Ol Disaepol Oli Kasem Tabu Spirit

Ten dei afta we Jisas i gobak long heven, ol disaepol oli kasem tabu spirit. Hemia long lafet blong Pentekos long yia 33 K.T., taem plante man oli aot long ol defren kantri oli kam long Jerusalem blong mekem lafet ya. I gat samwe long 120 disaepol oli joen long wan rum antap long wan haos, nao wan samting i hapen we i mekem olgeta oli sek. Oli luk wan samting olsem wan smol faea we i laet antap long hed blong evri disaepol, mo oli stat blong toktok long ol defdefren lanwis. Mo tu, i gat wan bigfala noes insaed long haos ya, olsem win we i blu strong.

Ol man blong ol narafala kantri we oli stap long Jerusalem, olgeta tu oli harem noes ya, nao oli ron i go long haos ya blong luk wanem i hapen. Oli sek taem oli harem ol disaepol oli toktok long ol defren lanwis, oli se: ‘Hemia ol man Galili ya. ?Olsem wanem oli save toktok long ol lanwis blong yumi?’

Nao Pita mo ol narafala aposol oli stanap long fored blong ol man. Pita i tokbaot olsem wanem oli kilim Jisas i ded mo Jehova i mekem hem i laef bakegen, i se: ‘Naoia Jisas i stap sidaon long raet saed blong God long heven, mo hem i givim tabu spirit long yumi, olsem we hem i promes. Taswe, yufala i luk mo harem ol merikel ya.’

Tok blong Pita i tajem hat blong ol man nao oli askem se: “?Bambae mifala i mekem wanem?” Hem i se: ‘Yufala i mas tanem tingting blong yufala mo baptaes long nem blong Jisas. Nao bae yufala i kasem tabu spirit, olsem wan presen.’ Long dei ya, samwe long 3,000 man oli baptaes. Stat long taem ya, namba blong ol disaepol long Jerusalem i kam antap kwiktaem. Tabu spirit i givhan long ol aposol blong oli stanemap plante moa kongregesen, blong oli save tijim ol disaepol long olgeta samting we Jisas i bin talem long olgeta.