Dongki Blong Balam i Toktok

Ol man Isrel oli stap klosap 40 yia long draeples. Oli winim plante bigfala taon finis. Naoia, oli stap long level ples blong Moab, long is saed blong Jodan Reva. I stret taem nao blong oli go long Promes Lan. Be Balak we i king blong Moab, hem i fraet se bambae oli winim kantri blong hem tu. Ale, hem i singaot wan man we nem blong hem Balam, i kam long Moab, blong i mekem trabol i kam long ol man Isrel.

Be Jehova i talem long Balam se: ‘Yu no mas singaot trabol i kam long ol man Isrel.’ Ale, Balam i talem se bambae hem i no go. Nao King Balak i singaot Balam bakegen, mo i promes se bambae i givim eni samting we hem i wantem. Be Balam i no go. Nao God i talem long Balam se: ‘Yu save go, be bae yu talemaot samting ya nomo we mi mi talem.’

Ale, Balam i sidaon long dongki blong hem, mo i raed i go long saot, blong i go kasem Moab. Hem i mekem plan se bambae hem i singaot trabol i kam long ol man Isrel, nating we Jehova i talem se hem i no mas mekem olsem. Long rod, enjel blong Jehova i kamtru long hem tri taem. Balam i no save luk enjel ya, be dongki blong hem i luk. Fastaem, dongki i tanem hem, i gowe long rod, i go insaed long wan garen. Namba tu taem, dongki i go fas long stonwol mo i skwisim leg blong Balam long hem. Namba tri taem, dongki i ledaon long medel blong rod. Long trifala taem ya, Balam i wipim dongki ya wetem stik blong hem.

Nao Jehova i mekem we dongki ya i toktok, i askem long Balam se: ‘?From wanem yu stap wipim mi?’ Balam i talem se: ‘!From we yu mekem ol man oli ting se mi mi krangke! Sipos mi holem wan naef blong faet naoia, bae mi kilim yu yu ded.’ Dongki i talem se: ‘!Yu luk! Plante yia finis, mi karem yu i go olbaot. ?Be yu tingbaot wan taem we mi mi mekem olsem long yu?’

Nao Jehova i mekem se Balam i luk enjel ya. Enjel i talem se: ‘Jehova i givim woning long yu finis, se yu no mas singaot trabol i kam long ol man Isrel.’ Balam i talem se: ‘Sore, mi mi mekem i no stret. Bae mi gohom.’ Be enjel i talem se: ‘Yu save go long Moab, be yu mas talemaot ol tok ya nomo we mi mi talem long yu.’

?Yu ting se Balam i lanem wan samting? Nogat. Hem i traem tri taem blong singaot trabol i kam long ol man Isrel, be evri taem Jehova i mekem se hem i talemaot blesing nomo long olgeta. Biaen, ol man Isrel oli go mekem faet long ol man Moab, mo Balam i ded long faet ya. ?Yu ting se i moagud sipos Balam i lesin long Jehova?