Lukluk i Go Long Promes Lan

Sinae Hil Blong Moses Mo Fasin Sore

TAEM yu tingbaot Hil Sinae, ating yu luk Moses long tingting blong yu. ?From wanem? From we Moses i bin tekem Loa blong God long wan hil long graon blong Sinae. ?Wanem hil ya? Ating hemia we yu luk antap.a

Long saot blong graon ya, samwe long medel blong ples we Red Si i kamaot long hem, i gat wan hil we i gat tu top blong hem. Ol tok blong Baebol we oli tokbaot Moses i stret nomo long bigfala ples ya. Oli kolem wan long tufala hil ya se Jebel Musa, we i min se “Hil blong Moses.”

Ol defren store long Baebol oli soemaot se nem ya i stret nomo. ?Yu yu tingbaot se Moses i stap lukaot long ol sipsip blong Jetro taem wan enjel i kamaot long hem long wan bus we i stap bon long faea? ?Weples ya? Baebol i talem se hemia long ‘hil ya blong God we nem blong hem, Horeb,’ we wan narafala nem blong hem, Hil Sinae. (Eksodas 3:​1-10; 1 King 19:​8) Afta we Moses i lidim ol man blong God oli kamaot long Ijip, hem i karem olgeta oli kam long ples ya. Eksodas 19:​2, 3 i talem se “oli mekem ples blong olgeta long botom blong hil ya Sinae. Nao Moses i go antap long hil ya, blong God i toktok wetem hem.”

Hemia i fastaem we Moses i go antap long Hil Sinae, mo hem i mekem moa wok bitim we hem i wokbaot long sotfala ples i go antap. Yumi ridim se: “Hae God i kamdaon, i stap long Hil ya, nao i singaot Moses blong i go antap long top blong Hil ya. Ale, hem i go antap.”​—Eksodas 19:​20.

Plante taosen turis tede oli bin traehad blong go antap folem ol step long naet blong kasem top blong hil, oli stap long ples ya blong luk san taem hem i girap, mo biaen oli kamdaon bakegen samwe long medel dei. Moses i no mekem olsem. God i talem long hem i se: “Yu kam antap long hil ya, yu kam luk mi. Mo taem yu stap long ples ya, bambae mi givim tu flat ston long yu, we mi raetemdaon olgeta loa long tufala finis.” Long taem ya “Moses i go antap moa long hil ya, i go insaed long klaod ya, mo i stap fote dei mo fote naet long ples ya.”​—Eksodas 24:​12-18.

Ale yumi save kasem save olsem wanem nem blong Moses i joen wetem hil ya, ?Be from wanem “fasin sore” i haf blong nem ya? Yes, taem Moses i go antap blong tekem Loa, ol man we oli stap daon long flat ples (ating long flat ples blong er-Raha we i stap long pija) oli folem wan krangke rod. Oli fosem brata blong Moses blong mekem wan god. Eron i talem se: “Ale yufala i go tekem olgeta earing ya we oli wokem long gol . . . yufala i tekem olgeta i kam long mi.” Taswe oli mekem wan pija blong bul long gol blong wosip long hem. Samting ya i mekem trufala God i kros mo plante taosen man oli ded from. (Eksodas 32:​1-35) Be God i soemaot fasin sore long Eron mo i fogivim hem. ?From wanem?

Tok blong God long Eksodas 32:​10 i soemaot se Hem i no luk Eron olsem stampa blong rabis fasin ya long Isrel. Mo taem trabol ya i kamaot, “olgeta we oli kamaot biaen long olfala Livae” oli jusum blong stap long saed blong God, i tru se olgeta wetem Eron. (Eksodas 32:​26) Ale nating se Eron i gat sam fol, God i soemaot fasin sore long hem long stampa blong Hil Sinae.

Biaen, Moses i talem long Jeova se hem i wantem save moa long Hem mo blong luksave bigfala paoa blong Hem. (Eksodas 33:​13, 18) Nating se Moses i no save luk fes blong God, Jeova i soemaot haf blong bigfala paoa blong Hem long Moses, Hem i talem se “mo man we mi jusumaot blong mi gat sore long hem, bambae mi gat sore long hem.” (Eksodas 33:​17–34:7) I stretgud long God blong soemaot fasin sore blong hem, from Baebol i yusum “fasin sore” plante taem we i joen wetem ol wok blong God wetem ol man Isrel, we hem i mekem wan promes long olgeta long Sinae.​—Ol Sam 103:​7-13, 18.

Ol man we oli go long Hil Sinae tede oli faenem wan haos blong ol man blong jyos i stap long stampa blong hem, samting ya i no stap pulum ol man blong tingbaot trufala wosip we Jeova i tijim Moses long hem antap long hil ya. Long defren fasin skul blong ples ya i wosip long ol pija. Hemia we yu luk long ples ya hem i “Rod i go long Paradaes.” Hem i stanap long buk we man ya blong jyos, Byzantine John Climacus i raetem. Afta we hem i spenem samwe long 40 yia long smol rum long haos blong ol man blong jyos, hem i kam wan haeman blong jyos ya mo i raetem store long saed blong rod ya blong go long heven we i olsem wan saen nomo. Be bambae yu luk long pija ya i soem se ol devel oli stap pulum sam haeman blong skul i godaon blong harem nogud blong olwe long helfaea. Pija ya i klia, be i no stanap long Baebol.​—Eklesiastis 9:​5, 10; Jeremaea 7:​31.

I defren olgeta long gyaman tijing ya, trutok blong God ya we i gat olgeta paoa i se “fasin blong mi [Jeova], oltaem mi gat sore long man, mo mi stap givhan long olgeta long gladhat blong mi. Mi mi no save kros kwik. Oltaem mi stap laekem man tumas, mo oltaem mi stap holemstrong promes blong mi.” (Eksodas 34:​6) Moses i kam kolosap long God ya we i gat sore long Hil Sinae.

[Futnot]

[Foto Credit Line Blong Pija Long Pej 8]

Pictorial Archive (Near Eastern History) Est.

[Foto Credit Line Blong Pija Long Pej 9]

Pictorial Archive (Near Eastern History) Est.

[Foto Credit Line Blong Pija Long Pej 9]

Pictorial Archive (Near Eastern History) Est.