Ol Sipsip Blong Jeova Oli Nidim Fasin Keagud Wetem Lav

“Yumi mas tingbaot we [Jeova], hem i God. . . . Yumi ol man blong hem, yumi olsem ol sipsip blong hem.”​—⁠OL SAM 100:⁠3.

1. ?Jeova i stap soem wanem fasin long ol man blong hem?

JEOVA i Bigfala Man Blong Lukaot Long Sipsip. Sipos yumi wan man blong hem, hem i luk yumi olsem we yumi wan sipsip blong hem, mo i keagud long yumi wetem lav. Papa blong yumi long heven i stap mekem yumi haremgud mo i givim spel long tingting blong yumi. Hem i stap lidim yumi ‘long ol stret rod from we yumi holem nem blong hem.’ (Ol Sam 23:​1-4) Gudfala Man Blong Lukaot Long Sipsip, Jisas Kraes, hem i laekem yumi tumas. Taswe, hem i givim laef blong hem blong sevem yumi.​—⁠Jon 10:​7-15.

2. ?Ol man blong God oli luk se oli stap olsem wanem long laef blong olgeta?

² Jeova i keagud long yumi. From samting ya, yumi save joen wetem man blong raetem Ol Sam blong talem se: “!Yumi glad, yumi mekem wosip long [Jeova]! !Yumi kam long fes blong hem, yumi singsing! Yumi mas tingbaot we [Jeova], hem i God. Hem nomo i mekem yumi, mo yumi i blong hem. Yumi ol man blong hem, yumi olsem ol sipsip blong hem.” (Ol Sam 100:​2, 3) Yes, yumi glad mo yumi stap sefgud. I olsem we yumi stap long wan yad we i gat strongfala stonwol i goraon long hem, nao ol wael anamol oli no save kakae yumi.​—⁠Namba 32:16; 1 Samuel 24:3; Sefanaea 2:⁠6.

Ol Man Blong Lukaot Long Sipsip We Oli Glad Long Wok Ya

3. ?Ol Kristin elda we tabu speret i putumap olgeta oli soem wanem fasin long ol sipsip blong God?

³ !I klia from wanem yumi ol sipsip blong God, yumi glad tumas! Ol elda we tabu speret i putumap olgeta, oli stap lidim yumi. Oli no “traem mekem bigfala bos long” yumi, oli no leftemap olgeta antap long yumi, mo oli no traem blong kam masta long bilif blong yumi. (Namba 16:13; Matyu 20:​25-28; 2 Korin 1:24; Hibrus 13:⁠7) Be, oli ol man blong lukaot long sipsip we oli gat lav. Mo oli folem advaes ya blong aposol Pita, se: “Yufala i mas lukaotgud long ol man we God i givim long yufala, olsem we man blong lukaot long sipsip i stap lukaotgud long ol sipsip blong hem. Yufala i mas lukaotgud long olgeta, we tingting blong yufala i glad blong mekem, olsem we God i wantem. I nogud yufala i mekem wok ya we tingting blong yufala i no glad. Mo i nogud yufala i mekem blong kasem pei long hem. Yufala i mas mekem from we tingting blong yufala i glad long hem. Bambae yufala i no kam olsem bigfala masta blong olgeta ya we God i putum olgeta long han blong yufala. Yufala i mas soemaot ol stret fasin long ol man blong yufala blong oli save folem, olsem we ol sipsip oli folem man blong lukaot long olgeta.” (1 Pita 5:​2, 3) Aposol Pol i talem long ol elda olsem hem, se: ‘Yufala i mas lukaotgud long yufala mo long ol man ya we tabu speret i putum olgeta oli stap finis long han blong yufala. Yufala i mas lukaot long ol man blong kongregesen blong God, olsem we man blong lukaot long sipsip i stap lukaot long ol sipsip blong hem. From we God i pemaot ol man ya finis long blad blong Pikinini blong hem.’ !Ol sipsip oli haremgud tumas taem ol man ya we tabu speret i putumap olgeta oli stap ‘lukaot long olgeta wetem lav’!​—⁠Ol Wok 20:​28-30.

