Oli Mekem Promes Long Jehova

Samwe long tu manis afta we ol man Isrel oli lego Ijip, oli kamtru long hil ya Sinae, mo oli mekem kamp blong olgeta long stamba blong hil ya. Jehova i singaot Moses i kam antap long hil ya, mo i talem long hem se: ‘Mi nao mi sevem ol man Isrel ya. Sipos oli obei long ol loa blong mi, oli save kam ol spesel man blong mi.’ Moses i godaon long hil ya, mo i talemaot ol tok blong Jehova long ol man Isrel. ?Ale, oli mekem wanem? Oli ansa se: “Mifala i glad blong mekem evri samting we Jehova i talem.”

Moses i go antap long hil bakegen, nao Jehova i talem long hem se: ‘Long namba tri dei, bae mi kamdaon long hil ya mo toktok long yufala. Yu go talem long ol man se oli no mas traem kam antap long hil ya.’ Nao Moses i godaon bakegen, mo i talem long ol man Isrel se oli mas rere blong harem ol tok blong Jehova.

Long namba tri dei, ol man Isrel oli luk bigfala laetning, mo tanda i faerap, mo bigfala klaod i kavremap hil ya, mo oli harem bigfala noes blong pupu. Nao Jehova i kamdaon, i stap antap long hil ya, we bigfala faea i laet raonabaot long hem. Ol man Isrel oli fraet tumas we oli stap seksek from. Bigfala smok i kavremap hil ya, mo hil ya i stap seksek. Noes blong pupu i stap kam bigwan moa. Nao God i talem se: ‘Mi mi Jehova. Yu no mas wosipim wan narafala god.’

Nao Moses i go antap long hil ya bakegen, mo Jehova i givim ol loa we hem i mas talemaot long ol man Isrel. Ol loa ya oli soemaot stret rod blong wosipim hem, mo ol gudfala fasin we oli mas folem. Moses i raetemdaon ol loa ya mo i ridim olgeta long ol man Isrel. Nao oli promes se: “Mifala i glad blong mekem evri samting we Jehova i talem.” Oli mekem promes long God, ?be oli holem promes ya?