Ol Man Blong Talemaot Gud Nius

JEHOVA i sanem Pikinini blong hem Jisas Kraes i kam, blong i soemaot wan gudfala eksampol we yumi save folem. (1 Pita 2:21) Taem wan man i biaen long Jisas, hem i kam wan man blong wok blong God we i talemaot gud nius. Jisas i talem se samting ya bambae i mekem hem i spel long spirit. Hem i se: “Yufala evriwan we i stap hadwok tumas mo yufala i stap karem ol hevi samting, yufala i kam long mi, mo bambae mi mi mekem we yufala i kasembak paoa. Yufala i mas putum yok blong mi long solda blong yufala, blong yufala i wok wetem mi, mo yufala i lan long mi, from we mi mi wan kwaet man mo tingting blong mi i stap daon, nao bambae yufala i save harem gud long laef blong yufala.” (Mat. 11:28, 29) !Ol man we oli folem Jisas oli luksave se promes ya i tru!

² Jisas, we i Nambawan Man blong wok blong God, i singaot sam man blong oli biaen long hem. (Mat. 9:9; Jon 1:43) Hem i trenem olgeta long wok blong prij, mo hem i sanem olgeta oli go mekem sem wok we hem i stap mekem. (Mat. 10:1 kasem 11:1; 20:28; Luk 4:43) Biaen, hem i sanem 70 narafala disaepol oli go talemaot gud nius blong Kingdom blong God. (Luk 10:1, 8-11) Taem Jisas i sanem olgeta oli go, hem i talem long olgeta se: “Man we i lesin long yufala, hem i lesin long mi. Mo man we i no wantem lesin long yufala, hem i no wantem lesin long mi tu. Mo man we i no wantem lesin long mi, hem i no wantem lesin long Man ya tu we i sanem mi.” (Luk 10:16) Jisas i talem ol tok ya blong soemaot long ol disaepol blong hem se oli gat wan impoten wok blong mekem mo oli mas tinghevi long hem. !Bambae oli toktok long bihaf blong Jisas mo Jehova! Hemia i sem mak long olgeta tede we oli obei long tok ya blong Jisas se: “Yu kam, yu biaen long mi.” (Luk 18:22; 2 Kor. 2:17) God i givim wok long olgeta evriwan we oli wantem biaen long Jisas, se oli mas talemaot gud nius blong Kingdom mo pulum ol narafala man oli kam man blong Kraes.—Mat. 24:14; 28:19, 20.

³ Yumi biaen long Jisas finis, taswe yumi gat blesing ya blong “save” Jehova God mo Jisas Kraes. (Jon 17:3) Jehova i tijim yumi finis long ol rod blong hem. Hem i givhan long yumi blong yumi jenisim tingting mo fasin blong yumi, mo blong yumi mekem laef blong yumi i laenap wetem ol stret loa blong hem. (Rom 12:1, 2; Efes. 4:22-24; Kol. 3:9, 10) Yumi wantem tumas blong talem tangkiu long Jehova, taswe yumi givim laef blong yumi i go long hem mo yumi baptaes long wota. Taem yumi baptaes, yumi kam man blong wok blong God.

⁴ Yumi mas tingbaot oltaem se man we i mekem wok blong God, tingting blong hem i mas klin, mo fasin blong hem i mas stret. (Sam 24:3, 4; Aes. 52:11; 2 Kor. 6:14 kasem 7:1) Bilif long Jisas Kraes i mekem tingting blong yumi i klin long fes blong God. (Hib. 10:19-23, 35, 36; Rev. 7:9, 10,14) Aposol Pol i talem long ol Kristin se oli mas mekem olgeta samting blong leftemap nem blong God. Olsem nao, oli no save mekem narafala i foldaon. Aposol Pita i talem se sipos yumi mekem ol gudfala fasin, yumi save pulum man we i no bilif i kam long trutok. (1 Kor. 10:31, 33; 1 Pita 3:1) ?Olsem wanem yu save givhan long wan man blong i kam man blong wok blong God, mo i joen wetem yumi blong talemaot gud nius?

