?Yu Yu Tinghae Long Ogenaesesen Blong Jeova?

“Hemia tok we Jeova i talem: ‘Heven i olsem jea blong king we mi sidaon long hem, mo wol i olsem ples blong mi putum leg blong mi antap long hem.’ ”​—AESEA 66:1.

1, 2. (a) ?Wanem sam samting we yu save luk long ae blong yu, we oli pruvum se Jeova i gat wan ogenaesesen? (b) ?Jeova i stap wea?

?YU YU bilif se Jeova i gat wan ogenaesesen? Sipos yes, ?from wanem yu bilif long ogenaesesen ya? Maet yu ansa se: ‘Yumi gat wan Haos Kingdom. Yumi gat wan grup blong elda mo wan kongregesena we i wok folem oda. I gat wan seket elda we i kam visitim yumi oltaem. Yumi stap joen long ol asembli we oli gohed folem wan program we i reregud. I gat wan ofis blong Wajtaoa Sosaeti we i lukaot long kantri blong yumi. Ol samting ya mo plante narafala samting tu, oli pruvum se Jeova i gat wan ogenaesesen we i stap wok.’

² Olgeta defdefren poen ya oli soemaot klia long yumi se i gat wan ogenaesesen. Be, sipos yumi stap tingbaot ol samting ya we yumi save luk nomo, yumi stap mestem wan bigfala haf blong mining blong ogenaesesen blong Jeova. Jeova i talem long Aesea se wol ya hem i jes wan ples blong putum leg blong hem nomo. Heven nao, i ples we hem i sidaon long hem. (Aesea 66:1) Heven we Jeova i tokbaot long ples ya, ?hem i minim wanem? ?Hemia skae we i stap antap long yumi? ?Hemia ples we ol sta mo mun oli stap long hem? no ?Hem i wan narafala ples we ol laef samting long hem oli hae moa? Aesea i tokbaot “haefala ples ya we Jeova i stap long hem, we i tabu mo i naes tumas.” Mo man blong raetem Ol Sam i tokbaot heven ya se ‘ples blong God.’ Taswe, “heven” ya we Aesea 66:1 i tokbaot, hem i ples blong ol speret man we yumi no save luk wetem prapa ae blong yumi. Long ples ya, Jeova i hae olgeta, i no gat wan we i hae moa long hem.​—Aesea 63:15; Ol Sam 33:13, 14.

3. ?Olsem wanem yumi save winim ol tingting we oli hafhaf?

³ Taswe, sipos yumi rili wantem luksave mo tinghae long ogenaesesen blong Jeova, yumi mas tingting moa long saed blong heven. Hemia nao problem we samfala oli gat. From we yumi no save luk ogenaesesen ya blong Jeova long heven wetem prapa ae blong yumi, ?olsem wanem yumi save se hem i rili stap? Maet tingting blong samfala i fasfas long saed ya, mo i olsem se oli stap long wan hol we i dip tumas. Ale, oli stat askem kwestin long olgeta se, ‘?Olsem wanem yumi save sua se ogenaesesen ya i tru i stap?’ Taem samting ya i kamaot, ?long wanem rod bilif i save kam naf blong winim ol tingting ya we oli hafhaf? I gat tu stampa rod. Faswan se, stadi wanwan long Tok blong God, long fasin we i dip. Seken samting se, kam oltaem mo joen long ol Kristin miting. Sipos yumi mekem olsem, bambae yumi save luk laet blong trutok ya, olsem laet we i stap saen long en blong hol ya we i dip tumas. Bifo finis, i gat sam man blong God, we oli bin gat tingting we i hafhaf long sam samting tu. I gud yumi tingbaot store blong wokman blong Elaesa, long taem ya we king blong Siria i kam faet agensem Isrel.​—Skelem wetem Jon 20:24-​29; Jemes 1:​5-8.

Wan Man We i Luk Bigfala Kampani Ya Blong Heven

4, 5. (a) ?Wokman blong Elaesa i gat wanem problem? (b) ?Olsem wanem Jeova i ansa long prea blong Elaesa?

