Jisas i Gobak Long Heven

Jisas i mitim ol man blong hem long Galili, mo i talem wan tok we i impoten tumas long olgeta, i se: ‘Yufala i mas go pulum ol man blong olgeta kantri oli kam disaepol blong mi. Yufala i tijim olgeta long ol samting we mi mi tijim yufala long hem, mo yufala i baptaesem olgeta.’ Nao hem i mekem wan promes se: ‘Yufala i mas tingbaot se, bae mi stap wetem yufala oltaem.’

Long ol 40 dei afta we Jisas i laef bakegen, hem i kamtru long plante handred disaepol long Galili mo Jerusalem. Hem i tijim olgeta long ol impoten save, mo i mekem plante merikel. Nao hem wetem ol aposol oli joen laswan long Hil Blong Ol Oliftri. Jisas i talem long olgeta se: ‘Yufala i no mas aot long Jerusalem. Yufala i wet blong kasem samting we Papa i promes blong givim.’

Be oli no kasem save long tok ya, ale, oli askem se: ‘?Bae yu yu kam King blong Isrel naoia?’ Jisas i ansa se: ‘I no stret taem yet blong Jehova i mekem mi mi kam King. I no longtaem, bae yufala i kasem paoa blong tabu spirit, nao yufala i witnes blong mi. Yufala i mas go prij long Jerusalem, Judia, Sameria, gogo yufala i kasem olgeta ples long wol.’

Ale sloslo, Jisas i go antap long skae mo wan klaod i kam kavremap hem. Ol disaepol oli stap lukluk i go antap, be hem i lus finis.

Nao oli aot long Hil Blong Ol Oliftri, oli gobak long Jerusalem. Oltaem oli stap mekem miting mo prea long wan rum antap long wan haos. Oli stap wet blong Jisas i talem long olgeta ol samting we oli mas mekem.