4. ?Ol man oli save se Charles T. Russell i gat wanem fasin fren wetem ol sipsip?

⁴ Jisas i givim “ol man” we oli olsem “presen” long kongregesen. Samfala oli “pasta,” no ol man blong lukaot long sipsip, we oli stap lukaot long ol sipsip blong Jeova wetem lav. (Efesas 4:​8, 11; King James Version) Wan long ol man ya, hemia Charles T. Russell, faswan presiden blong Watch Tower Society. Oli kolem hem Pasta Russell from lav mo sore we hem i soem, taem hem i stap lukaot long ol sipsip aninit long Nambawan Man Blong Lukaot Long Sipsip, Jisas Kraes. Tede, Hed Kampani blong ol Wetnes blong Jeova i putumap ol Kristin elda. Mo oli lukaotgud blong no yusum ol nem olsem, “pasta,” “elda,” no “tija,” olsem haenem blong makem olgeta. (Matyu 23:​8-12) Ol elda tede oli keagud mo lukaotgud long ol sipsip blong Jeova, blong givhan long olgeta.

5. ?From wanem ol nyuwan oli mas savegud ol elda we tabu speret i putumap olgeta long Kristin kongregesen?

⁵ Olsem ol man blong lukaot long sipsip, ol elda oli mekem wan impoten wok blong givhan long ol nyuwan blong gohed moa long saed blong speret. Taswe, nyufala buk ya Save Blong Lidim Yu Long Laef We i No Save Finis i talem long pej 168, se: “Traem savegud ol elda long kongregesen. Long plante yia finis, oli bin folem save blong God long laef blong olgeta. From samting ya, oli kasem ol fasin we Baebol i talem, blong oli kam naf blong lidim kongregesen. (1 Timote 3:​1-7; Taetas 1:​5-9) Yu no mas fraet blong go luk wan long olgeta sipos yu nidim help long saed blong speret, blong winim wan fasin no tingting we i agensem loa blong God. Bambae yu faenem se ol elda oli folem advaes blong Pol, se: ‘Yufala i mas mekem tingting blong ol man ya we oli fraet, i strong bakegen. Yufala i mas givhan long olgeta we oli no gat paoa. Mo long olgeta man, yufala i mas mekem tingting blong yufala i longfala.’​—⁠1 Tesalonaeka 2:​7, 8; 5:⁠14.”

Taem Ol Nyuwan Oli Wantem Joen Long Wok Blong Prij

6. ?Wanem rod blong folem sipos wan Baebol studen i wantem kam wan man blong talemaot Kingdom?

⁶ Afta we wan Baebol studen i kasem save blong God mo i stap kam long ol miting, maet hem i wantem joen long wok blong talemaot Kingdom, wan prija blong gud nyus. (Mak 13:10) Long taem ya, Wetnes we i stap stadi wetem hem i mas luk presiden elda. Elda ya bambae i luk wan long ol elda long Sevis Komiti blong kongregesen mo wan narafala elda. Nao bambae tufala i go luk Baebol studen ya mo Wetnes we i stap stadi wetem hem. Ol samting we oli tokbaot bambae i stanap long buk ya Ol Rul Blong Mekem Minista Wok Blong Yumi, long pej 93 mo 94. Sipos tufala elda ya i luk se studen ya i bilif long ol stampa tijing blong Baebol mo i mekem laef blong hem i laenap wetem ol rul blong God, bambae tufala i talem long hem se hem i naf blong joen long wok blong talemaot gud nyus.a Taem hem i givim ripot blong wok we hem i mekem blong talemaot gud nyus, bambae oli raetem ripot ya long prapa kad blong hem, Rikod Blong Pablisa Long Kongregesen. Naoia, ripot blong wok blong prij blong nyufala pablisa ya i save joen wetem ripot blong ol milyan narafala hapi man blong ‘talemaot tok blong God’ long wol. (Ol Wok 13:⁠5) Nao bambae oli talemaot long kongregesen se hem i wan pablisa we i no baptaes yet.

7, 8. ?Olsem wanem blong halpem wan pablisa we i no baptaes yet long wok blong talemaot gud nyus?

