!Jeova i Rul Long Mifala!

“Mifala i mas obei long God, [we hem i rul long mifala, NW], mifala i no save obei long ol man nomo.”​—⁠OL WOK 5:⁠29.

1, 2. ?Sipos ol man oli mekem wan loa we i agens long loa blong God, ol Wetnes blong Jeova oli mekem wanem we i sem mak long ol aposol bifo?

YIA, hem i 33 K.T.a Ples, hem i kot blong ol man Jyu, Sanhedrin. Twelef man oli fesem hae kot ya, mo Jeova God i no blokem samting ya. Oli rere blong jajem ol aposol blong Jisas Kraes. Yu harem, hae pris i talem se: ‘Mifala i tok strong long yufala finis se bambae yufala i no moa yusum nem blong man ya blong tijim ol man. Be yufala i mekem se Jerusalem i fulap long ol tijing blong yufala.’ Nao Pita mo ol narafala aposol oli talem se: “Mifala i mas obei long God, [we hem i rul long mifala, NW], mifala i no save obei long ol man nomo.” (Ol Wok 5:​27-29) I olsem we oli talem se: “!Jeova i rul long mifala!”

² Yes, Jeova i rul long ol trufala man blong Jisas. Ol Wok Blong Ol Aposol i soemaot samting ya, i klia nomo. Taem hem i stap long Rom, long 61 K.T., ‘dokta ya Luk, we oli laekem hem tumas,’ hem i raetem buk ya. (Kolosi 4⁠:14) Sem mak tede, sipos ol man oli mekem wan loa we i agens long loa blong God, be ol man blong Jeova oli obei long God nomo we i rul long heven, antap long olgeta. ?Be buk blong Ol Wok i lanem yumi long wanem narafala samting? (Taem yufala wanwan i stadi long Wajtaoa ya, i gud we yufala i ridim ol vas blong Ol Wok we mifala i raetem long ol braket.)

Jisas i Jusumaot Sam Man Blong Oli Wetnes

3. ?Taem ol man blong Jisas oli ‘baptaes long tabu speret,’ wanem samting i bigfala moa long laef blong olgeta, i winim ol narafala samting?

³ Ol aposol oli save stanap strong long saed blong God from we naoia oli kam strong long saed blong speret. ?Be wanem i hapen bifo? Kraes i ded long pos, mo olgeta oli save se hem i laef bakegen. (1:​1-5) Taem Jisas i laef bakegen gogo 40 dei i finis, Jisas i “stap soemaot hem long olgeta.” Hem i tekem bodi olsem man, nao hem i stap tijim olgeta long ol trutok blong Kingdom. Hem i talem long ol disaepol blong hem se oli mas wet long Jerusalem blong kasem baptaes “long Tabu Speret.” Afta, wok blong prij bambae i bigfala samting long laef blong olgeta, i winim ol narafala samting. Ol Wetnes blong Jeova tede tu oli tingting olsemia long wok blong prij.​—⁠Luk 24:​27, 49; Jon 20:​19 kasem 21:⁠24.

4. ?Taem ol man blong Jisas oli kasem tabu speret, bambae oli mas mekem wanem?

⁴ Ol aposol oli no baptaes long tabu speret yet. Taswe oli no gat stret tingting, oli ting se wan gavman blong wol nomo bambae i finisim strong rul blong ol man Rom. From samting ya, oli askem long Jisas se: “?Masta, i stret taem nao blong yu mekem we ol man Isrel oli gat king blong olgeta bakegen, no i no taem blong hem yet?” (1:​6-8) I olsem we Jisas i talem ‘no’ long olgeta, from we ‘i no blong olgeta i save ol taem ya mo ol dei ya we Papa blong hem nomo i gat raet blong jusumaot.’ ‘Taem tabu speret i kam kasem olgeta’ bambae hem i givim paoa long olgeta blong talemaot Kingdom blong God, we bambae i stanap long heven nomo. Kingdom ya, bambae i no stap long wol ya. Bambae oli mas prij long Jerusalem, mo long olgeta ples long Judia, mo Sameria, “gogo i finisim olgeta ples long wol.” Long ol las dei ya, tabu speret i stap givhan long ol Wetnes blong Jeova blong mekem wok ya, ale oli mekem gogo oli kavremap olgeta ples long wol.

