Jisas i Wokbaot Antap Long Wota

Jisas i mekem sikman i kam gud bakegen mo i mekem dedman i laef bakegen. Antap long samting ya, hem i save stopem win mo ren. Afta we Jisas i prea antap long wan hil, hem i lukluk i godaon long Si blong Galili, mo hem i luk se wan bigfala win i girap we i mekem se wota i raf we i raf. Ol aposol oli stap long bot blong olgeta, mo oli stap traehad blong pul agensem win. Ale, Jisas i kamdaon long hil, mo i wokbaot antap long wota blong go long olgeta. Taem ol aposol oli luk we hem i stap kam, oli fraet. Be Jisas i talem long olgeta se: “Yufala i no fraet. Mi nomo ya.”

Pita i talem se: ‘Masta, sipos i tru se yu, yu talem long mi blong mi wokbaot antap long wota, mi kam long yu.’ Jisas i se: “!Yu kam!” Ale, Pita i kamaot long bot mo i wokbaot i go long Jisas. Be taem hem i kam klosap long Jisas, hem i luk we win i strong mo solwota i raf we i raf, nao hem i fraet mo i stat blong draon. Hem i singaot se: “!Masta, yu sevem mi!” Jisas i holem han blong hem mo i talem se: ‘?From wanem yu gat tu tingting? Bilif blong yu i smol.’

Taem Jisas mo Pita i klaem i gobak long bot, wantaem nomo bigfala win ya i stop. ?Yu ting se ol aposol oli harem olsem wanem? Oli talem se: ‘!Tru ya, yu yu Pikinini blong God!’

I gat wan narafala taem bakegen we Jisas i kwaetem win mo solwota. Taem ol aposol oli stap pul i go long narasaed blong lek ya, Jisas i stap slip long bot. Nao wan bigfala win i girap. Solwota i raf tumas, mo ol bigbigfala wef oli stap kam insaed long bot. Ol aposol oli wekemap Jisas, oli singaot se: ‘!Tija, bae yumi ded! !Plis yu halpem mifala!’ Jisas i girap, mo i tok long solwota i se: “!Yu stap kwaet!” Wantaem nomo, win i godaon mo solwota i kam kwaet. Nao Jisas i talem long ol aposol se: “?Yufala i no gat bilif yet?” Oli taltalem long olgeta se: ‘!Win mo ol wef tu oli obei long hem!’ Jisas i tijim ol aposol se sipos oli trastem hem fulwan, bambae oli no fraet long wan samting.