Las Storian Bifo We Oli Baptaes

Klosap oltaem, ol man we oli baptaes blong kam Witnes blong Jehova, oli baptaes long ol asembli. I gat tok blong baptaes, mo long en blong tok ya, brata we i givim tok bambae i askem long ol man mo woman we oli wantem baptaes blong oli stanap mo ansa long klia voes long tufala kwestin ya:

1. ?Yu yu tanem tingting blong yu from ol sin blong yu mo givim laef blong yu i go long Jehova, mo akseptem rod we hem i yusum blong sevem yu tru long Jisas Kraes?

2. ?Yu yu kasem save se taem yu baptaes, yu kam wan Witnes blong Jehova mo yu stap insaed long oganaesesen blong hem?

Taem olgeta we oli wantem baptaes oli talem ‘yes’ long tufala kwestin ya, i olsem we oli “talemaot” long fes blong ol man se oli bilif long sakrefaes blong Jisas, mo oli givim laef blong olgeta fulwan i go long Jehova. (Rom 10:9, 10) From samting ya, olgeta we oli wantem baptaes oli mas prea mo tingting dip long tufala kwestin ya bifo long dei blong baptaes. Olsem nao, bambae oli save givim ansa we i kamaot long hat blong olgeta.

?Yu yu prea blong givim laef blong yu long Jehova finis, mo yu promes blong wosipim hem nomo mo putum wok blong hem long fasples long laef blong yu?

?Naoia yu yu sua gud se yu rere blong baptaes?

?Wanem kaen klos i stret blong werem taem yu baptaes? (1 Tim. 2:9, 10; Jon 15:19; Fil. 1:10)

Yumi mas werem klos we i soemaot “respek mo stret tingting,” blong ol narafala oli luksave se yumi “wosipim God.” Taswe, olgeta we oli baptaes, oli no mas putum klos blong swim we i pulum ae blong man o i soemaot bodi blong olgeta. Mo tu, oli no mas putum klos we i gat raeting long hem. Oli mas putum klos we i stret, i klin, mo i soemaot respek long taem blong baptaes.

?Man i mas gat wanem fasin long taem blong baptaes? (Luk 3:21, 22)

Taem Jisas i baptaes, hem i soemaot fasin we ol Kristin tede oli save folem. Ol fasin mo ol samting we Jisas i mekem oli soemaot se hem i luksave se baptaes i wan impoten samting. Taswe, ples blong baptaes i no wan ples blong talem ol tok plei we i no stret, pleplei, swimswim, o mekem narafala fasin we i givim tingting se taem ya i no impoten. Mo tu, Kristin we i baptaes bambae i no mekem fasin olsem we hem i win finis, nogat. I tru se baptaes i wan taem blong glad, be yumi mas soemaot glad ya long fasin we i stret.

?Olsem wanem fasin blong go long ol miting oltaem mo joen wetem kongregesen bambae i givhan long yu blong holem promes ya blong givim laef blong yu long Jehova?

Afta we yu baptaes, ?from wanem i impoten we yu gohed blong folem wan gudfala program blong stadi yu wan mo joen oltaem long wok blong prij?

ADVAES I GO LONG OL ELDA

Taem wan pablisa i talemaot se hem i wantem baptaes, oli leftemap tingting blong hem blong i stadi gud long ol “Kwestin Blong Olgeta We Oli Wantem Baptaes,” long pej 185-207 long buk ya. Oli pulum tingting blong hem i go long haf ya, “Tok i Go Long Pablisa We i No Baptaes” long pej 182. Olsem haf ya i talem, pablisa we i wantem baptaes i save yusum buk ya mo ol not we hem i raetem, taem hem i storian wetem ol elda long ol kwestin ya. I no nid blong wan narafala i tokbaot ol kwestin ya wetem hem bifo we hem i storian wetem ol elda.

Pablisa i mas talemaot long kodineta blong ol elda se hem i wantem baptaes. Afta we hem i stadi long ol “Kwestin Blong Olgeta We Oli Wantem Baptaes,” kodineta bambae i askem long hem sipos hem i prea finis blong givim laef blong hem long Jehova blong mekem wok blong hem. Sipos hem i mekem olsem finis, kodineta bambae i mekem plan blong tu elda i storian wetem hem long ol “Kwestin Blong Olgeta We Oli Wantem Baptaes.” Bambae wan elda i mekem fas haf blong ol kwestin ya mo narafala elda i mekem seken haf. Tufala i save mekem olsem enitaem, i no nid blong wet kasem taem we oli talemaot se bambae i gat wan asembli.

I nidim tu defren taem nomo blong mekem tufala haf ya blong ol kwestin blong baptaes. Taem wan elda i mekem haf blong hem, hem i save tekem wan aoa blong storian wetem pablisa. Be sipos i gat gudfala risen blong bitim wan aoa, i no gat wan rul i blokem hem. Oli mas statem mo finisim storian ya wetem wan prea. Pablisa mo elda i no mas hareap blong finisim ol kwestin ya. Tufala elda we oli mekem ol kwestin ya, oli mas tingbaot se hemia wan impoten wok long program blong olgeta.

I moagud blong askem ol kwestin long ol pablisa wanwan, be i no long wan grup blong ol pablisa. Taem pablisa i ansa long ol kwestin, elda i luksave klia sipos hem i kasem save gud long ol poen, mo sipos hem i rere blong baptaes. Mo tu, taem oli storian wetem ol pablisa wanwan, ating ol pablisa oli no save fraet blong toktok. Sipos hasban mo waef tugeta i wantem baptaes, maet ol elda oli askem ol kwestin long tufala wantaem.