5. ?Olsem wanem Jisas bambae i mas kambak long sem fasin we olgeta oli luk, taem hem i go antap long heven?

⁵ Jisas i jes talem finis long olgeta se oli mas prij long olgeta ples long wol, nao hem i stat go antap long heven. Hem i lego ol disaepol blong hem, ale bodi blong hem i stap go antap. Biaen Jisas i go insaed long ples blong Hae God we i rul long hem long heven. Nao hem i stap wok long ples blong ol speret man. (1:​9-11) Taem wan klaod i kam kavremap Jisas, ol aposol oli no moa save luk hem, nao hem i lego bodi blong hem we i olsem bodi blong man. Wantaem nomo, tufala enjel i kam stanap wetem ol aposol, nao tufala i talem se bambae Jisas ‘i mas kambak bakegen long sem fasin ya we olgeta oli luk, taem hem i go antap long heven.’ Mo samting ya i kamaot tru. Ol disaepol blong Jisas nomo oli luk hem taem hem i go antap long heven. Mo ol Wetnes blong Jeova nomo oli luksave taem we hem i kambak bakegen, we ol man oli no save luk hem.

Jeova i Mekem Wan Jus

6. ?Olsem wanem oli jusum wan man blong tekem ples blong Judas Iskariot?

⁶ I no longtaem, ol aposol oli kambak bakegen long Jerusalem. (1:​12-26) Oli go long wan rum antap (ating long haos blong mama blong Mak, Meri), nao leven trufala aposol ya oli stap joen oltaem long prea wetem ol brata blong Jisas. Mo ol narafala disaepol blong Jisas, wetem mama blong Jisas, Meri, olgeta tu oli stap prea wetem olgeta. (Mak 6:3; Jemes 1:⁠1) ?Be hu bambae i “tekem ples” blong Judas? (Ol Sam 109:⁠8) I gat samwe long 120 disaepol oli stap taem God i jusumaot wan narafala man blong tekem ples blong man ya we i letem Jisas i go long han blong ol enemi blong hem. Nao taem God i jusumaot man ya, namba blong ol aposol i kasem twelef bakegen. Hem i mas jusumaot wan man we hem i wan disaepol blong Jisas, taem Jisas i stap mekem minista wok blong hem long wol. Mo hem i mas wan man we i luk Jisas, taem hem i laef bakegen long ded. Mo tu, man ya i mas bilif strong se Jeova nomo i rul long hem. Ale olgeta oli prea, nao oli mekem samting we i olsem oli sakem daes, blong jusumaot wan blong tufala ya, Matias no Josef Basabas. God i lidim bisnes ya, ale, nem blong Matias i kamaot.​—⁠Proveb 16:33.

7. (a) ?Olsem wanem Judas i “pem wan pis graon long mane ya we i winim long samting nogud ya we i wokem”? (b) ?Judas i ded long wanem fasin?

⁷ Judas Iskariot i no ona long Jeova olsem we hem i rul long hem. !Hem i letem Pikinini blong God i go long han blong ol enemi blong hem, blong kasem tate selva mane nomo! Biaen Judas i givimbak mane ya long ol jif pris. Be Pita i talem se gyaman fren ya blong Jisas i “pem wan pis graon long mane ya we i winim long samting nogud ya we i wokem.” ?From wanem Pita i talem olsem? From we mane we oli yusum blong pem pis graon we oli kolem “graon blong blad,” Judas i givim, mo hem tu i givim risen blong pem pis graon ya. Pis graon ya hem i wan flat ples kolosap long ples we oli kolem Hinom, afsaed long stonwol blong Jerusalem, long saed i go long saot. Judas i spolem gudfala fasin fren we hem i gat wetem God we i rul long hem long heven. Nao Judas i “go hangem hem long rop, blong i ded.” (Matyu 27:​3-10) Maet rop ya no han blong tri i brok, from we ‘hem i foldaon long ples ya.’ Ating hem i foldaon long sam ston we oli sap, from we ‘bel blong hem i brok, nao wantaem nomo gat blong hem i kamaot.’ !Neva i mas gat wan long yumi we hem i wan gyaman brata!

!Tabu Speret i Fulap Long Olgeta!