⁴ King blong Siria i sanem wan bigfala ami blong hem i godaon long Dotan long naet, blong holemtaet Elaesa. Taem wokman blong Elaesa i girap long eli moning, hem i go afsaed, ating hem i wantem pulum freswin long ruf antap long haos blong olgeta long Medel Is. !Be, taem hem i lukluk raon, hem i sek bigwan! Wan bigfala ami blong ol man Siria wetem ol hos mo kat blong faet oli raonem taon ya, oli stap wet blong holemtaet profet blong God. Wokman ya i singaot i go long Elaesa i se: “!Sore tumas masta blong mi! ?Naoia bambae yumi mekem wanem?” Elaesa i no seksek, hem i ansa wetem tingting we i suagud, olsem se i no gat trabol nating. Hem i se: “Yu no fraet, from we i gat moa man i stap wetem yumi i bitim ol man we oli stap wetem olgeta.” Ating wokman ya i askem long hem wan se, ‘Be, ?wehem olgeta ya? !Mi no save luk olgeta!’ Samtaem ating hemia problem blong yumi tu​—yumi slak blong lukluk wetem ae blong save blong yumi, nao yumi no naf blong kasem save, no luksave, ol kampani ya blong heven.​—2 King 6:​8-​16; Efesas 1:​18.

⁵ Elaesa i prea blong God i openem ae blong wokman blong hem. ?Wanem i hapen biaen? “Wantaem nomo, Jeova i openem ae blong wokman ya, nao hem i save lukluk. Mo !luk! olgeta hil raonabaot long Elaesa, oli fulapgud wetem ol hos mo ol kat blong faet we faea i laet long olgeta.” (2 King 6:​17) Yes, hem i luk bigfala kampani ya blong heven, hemia olgeta ami blong enjel we oli stap wet nomo blong givhan long man blong God. Naoia, wokman ya i kasem save from wanem Elaesa i no seksek mo i suagud long tingting blong hem.

6. ?Olsem wanem yumi save kasem moa save long saed blong ogenaesesen blong Jeova we i stap long heven?

⁶ ?Samtaem yumi gat problem ya tu, olsem wokman blong Elaesa, we yumi no naf blong luksave bigfala kampani blong enjel long heven? Long sam kantri we i had blong gohed long Kristin wok, ?yumi kwik blong tingbaot ol trabol we i save kasem yumi nomo? Sipos i olsem, ?yu ting se bambae i gat wan spesel vison i kamaot blong mekem se tingting blong yumi i kam kliagud? No gat. Yumi gat wan samting we wokman blong Elaesa i no bin gat long taem bifo. Hemia Baebol. Baebol i tokbaot plante vison, we oli save givhan long yumi blong gat klia save long saed blong ogenaesesen ya long heven. Mo tu, Tok ya we i kamaot long God, i givim sam rul we oli save lidim yumi blong stretem tingting blong yumi mo fasin blong laef blong yumi. Be, yumi wanwan i mas traehad blong kasem fasin luksave mo wokem fasin blong tinghae long plan we Jeova i stanemap. Yumi save mekem olsem, tru long stadi wanwan, wetem prea mo fasin blong tingting dip.​—Rom 12:12; Filipae 4:6; 2 Timote 3:​15-17.

Fasin Blong Stadi We i Mekem Yumi Luksave

7. (a) ?Maet samfala oli gat wanem problem long saed blong fasin blong stadi Baebol wanwan? (b) ?From wanem i gud blong traehad blong stadi wanwan?

