Raetem Leta Blong Toktok Long Narafala

OL LETA oli givhan long plante milian man blong oli harem gud, mo blong oli kam gud moa long fasin blong olgeta. Bighaf blong ol buk long Kristin Grik haf blong Baebol oli ol leta. Tede, yumi save raetem leta blong bildimap bilif blong ol niuwan, mo blong sanem toktok i go long ol fren, mo blong leftemap tingting blong ol Kristin brata sista we oli stap mekem spesel wok. Yumi save raetem leta long olgeta we oli kasem hadtaem, blong givhan long olgeta blong oli stanap strong, mo blong tokbaot ol wok long kongregesen.—1 Tes. 1:1-7; 5:27; 2 Pita 3:1, 2.

Leta i wan gudfala rod blong prij long narafala. Long sam kantri, plante man oli laef long ol bigbigfala stori haos no hotel we oli putum tabu long olgeta, se ol narafala man oli no save go insaed. Taswe i no isi blong faenem rod blong prij long ol man ya. Mo tu, sam man oli aot long haos blong olgeta klosap fuldei, taswe yumi no faenem olgeta taem yumi prij long ol haos wanwan. Sam narafala man oli laef long ol ples we oli longwe long taon.

Samtaem yu no save aot long haos from we yu sik, weta i nogud, no yu stap long wan kantri we loa i makemaot stret taem blong man i no moa wokbaot long rod. ?Olsem wanem? ?Yu save raetem leta blong prij long wan famle blong yu no long wan man we maet yu bin storian wetem hem long rod? ?I gat wan Baebol stadi blong yu we i muv i go long narafala ples? Sipos yu raetem leta long hem, ating bambae yu givhan bigwan long hem blong i stap tingting oltaem long trutok. Mo tu, maet yu save serem sam save blong Baebol wetem wan man mo woman we tufala i jes mared, wan papa mama we tufala i jes gat pikinini, no man we wan fren no famle blong hem i jes ded.

Yu Raetem Leta Blong Prij

Taem yu raetem leta long wan man we yu no save hem, i gud yu tokbaot yu wan fastaem. Yu save talem se yu yu wan volontia, mo yu joen long wan wok we i stap gohed long fulwol, blong givhan long ol man. Sipos yu ting se i stret, yu save talem se yu yu wan Witnes blong Jehova. Yu mas eksplenem long hem from wanem yu no save toktok stret long hem. Taem yu raetem leta ya, yu mekem olsem we yu stap storian wetem man ya stret. Be yu no mas fogetem advaes ya se, ‘yu mas waes olsem snek, mo yu mas kwaet olsem sotleg.’ Hemia i min se yu mas tingting gud se bambae yu givim hamas save long man ya long saed blong yu wan.—Mat. 10:16.

Long leta ya, yu save raetem ol samting we maet yu talem sipos yu go luk man ya long haos blong hem. Yu save yusum fastok we i stap long Reasoning buk no long smol buk ya Statem Wan Storian, no yu save yusum fastok we i kamaot long ol Kingdom Wok Blong Yumi. Yu save askem wan kwestin mo yu pulum man ya blong i tingting gud long kwestin ya. Sam pablisa oli talem stret se yumi stap mekem fri Baebol stadi wetem ol man, blong ansarem ol kwestin we oli gat long Baebol. Nao oli raetem nem blong sam japta blong buk we yumi yusum blong mekem stadi long ol man. Long pej 73, i gat eksampol blong wan leta we man i save raetem blong prij long narafala. Hemia i save givhan long yu, be i gud yu no yusum sem toktok long evri leta. Sipos yu yusum sem toktok evritaem, bambae ol man oli stap kasem sem save bakegen mo bakegen.

Sam man oli no glad blong ridim wan longfala leta we i kam long wan strenja. Taswe i waes blong raetem wan leta we i sot nomo. Sipos leta blong yu i longfala tumas, man bambae i les blong ridim. I gud yu sanem wan smol pepa wetem leta ya, blong talem stret taem blong ol miting long Haos Kingdom. Yu save sanem wan traket, wan buklet, wan Wajtaoa no Wekap! i go wetem leta ya, mo yu talem long man ya se sipos hem i wantem, yu save sanem ol niu magasin long hem taem oli kamaot. Maet yu askem long hem sipos hem i wantem we yu yu kam luk hem long haos blong hem, blong yutufala i storian moa long samting we yu tokbaot long leta ya.