8. ?Ol disaepol blong Jisas oli kasem baptaes long tabu speret long wanem taem? ?Speret ya i gat wanem paoa long olgeta?

⁸ ?Olsem wanem long promes we Jisas i mekem long olgeta se bambae oli mas baptaes long tabu speret? Samting ya i kamaot ten dei biaen we Jisas i go antap long heven, long Pentekos, long 33 K.T. (2:​1-4) !Hemia wan gudfala taem ya! !Olgeta oli harem gud tumas! Traem tingbaot: Samwe long 120 disaepol oli stap long wan rum antap, ‘nao wantaem nomo, i gat wan noes i kamaot long skae, we i olsem wan bigfala win i blu, nao noes ya i kavremap olgeta ples long haos ya we oli stap sidaon insaed long hem.’ I no gat win, be noes ya i olsem wan bigfala win i blu. Nao olgeta ya oli luk wan samting we i “olsem faea i laet.” Faea ya i seraot, nao laet blong hem i kam kasem evri disaepol mo aposol. “Mo olgeta evriwan, Tabu Speret i kam fulap long olgeta, nao oli stat toktok long ol lanwis blong ol narafala man.” Taem oli kasem baptaes ya, long semtaem tabu speret i makemaot olgeta, i olsem we i promes long olgeta se bambae oli kasem sam bigfala samting long saed blong speret.​—⁠Jon 3:​3, 5; 2 Korin 1:​21, 22; 1 Jon 2:⁠20.

9. ?Ol disaepol we tabu speret i fulap long olgeta, oli stap tokbaot wanem?

⁹ Long Jerusalem, i gat ol man Isrel oli stap, mo ol man we oli ‘kamaot long olgeta ples long wol,’ nao oli kam joen wetem ol man Isrel long Jerusalem. Samting we i kamaot long dei ya i gat paoa long olgeta evriwan ya. (2:​5-13) Olgeta oli sapraes tumas, oli seksek, nao oli askem se: ‘?Olsem wanem yumi evriwan i stap harem we olgeta i stap toktok long ol lanwis blong yumi olsem?’ Oli stap toktok long ol lanwis olsem lanwis blong ol man Midia (long saed i go long is blong Judia), Frijia (long Esia Maena), mo Rom (long Yurop). Ol disaepol ya oli stap toktok long ol lanwis, oli stap talem “ol bigbigfala wok ya we God i mekem.” Nao plante man we oli stap lesin oli sapraes tumas. Be samfala oli stap laf long olgeta ya we speret i kam finis long olgeta, oli talem se: ‘A, ol man ya oli drong ya.’

Pita i Givim Wan Gudfala Wetnes

10. ?Samting we i kamaot long Pentekos long 33 K.T. i mekem wanem profet tok i kamtru? ?Wanem samting i kamaot tede we i kolosap sem mak?

¹⁰ Long fas tok blong Pita, hem i soemaot se ol man ya oli no drong, from we hemia naen kilok long moning nomo, i eli tumas blong oli drong. (2:​14-21) Be samting ya we i kamaot i mekem promes blong God i kamtru. God i promes blong kafsaedem tabu speret long ol man blong hem. Hem i putum long tingting blong Pita blong tokbaot taem blong yumi tu. Taswe Pita i ademap tok ya se “long taem ya we las dei blong wol i kam kolosap,” mo ‘bambae oli save talemaot ol tok we God i talem long olgeta.’ (Joel 2:​28-32) Bifo long bigfala dei blong hem, Jeova bambae i mekem ol samting blong sapraes long skae. Mo bambae hem i mekem ol saen long paoa blong hem long wol ya tu. Sipos man i singaot God long nem blong hem nomo, bambae God i sevem hem. Tede tu, God i givim tabu speret long olgeta we hem i makemaot olgeta. From samting ya, oli save ‘talemaot ol tok we God i talem long olgeta’ long ful paoa mo waes blong olgeta.

11. ?Ol man Isrel oli mekem wanem long Jisas? ?Mo God i mekem wanem long Jisas?