OL NIUFALA PABLISA

⁵ Taem yu jes stat blong stadi Baebol wetem wan man, i gud yu pulum hem blong i serem long ol narafala, ol save we hem i stap lanem. Hem i save tokbaot long ol famle, ol fren, ol man long ples blong wok, mo ol man we hem i mitim olgeta long ol narafala ples. Hemia wan impoten samting we yu mas tijim ol niuwan long hem, blong oli save biaen long Jisas Kraes mo kam ol man blong talemaot gud nius. (Mat. 9:9; Luk 6:40) Taem ol man ya oli gohed gud mo oli tekem janis blong prij, bambae oli wantem joen long wok blong prij.

OLI MAS KASEM SAM MAK FASTAEM

⁶ Bifo we yu askem long wan Baebol stadi blong i go prij wetem yu long ol haos wanwan, yu mas suagud se hem i kasem ol mak we hem i mas kasem. Wan niuwan we i joen wetem yumi long wok blong prij, hem i soemaot long fes blong ol man se hem i joenem ol Witnes blong Jehova. Taswe, yumi kasem save se man ya i mekem ol fasin blong hem oli stret finis folem ol loa blong Jehova, nao hem i naf blong kam wan pablisa we i no baptaes.

⁷ Taem yu mekem stadi long wan man mo yu tokbaot ol rul blong Baebol long hem, yu kasem save long plante samting long laef blong hem. Ating yu luk se hem i stap folem ol samting we hem i lanem. Be ol elda bambae oli wantem storian wetem yutufala blong tokbaot sam samting long laef blong hem.

⁸ Kodineta blong ol elda bambae i mekem plan blong tu elda (wan long tufala i stap long sevis komiti) i storian wetem yu mo Baebol studen ya. Long kongregesen we i no gat plante elda, wan elda mo wan man blong givhan we i naf, tufala i save storian wetem yutufala. I no mas gat plante taem i pas bifo we tufala i storian wetem studen ya. Taswe, sipos hem i talem long ol elda long miting se hem i wantem prij, maet oli save toktok wetem hem afta long miting nomo. Storian ya i no mas mekem studen i fraet, yufala evriwan i mas harem gud. Bifo we studen i save go prij olsem wan pablisa we i no baptaes, hem i mas kasem ol mak ya:

1. (1) Hem i bilif se Baebol i Tok blong God.—2 Tim. 3:16.

2. (2) Hem i save ol stamba tijing blong Baebol mo hem i bilif long olgeta. Ale, sipos wan man i askem kwestin long hem, ansa blong hem bambae i laenap wetem Baebol, be i no wetem ol tijing blong ol giaman skul. Mo hem i no talemaot prapa tingting blong hem.—Mat. 7:21-23; 2 Tim. 2:15.

3. (3) Hem i stap obei long tok blong Baebol blong joen wanples wetem ol man blong Jehova long ol miting blong kongregesen, sipos hem i naf blong mekem olsem.—Sam 122:1; Hib. 10:24, 25.

4. (4) Hem i save finis wanem we Baebol i talem long nogud fasin blong man wetem woman, olsem stilim man o woman blong narafala, mared long plante woman wantaem, mo homoseksuol, mo hem i stap folem ol loa ya long laef blong hem. Sipos man ya i stap wetem wan woman, o woman ya i stap wetem wan man, tufala i saen finis blong stretem mared blong tufala.—Mat. 19:9; 1 Kor. 6:9, 10; 1 Tim. 3:2, 12; Hib. 13:4.

5. (5) Hem i folem loa blong Baebol we i putum tabu long drong, mo hem i sakemaot finis ol drag olsem tabak mo maruana, mo ol narafala drag we man i wokem we oli spolem tingting mo oli no meresin blong wan sik.—2 Kor. 7:1; Efes. 5:18; 1 Pita 4:3, 4.

6. (6) Hem i luksave se hem i no mas joen wetem ol rabis fren.—1 Kor. 15:33.

7. (7) Hem i no moa memba blong wan giaman skul. Hem i no moa joen long enikaen jos sevis mo enikaen wok blong giaman skul, mo i no moa sapotem olgeta.—2 Kor. 6:14-18; Rev. 18:4.

