Oganaesesen We i Mekem Wok Blong Jehova

LONG wol ya, i gat plante oganaesesen blong ol jos, politik, bisnes, mo i gat sam sosol oganaesesen. Ol oganaesesen ya oli folem ol defdefren rod, mo tingting, mo waes blong wol, mo tu, samting we oli wantem mekem i no sem mak. Be i gat wan oganaesesen we i defren long olgeta evriwan. Tok blong God i soemaot klia se oganaesesen ya, hemia ol Witnes blong Jehova.

² I gud tumas we yu stap insaed long oganaesesen blong Jehova. Yu yu luksave finis samting we God i wantem, mo naoia yu stap mekem. (Sam 143:10; Rom 12:2) Yu yu stap mekem wok blong God wetem wan bigfala kampani blong ol brata mo sista long fulwol, we oli lavlavem olgeta. (2 Kor. 6:4; 1 Pita 2:17; 5:9) From samting ya, yu stap kasem plante blesing mo yu glad tumas, olsem Tok blong God i talem. (Prov. 10:22; Mak 10:30) Yu stap holemstrong long Jehova mo yu mekem samting we hem i wantem. Hemia i rerem yu from wan nambawan laef we i no save finis long fiuja.—1 Tim. 6:18, 19; 1 Jon 2:17.

³ Yes, God i gat wan nambawan oganaesesen long wol we i defren long ol narafala oganaesesen. Jehova we i Hed blong evri samting, hem nao i rulum oganaesesen ya. Yumi trastem hem fulwan. Hem i Jaj blong yumi, hem i Man Blong Givim Loa blong yumi, mo hem i King blong yumi. (Aes. 33:22) Hem i no wan God we i olbaot, be hem i wok folem plan. Taswe hem i mekem wan plan, blong yumi “stap wok wetem” hem blong mekem stamba tingting blong hem i kamtru.—2 Kor. 6:1, 2.

⁴ Taem yumi stap kam klosap moa long en blong rabis wol ya, yumi mas gohed blong obei long Jisas Kraes, King we God i putumap. (Aes. 55:4; Rev. 6:2; 11:15) Jisas i talem se ol man blong hem bambae oli mekem plante moa wok i bitim ol wok we hem i mekem long wol. (Jon 14:12) Tok ya i tru tumas, from we ol man blong Jisas oli stap kam plante moa oltaem, mo oli wok plante yia moa i bitim hem, mo oli mekem gud nius i goaot long plante moa ples. Oli mas talemaot gud nius blong Kingdom long olgeta ples blong wol.—Mat. 24:14; 28:19, 20; Wok 1:8.

⁵ Samting ya i stap kamtru tede. Be wok ya blong talemaot gud nius bambae i finis long stret taem we Jehova i wantem, olsem Jisas i talem. Ol profet tok blong Baebol oli soemaot klia se bigfala dei blong Jehova we bambae i mekem ol man oli fraet, hem i klosap tumas.—Joel 2:31; Sef. 1:14-18; 2:2, 3; 1 Pita 4:7.

⁶ Yumi luksave samting we Jehova i wantem long taem blong en, taswe yumi mas wok had moa blong mekem samting ya. Yumi mas savegud olsem wanem oganaesesen blong God i stap wok, mo yumi mas wok gud wetem oganaesesen ya. Oganaesesen ya i wok folem tok blong Baebol, hemia ol komanmen, ol loa, ol oda, ol rul, mo ol tijing we tabu spirit i pulum ol man blong oli raetemdaon.—Sam 19:7-9.

⁷ Taem ol man blong Jehova oli obei long advaes blong Baebol we oganaesesen i givim, oli gat pis mo oli wok wetem wan tingting nomo. (Sam 133:1; Aes. 60:17; Rom 14:19) ?Wanem i mekem se yumi joengud long evri ples long wol? Yumi lavlavem yumi, mo lav ya i gat bigfala paoa. (Jon 13:34, 35; Kol. 3:14) Taem yumi wok long fasin we God i glad long hem, yumi stap muv wetem oganaesesen blong Jehova long heven.