⁷ Fasin blong stadi wanwan hem i wan samting we plante man oli no glad blong mekem, from we samfala oli no bin laekem blong stadi long skul, no maet oli neva gat jans blong stadi plante. Be, sipos yumi wantem luksave mo tinghae long ogenaesesen blong Jeova wetem ae blong save blong yumi, yumi mas wokem fasin ya blong wantem tumas blong stadi. ?Yu ting se yu rili save haremgud long wan kakae sipos yu no reregud kakae ya fastaem? Ol jif kuk, no eni narafala man blong kuk, oli save talem long yu se oli mas wokhad blong rerem wan nambawan kakae we i tesgud. Be, olgeta kakae ya we oli hadwok blong mekem, oli save finis kwiktaem, maet long haf haoa no sam menet nomo. Defren olgeta long samting ya, fasin blong stadi wanwan i save karem gudfala frut we bambae oli stap blong olgeta yia long laef blong yumi. Sipos yumi luk se yumi stap kamgud moa, fasin blong stadi wanwan i save kam wan samting we yumi laekem tumas. Aposol Pol i talem tru se, yumi mas lukaotgud long fasin blong yumi mo long ol tok we yumi stap tijim long man, mo yumi mas gohed blong ridim Baebol long ol man. I nidim we yumi gohed oltaem blong traehad, be ol blesing we yumi save kasem from, bambae oli stap olwe.​—1 Timote 4:​13-​16.

8. ?Proveb i pulum yumi blong traem gat wanem fasin?

⁸ Wan waes man blong bifo i talem se: “Pikinini blong mi, yu mas kasem gud ol tok blong mi, mo yu mas holem gud ol loa blong mi oli stap kolosap long yu, blong mekem se sora blong yu i lesingud long ol waes tok, mo hat blong yu i laekem fasin luksave. Mo tu, yu mas gohed blong singaot long dip save, mo yu mas singaot strong long fasin luksave, blong oli kam long yu. Yu mas stap lukaot samting ya olsem selva, yu mas traem faenem olgeta oltaem we yu no spel, olsem ol sas samting we oli haed. Sipos yu mekem olsem, bambae yu kasem save long fasin fraetgud long Jeova, mo bambae yu faenem save blong God.”​—Proveb 2:​1-5.

9. (a) ?Olsem wanem praes blong gol i defren long save blong God? (b) ?Wanem ol tul we yumi nidim blong kasem stret save blong God?

⁹ ?Yu kasem se bigfala wok ya i stap long han blong hu? I gat wan tok we i kamaot plante taem long ol vas ya, hemia se ‘yu mas.’ Mo makemgud tok ya, ‘Yu mas stap lukaot samting ya olsem ol sas samting we oli haed.’ Tingbaot ol man we, blong plante handred yia, oli bin digim graon blong traem faenem selva mo gol long ol ples olsem Bolivia, Meksiko, mo Saot Afrika, mo sam narafala kantri bakegen. Ol man ya oli wok strong, wetem pik mo savel, blong digimaot ol sas ston ya long graon. Oli tingbaot gol olsem wan samting we i sas tumas. Strong tingting ya i mekem se, long wan ples long Kalifonia, Yunaeted Stet, ol man oli digim hol we i longfala olsem 591 kilomita, mo we i godaon kasem 1.5 kilomita​—hemia jes blong faenem gol nomo. Be, ?man i save kakae gol? ?Oli save dring gol? Sipos yu stap long wan draeples mo kolosap yu ded from we yu hanggri mo yu tosta, ?gol ya bambae i sevem yu? No gat. Tingting blong ol man se gol i sas tumas, i stap long hed blong olgeta nomo. I dipen long tingting blong ol wanwan man nomo se gol i sas olsem wanem. Evri dei nomo praes blong hem i stap jenis, samting ya i klia taem yumi luk olsem wanem we praes blong mane i jenis oltaem long wol. Nating se i olsem, sam man oli lusum laef blong olgeta from gol. Be, ?olsem wanem long gol long saed blong speret? ?Yumi mas traehad go kasem wanem mak blong faenem gol ya, hemia “save blong God”? !Tingbaot: Save blong Haefala Masta blong heven mo wol, save long saed blong ogenaesesen blong hem, mo blong olgeta stampa tingting blong hem! Blong digim save ya, yumi nidim ol pik mo savel long saed blong speret. Hemia ol buk we oli stanap long Baebol, we oli save halpem yumi blong digim Tok blong Jeova mo luksave mining blong hem.​—Job 28:12-​19.

Digimaot Save Blong Lukluk Klia Moa

10. ?Daniel i luk wanem long wan vison?

