya bifo long taem blong Noa oli go fri. Hem i sevem Noa we i wan prija we i stap talemaot stret fasin, wetem seven narafala man tu, be i letem wota i kam bigwan, i draonem ol narafala man ya we oli no obei long hem.” (2 Pita 2:5) Long saed blong ol man ya we oli laf long God, Pita i talem se: “Olgeta oli stap tok olsem be oli no wantem tingbaot we bifo longtaem, God i tok, nao skae mo graon tufala i kamaot. Hem i mekem graon ya i kamaot long medel blong ol wota, mo hem i yusum wota ya blong wokem olgeta ples long wol. Mo long sem fasin, hem i yusum wota bakegen blong spolem, long taem ya we hem i spolem wol ya we i stap bifo, long wota ya we i ron bigwan. Be skae mo graona we i stap naoia, tok blong God i blokem tufala, tufala i stap wet blong bambae faea i kasem tufala. Tok ya bambae i stap holem tufala, gogo i kasem bigfala Dei ya we God bambae i jajem ol man we oli no obei long hem, nao bambae oli lus.”—2 Pita 3:5-7.

Laef folem ol loa blong God. Pita i talem se olgeta we oli wantem stap laef taem en i kam, bambae oli mas ‘tabu, oli mas mekem ol fasin we God i wantem mo oli mas gohed blong wok.’ (2 Pita 3:11) I gud blong makem tok we Pita i talem se, ‘tabu, mekem ol fasin we God i wantem,’ mo ‘gohed blong wok.’ Ol tok ya oli soemaot se, i no naf we yumi talem nomo se yumi bilif long God. Mo tu, i nogud we yumi traem blong kam fren blong God long las minit nomo, jes from we yumi wantem stap laef taem en i kam.

?Wanem nao ol wok mo ol fasin we God i glad long olgeta? I gud blong skelem samting we yu save finis wetem samting we Baebol i tijim long saed ya. Ol Witnes blong Jeova oli glad blong givhan long yu. I gud yu askem long olgeta blong oli soemaot ansa blong kwestin ya long Baebol. Samting ya bambae i givhan long yu blong gat strong tingting, mo bambae yu no fraet nating long ol toktok we ol man oli talem long saed blong en.

[Futnot]

[Tok blong makem poen long pej 7]

Wol ya bambae i no lus, be ol man we oli spolem wol, olgeta nao bambae oli lus