8. (8) Hem i no moa joen long politik.—Jon 6:15; 15:19; Jem. 1:27.

9. (9) Hem i bilif long tok blong Aesea 2:4, mo i no joen nating long ol faet blong ol kantri.

10. (10) Hem i wantem tumas blong kam wan Witnes blong Jehova.—Sam 110:3.

⁹ Sipos tufala elda i no sua gud long tingting blong Baebol studen long sam long ol poen ya, tufala i mas askem stret long hem. Maet tufala i tokbaot ol vas blong Baebol we oli stap. Hem i mas kasem save se laef blong olgeta we oli joen wetem ol Witnes blong Jehova blong prij, i mas laenap wetem ol tok ya blong Baebol. Ol tok blong studen ya bambae i soemaot long tufala elda sipos hem i kasem save gud long ol fasin we hem i mas gat, mo sipos hem i naf blong joen long wok blong prij.

¹⁰ Tufala elda i no mas letem longfala taem i pas bifo we tufala i talem long studen se hem i save kam wan pablisa. Plante taem, tufala i save mekem samting ya afta we tufala i storian long hem. Sipos hem i naf, tufala i save talem gudfala toktok long hem blong soemaot se tufala i glad tumas we hem i kam pablisa. (Rom 15:7) Tufala i talem long hem blong i joen kwiktaem long wok blong prij, mo blong i putum ripot blong prij long en blong manis. Tufala i eksplenem long hem se taem wan Baebol studen i kam pablisa we i no baptaes mo i putum fas ripot blong hem, oli raetem nem blong hem long Ripot Blong Pablisa Long Kongregesen, mo oli holem i stap long fael blong kongregesen. Ol elda oli nidim ol save long saed blong ol pablisa wanwan, blong mekem se oganaesesen i save lukaot gud long wok blong ol Witnes blong Jehova long fulwol, mo tu, blong pablisa ya i joen long wok ya mo save kasem help blong gohed gud. Ol elda oli save talem long ol niufala pablisa se oli folem ol rul long Global Data Protection Policy blong ol Witnes blong Jehova long jw.org, long saed blong save we oli gat long ol pablisa wanwan.

¹¹ Yumi traem save gud ol niufala pablisa mo yumi soemaot se yumi intres long olgeta wanwan mo long wok blong olgeta. Samting ya i save pulum olgeta blong oli putum ripot blong prij oltaem mo oli traehad moa long wok blong Jehova.—Fil. 2:4; Hib. 13:2.

¹² Taem ol elda oli talem long wan Baebol studen se hem i naf blong joen long wok blong prij, hem i gat raet blong kasem buk ya Oganaesesen We i Mekem Wok Blong Jehova. Afta we hem i putum fas ripot blong prij, oli talemaot wan sot mesej long kongregesen, se naoia hem i wan pablisa we i no baptaes.

GIVHAN LONG OL YANGFALA

¹³ Ol pikinini tu oli save kam pablisa blong gud nius. Jisas i glad long ol pikinini mo i blesem olgeta. (Mat. 19:13-15; 21:15, 16) Papa mo mama nao i mas ol faswan blong givhan long pikinini. Be maet samfala long kongregesen tu oli wantem givhan long ol yangfala we oli glad blong joen long wok blong talemaot Kingdom. Sipos yu yu gat pikinini, eksampol blong yu long wok blong prij i save pulum pikinini blong i wok strong moa. Sipos pikinini i gat gudfala fasin mo hem i wantem tumas blong talemaot bilif blong hem, ?yu save mekem wanem moa blong givhan long hem?