Smol Advaes Blong Mekem Leta i Luk Naes

Yu traem lukluk leta we i stap olsem wan eksampol. Bambae yu makem ol samting ya: (1) Leta ya i klin, ol wod oli no stap klosap tumas. (2) Nating sipos man ya i lusum envlop, be hem i gat nem mo adres yet blong hemia we i raetem leta ya. (3) Taem man i ridim fas paragraf nomo, hem i save from wanem hem i kasem leta ya. (4) Wan paragraf i tokbaot wan tingting no wan poen nomo. (5) Man we i raetem leta ya i toktok wetem respek, be hem i no bitim mak.

Long ol leta we sekretari blong kongregesen i sanem i go long branj ofis, i mas gat nem blong kongregesen i stap long hem, wetem nem blong sekretari, adres blong hem, mo dei we hem i raetem leta ya. Mo tu, long olkaen leta olsem, i mas gat nem mo adres blong man no ogenaesesen we bambae leta ya i go long hem. Biaen long ol samting ya, yu talem halo long fasin we i stret long ples blong yu. Blong klosem leta ya, long sam lanwis ol man oli talem samting olsem “Brata blong yu,” “Fren blong yu,” no “Tangkiu,” bifo we oli saenem nem blong olgeta. I stret blong saenem nem blong yu wetem pen, i bitim we yu taepem long kompiuta no taepraeta.

Long enikaen leta we yumi raetem, i gud yumi meksua se speling blong yumi i stret, fasin blong joejoenem ol wod i stret, mo yumi putum ol koma mo ful stop. Mo yumi mas meksua tu se leta i no olbaot. Taem yumi mekem olsem, yumi pulum man we i kasem leta ya blong i tinghae long ol tok we i stap long hem.

Long envlop, i gud we oltaem yu putum wan adres we man ya i save raet i kambak long hem sipos hem i wantem. Maet i moa gud yu putum prapa adres blong yu. Sipos yu ting se long ples blong yu i no waes blong givim adres blong yu long wan strenja, maet yu askem long ol elda sipos oli save letem yu yu putum adres blong Haos Kingdom. Yu neva mas yusum adres blong branj ofis, from we maet man we i kasem leta ya i ting se branj ofis nao i raetem leta ya long hem, mo maet tingting blong hem i fasfas. Sipos yu no putum wan adres nating be yu sanem sam buk i go long wan man, hemia tu i save givim rong tingting long hem se branj ofis i sanem leta ya long hem.

Yu mas meksua se yu putum wan stam we i stret long praes blong sanem leta ya i go, antap moa sipos yu sanem sam buk i go. Sipos ol stam oli no stret long praes blong leta, plante taem postofis i mekem se man we i kasem leta ya i mas pem, mo samting ya bambae i mekem se man ya i no glad. Yu mas tingbaot se long plante kantri, taem yu putum wan buklet no magasin i go wetem wan leta, praes blong hem i antap moa long praes blong wan leta.

Ol Toktok Insaed Long Leta

Taem yu raetem leta blong yu finis, yu mas ridim fulwan blong skelem ol toktok blong yu. ?Olsem wanem? ?Yu yu tok kaen mo yu soemaot fasin fren? Lav mo kaen fasin, hemia ol fasin we yumi traehad blong soemaot long ol narafala. (Gal. 5:22, 23) Sipos yu faenem sam toktok we oli no leftemap tingting blong man, i gud yu jenisim.

Ol leta oli save go long ol ples we yumi no save kasem olgeta. From risen ya nao, leta i wan impoten tul we yumi save yusum blong talemaot gud nius. Leta we yu raetem bambae i soemaot se yu yu wanem kaen man, mo wanem samting we yu yu tinghae long hem. From samting ya, yu mas tingting gud long ol tok we i stap long leta ya, yu mas meksua se leta i luk naes, mo yu mas tingbaot se taem man i ridim leta ya, bambae hem i gat wanem tingting. Maet leta ya nao i stret samting blong pulum wan man, no blong mekem tingting blong hem i strong, no blong leftemap tingting blong hem, blong hem i wokbaot long rod blong laef.