OGANAESESEN BLONG JEHOVA LONG HEVEN

⁸ Trifala profet ya Aesea, Esikel, mo Daniel, trifala i luk vison blong oganaesesen blong Jehova long heven. (Aes. japta 6; Esik. japta 1; Dan. 7:9, 10) Aposol Jon tu i luk wan vison blong ol samting long heven, mo hem i raetemdaon long buk blong Revelesen. Hem i luk we Jehova i stap sidaon long wan bigfala jea we i saen we i saen. Ol enjel oli stap klosap long hem, mo oli stap talemaot se: “Jehova, God We i Gat Olgeta Paoa, mo we i stap we i stap, mo we i stap fastaem, bifo olgeta, mo we bambae i kam, hem i tabu, we i tabu, we i tabu.” (Rev. 4:8) Mo tu, Jon i luk “wan smol sipsip i stap stanap long medel blong tron.” Hemia Jisas Kraes, Smol Sipsip blong God.—Rev. 5:6, 13, 14; Jon 1:29.

⁹ Vison ya blong Jehova we i sidaon long bigfala jea blong hem, i soemaot se hem nao i Hed blong oganaesesen ya. Fas Kronikel 29:11, 12 i tokbaot hem mo haenem blong hem, i se: “O Jehova, yu yu hae we yu hae mo yu gat bigfala paoa, mo olgeta samting we oli naes mo oli flas oli blong yu, mo paoa blong king i blong yu, from we olgeta samting long heven mo long wol, oli blong yu. O Jehova, kingdom i blong yu. Mo yu nao yu stap leftemap yu wan blong yu hae moa long olgeta samting. Ol sas samting mo haenem oli kamaot long yu, mo yu yu rul long olgeta samting, mo han blong yu i gat paoa mo i strong we i strong, mo i naf blong mekem ol bigfala samting mo givim paoa long evri samting.”

¹⁰ Jisas Kraes i wok wetem Jehova long heven. Jehova i givim bigfala paoa long hem, mo i kasem wan posisen we i hae. “[God] i putum olgeta samting oli stap aninit long leg blong Kraes, mo i putumap hem i hed blong olgeta samting we oli joen wetem kongregesen.” (Efes. 1:22) Aposol Pol i tokbaot Jisas se: “God i leftemap hem, i givim wan posisen long hem we i hae, mo from we hem i kaen, hem i givim nem long hem we i hae moa long ol narafala nem, nao olgeta we oli stap long heven mo olgeta we oli stap long wol mo olgeta we oli stap insaed long graon, oli mas benem ni blong olgeta long nem blong Jisas, mo olgeta evriwan oli mas talemaot klia se Jisas Kraes i Masta, blong givim glori long God ya we i Papa.” (Fil. 2:9-11) Taswe, yumi save trastem fulwan se Jisas bambae i lidimgud yumi.

¹¹ Profet Daniel i luk wan vison blong Jehova, Olfala ya we i stap fastaem bifo olgeta, mo i stap sidaon long jea blong hem long heven. “Plante taosen taosen [enjel] oli stap mekem minista wok blong hem, mo ten taosen taems ten taosen oli stap stanap long fored blong hem.” (Dan. 7:10) Baebol i talem se bigfala ami blong ol enjel ya, “oli spirit nomo, we oli stap mekem ol tabu wok. Hem i stap sanem olgeta blong oli mekem minista wok ya blong givhan long ol man ya we bambae hem i sevem olgeta.” (Hib. 1:14) Ol enjel ya oli gat ol defdefren wok, olsem “ol king, ol masta, ol gavman, mo ol haeman.”—Kol. 1:16.

