Sam Rod We Oli Yusum Blong Talemaot Gud Nius

OL KRISTIN oli gat wan wok blong mekem, hemia blong ‘pulum ol man long olgeta ples long wol oli kam man blong Kraes.’ Be hemia i no min se oli mas fosem ol man blong kam disaepol. Taem Jisas i givim oda ya long ol man blong hem, hem i talem se oli mas “talemaot gud nius long ol puaman,” oli mas “mekem ol man we tingting blong olgeta i foldaon olgeta, oli harem gud bakegen” mo oli mas “leftemap tingting blong olgeta we oli harem nogud, oli stap krae.” (Matiu 28:19; Aesea 61:1, 2; Luk 4:18, 19) Ol Witnes blong Jeova oli wantem mekem i gud long ol man taswe oli talemaot gud nius we i stap long Baebol. Ol Witnes blong Jeova tede oli traem folem fasin blong profet Esikel bifo. Oli traem faenem ol man we ‘oli stap harem nogud from ol samting nogud we ol narafala man oli stap mekem.’—Esikel 9:4.

Beswan rod we oli yusum blong faenem ol man we oli stap harem nogud olsem, hemia long ol haos wanwan. Oli traem bes blong olgeta blong go long ol man, olsem Jisas i mekem taem hem i stap “wokbaot, i goraon long olgeta taon mo olgeta vilej, nao hem i stap prij, mo i stap talemaot gud nius blong kingdom blong God.” Ol faswan man we oli kam disaepol blong Jisas, olgeta tu oli mekem wok ya. (Luk 8:1, NW; 9:1-6; 10:1-9) Tede, ol Witnes blong Jeova oli traehad blong kasem evri haos long ples blong olgeta wan taem no plante moa taem, long wan yia, sipos oli naf blong mekem olsem. Oli traem faenem rod blong storian smoltaem long saed blong ol samting we ol manples blong olgeta oli wari long hem no ol samting we ol man oli intres long hem, sipos no maet oli tokbaot ol samting we i stap hapen long wol. Maet oli soem wan no tu vas long man, mo sipos man i intres blong storian moa, ol Witnes oli save mekem plan wetem hem blong kambak long wan taem we i stret long hem. Oli gat sam Baebol mo sam buk we oli eksplenem ol defdefren haf blong Baebol, mo sipos man i wantem, oli save stadi Baebol wetem hem we hem i no pem. Plante milian man mo famle raon long wol oli stap stadi Baebol finis wetem ol Witnes evri wik.

Wan narafala rod blong “talemaot gud nius blong kingdom” hemia long ol miting we ol Witnes blong Jeova oli mekem long ol haos wosip blong olgeta we oli kolem Haos Kingdom. Long ples ya, oli mekem miting evri wik. Wan long ol miting ya hem i wan pablik tok we i tokbaot ol defdefren samting long Baebol we ol man oli mas save. Afta long pablik tok ya i gat stadi long wan haf blong magasin ya Wajtaoa, we i tokbaot wan save we i kamaot long Baebol no wan profet tok. Long wik i gat wan narafala miting we hem i wan skul blong trenem ol Witnes blong oli kamgud moa long wok blong talemaot gud nius, mo afta long miting ya i gat wan narafala miting we i blong tokbaot wok blong prij we ol Witnes oli mekem long ples blong olgeta. Ale, long wan narafala dei blong wik i gat wan narafala miting we oli holem long haos blong sam Witnes, mo oli stadi tugeta long saed blong Baebol.

Eni man nomo i welkam blong kam long ol miting ya. I no gat plet i goraon blong mekem kleksen mane. Ol miting ya oli save givhan long evriwan. Baebol i talem se: “I gud yumi stap tingbaot yumi, blong yumi givgivhan long yumi blong mekem yumi strong blong lavem ol man, mo blong mekem ol gudfala fasin. I nogud yumi lego ol miting blong [“kongregesen,” NW], olsem we sam long yumi oli mekem finis. Oltaem yumi mas toktok gud long yumi blong leftemap tingting blong yumi, from we yumi save se Dei ya we Masta blong yumi bambae i jajem olgeta man long hem, hem i kam klosap finis.” I impoten blong stadi mo lukaot moa save blong Baebol, be yumi nidim tu blong joen long ol miting: “Oltaem, ol man oli stap lanlan long olgeta bakegen, olsem we naef i save sapenem naef.”—Hibrus 10:24, 25; Ol Proveb 27:17.