¹¹ Nao Pita i gohed blong talemaot Mesaea se hem i hu. (2:​22-28) God i soemaot long ol man Isrel se Jisas i Mesaea, from we God i givim paoa long hem blong i mekem ol saen mo ol merikel, mo samting blong sapraes long fes blong olgeta. (Hibrus 2:​3, 4) Be ol man Isrel oli girap, oli kilim hem i ded, olsem we oli putum hem ‘long han blong ol man blong brekem loa,’ blong oli nilim hem long pos. Ol man blong brekem loa i minim ol man Rom, from we oli no obei long loa blong God. Taem God i putum Jisas long han blong olgeta, “hem i mekem olsem from we hem i wantem mekem olsem, mo from we hem i save ol samting we bambae oli save kamaot.” Hemia i min se samting we i kamaot long Jisas, i stret nomo long wil blong God. Be God i mekem Jisas i laef bakegen long ded. Mo hem i mekem se bodi blong hem i lus, blong i no kam rotin mo i no sting.​—⁠Ol Sam 16:​8-11.

12. ?Deved i luk wanem samting we bambae i kamaot? ?Blong kasem laef, oli mas mekem wanem?

¹² Taem Pita i gohed long tok blong hem, hem i makem long tingting blong olgeta ol profet tok we oli talemaot Mesaea. (2:​29-36) Hem i talem se Deved i luk wan samting we bambae i kamaot, nao hem i tok. Hem i luk we God i mekem nambawan Pikinini blong hem, hemia Mesaea Jisas, i laef bakegen long ded. God i leftemap hem i go antap, blong i stap long raet saed blong God. Nao Jisas i kafsaedem long olgeta tabu speret ya we Papa blong hem i givim long hem. (Ol Sam 110:⁠1) Olgeta we oli stap lesin long Pita, oli ‘stap luk mo oli stap harem’ wok blong tabu speret ya, from we oli luk samting olsem faea i laet, i seraot, i kam kasem evri man. Mo oli harem we ol man oli stat toktok long ol lanwis blong ol narafala man. Mo tu, Pita i soemaot long olgeta se blong kasem laef, oli mas ona long Jisas olsem Masta mo Mesaea blong olgeta.​—⁠Rom 10:9; Filipae 2:​9-11.

Jeova i Mekem Wok Blong Olgeta i Karem Frut

13. (a) ?Blong tekem baptaes long prapa fasin, ol man Isrel mo olgeta we oli joen wetem olgeta oli mas luksave mo bilif long wanem? (b) ?Long dei ya, hamas man oli tekem baptaes? ?Mo biaen oli mekem wanem insaed long Jerusalem?

¹³ !Tok blong Pita i stret nomo long olgeta, mo i gat paoa! (2:​37-42) Taem ol man oli harem tok blong hem oli harem we i stikim hat blong olgeta, from we oli bin agri wetem ol man we oli kilim Mesaea i ded. Ale Pita i talem long olgeta se: “Yufala i mas tanem tingting blong yufala from ol sin blong yufala, mo yufala evriwan i mas baptaes long nem blong Jisas Kraes, blong bambae God i tekemaot ol sin blong yufala. Nao bambae God i givim Tabu Speret ya long yufala.” Ol man Isrel mo ol man blong ol narafala nesen we oli joen wetem olgeta, oli ona mo obei finis long Jeova olsem we hem i God blong olgeta, mo oli save se oli nidim tabu speret blong hem. Nao oli mas tanem tingting blong olgeta from ol sin blong olgeta, mo oli mas bilif se Jisas i Mesaea. Nao oli save baptaes long nem blong Papa, long nem blong Pikinini blong hem, mo long nem blong tabu speret. Samting ya i min se oli luksave mo oli ona long wok blong olgeta. (Matyu 28:​19, 20) Taem Pita i talemaot ol samting ya long ol man Isrel wetem ol narafala man we oli joen long olgeta, hem i yusum samting olsem wan ki we Jisas i givim long hem. Hemia i fastaem we long saed blong speret, hem i openem doa long ol man Isrel we oli bilif, blong oli kasem moa save mo oli gat jans blong go insaed long Kingdom blong heven. (Matyu 16:19) !Long dei ya, 3,000 man oli tekem baptaes! !Traem tingbaot! !Bigfala kampani ya blong ol Wetnes blong Jeova oli stap prij long wan smol ples nomo, long Jerusalem!

14. ?From wanem olgeta we oli bilif oli “gat raet blong yusum ol samting blong evri man”? ?Olsem wanem oli mekem olsem?