¹⁴ I gud we papa mo mama tufala i askem long wan elda long Sevis Komiti Blong Kongregesen, sipos ol elda oli save storian wetem pikinini ya, blong luk sipos hem i naf blong kam wan pablisa. Kodineta bambae i mekem plan se tu elda (wan long tufala i stap long sevis komiti) i toktok wetem pikinini ya mo papa mo mama blong hem. Sipos wan long tufala nomo i stap long trutok, bambae tufala elda i toktok wetem hem mo pikinini. Sipos wan narafala we i stap long trutok i lukaot long pikinini ya, bambae tufala i toktok wetem hem mo pikinini. Sipos pikinini i kasem save long ol stamba trutok blong Baebol, mo hem i wantem prij, hemia i soemaot se hem i stap gohed gud. Taem tufala elda i skelem ol samting ya mo ol narafala mak we pablisa i mas kasem, bambae tufala i luksave sipos pikinini ya i naf blong kam wan pablisa we i no baptaes. (Luk 6:45; Rom 10:10) Taem tufala i toktok wetem pikinini, tufala i save tokbaot nomo ol samting we i stret long pikinini mo i no nid blong tokbaot ol samting long saed blong ol bigman.

¹⁵ Long storian ya, tufala elda i talem gudfala toktok long pikinini from we hem i stap gohed gud, mo tufala i pulum hem blong i kam naf blong baptaes. I klia se papa mo mama blong hem i wok had finis blong tijim hem long trutok, taswe i stret blong talem gudfala toktok long tufala tu. Blong halpem papa mo mama ya blong givhan moa long pikinini blong tufala, tufala elda ya i save pulum tufala blong ridim haf ya “Tok i Go Long Papa Mo Mama,” we i stap long pej 179-181.

GIVIM LAEF LONG JEHOVA MO BAPTAES

¹⁶ Maet yu yu kasem save finis long Jehova, yu mekem laef blong yu i stret folem ol loa blong hem, mo yu stap joen long wok blong prij, be yu mas gohed moa yet blong kam wan gudfala fren blong Jehova. ?Yu mekem samting ya olsem wanem? Yu givim laef blong yu i go long Jehova, mo yu baptaes long wota.—Mat. 28:19, 20.

¹⁷ Blong givim laef blong yu long God, yu prea long hem, mo yu promes wetem fulhat blong yu blong yusum laef blong yu blong mekem wok blong hem, mo blong folem ol rul blong hem. Bambae yu mekem wosip long hem nomo gogo i no save finis. (Dut. 5:9) Hemia samting we yu wan yu mekem wetem Jehova. I no gat narafala man i save mekem samting ya long ples blong yu.

¹⁸ Be i no naf blong talem nomo long Jehova se yu wantem kam wan man blong hem. Yu mas soemaot long fes blong ol man tu se yu yu givim laef blong yu i go long God. Yu soemaot samting ya taem yu baptaes long wota, olsem Jisas. (1 Pita 2:21; 3:21) Sipos yu mekem desisen blong wosipim Jehova nao yu wantem baptaes, ?yu mas mekem wanem? Yu mas talemaot long kodineta blong ol elda. Hem bambae i mekem plan blong sam elda oli storian wetem yu, blong luk sipos yu stap mekem ol fasin we God i wantem. Blong kasem moa save, plis lukluk “Tok i Go Long Pablisa We i No Baptaes,” long pej 182-184, mo “Ol Kwestin Blong Baptaes” long pej 185-207.

OL NIUS BLONG WOK BLONG PRIJ

¹⁹ Longtaem finis i kam, ol man blong Jehova oli glad blong harem ol nius we i soemaot se tru wosip i stap kam bigwan moa. Stat long taem we Jisas Kraes i talem long ol man blong hem se oli mas talemaot gud nius long olgeta ples blong wol, ol tru Kristin oli wantem tumas blong luk olsem wanem samting ya bambae i kamtru.—Mat. 28:19, 20; Mak 13:10; Wok 1:8.

²⁰ Ol man blong Jisas bifo oli glad blong harem nius se wok blong prij i stap gohed olsem wanem. (Mak 6:30) Buk blong Ol Wok i talem se samwe long 120 man oli stap long lafet blong Pentekos long yia 33, taem tabu spirit i kamdaon long ol disaepol. Smoltaem afta, namba blong ol disaepol ya i kam antap kasem 3,000 mo biaen 5,000. Ol man blong Jisas oli harem nius ya se, “evri dei, Jehova i stap tekem ol man we hem i sevem olgeta, oli kam joen wetem olgeta.” Mo “wan bigfala hip blong ol pris tu oli bilif.” (Wok 1:15; 2:5-11, 41, 47; 4:4; 6:7) !Ol disaepol oli glad blong harem nius ya se ol man blong Jehova oli stap kam plante moa! !I klia se nius ya i pulum olgeta blong oli wok strong moa long wok ya we God i givim long olgeta, nating se ol lida blong skul blong ol man Isrel oli mekem bigfala trabol long olgeta!