¹⁰ Naoia, bambae yumi digimaot sam samting long saed blong speret blong traem kasem save long ogenaesesen blong Jeova long heven. Wan stampa samting blong givhan long yumi blong lukluk moa klia long saed ya, hemia vison blong Daniel long saed blong Olfala blong Ol Dei we i stap sidaon long bigfala jea blong hem. Daniel i raetem se: “Mi gohed blong lukluk nao i gat ol jea blong king oli stap mo Olfala blong Ol Dei i sidaon. Klos blong hem oli waet olsem sno, mo hea blong hed blong hem i klingud olsem koten. Jea blong hem i olsem faea. Ol wil blong jea ya oli olsem bigfala faea we i stap bon. Wan reva blong faea i stap ron i go fastaem long hem. I gat plante taosen mo taosen we oli stap wok blong hem, mo ten taosen taem ten taosen we oli stap stanap fored long hem. Kot i sidaon, mo oli openem ol buk.” (Daniel 7:​9, 10) ?Hu ya olgeta taosen we oli stap wok blong Jeova? Ol refrens we oli stap long medel blong pej long New World Translation, we yumi save yusum olsem ol “pik” mo “savel,” oli lidim yumi i go long ol narafala vas olsem Ol Sam 68:17 mo Hibrus 1:​14. !Yes, olgeta ya we oli stap wok blong Jeova, hemia ol enjel long heven!

11. ?Olsem wanem vison blong Daniel i halpem yumi blong kasem save long tok blong Elaesa?

¹¹ Vison ya blong Daniel i no talem se hem i luk olgeta enjel blong God evriwan. Ating i gat plante milyan moa. Be i sua se, naoia yumi luksave from wanem Elaesa i talem se: “I gat moa man i stap wetem yumi i bitim ol man we oli stap wetem olgeta.” !Nating se i gat fulap rabis enjel, hemia ol devel, we oli biaenem bigfala ami ya blong king blong Siria, be namba blong ol ami blong Jeova we oli stap long heven oli bitim olgeta ya!​—Ol Sam 34:7; 91:11.

12. ?Olsem wanem yu save kasem moa save long saed blong ol enjel?

¹² Ating yu yu wantem save moa long saed blong ol enjel ya, se wanem ol wok we oli mekem blong Jeova. Grik wod ya we yumi tanem i kam enjel, i soemaot long yumi se ol enjel oli man blong karem mesej, from we wod ya i minim “mesenja.” Be, i gat plante moa samting long saed blong wok we olgeta ya oli stap mekem. Taswe, yu mas gohed blong digim, blong faenemaot moa long saed ya. Sipos yu gat buk ya Insight on the Scriptures, yu save stadi long haf we i stap aninit long tok ya “Angel (Enjel),” no yu save ridim sam haf blong Wajtaoa we oli bin tokbaot ol enjel. Bambae yu sapraes long hamas save yu kasem long saed blong ol wokman ya blong God long heven, mo bambae yu stat tinghae long wok we oli mekem blong sapotem yumi. (Revelesen 14:​6, 7) Be, long ogenaesesen blong God long heven, samfala speret man oli gat spesel wok.

Samting We Aesea i Luk

13, 14. ?Aesea i luk wanem long vison blong hem, mo samting ya i gat paoa long hem olsem wanem?

¹³ Naoia, bambae yumi digim i go moa long vison blong Aesea. Taem yu ridim japta 6, vas 1 kasem 7, ol tok blong hem oli save gat bigfala paoa long yu. Aesea i talem se hem i “luk Jeova, i stap sidaon long jea blong hem,” mo “ol seraf oli stap stanap raonabaot long hem.” Olgeta ya oli stap singaot blong talemaot bigfala paoa blong Jeova, oli leftemap Jeova se hem i tabu tumas. Taem yu ridim ol vas ya, samting ya i mas gat paoa long yu. ?Wanem i hapen long Aesea taem hem i luk samting ya? “Nao mi talem se: ‘!Sore tumas long mi! I olsem we samting ya i mekem we mi mi no moa save toktok [olsem long Seol], from we maot blong mi i no klin nating, mo mi stap long medel blong ol man we maot blong olgeta i no klin tu. !Ae blong mi i luk King ya, Jeova blong ol ami, hem wan!’ ” !Vison ya i rili mekem Aesea i sapraes bigwan! ?Olsem wanem long yu?