¹⁴ Plante man oli kam long ol ples we oli longwe long Jerusalem. Olgeta oli no gat plante samting blong olgeta, blong oli save stap longtaem. Be oli wantem tumas blong lanem moa long saed blong nyufala bilif blong olgeta, mo blong prij long ol narafala. Taswe ol faswan disaepol ya blong Jisas oli soemaot lav, ale oli givgivhan long olgeta, olsem ol Wetnes blong Jeova tede oli mekem. (2:​43-47) Oli joen gud long wan kampani nomo, nao “olgeta evriwan oli gat raet blong yusum ol samting blong evri man.” Samfala oli salem graon blong olgeta blong oli seraot ol mane we oli kasem, i go long olgeta we oli sot long sam samting. From samting ya, kongregesen i gat gudfala stat. Mo evri dei, ‘Jeova i stap sevem sam moa man, i stap joenem olgeta long kampani ya blong olgeta.’

Wan Merikel Mo Frut Blong Hem

15. ?Taem Pita mo Jon tufala i stap go insaed long haos blong prea, wanem samting i kamaot? ?Taem ol man oli luk samting ya, oli tingting olsem wanem?

¹⁵ Jeova i stap sapotem ol man blong Jisas from we hem i givim paoa long olgeta blong oli save wokem “plante saen.” (3:​1-10) Wan dei, long tri kilok long aftenun, Pita mo Jon tufala i stap go insaed long haos blong God. Hemia haoa blong prea we oli joenem wetem sakrafaes we oli mekem long sapa. Nao i gat wan man we i no save wokbaot, from we taem hem i bon, leg blong hem i nogud. Hem i stap kolosap long doa ya blong haos blong God, we nem blong hem Doa we i Flas Gud. Nao hem i “stap askem mane long ol man” we oli go insaed long haos ya. Taem hem i askem mane long Pita mo Jon, Pita i talem long hem se: ‘Mi mi no gat selva, mi no gat gol. Be wan samting we mi gat, mi givim long yu: Long nem blong Jisas Kraes, man Nasaret, mi talem long yu, yu girap, yu wokbaot.’ !Nao wantaem nomo, leg blong man ya i kamgud! Nao hem i girap, i go insaed long haos blong God, “we hem i stap wokbaot, i stap jyajyam, i stap presem God.” Nao olgeta man we oli luk merikel ya, ‘oli seksek gud long samting ya we i kamtru long man ya.’ Ating samfala oli tingbaot tok ya we oli talemaot long taem bifo, i se: “Man we hem i no save wokbaot, bambae hem i klaemap olsem wan dia.”​—⁠Aesea 35:⁠6.

16. ?Olsem wanem ol aposol oli kasem paoa blong mekem man we i no save wokbaot i kamgud bakegen?

¹⁶ ?Olgeta man we oli sapraes tumas, oli resis i kam long vranda blong haos blong God long saed i go long is, nem blong hem Vranda blong Solomon. Long ples ya, Pita i wetnes bakegen. (3:​11-18) Hem i soemaot se God nomo i givim paoa ya long ol aposol, blong oli mekem man ya i kamgud bakegen. Paoa ya, God i givim tru long Man blong hem we i leftemap hem finis, hemia Jisas. (Aesea 52:13 kasem 53:12) Ol man Isrel oli talem finis long fes blong Paelat, se oli no wantem Jisas ya, ‘Man we i Tabu, Man we i Stret.’ Be biaen, Jeova i mekem hem i laef bakegen long ded. Taem ol man ya mo ol haeman blong olgeta oli kilim Jisas i ded, oli no save se oli stap kilim Mesaea ya i ded. Be hemia i rod we God i yusum blong mekem ol profet tok we hem i talemaot bifo oli kamtru. Hem i talemaot finis we “bambae Mesaea blong hem i mas harem nogud long bodi blong hem.”​—⁠Daniel 9:⁠26.

17. (a) ?Ol man Isrel oli mas mekem wanem? (b) ?I stat long taem we ‘God i sanem Kraes i kam’ kam kasem naoia, wanem i stap kamaot?