²¹ Samwe long yia 60 kasem 61, Pol i raetem leta i go long ol Kristin long Kolosi. Hem i talem se gud nius “i stap karem frut mo i stap goaot moa long olgeta ples long wol,” mo “oli stap talemaot long olgeta ples long wol.” (Kol. 1:5, 6, 23) Ol fas Kristin oli obei long Tok blong God, taswe bifo we ol ami oli spolem Jerusalem long yia 70, tabu spirit i givim paoa long ol Kristin blong oli mekem wan bigfala wok blong prij. !Ol gudfala Kristin ya oli glad tumas taem oli harem nius blong ol frut we i kamaot from wok blong olgeta!

²² Tede tu, oganaesesen blong Jehova i stap raetemdaon ol stori blong wok ya we Matiu 24:14 i tokbaot, se: “Ol man bambae oli talemaot gud nius ya blong Kingdom long olgeta ples long wol, blong oli witnes long olgeta nesen, nao biaen en bambae i kam.” Yumi, we yumi givim laef blong yumi i go long God finis, yumi gat wan impoten wok blong mekem. Yumi wanwan i mas wantem tumas blong luk we wok ya i finis bifo we en i kam. Jehova bambae i meksua se wok ya i finis. Mo sipos yumi joen long wok ya, bambae Jehova i glad long yumi.—Esik. 3:18-21.

RIPOT BLONG PRIJ

²³ ?Yu raetem wanem long ripot blong prij? Pepa ya we oganaesesen i wokem, Ripot Blong Prij, i soemaot ol save we yu mas givim. Mo maet ol save we i kam biaen i save givhan long yu.

²⁴ Aninit long tok ya “Ol Buk (Long Pepa Mo Long Mobaelfon),” yu raetem namba blong ol buk o video we yu sanem o yu givimaot long ol man we oli no baptaes olsem Witnes. Aninit long “Soem Video,” yu raetem hamas video yu soemaot long wok blong prij.

²⁵ Taem yu gobak blong luk wan man we i no baptaes, mo yu givim moa save blong Baebol long hem, hemia wan visit. Evri taem we yu mekem olsem, yu makem wan visit long ripot blong yu, aninit long “Visit.” Yu save mekem visit long wan man long haos blong hem, yu save raetem leta, yu toktok long telefon, yu sanem mesej long mobaelfon o long imel, o yu go luk hem blong givim buk o magasin long hem. Evri taem we yu mekem wan Baebol stadi, yu makem wan visit long ripot blong yu. Sipos yu lidim Famle Wosip evri wik mo i gat wan pikinini i stap we i no baptaes, yu save makem wan visit long ripot blong yu.

²⁶ Nating se yu mekem Baebol stadi evri wik long wan man, be yu makem wan Baebol stadi nomo long ripot blong yu long en blong manis. Yu raetem fulnamba blong ol Baebol stadi we yu mekem long defdefren man. Namba ya i soemaot ol Baebol stadi we yu mekem long ol man we oli no baptaes olsem Witnes. Maet wan elda long sevis komiti i askem long yu blong yu mekem Baebol stadi wetem wan brata o sista we i no moa prij, o wan we i jes baptaes be i no finisim buk ya !Enjoem Laef Olwe! Long taem olsem, yu makem wan Baebol stadi long ripot blong yu.