⁷ Pablisa we i no baptaes yet, i nidim help blong ol elda mo ol narafala Kristin we oli bigman long saed blong speret. Eksampel, man we i lukaot long Buk Stadi we nyufala pablisa ya i joen long hem, hem i intres blong givhan long hem blong gohed moa long saed blong speret. Maet nyufala pablisa ya i faenem se i had blong toktokgud long wok blong prij long ol haos wanwan. (Ol Wok 20:20) Taswe, hem i glad we narafala i givhan long hem, antap moa, hemia we i bin mekem stadi wetem hem long buk ya Save. I stret blong soemaot rod long hem olsemia, from we Jisas Kraes i rerem ol disaepol blong hem blong go talemaot gud nyus.​—⁠Mak 6:​7-13; Luk 10:​1-22.

⁸ Sipos yumi wantem kam moagud long wok blong talemaot gud nyus, i impoten we yumi reregud fastaem. From samting ya, maet tufala pablisa oli save mekemrere mo lanem sam rod blong talemaot gud nyus, we oli stap long Kingdom Wok Blong Yumi evri manis. Taem tufala i statem wok blong prij, i gud se hemia we i gat moa save i toktok long faswan haos no long tu haos. Afta we hem i talem halo long kaen fasin, tufala pablisa i save joen blong givim wetnes. Taem tufala i prij tugeta blong sam wik, maet tufala i faenem sam visit mo maet tufala i save statem wan Baebol stadi tu long buk ya, Save Blong Lidim Yu Long Laef We i No Save Finis. Maet fastaem, pablisa we i gat moa save i lidim stadi ya. Nao biaen, hem i save givim stadi ya long hemia we i jes kam wan man blong talemaot Kingdom. !Bambae tufala pablisa ya i glad tumas sipos Baebol studen ya i soem tangkyu from save blong God!

9. ?Wanem rod i stret blong folem taem wan pablisa i wantem baptaes?

⁹ Taem pablisa ya we i no baptaes yet i stap gohed moa long saed blong speret, maet hem i prea blong givim laef blong hem long Jeova, mo i wantem tekem baptaes. (Skelem wetem Mak 1:​9-11.) Hem i mas talemaot samting ya long presiden elda blong kongregesen. Ale, elda ya bambae i mekem plan blong sam elda oli go storeyan wetem hem long ol kwestin long pej 171 kasem 218 blong buk ya Ol Rul Blong Mekem Minista Wok Blong Yumi. Oli save go luk man ya tri taem, blong askem ol kwestin long ol fo haf ya long hem. Sipos i gat naf elda, tri defren elda oli mas mekem samting ya. Sipos oli agri se pablisa ya we i no baptaes yet i gat stret save long ol tijing blong Baebol mo i nafgud long ol narafala fasin, bambae oli talem long hem se hem i save baptaes. Taem hem i givim laef blong hem long God mo i tekem baptaes, i olsem we hem i kasem ‘mak’ blong sevem hem.​—⁠Esikel 9:​4-6.

Kasem Ol Spesel Samting We Oli Nidim

10. Afta we wan man i stadi finis long olgeta haf blong buk ya Save mo i tekem baptaes, ?olsem wanem hem i save mekem save blong hem long Baebol i kam bigfala moa?

¹⁰ Afta we wan man i mekem Baebol stadi long olgeta haf blong buk ya Save mo i tekem baptaes, maet hemia we i stadi wetem hem i no nidim blong stadi long wan narafala buk bakegen wetem hem, olsem buk ya Joen Tugeta Long Wosip Blong Trufala God.b I tru, hemia we i jes baptaes bambae i lanem plante samting taem hem i stap rerem ol Kristin miting mo i joen oltaem long olgeta. Bambae hem i kasem moa save taem tosta blong hem long trutok i pusum hem blong ridim mo stadi long ol Kristin buk hem wan, mo blong tokbaot save blong Baebol wetem olgeta we oli gat sem bilif olsem hem. ?Be olsem wanem sipos hem i gat sam spesel nid?

11. (a) ?Olsem wanem Prisila mo Akwila, tufala i halpem Apolos? (b) ?Yumi save givim wanem help long wan yangfala we i bigman finis we i jes baptaes mo i stap tingting blong mared?