Ol Witnes oli yusum evri janis we oli gat blong tokbaot gud nius wetem ol man we oli mitim evri dei long laef blong olgeta. Maet oli stori smol wetem wan man we haos blong hem i stap klosap long haos blong olgeta, no wan man we i wokbaot wetem olgeta long bas no long sip, no wan fren no famle blong olgeta, no long ples blong wok taem oli spel long medel dei. Taem Jisas i stap long wol, hem i tokbaot God long ol man long enitaem—taem hem i stap long solwota, taem hem i stap antap long hil, taem hem i kakae long haos blong wan man, taem hem i go long wan mared, no taem hem i stap long wan fising bot long Solwota blong Galili. Hem i tij insaed long ol haos blong prea mo long tempol blong Jerusalem. Nomata weples hem i stap long hem, hem i faenem rod blong tokbaot Kingdom blong God long ol man. Ol Witnes blong Jeova oli traem bes blong olgeta blong folem fasin blong Jisas long saed ya.—1 Pita 2:21.

FASIN BLONG OLGETA I GIVIM WITNES

Olgeta rod we wan man i yusum blong tokbaot gud nius long yu bambae oli nating nomo sipos laef blong man ya i no laenap wetem ol tijing ya we hem i stap talem long yu. Yes, man we i talem wan samting be aksen blong hem i defren, hem i man blong tu fes. Fasin ya nao we i stap long plante jos mo i mekem se milian man oli sakemaot Baebol. Be fasin tu fes blong ol jos i no min se Baebol i nogud. Ol tija blong Loa mo ol Farisi long taem blong Jisas oli holem Hibru Haf blong Baebol, be Jisas i talem se ol man ya oli gat tu fes. Hem i tokbaot fasin blong olgeta ya blong ridim Loa blong Moses, nao hem i talem long ol man blong hem se: “Yufala i mas harem ol tok blong olgeta, mo yufala i mas mekem olgeta samting we oli talem. Be i nogud yufala i folem fasin blong olgeta, from we olgeta oli talem ol samting, be oli no mekem olsem we oli talem.” (Matiu 23:3) Wan Kristin we fasin blong laef blong hem i gud, i save gat moa paoa long man i bitim we hem i toktok plante aoa. Hemia advaes we Baebol i givim long ol Kristin woman we man blong olgeta i no bilif olsem olgeta, i se: “Fasin nomo blong yufala i save pulum olgeta blong oli bilif. Taem ol man blong yufala oli luk we fasin blong yufala i klin gud, mo yufala i gat ona, hemia i naf blong pulum olgeta. Bambae i no nid blong yufala i talem wan samting long olgeta.”—1 Pita 3:1, 2.

Ol Witnes blong Jeova oli wantem soemaot long ol man se gud nius i wan nambawan samting, taswe, oli traem wokem ol gudfala Kristin fasin blong ol man oli luksave se gud nius ya i nambawan. Oli traem ‘mekem i gud long ol narafala man, olsem we oli wantem blong olgeta oli mekem long olgeta.’ (Matiu 7:12) Oli mekem fasin ya long ol narafala Witnes, long ol fren mo famle blong olgeta mo long ol man we oli laef klosap long olgeta, mo long evri narafala man tu. Oli no stretman taswe oli no naf blong gat fasin we i stretgud oltaem. Be oli rili wantem mekem i gud long ol man taswe oli talemaot gud nius blong Kingdom long olgeta, mo taem oli naf blong halpem narafala bambae oli mekem.—Jemes 2:14-17.

[Tok blong pija long pej 19]

Hawai

[Tok blong pija long pej 19]

Veneswela

[Tok blong pija long pej 19]

Yugoslavia

[Tok blong pija long pej 20]

Ol Haos Kingdom, oli no flas tumas, oli ples blong lanem ol samting long saed blong Baebol

[Tok blong pija long pej 21]

Ol Witnes oli traehad blong mekem fasin blong olgeta long famle mo wetem ol narafala man, i laenap wetem wanem we oli stap tijim