Sipos wan elda i askem ol kwestin long wan sista, tufala i mas storian long ples we ol narafala oli save luk tufala, be oli no save harem wanem we tufala i stap tokbaot. Sipos i gat nid blong elda i tekem wan narafala i go wetem hem, man ya i mas wan elda o wan man blong givhan, be hemia i dipen long haf we tufala i mekem, olsem nekis paragraf i eksplenem.

Long sam kongregesen, maet i no gat naf elda. Long taem olsem, ol man blong givhan we oli naf, mo we oli gat fasin blong skelem gud samting, oli save mekem ol kwestin blong baptaes long “Haf 1: Ol Bilif Blong Ol Kristin.” Ol elda nomo bambae oli mekem ol kwestin long “Haf 2: Laef Blong Ol Kristin.” Sipos i no gat naf brata blong mekem wok ya, oli save talemaot long eria elda, nao hem bambae i luk sipos wan kongregesen klosap i save givhan.

Sipos hemia we i wantem baptaes i no kasem 18 yia yet, papa mo mama blong hem, o wan long tufala we i stap long trutok, i mas stap long taem blong ol storian ya. Sipos papa mo mama i no save stap, tu elda (o wan elda mo wan man blong givhan sipos oli storian long Haf 1) i mas joen long ol storian ya.

Ol elda oli mas meksua se pablisa we i wantem baptaes i gat naf save long ol stamba tijing blong Baebol. Mo tu, oli mas luksave sipos hem i rili laekem trutok mo i gat bigfala respek long oganaesesen blong Jehova. Sipos pablisa i no gat naf save long ol stamba tijing blong Baebol, ol elda oli save mekem plan blong narafala i givhan moa long hem, nao bambae hem i save kam naf blong baptaes nekis taem. Maet sam pablisa oli nidim moa taem blong wokem fasin ya blong tinghae long wok blong prij mo blong obei long oganaesesen. Ol elda oli mas mekem plan blong yusum gud taem we oli gat blong storian long ol kwestin wetem pablisa, olsem nao, bambae oli luksave gud sipos hem i naf blong baptaes. Maet oli spenem moa taem long sam kwestin, mo oli spenem smoltaem nomo long sam narafala kwestin. Nating se i olsem, be oli mas askem olgeta kwestin.

Afta we tufala elda i finisim ol kwestin ya, bambae tufala i mekem wan miting blong luk sipos pablisa ya i naf blong baptaes. Tufala i mas tingbaot fasin blong laef blong pablisa bifo, hamas save we hem i gat, mo sam narafala samting olsem. Tufala i mas luksave sipos hem i stap wok had blong fren gud wetem Jehova, mo sipos hem i kasem save gud long ol stamba trutok blong Baebol. Sipos ol elda oli soemaot lav taem oli givhan long olgeta we oli wantem baptaes, bambae olgeta ya oli save kam ol man blong God we oli nafgud blong mekem impoten wok ya blong talemaot gud nius.

Biaen, wan long tufala elda ya o tufala tugeta, i mas go luk pablisa we i wantem baptaes, blong talem long hem sipos hem i naf blong baptaes. Sipos hem i naf, tufala i mas storian wetem hem long haf ya “Las Storian Bifo We Oli Baptaes,” long pej 206-207. Sipos pablisa i no finisim buk ya yet !Enjoem Laef Olwe!, tufala elda ya i mas leftemap tingting blong hem blong i finisim gud stadi, afta we hem i baptaes. Talem long pablisa se bambae oli putum dei we hem i baptaes long Ripot Blong Pablisa Long Kongregesen. Mekem hem i tingbaot bakegen se ol elda oli mas kasem ol save ya long saed blong hem, blong oganaesesen i save gohed blong lukaot long wok blong ol Witnes blong Jehova long fulwol mo blong hem i save joen long ol wok blong kongregesen mo kasem help long ol elda. Mo tufala i save talem long hem se oli yusum ol save ya folem Global Data Protection Policy Blong Ol Witnes Blong Jehova, we hem i save faenem long jw.org. Storian ya i no bitim ten minit.

Wan yia afta we pablisa i baptaes, tu elda i mas go luk hem bakegen, blong leftemap tingting blong hem mo givim sam advaes blong givhan long hem. Wan long tufala elda ya, hemia elda we i lukaot long grup blong prij we pablisa ya i stap long hem. Sipos pablisa we i baptaes i no kasem 18 yia yet, papa mo mama blong hem, o wan long tufala we i stap long trutok, i mas stap. Miting ya i mas leftemap tingting blong olgeta mo mekem oli harem gud. Tufala elda ya bambae oli tokbaot olsem wanem hem i stap progres mo givim sam advaes blong hem i save gohed blong folem wan gudfala program blong stadi Baebol hem wan, ridim Baebol evri dei, mekem famle wosip evri wik, go oltaem long miting, mo prij evri wik. (Efes. 5:15, 16) Sipos hem i no finisim buk ya yet !Enjoem Laef Olwe!, tufala elda bambae i mekem plan blong wan brata o sista i stadi wetem hem long buk ya. Tufala i mas soemaot lav, mo talem plante gudfala toktok long hem. Plante taem, i naf nomo blong givim wan o tu advaes long hem.