¹¹ Apolos ‘i savegud ol tok blong Baebol’ mo i tijim ol man long ol stret tijing long saed blong Jisas. Nating se i olsem, Prisila mo Akwila, we tufala i folem Kristin fasin longtaem finis, tufala i givhan long Apolos taem tufala i “tekem hem i go long haos blong tufala, nao tufala i talemaot Rod blong God i klia moa long hem.” (Ol Wok 18:​24-26; skelem wetem Ol Wok 19:​1-7.) From samting ya, maet wan yangfala we i bigman finis mo i jes baptaes, i stap tingting blong fren wetem wan boe no wan gel, mo mared. Wan we i stap folem Kristin rod longtaem moa long hem i save halpem hem blong faenem ol advaes long bisnes ya long ol buk blong Watch Tower. Eksampel, ol save we oli givhan bigwan long bisnes ya oli stap long Haf 7 blong buk ya Questions Young People Ask​—⁠Answers That Work.c Maet pablisa we i bin mekem Baebol stadi wetem nyuwan ya i tokbaot save ya wetem hem, nating se tufala i no stap mekem wan stadi oltaem.

12. ?Hasban mo waef we tufala i jes baptaes mo tufala i gat problem long mared blong tufala, tufala i save kasem wanem help?

¹² Tingbaot wan narafala eksampel. Maet wan hasban mo waef blong hem we tufala i jes baptaes, tufala i gat sam problem long fasin blong tufala blong folem ol rul blong God long mared blong tufala. Maet tufala i toktok wetem wan elda. Elda ya i save spenem sam sapa wetem tufala, blong tokbaot Baebol mo blong pulum tingting blong tufala i go long ol save long ol buk blong Watch Tower Sosaeti. Be, elda ya i no nidim blong statem wan Baebol stadi bakegen wetem tufala.

Sipos Wan Nyuwan i Mekem Sin

13. ?From wanem ol elda long kongregesen oli mas soem sore long man we i jes baptaes, we i mekem sin be i tanem tingting blong hem?

¹³ Ol elda oli folem eksampel blong Bigfala Man Blong Lukaot Long Sipsip, Jeova, we i talem se: “Mi wan bambae mi fidim ol sipsip blong mi, . . . hemia we i brekem wan bun blong hem, bambae mi fasem hem gud long kaliko. Mo hemia we i sik, bambae mi mekem hem i strong bakegen.” (Esikel 34:​15, 16; Efesas 5:⁠1) Folem tingting ya, disaepol Jud i talem se ol man blong God oli mas soem sore long ol tabu Kristin we oli no strong long bilif no oli mekem sin. (Jud 22, 23) I stret nomo we yumi ting se olgeta we oli folem Kristin rod longtaem finis, oli mas soem fasin we i gud moa long ol narafala. Taswe, i sua se yumi mas soem sore long hemia we i jes baptaes​—⁠wan pikinini sipsip​—⁠we i mekem sin be i tanem tingting blong hem. (Luk 12:48; 15:​1-7) From samting ya, ol elda we ‘oli wok olsem ol jaj long nem blong Jeova,’ oli mas soem fasin keagud wetem lav long ol sipsip olsem, mo stretem olgeta long kwaet fasin.​—⁠2 Kronikel 19:6; Ol Wok 20:​28, 29; Galesia 6:⁠1.d

14. ?Wanem stret rod blong folem sipos pablisa we i jes baptaes i mekem bigfala sin, mo olsem wanem blong givhan long hem?

¹⁴ Maet pablisa ya we i jes baptaes i gat fasin blong dring tumas alkol bifo. Ale, hem i foldaon wan no tu taem bakegen long fasin ya. No maet hem i winim fasin blong smok tabak we hem i yusum longtaem finis, be i foldaon long traem ya bakegen mo i smok haed wan no tu taem. Nating se nyufala brata ya blong yumi i prea long God blong i fogivim sin blong hem, hem i mas askem wan elda blong givhan long hem, blong mekem se sin ya i no kam olsem fasin blong hem oltaem. (Ol Sam 32:​1-5; Jemes 5:​14, 15) Taem hem i talemaot sin blong hem long wan elda, elda ya i mas traem blong stretem hem wetem sore. (Ol Sam 130:⁠3) Maet i naf nomo we elda ya i givim advaes blong Baebol blong givhan long hem blong folem stret rod bakegen. (Hibrus 12:​12, 13) Elda ya i mas tokbaot bisnes ya wetem presiden elda blong kongregesen, blong luk olsem wanem oli save givhan long nyuwan ya moa.