¹² I gud yumi tingting dip long ol samting ya long oganaesesen blong Jehova long heven. Olsem nao, bambae yumi kasem save long tingting blong Aesea taem hem i luk vison blong hem. Hem i “luk Jehova i stap sidaon long wan tron we i hae mo i stap antap olgeta” mo “antap long hem, i gat ol seraf oli stap stanap.” Nao Aesea i talem se: “!Sore tumas long mi! !Mi mi sud ded finis, from we ol tok blong mi oli no klin, mo mi mi stap wetem ol man we tok blong olgeta i no klin, mo from we stret long ae blong mi, mi luk King, hemia Jehova komanda blong ol ami!” Yes, taem Aesea i luk se oganaesesen blong Jehova i bigwan we i bigwan, hem i fraet mo i harem se hem i smol we i smol. Vison ya i gat bigfala paoa long hem, taswe taem wan voes i kamaot long heven blong singaot ol man blong oli mekem spesel wok ya blong talemaot ol jajmen blong Jehova, wantaem nomo Aesea i ansa se: “!Mi ya! !Yu sanem mi!”—Aes. 6:1-5, 8.

¹³ Ol man blong God oli kasem save long oganaesesen blong Jehova mo oli tinghevi long hem, nao samting ya i gat paoa long olgeta olsem i gat paoa long Aesea. Taem oganaesesen ya i stap muv, yumi traehad blong muv wetem. Oltaem yumi mas soemaot se yumi trastem oganaesesen blong Jehova.

OGANAESESEN BLONG JEHOVA I STAP MUV

¹⁴ Esikel japta 1 i tokbaot Jehova, se i stap sidaon long wan samting we i olsem wan bigfala kat long heven. Kat ya we i stap muv, i pija blong oganaesesen blong Jehova long heven. Taem Baebol i talem se Jehova i stap sidaon long kat ya, hem i min se hem i stap yusum mo lidim oganaesesen blong hem, blong i mekem samting we hem i wantem.—Sam 103:20.

¹⁵ Long medel blong ol wil blong kat ya, i gat wan narafala wil bakegen we i sem saes mo i krosem faswan. From samting ya, ol wil ya “oli save muv i go long eniwan long ol fo saed.” (Esik. 1:17) Kwiktaem nomo, kat ya i save jenisim rod blong hem. Be hem i no stap ron olbaot. Jehova i no save letem oganaesesen blong hem i folem enikaen rod nomo. Esikel 1:20 i talem se: “oli go long eni ples we spirit i pulum olgeta blong go.” Taswe, spirit blong Jehova nao i lidim oganaesesen blong hem olsem we hem i wantem. Kwestin we yumi wanwan i mas askem, hemia se: ‘?Mi mi stap muv wetem oganaesesen ya?’

¹⁶ I no naf blong go long miting mo joen long wok blong prij nomo. Yumi muv wetem oganaesesen blong Jehova, taem yumi gohed gud mo yumi stap kam bigman long bilif. Mo tu, yumi “faenemaot ol samting we oli moa impoten” mo oltaem yumi stap tekem kakae we i kamaot long Jehova. (Fil. 1:10; 4:8, 9; Jon 17:3) Yumi mas tingbaot tu se, blong wok olsem wan oganaesesen, i mas gat samfala we oli mekem plan blong ol wok, mo evriwan oli mas glad blong wok wanples. Taswe yumi mas luksave se i impoten tumas blong yusum ol presen we Jehova i givim, blong mekem wok blong hem. Hemia ol save mo gudhan we yumi gat, wetem mane mo olting blong yumi tu. Taem yumi muv wetem kat blong Jehova long heven, laef blong yumi i laenap wetem tok blong God we yumi talemaot.

¹⁷ Oganaesesen blong Jehova i stap givhan gud long yumi, blong yumi gohed strong long wok blong Hem. Yu mas tingbaot se Jehova nao i stap long kat ya long heven. Taswe, taem yumi muv wetem kat ya, yumi soemaot se yumi gat respek long Jehova. Mo yumi trastem hem, olsem wan bigfala Ston we i blokem gud yumi. (Sam 18:31) Baebol i promes se: “Jehova bambae i givim paoa long ol man blong hem. Jehova bambae i blesem ol man blong hem, i mekem oli gat pis.” (Sam 29:11) Taem yumi stap long oganaesesen blong Jehova tede, yumi kasem paoa we hem i givim, mo yumi harem gud long pis we hem i givim long ol man blong hem we oli stap wok folem plan. Yes, yumi savegud se sipos yumi mekem samting we Jehova i wantem, bambae yumi kasem plante blesing naoia mo blong olwe.