Glad Blong Toktok

SIPOS yu yu glad blong toktok, bambae tok blong yu i laef. I impoten we tok blong yu i givim save long man, be sipos yu mekem tok i laef mo yu glad blong toktok, bambae yu pulum man blong i lesin. Nomata se yu yu blong wanem kantri mo se prapa fasin blong yu i olsem wanem, be yu yu naf blong wokem fasin ya we yu glad blong toktok.

Toktok Blong Yu i Mas Soemaot Se Yu Harem Olsem Wanem. Taem Jisas i toktok long wan woman Sameria, hem i talem se ol man blong Jehova oli mas mekem wosip long hem “long spirit mo trutok.” (Jon 4:24, NW) Man olsem i wosipim God from we hem i glad long ol samting we God i mekem, mo wosip blong hem i laenap wetem trutok we i stap long Baebol. Taem man i glad tumas long ol samting we God i mekem, bambae yumi haremsave samting ya long ol toktok blong hem. Hem i wantem tumas blong talemaot ol samting we Jehova i mekem from lav blong hem. Taem man blong givim tok i muvum han, bodi, mo fes blong hem, mo i yusum gud voes blong hem, hemia i soemaot klia se hem i harem olsem wanem.

Be sam man we oli lavem Jehova mo oli bilif long samting we oli talem, oli no gat fasin ya we oli glad blong toktok. ?From wanem? I no naf we man i rerem gud ol tok we bambae hem i talem. Sipos hem i wantem mekem we tok blong hem i laef, hem i mas soemaot se i harem olsem wanem long ol save ya. Yu traem tingbaot man we i stap tokbaot sakrefaes blong Jisas Kraes we i pemaot yumi. I nogud hem i tingbaot nomo ol save we hem i mas talemaot. Hem i mas glad tu long olgeta samting we sakrefaes blong Jisas i mekem long hem mo long ol man we oli lesin. Hem i mas wantem blong talem tangkiu long Jehova mo Jisas Kraes from nambawan presen ya we tufala i givim. Hem i mas tingbaot nambawan laef ya we olgeta man oli gat janis blong kasem from sakrefaes ya, hemia laef long paradaes long wol we ol man bambae oli hapi olwe mo bodi blong olgeta i stret gud. Taswe ol tok blong brata ya i mas kamaot long hat blong hem, i no long tingting blong hem nomo.

Baebol i tokbaot Esra we i wan tija blong loa long Isrel bifo, mo hem i wan man blong raetem ol kopi blong loa tu. Esra tu ‘mekemrere hat blong hem blong ridim gud loa blong Jehova, mo blong mekem loa ya i wok, mo blong tijim ol man Isrel.’ (Esra 7:10, NW) Sipos yumi mekem sem mak, i min se yumi no rerem nomo tok blong yumi be yumi rerem hat blong yumi tu, ale ol tok blong yumi bambae i kamaot long hat. Sipos yumi tokbaot trutok wetem fulhat blong yumi, yumi save givhan bigwan long ol man blong oli laekem trutok tumas.

Yu Tingbaot Ol Man We Oli Stap Lesin. Wan impoten samting we i save givhan long yu blong yu glad blong toktok, hemia sipos yu gat strong tingting se ol man we oli stap lesin oli nidim ol save we bambae yu givim long olgeta. Ale, taem yu rerem tok blong yu, yu no rerem ol gudfala save nomo. Yu prea long Jehova tu blong i lidim yu blong yusum gud ol save ya, nao bambae yu givhan long ol man we yu toktok long olgeta. (Sam 32:8; Mat. 7:7, 8) Yu tingting gud long ol save ya. ?From wanem ol man oli nidim? ?Save ya bambae i givhan long olgeta olsem wanem? ?Yu save mekem wanem blong ol man oli tinghae long save ya?

Yu mas tingting plante long ol save long tok blong yu, gogo yu harem se yu glad tumas long hem mo yu wantem tumas blong tokbaot. Maet ol save ya i no niu, be wei blong yu blong talemaot i save mekem i kam olsem niufala save long tingting blong olgeta we oli lesin. Yu mas rerem ol save we bambae i givhan long ol man blong oli kam fren blong Jehova, mo blong oli glad long ol samting we Jehova i givim, mo blong oli winim ol trabol we oli fesem long rabis wol ya, mo blong oli kam gud moa long wok blong prij. Sipos yu mekem olsem, i stret nomo we yu yu glad tumas blong tokbaot ol save ya.