15. ?I gat nid blong mekem wanem taem samfala we oli jes baptaes oli mekem sin?

¹⁵ Oli mas mekem sam samting moa long samfala we oli mekem sin. Sipos ol man oli stap tokbaot sin blong man ya, no hem i mekem denja long ol sipsip, no i gat nara bigfala problem i kamaot, grup blong ol elda i save jusum tu elda blong faenemaot moa long bisnes ya. Sipos tufala i faenem se trabol ya i bigwan we i stret blong kot komiti i lukluk long hem, tufala i mas talem samting ya long grup blong ol elda. Nao, grup blong ol elda i save mekem wan kot komiti blong givhan long hemia we i mekem sin. Kot komiti i mas stretem hem long kaengud fasin. Oli mas traehad blong stretem hem wetem ol tok blong Baebol. Sipos hem i lesin long kot komiti we oli traehad blong stretem hem long kaen fasin, ale oli save luk sipos i moagud we oli no yusum hem long ol haf long platfom long ol miting long Haos Kingdom, mo sipos oli save letem hem blong givim ansa long ol miting.

16. ?Ol elda oli save mekem wanem blong givhan long hemia we i mekem sin?

¹⁶ Sipos hemia we i mekem sin i lesin, wan no tu elda long kot komiti oli save mekem plan blong visitim hem, blong givhan blong mekem bilif mo tingting blong hem long ol stret rul blong God i kam strong bakegen. Maet wanwan long tufala i save joen sam samtaem wetem hem long wok blong talemaot gud nyus. Samtaem, tufala i save storeyan wetem hem long saed blong Baebol. Maet oli yusum sam haf blong Wajtaoa mo Wekap! we oli stret long ol nid blong hem, be i no blong mekem Baebol stadi wetem hem we i gohed oltaem. Fasin ya blong keagud long hem wetem lav, bambae i mekem se hemia we i mekem sin i kasem paoa blong winim ol slak fasin blong hem biaen.

17. ?I stret blong mekem wanem sipos wan man we i baptaes i mekem nogud be i no tanem tingting mo lego rabis rod blong hem?

¹⁷ I tru, hem i no save gohed blong mekem sin we hem i no tanem tingting blong hem, mo mekem eskyus se hemia i from we hem i jes baptaes nomo. (Hibrus 10:​26, 27; Jud 4) Eniwan we i baptaes finis mo i mekem sin be i no tanem tingting mo i no lego rabis rod we hem i folem, kongregesen i mas putumaot hem. (1 Korin 5:​6, 11-13; 2 Tesalonaeka 2:​11, 12; 2 Jon 9-11) Taem i gat nid blong mekem olsem, grup blong ol elda bambae oli jusum wan kot komiti. Sipos oli mas putumaot hem, bambae oli talemaot sotfala mesej ya long kongregesen se: “Kongregesen i putumaot . . . .”e

Givhan Long Olgeta Blong Kam ‘Bigman Long Saed Blong Speret’

18. ?From wanem yumi save sua se Kristin we i jes baptaes mo ol narafala bambae oli gat plante moa samting blong lanem olwe long saed blong Jeova mo ol samting we hem i wantem?

