Ansa Long Wan Kwestin
◼ ?Bifo we wan pablisa i wantem tekem baptaes, hem i mas mekem wanem?
Baptaes, hemia wan impoten desisen we man i mas mekem. Taswe, bifo we wan pablisa i wantem tekem baptaes, hem i mas kasem save gud ol samting we God i wantem hem blong mekem. Antap long hemia, hem i mas soemaot se hem i gat strong tingting blong folem, ol samting we God i wantem hem blong mekem long laef blong hem.
Ol Kristin oli kasem advaes ya se i nogud we oli lego ol miting. Taswe, wan pablisa we i no baptaes yet, i mas soemaot se hem i stap traehad oltaem blong kam long ol miting blong kongregesen. (Hib. 10:24, 25) Hem i mas glad blong givim ansa long ol miting mo hem i mas gohed blong joen long Tiokratik Skul.
Longtaem finis, Jisas i givim wok long olgeta kristin blong oli mas mekem. Wok ya, hemia blong prij mo blong tijim ol man. Taswe wan pablisa we i no baptaes yet, hem i mas traehad blong joen long wok blong prij, bifo we hem i tekem baptaes. (Mat. 24:14; 28:19, 20) ?Hem i mas prij hamas manis bifo we hem i tekem baptaes? I no gat wan rul long saed ya. Be hem i nidim naf taem, blong soemaot se hem i stap prij oltaem. Mo hem i mas soemaot se hem i gat strong tingting mo hem i glad blong mekem wok ya oltaem. (Sam 78:37) Blong tekem baptaes, wan man i no nid blong pablisa longtaem. Samtaem man i save prij sam manis nomo, nao i baptaes. ?Hem i mas givim ripot hamas taem, bifo we hem i naf blong tekem baptaes? I no gat wan stret rul long saed ya. Ol elda oli mas tingbaot se ol pablisa wanwan oli defren, mo oli mas luksave sipos pablisa ya i naf blong tekem baptaes no nogat.—Luk 21:1-4.
Ol elda (no man blong givhan long kongregesen, sipos i no gat naf elda) oli mas tingbaot se ol pablisa wanwan oli defdefren. Ale, taem oli askem kwestin blong baptaes long olgeta, oli mas luklukgud sipos hem i naf blong tekem baptaes no nogat. Bambae oli mas luk sipos pablisa ya i rili wantem kam wan Witnes blong Jehova. Oli mas luk se hem i glad blong joen wetem ogenaesesen. Mo oli mas luk tu se hem i glad blong prij. Ol elda oli mas kasem save se, hem i no bigman long spirit yet. Mo, hem i no gat plante save olsem wan pablisa we i stap longtaem long trutok. Sipos ol elda oli luk we hem i no naf yet blong tekem baptaes, long kaen fasin oli save ridim sam Vas long hem, we oli soemaot from wanem oli tekem desisen ya, mo oli mas leftemap tingting blong hem blong i gohed blong kasem sam moa save blong God.