?From Wanem Mi Wantem Luk Naes?

?BAMBAE YU YU MEKEM WANEM?

Yu traem tingbaot stori ya: Taem Julia i lukluk hem long mira, samting we hem i luk hemia se, hem i fatfat tumas. Hem i stap tingting se: “Mi mas lusum sam kilo.” Be ol famle mo ol fren blong hem, oli talem se: “Yu yu bunbun finis.”

Biaen, Julia i wantem lusum “2 kilo”. Be samting we hem i tingbaot, i save mekem bigfala problem long hem. Hem i wantem lego kakae blong sam dei . . .

Sipos yu yu Julia, ?bambae yu mekem wanem?

!STOP MO TINGTING!

I no rong blong wantem luk naes. Baebol i tokbaot sam man mo woman we bodi blong olgeta i naes, olsem Sera, Rejel, Abigel, Josef, mo Deved. Mo tu, Baebol i tokbaot Abisag se hem “i naes we i naes.”—1 King 1:4.

Plante yangfala, oltaem oli stap tingbaot fes, hea mo bodi blong olgeta. Be hemia i save mekem bigfala problem long olgeta. Yu traem tingbaot:

• Wan ripot i soemaot se, 58 pesen blong ol gel oli talem se oli fatfat tumas, be 17 pesen nomo oli tru.

• Wan narafala ripot i soemaot se, 45 pesen blong ol woman we oli bunbun, oli talem se oli hevi tumas.

• Sam yangfala we oli mekem sam samting blong lusum weit, oli kasem sik ya anorexia. Wan sik long tingting, we i mekem man i fraet blong kam fatfat, nao i no moa kakae, mo i stap kam bunbun we i bunbun.

Sipos yu luk saen blong sik ya long yu, no eni problem we i mekem se yu no save kakae, i gud yu lukaot rod blong halpem yu. Maet yu save tokbaot long wan fren we i bigman mo yu trastem hem. Baebol i talem se: “Wan tru fren i lavem yu oltaem nomo, mo hem i olsem wan brata we i rere blong givhan long taem blong trabol.”—Ol Proveb 17:17, NW.

!BESWAN SAMTING WE YU SAVE MEKEM!

Fasin blong man i save soemaot sipos man i naes no nogat. Yu traem tingbaot Absalom, we i pikinini blong King Deved. Baebol i talem se:

“I no gat wan narafala man long kantri ya we olgeta man oli save, we i naes tumas olsem Absalom. . . . I no gat wan samting nating i spolem bodi blong hem.”—2 Samuel 14:25.

Nating se i olsem, Absalom i wan man we i flas, i wantem hae nem, mo i no save obei. From samting ya, Baebol i tokbaot Absalom olsem wan man we i no fasgud long narafala, i agensem narafala, mo i man blong kilim man i ded.

From gudfala risen, Baebol i givim advaes long yumi se:

“Yufala i putum niufala laef ya blong yufala, olsem prapa klos blong yufala.”—Kolosi 3:10.

‘I nogud yufala i stap flasem bodi blong yufala . . .  be i gud yufala i mekem tingting blong yufala i stret long fes blong God.’—1 Pita 3:3, 4.

I stret nomo we yu wantem luk naes, be samting we i mekem yu luk naes moa, hemia ol fasin blong yu. Ol gudfala fasin, oli pulum narafala blong luk se yu naes moa, i bitim wan strong bodi we i naes. Wan gel we nem blong hem Felisia, i talem se: “Naes bodi i save pulum ae kwiktaem, be ol gudfala fasin blong yu, hemia nao samting we ol man bambae oli tingbaot moa, i bitim naes bodi.”

LUKLUKGUD LONG YU WAN

?Oltaem yu no glad taem yu luk fes mo bodi blong yu long mira?

?Samtaem yu stap tingbaot blong jenisim sam samting long fes, hea mo bodi blong yu?

Sipos i gat janis, ?bambae yu yu jusum weswan blong mekem long bodi blong yu? (Jusum hemia we yu wantem)

• AE

• SAES

• HEA

• BODI

• FES

• KALA BLONG SKIN

Sipos yu ansa yes long tufala faswan kwestin ya, mo yu jusum bitim tri samting long nambatri kwestin, i gud yu tingbaot se: Ol narafala oli luk se yu naes. I isi nomo blong yumi wari from, fes, hea mo bodi blong yumi.—1 Samuel 16:7.