Maet yu mekem wan riding long fored blong plante man. Sipos yu wantem rid wetem glad, i no naf blong ridim stret ol wod mo ol grup blong wod nomo. Yu mas tingting gud long haf ya we bambae yu ridim. Sipos yu ridim wan haf blong Baebol, yu traem lukaot moa save long haf ya. Yu mas meksua se yu kasem save long bigfala tingting insaed long riding ya. Yu mas tingbaot se riding ya i save givhan olsem wanem long yu mo long ol man we bambae oli lesin long yu. Mo yu mas wantem blong soemaot samting ya long riding blong yu.

?Yu yu stap mekemrere blong go long wok blong prij? Ale, i gud yu lukluk bakegen long ol samting we yu wantem tokbaot wetem ol man, mo ol vas we yu wantem yusum. Mo tu, yu save tingbaot wanem i stap long tingting blong ol man. ?Wanem nius i kamaot long ples blong yu? ?Wanem trabol we ol man oli stap kasem? Taem yu yu rere gud blong soemaot long ol man se Baebol i save givhan long olgeta blong winim ol trabol, yu harem se yu wantem tokbaot samting ya mo yu glad blong toktok.

Yu Mekem Tok Blong Yu i Laef. Taem yu mekem tok blong yu i laef, yu soemaot klia se yu glad blong toktok. Ol man oli mas luk samting ya long fes blong yu. Oli mas haremsave se yu bilif strong long wanem we yu stap talem, oli no mas harem olsem se yu stap flas.

Be yu no mas bitim mak. I gat sam man we oli toktok oltaem long fasin we oli glad bitim mak. Maet narafala i mas givhan long olgeta blong oli tingbaot se i nogud we man i glad tumas nao i olsem se i mekem sinema. Sipos oltaem oli glad bitim mak, bambae ol man oli stap lukluk olgeta nomo, oli no stap tingting long ol tok blong olgeta. Be i gat sam man we oli defren olgeta. Oli man blong sem, mo narafala i mas pulum olgeta blong oli traem toktok wetem glad mo soemaot se oli harem olsem wanem long ol save ya.

Taem yu glad blong toktok, yu mekem se ol man we oli lesin long yu, olgeta tu oli glad. Sipos yu stap lukluk fes blong ol man mo yu glad long ol save we yu stap tokbaot, bambae oli haremsave samting ya. Apolos i wan man we i mekem tok blong hem i laef. Baebol i talem se hem i wan gudfala man blong toktok. Sipos yu letem tabu spirit blong God i fulumap yu wetem glad, bambae tok blong yu i laef mo i pulum ol man we oli lesin blong oli mekem save ya i wok.—Wok 18:24, 25; Rom 12:11.

Yu Toktok Wetem Glad We i Stret Long Save. Yu mas lukaot se yu no toktok oltaem wetem bigfala glad, nao ol man oli kam taed long toktok blong yu. Ale maet oli mestem poen we yu wantem se oli mekem i wok long laef blong olgeta. Taswe, i gud yu rerem ol save we i mekem se long sam haf blong tok blong yu, yu toktok wetem glad mo soemaot se yu harem olsem wanem, mo long sam narafala haf yu no mekem olsem. Be i nogud tu blong toktok long fasin we i olsem se yu no kea nating long samting we yu talem. Sipos yu jusum gud ol save blong yu, bambae yu wantem tumas blong tokbaot save ya. Be i tru se i gat sam save we i stret blong tokbaot wetem moa glad i bitim narafala save. I gud yu tingbaot weples long tok blong yu i stret blong putum ol defdefren save ya.

Long tok blong yu, i gat sam poen we oli moa impoten, mo sloslo yu mas lidim tingting blong ol man i go long ol poen ya. Taem yu tokbaot ol impoten poen, yu mas toktok wetem glad. Plante taem, ol impoten poen ya nao we bambae oli pusum ol man blong oli mekem save ya i wok long laef blong olgeta. Taem yu pulum ol man finis blong oli bilif long samting we yu talem, yu mas mekem se oli wantem tekem aksen, mo yu mas soemaot long olgeta wanem blesing i save kamaot taem oli folem ol tok ya. Glad blong toktok bambae i givhan long yu blong yu kasem hat blong ol man. I nogud yu stap fosem yu nomo blong mekem tok blong yu i laef. I mas gat wan risen from wanem yu toktok olsem, mo samting ya i dipen long save we yu wantem tokbaot.