Ansa Long Wan Kwestin
● ?Wan pablisa we i no baptaes i mas kasem wanem mak long wok blong prij bifo we hem i tekem baptaes?
Bifo we wan man i kam wan pablisa we i no baptaes, hem i pruvum finis se hem i wantem tumas blong kam wan Wetnes blong Jeova. (Sam 110:3) Stadi we hem i mekem long saed blong Baebol i pusum hem blong jenisim ol tingting blong hem, ol fasin blong hem mo laef blong hem. Man ya i rili wantem se Jeova i agri long hem, mo hem i glad nomo blong mekem ol samting we Jeova i askem long hem. Taswe hem i kam oltaem long ol miting, ol seket mo distrik asembli we ol man blong Jeova oli ogenaesem. (Hib. 10:24, 25.) Wan man olsem i kam oltaem long olgeta Kristin miting. Be long sem taem, hat blong hem i pusum hem blong talemaot bilif we hem i gat. From samting ya nao, hem i ansa long ol miting mo hem i joen long Tiokratik Skul.—Sam 40:9, 10; om, pej. 73.
Taem wan stadi blong yumi i agri long trutok mo i soemaot se hem i rili laekem mesej blong Kingdom, long taem ya nao man ya i save prij long olgeta haos wanwan. Wok ya i impoten tumas long lukluk blong ol Wetnes blong Jeova. (Mat. 24:14; 28:19, 20; om, pej. 111, 112.) Bifo we wan man i go prij, ol elda mo pablisa we i mekem stadi long man ya oli mas sidaon tugeta mo oli mas save sipos laef blong man ya i stret gud wetem ol rul blong Baebol. Man ya i mas wantem kam wan Wetnes blong Jeova, hem i mas tinghae long wok blong talemaot gud nyus mo hem i mas wantem mekem disaepol.—Gal. 6:6; w 15/11/88, pej 17; om pej. 98-9, 174 (98-100, 173).
Taem wan man we i stadi Baebol i rere finis blong kam prij wetem yumi, i no gat nid blong hem i wet longtaem bifo we hem i tekem baptaes long wora. Laef blong hem i stret finis wetem ol Kristin rul. Be hem i no gat plante ekspiryens yet long wok blong prij. Yumi mas givim naf taem long hem blong soemaot we tingting blong hem i strong blong prij oltaem.—Sam 40:8; Rom 10:9, 10, 14, 15.
Taem man ya i rere blong baptaes, hem i stap gohed blong prij oltaem wetem ol narafala Kristin. I no naf blong hem i prij wan no tu haoa long wan manis nomo. (wE 84, Jun 1, p.8 haf 2; wF 84 1/9 p.8, haf 2). I tru we olgeta man wanwan we i wantem tekem baptaes oli defren. Yumi mas tingbaot ples blong hem, hamas yia blong hem, olsem wanem hem i save lan, mo sam narafala samting bakegen. Ol elda oli save folem rul ya we i stap long pej 175 (174) blong buk Minista wok, i se: “Yumi intres long olgeta we hat blong olgeta i laekem Jeova, mo we i kasem save finis long ol stampa trutok. Wetem lav, yufala i save enkarajem mo halpem ol man we i wantem tekem baptaes blong oli kam Kristin minista, mo blong oli rere gud long bigfala wok ya.”—Mat. 16:24; Jon 4:34; 1 Pita 2:21.