¹⁸ Bighaf blong ol man blong God bambae oli gohed blong stap olsem ol sipsip. Mo tu, yumi haremgud tumas se, bambae yumi evriwan i save gohed olwe blong kam moa kolosap long Papa blong yumi long heven, from we oltaem bambae yumi lanem moa long saed blong hem mo ol samting we hem i wantem. (Eklesiastis 3:11; Jemes 4:⁠8) Ol taosen man we oli baptaes long Pentekos long yia 33 K.T.,f oli mas lanem plante moa samting biaen. (Ol Wok 2:​5, 37-41; 4:⁠4) I sem mak long olgeta we oli no man Jyu, we oli no gat save nating long Baebol. Samting ya i tru long olgeta we oli baptaes afta we Pol i givim tok blong hem long Ereopagas long Atens. (Ol Wok 17:​33, 34) Tede tu, olgeta we oli jes baptaes oli gat plante moa samting blong lanem. Mo oli nidim taem mo help, blong mekem tingting blong olgeta i strong blong gohed oltaem blong mekem samting we i stret long fes blong God.​—⁠Galesia 6:9; 2 Tesalonaeka 3:⁠13.

19. ?Olsem wanem blong givhan long olgeta we oli baptaes blong kam ‘bigman long saed blong speret’?

¹⁹ Evri yia, plante taosen man oli tekem baptaes mo oli nidim we narafala i givhan long olgeta blong oli kam ‘bigman long saed blong speret.’ (Hibrus 6:⁠1-3) Yu save givhan long samfala blong putum nyufala laef ya mo blong “folem trutok oltaem long laef blong olgeta,” taem yu toktok wetem olgeta, soem eksampel, mo soem ol rod we oli wokgud long wok blong talemaot gud nyus. (3 Jon 4; Kolosi 3:​9, 10) Sipos yu bin mekem wok blong talemaot gud nyus longtaem finis, maet ol elda oli askem yu blong givhan long wan nyufala man blong bilif. Maet oli askem yu blong joen wetem hem long wok blong talemaot gud nyus, no tokbaot sam poen blong Baebol wetem hem blong sam wik. Samting ya bambae i mekem bilif blong hem long God, tangkyu blong hem from ol Kristin miting, mo ol narafala samting olsem, i kam strong moa. Fasin fren we ol man blong lukaot long sipsip oli gat wetem ol sipsip, i olsem wan papa we i givim advaes mo wan mama we i kaengud. (1 Tesalonaeka 2:​7, 8, 11) Be sipos ol elda mo ol man blong givhan oli no plante, oli no save lukaot long evri samting we kongregesen i nidim. Yumi evriwan i olsem wan famle we olgeta memba blong hem oli stap givgivhan long olgeta. Wanwan long yumi i save givhan long olgeta we oli stap wosip wetem yumi. Maet yu wan yu save mekem wan samting blong leftemap tingting blong narafala, toktokgud wetem hemia we i harem nogud, mo givhan long olgeta we oli no strong.​—⁠1 Tesalonaeka 5:​14, 15.

20. ?Olsem wanem blong mekem save blong God i go long ol narafala mo blong keagud long ol sipsip blong Jeova wetem lav?

²⁰ Ol man oli nidim save blong God. Mo yu, olsem wan Wetnes blong Jeova, yu save joen blong talemaot save ya mo haremgud tumas from. Ol sipsip blong Jeova oli nidim fasin keagud wetem lav. Mo yu yu save wok wetem lav blong mekem se oli kasem samting ya. Bambae Jeova i blesem wok blong talemaot gud nyus we yu stap mekem, mo bambae hem i givim pei long yu, from we yu traehad wetem fulhat blong yu blong givhan long ol sipsip blong hem.

[Ol futnot]

?Bambae Yu Ansa Olsem Wanem?

◻ ?Jeova i stap mekem wanem fasin long ol sipsip blong hem?

◻ ?Wanem rod i stret blong folem taem ol nyuwan oli wantem joen long wok blong talemaot gud nyus?

◻ ?Olsem wanem olgeta we oli gat sem bilif oli save givhan long ol nyuwan we oli nidim spesel kea?

◻ ?Ol elda oli save givim wanem help long olgeta we oli mekem sin be oli tanem tingting blong olgeta?

◻ ?Olsem wanem yu save halpem wan we i jes baptaes blong i kam ‘bigman long saed blong speret’?

[Tok Blong Pija Long Pej 16]

Ol man oli savegud se Charles T. Russell i stap lukaot long ol sipsip wetem lav

[Tok Blong Pija Long Pej 18]

Ol man blong lukaot long sipsip we oli gat sore, oli soem kaengud fasin long ol sipsip blong God