¹⁴ Be, ?olsem wanem Aesea i naf blong stanap i stap long fored blong bigfala paoa ya we ae blong hem i luk? Hem i eksplenem se wan seraf i kam sevem hem, mo i talem long hem se: “Ol rong blong yu oli lego yu finis, mo sin blong yu, oli stretem.” (Aesea 6:7) Yes, Aesea i save trastem sore blong God mo hem i save lesingud long olgeta tok blong Jeova. ?Olsem wanem? ?Yu wantem save moa long saed blong ol speret man ya we oli hae tumas? Ale, ?yu mas mekem wanem? Digim sam moa save. Wan tul we yu save yusum blong givhan long yu, hemia Watch Tower Publications Index, ol refrens blong hem oli save lidim yu i go long plante moa save blong mekem tingting blong yu i klia moa long saed ya.

?Esikel i Luk Wanem?

15. ?Wanem i soemaot se yumi save bilif fulwan long vison blong Esikel?

¹⁵ Naoia, bambae yumi tokbaot wan narafala grup blong speret man we God i wokem. Esikel i gat jans blong luk wan vison we i givim paoa long hem taem hem i kalabus yet long Babilon. Openem Baebol blong yu i go long Esikel japta 1, mo ridim vas wan kasem tri. ?Ol vas ya oli stat wetem wanem tok? ?Oli stat olsem se, ‘Wan taem, long wan kantri farawe. . .’? No gat. Hemia i no wan kastom store blong wan taem we i no tru. Vas 1 i talem se: “Nao i hapen long namba tate yia, long namba fo manis, long namba faef dei blong manis ya, taem mi stap wetem ol man we oli kalabus kolosap long reva Jeba, heven i open mo mi luk sam vison blong God.” ?Yu luk wanem samting long vas ya? Hem i givim stret dei mo ples we samting ya i hapen long hem. Ol smosmol poen ya oli soem long yumi se samting ya i kamaot long 613 B.K.T.,b hemia namba faef yia we King Jehoiakin i kalabus.

16. ?Esikel i luk wanem samting?

¹⁶ Han blong Jeova i gat paoa long Esikel, mo hem i luk wan vison we i mekem hem i sapraes tumas, olsem we win blong hem bambae i finis. Hem i luk Jeova we i stap sidaon long wan jea blong king antap long wan bigfala kat blong faet long heven. Ol wil blong kat ya oli bigfala tumas mo oli gat fulap ae raon long olgeta. Samting we yumi intres long hem, hemia se i gat fo narakaen man oli stanap i stap long ol fofala wil blong kat ya. “Hemia pija blong olgeta ya: oli olsem man lelebet. Wanwan blong olgeta i gat fo fes, mo wanwan blong olgeta i gat fo wing. . . . Long raetsaed blong hed blong fofala ya, i gat fes blong man wetem fes blong laeon, mo long lefsaed, i gat fes blong buluk. I gat wan fes blong igel tu i stap long wanwan blong ol fofala man ya.”​—Esikel 1:​5, 6, 10.

17. ?Fofala fes blong ol jerubim oli minim wanem?

¹⁷ ?Wanem ya ol fofala narakaen man ya? Esikel hem wan i talem se oli ol jerubim. (Esikel 10:​1-3, 14) ?From wanem olgeta wanwan oli gat fo fes? Hemia i blong soemaot fo stampa fasin blong Haefala Masta Jeova. Fes blong igel i minim waes blong Jeova, we hem i save lukluk samting longwe. (Job 39:27-​29) ?Fes blong buluk i minim wanem? Yumi save finis bigfala paoa we i stap long nek mo solda blong wan buluk we i wantem faet, hem i naf blong sakem wan hos mo man we i sidaon long hem, i go antap long skae. Yumi sua se, buluk i soemaot bigfala paoa blong Jeova we i no gat mak blong hem. Laeon hem i saen blong stretfasin. Mo laswan, hemia fes blong man, i stret nomo blong minim lav blong God, from we, long olgeta samting we God i wokem long wol, man nomo hem i naf blong soemaot nambawan fasin ya.​—Matyu 22:37, 39; 1 Jon 4:8.