²⁷ Aninit long “Aoa,” yu raetem hamas aoa yu spenem long wok blong prij. Hemia ol aoa we yu spenem blong prij long ol man we oli no Witnes long ol haos wanwan, mekem ol visit mo Baebol stadi, tekem janis blong prij, o prij long eni ples. Sipos tu pablisa i stap prij tugeta, tufala i save makem aoa we tufala i spenem long wok blong prij. Be wan nomo i makem visit mo Baebol stadi we tufala i mekem. Papa mo mama we tufala tugeta i tijim ol pikinini long Famle Wosip, tufala wanwan i save makem wan aoa long wan wik. Brata we i givim pablik tok, hem tu i save makem taem ya long ripot blong prij. Sipos wan brata o sista i tanem wan pablik tok i go long narafala lanwis, hem tu i save makem taem ya. Be i gat sam narafala impoten wok we yumi no makem long ripot blong prij. Hemia ol aoa we yumi spenem blong rere from wok blong prij, blong kam long miting blong prij, mo blong mekem sam samting blong yumi nomo.

²⁸ Ol pablisa wanwan oli mas prea mo folem tingting we oli trenem gud wetem Baebol, taem oli stap makem hamas aoa oli spenem long wok blong prij. Sam pablisa oli stap prij long ol taon we ol man oli fasfas, be sam narafala oli prij long ples we i gat smol man nomo long hem, mo oli mas wokbaot plante kilometa blong faenem ol man. Ol teritori oli defdefren. Ol pablisa tu oli gat defdefren tingting long samting we oli makem long ripot olsem aoa blong prij. Hed Kampani i no mekem rul long ol aoa we ol brata mo sista oli ting se i stret blong makem, mo oli no givim raet long wan narafala man blong jajem bisnes ya.—Mat. 6:1; 7:1; 1 Tim. 1:5.

²⁹ Yu no mas makem ol haf aoa long ripot blong yu. Be sipos wan pablisa i olfala mo i no save aot long haos, o i stap long hospital, o i handikap, hem i save makem 15 minit, o haf aoa, o 45 minit long ripot blong hem. Sipos hem i prij blong 15 minit nomo long wan manis, hem i save makem long ripot blong hem, olsem nao, kongregesen i kaontem hem yet se hem i wan pablisa. Plan ya i stret tu long pablisa we i kasem wan trabol, maet wan strong sik o wan kil, mo i no save prij blong wan o tu manis. Plan ya i blong olgeta nomo we wan bigfala trabol i blokem olgeta. Sevis komiti bambae i mekem desisen se weswan pablisa we i gat raet blong folem plan ya.

RIPOT BLONG PABLISA LONG KONGREGESEN

³⁰ Taem kongregesen i kasem ripot blong yu evri manis, oli raetem long Ripot Blong Pablisa Long Kongregesen. Ol ripot ya oli blong kongregesen. Sipos yu gat tingting blong muv i go long narafala kongregesen, yu mas talemaot long ol elda. Nao sekretari bambae i sanem ol ripot blong yu long niufala kongregesen. Olsem nao, ol elda bambae oli rere blong welkamem yu mo givhan long yu blong yu gohed gud. Sipos yu yu aot long kongregesen blong yu blong smoltaem nomo we i no bitim tri manis, plis sanem ripot blong yu i gobak long kongregesen evri manis.

?FROM WANEM YUMI GIVIM RIPOT BLONG PRIJ?

³¹ ?Olsem wanem? ?Samtaem yu foget blong givim ripot blong prij long en blong manis? Wanwan taem, yumi evriwan i nidim we narafala i talem bakegen long yumi. Be sipos yumi gat stret tingting long ripot blong prij mo yumi kasem save from wanem i impoten blong givim, ating bambae i isi moa blong tingbaot ripot ya evri manis.

³² Samfala oli askem se: “?From wanem mi mas givim ripot blong prij? Jehova i save ol wok we mi mi mekem.” I tru, Jehova i save ol wok blong yumi wanwan, mo hem i save gud sipos yumi stap wok wetem ful hat blong yumi o nogat. Be i gud yumi tingbaot we Jehova i raetemdaon long Baebol hamas dei we Noa i stap long sip, mo hamas yia we ol man Isrel oli wokbaot long draeples. Mo God i save gud hamas man oli holemstrong long hem mo hamas man oli no obei long hem. Hem i raetemdaon olsem wanem ol man Isrel oli winim ol taon long Kenan, mo ol wok blong ol gudfala jaj long Isrel. Hem i raetemdaon plante smosmol samting we ol man blong hem bifo oli mekem. God i putum ol save ya long tingting blong ol man blong oli raetem long Baebol. Samting ya i soemaot klia se i impoten tumas blong raetem ripot we i stret.

