Ansa Long Wan Kwestin

◼ ?Yumi mas tingbaot wanem samting, taem yumi raetem leta long ol man we yumi no bin faenem olgeta long haos blong olgeta?

From plante risen, i hadwok moa naoia blong faenem ol man long haos blong olgeta. Sam pablisa oli luk se wan gudfala rod blong kasem olgeta i blong raetem leta. I tru se, samting ya i save karem gudfala frut, be i gud blong tingting long sam samting we oli save givhan long yumi blong blokem sam problem we oli save kamaot:

Yu no mas raetem adres blong Sosaeti long baksaed blong leta blong yu. Samting ya bambae i givim rong tingting long olgeta, se ofis blong Sosaeti nao i raetem leta ya. Tingting ya i save mekem problem i kamaot, mo samtaem i save westem mane tu.

Mekem sua se yu sanem leta ya i go long stret adres, mo putum stam long hem we i naf.

Yu no mas raetem leta i go long “Man blong haos” nomo, be yu mas putum stret nem blong hem.

Yu no mas putum leta i stap aninit long doa taem man i no stap.

Ol sot leta oli moa gud. Putum wan traket no wan magasin i go wetem leta ya bitim we yu raetem wan longfala leta.

Ol leta we yu raetem long taepraeta oli moa isi blong ridim, mo maet man blong haos i moa glad blong ridim.

I no stret blong kaontem wan visit blong ol wanwan leta. Yu save kaontem nomo sipos yu bin prij finis long man blong haos ya.

Sipos yu raetem leta long wan man we i soem intres finis, yu mas givim adres mo namba blong telefon blong yu. Olsem nao, hem i save telefon no raet i kambak long yu. Eksplenem fasin blong stadi Baebol we yumi yusum.

Askem long hem blong go long ol miting blong kongregesen long ples blong hem. Givim adres mo ol taem blong miting.

Yu no mas gohed blong sanem leta long ol man we yu no bin mitim olgeta long haos, afta we yu givimbak map blong teritori we oli stap long hem. Hem i wok blong pablisa we i holem map, blong faenem olgeta man long teritori ya.