18. ?Olsem wanem aposol Jon i givhan moa long yumi blong lukluk save ogenaesesen blong heven?

¹⁸ I gat sam narafala vison we oli save halpem yumi blong lukluk klia moa long pija ya. Sam long olgeta ya, hemia ol vison blong Jon we oli stap long buk blong Revelesen long Baebol. Olsem Esikel, hem tu i luk Jeova long wan bigfala jea wetem bigfala paoa blong hem, mo ol jerubim oli stanap kolosap long hem. ?Ol jerubim ya oli stap mekem wanem? Oli talem sem samting we ol seraf oli talemaot long Aesea japta 6, se: “Hae God ya we i God blong yumi, we i gat olgeta paoa, hem i tabu we tabu we tabu. Hem i stap fastaem, bifo olgeta, hem i stap naoia, mo hem bambae i kam.” (Revelesen 4:​6-8) Mo tu, Jon i luk wan smol sipsip i stanap kolosap long bigfala jea ya. ?Hem i pija blong hu? Hemia Smol Sipsip blong God, Jisas Kraes.​—Revelesen 5:​13, 14.

19. Tru long stadi ya, ?yu yu luksave wanem long saed blong ogenaesesen blong Jeova?

¹⁹ Taswe, tru long ol vison ya, ?yumi luksave wanem? Hemia se Jeova God nao i stap sidaon long jea blong hem antap olgeta, long ogenaesesen ya long heven. Smol Sipsip ya Jisas Kraes, we hem i Waes Tok ya, no Logos, i stap kolosap long Hem. Biaen, yumi luk wan bigfala kampani blong ol enjel blong heven. Long olgeta ya, i gat ol defren grup olsem ol seraf mo ol jerubim. Olgeta ya evriwan, oli joen tugeta long wan ogenaesesen we i wok strong blong mekem ol stampa tingting blong Jeova oli kamtru. Mo wan long ol stampa tingting ya, hemia wok blong talemaot gud nyus long olgeta ples blong wol long taem ya blong en.​—Mak 13:10; Jon 1:​1-3; Revelesen 14:6, 7.

20. ?Wanem kwestin we bambae yumi tokbaot long nekiswan stadi?

²⁰ Laswan samting se, i gat ol Wetnes blong Jeova long wol ya we oli stap mekem miting tugeta long ol Haos Kingdom, blong lanem olsem wanem blong mekem wil blong Haefala Masta ya. I sua se, naoia yumi luksave se i gat plante moa man i stap wetem yumi i bitim ol man we oli stap wetem Setan mo ol enemi blong trutok. Be, kwestin i stap yet se, ?Olsem wanem ogenaesesen ya long heven i joen wetem wok ya blong talemaot gud nyus blong Kingdom? Nekis stadi bambae i tokbaot samting ya mo sam narafala samting bakegen.

[Ol futnot]

Ol Kwestin Blong Tingtingbak

◻ ?Blong tinghae long ogenaesesen blong Jeova, yumi mas luksave wanem samting?

◻ ?Wanem samting i kamaot long wokman blong Elaesa, mo olsem wanem profet Elaesa i leftemap tingting blong hem?

◻ ?Yumi mas tingting olsem wanem long saed blong stadi wanwan?

◻ ?Olsem wanem Daniel, Aesea, mo Esikel oli givim moa save long yumi long saed blong ogenaesesen blong God long heven?

[Tok Blong Pija Long Pej 13]

Ol gudfala frut we oli kamaot long stadi wanwan, oli save stap longtaem moa i bitim wan kakae we man i hadwok blong rerem

[Tok Blong Pija Long Pej 15]

Blong ansarem prea blong Elaesa, Jeova i soem wan vison blong olgeta kampani ya we oli stap long heven