³³ Ol stori blong Baebol oli soemaot se ol man blong Jehova bifo, oli raetem ol stori mo ripot we oli stret gud. Long plante stori, sipos oli no bin raetem ol stret namba, bambae stori i no gat paoa. Yu traem luk ol stori long Jenesis 46:27; Eksodas 12:37; Jajes 7:7; 2 King 19:35; 2 Kronikel 14:9-13; Jon 6:10; 21:11; Ol Wok 2:41; 19:19.

³⁴ I klia se ol ripot ya oli no soemaot olgeta wok we yumi mekem long wosip blong Jehova, be oli givhan long oganaesesen blong Jehova. Long taem blong ol fas Kristin, sam aposol oli kambak long wan trip blong prij, nao oli talem long Jisas “olgeta samting we oli tijim ol man long hem, mo olgeta samting we oli mekem.” (Mak 6:30) Ripot i save soemaot samting we yumi mas kam gud moa long hem long wok blong prij. Ol namba oli save soemaot se, nating we sam wok i gohed gud, be sam narafala samting, olsem namba blong ol pablisa, i no jenis. Maet sam pablisa oli nidim ol gudfala toktok blong leftemap tingting blong olgeta, o maet i gat sam trabol blong stretem. Ol elda oli yusum ol ripot blong makem ol samting mo traehad blong stretem eni samting we i blokem sam pablisa o kongregesen blong i gohed gud.

³⁵ Ol ripot oli givhan tu long oganaesesen blong i save weples i nidim moa pablisa. Ol ripot oli soemaot weples i gat moa frut long wok blong prij mo weples i no gat frut. Oli soemaot wanem kaen buk ol pablisa oli nidim, blong givhan long ol man blong oli kasem save long trutok. Ol ripot ya oli givhan long oganaesesen blong Jehova blong i save hamas buk we ol defdefren ples long wol oli yusum, nao oli wokem naf buk mo Baebol blong ol pablisa oli save yusum long wok blong prij.

³⁶ Ol ripot oli leftemap tingting blong yumi. Taem yumi kasem nius blong wok blong prij long ol narafala ples blong wol, yumi harem gud. Ol ripot we oli soemaot se ol pablisa oli stap kam plante, oli mekem yumi luksave se oganaesesen blong Jehova i stap kam bigwan moa. Ol stori blong prij oli mekem yumi harem gud, mo oli pulum yumi blong wok strong moa. (Wok 15:3) I impoten we yumi putum ripot blong prij oltaem. Hemia i soemaot se yumi tingbaot ol brata mo sista blong yumi long ol narafala ples. I wan smol samting nomo blong putum ripot, be i soemaot se yumi obei long oganaesesen blong Jehova.—Luk 16:10; Hib. 13:17.

YUMI WANWAN I MAS TRAEHAD BLONG KASEM SAM MAK

³⁷ Yumi no mas skelem wok blong prij blong yumi wetem hemia blong narafala. (Gal. 5:26; 6:4) Laef blong yumi evriwan i defdefren. I moagud yumi wanwan i traehad blong kasem sam mak we oli no had tumas blong kasem. Olsemia bambae yumi save skelem sipos yumi stap kamgud moa long wok blong prij o olsem wanem. Nao taem yumi kasem sam mak, bambae yumi harem gud.

³⁸ I klia nomo se Jehova i stap mekem wok ya i spid blong hivimap ol man we bambae hem i sevem olgeta long taem blong “bigfala trabol.” Yumi stap laef long taem we profet tok blong Aesea i stap kamtru, se: “Smolwan bambae i kam wan taosen mo hemia we i smol olgeta bambae i kam wan strong nesen. Mi Jehova, mi nao bambae mi mekem i spid long prapa taem blong hem.” (Rev. 7:9, 14; Aes. 60:22) !Hem i wan privilej blong mekem wok blong God, mo talemaot gud nius long ol las dei ya!—Mat. 24:14.