¹⁷ From samting we ol man Isrel oli mekem long Mesaea ya, Pita i talem long olgeta wanem oli mas mekem. (3:​19-26) Oli mas “tanem tingting blong olgeta,” mo oli mas sore from ol sin we oli bin mekem. Nao oli mas ‘tanraon,’ jenisim laef blong olgeta, mo folem narafala rod. Sipos oli soemaot se oli bilif long Jisas, we hem i Mesaea, mo long sakrafaes we hem i givim blong pemaot ol man, Jeova bambae i mekem olgeta oli harem gud, from we hem bambae i fogivim ol sin blong olgeta. (Rom 5:​6-11) Hem i pulum ol man Isrel blong tingbaot promes we God i mekem finis long ol olfala blong olgeta bifo. God i bin talem long Ebraham se: “Bambae mi mi yusum laen blong yu blong mekem i gud long olgeta man long wol.” Ale, God i sanem man blong hem, Mesaea, i kam long ol man Isrel fastaem, blong sevem olgeta we oli tanem tingting blong olgeta, nao oli lego ol rabis fasin blong olgeta. God i ‘sanem Kraes i kam’ taem hem i givim paoa long hem blong hem i kam king long heven long 1914. I stat long taem ya kam kasem naoia, ol Wetnes blong Jeova oli harem gud, from we God i stanemap bakegen ol trutok mo ogenaesesen blong olgeta.​—⁠Jenesis 12:3; 18:18; 22:⁠18.

!Oli No Save Stop!

18. ?Wanem “ston ya” we “ol man blong wokem haos,” hemia ol man Isrel, oli sakem? ?Hu nomo i save sevem olgeta?

¹⁸ Ol jif pris, wetem kapten blong ol soldia blong haos blong God, wetem ol Sadusi, oli kros tumas, from we Pita mo Jon tufala i stap tijim ol man se Jisas i laef bakegen long ded finis. Nao oli holem tufala, oli putum tufala long kalabus. (4:​1-12) Ol Sadusi oli no bilif se man i save laef bakegen long ded. Be plante man we oli harem tok blong tufala, oli bilif long hem. Mo namba blong ol man nomo we oli bilif, i kasem samwe long 5,000 man. Nao oli mekem tufala aposol ya i stanap long fored blong ol haeman blong kot long Jerusalem. Oli stap askem kwestin long tufala. Pita i talem se man ya we leg blong hem i nogud, tufala i mekem hem i gud bakegen “long paoa blong nem blong Jisas Kraes, man Nasaret.” Hem i talem se hemia man ya we bifo olgeta oli nilim hem long pos blong kilim hem i ded, be God i mekem hem i laef bakegen long ded. Hemia “ston ya” we “ol man blong wokem haos,” ol man Jyu ya oli sakem finis. Be nao, hem i kam “nambawan ston blong haos.” (Ol Sam 118:​22, NW) Pita i talem se: “Mo i no gat wan narafala man nating we i save sevem yumi.”

19. ?Taem Kaonsel i talem long tufala aposol ya se tufala i no moa save prij, wanem ansa blong tufala?

¹⁹ Nao samfala oli traem blokem tok blong tufala. (4:​13-22) Man ya we leg blong hem i kamgud finis, hem i stap stanap wetem tufala. Wok ya we tufala i mekem long man ya “i bigfala tumas.” Taswe oli no save haedem. Be oli tok strong long Pita mo Jon, oli talem se “tufala i no moa save yusum nem blong Jisas bakegen blong tok long ol man.” ?Wanem ansa blong tufala? Tufala i talem se: ‘Mifala i no save stap kwaet. Mifala i mas gohed blong talemaot ol samting ya we mifala i luk long ae blong mifala, mo we mifala i harem long sora blong mifala.’ !Tufala i obei long Jeova, we hem nomo i rul long tufala!

!Jeova i Ansa Long Prea Blong Olgeta!

20. ?Ol disaepol oli askem wanem long prea blong olgeta? ?Wanem i kamaot biaen?

²⁰ Ol Wetnes blong Jeova oli mekem prea long ol miting blong olgeta. Ol disaepol oli joen long prea tu, taem oli letem Pita mo Jon tufala i gofri, nao tufala i mekem ripot long olgeta, long ol samting we i bin kamaot long tufala. (4:​23-31) Long prea, oli talem se Herod Antipas mo Ponjes Paelat, tufala i joen wetem ol hiten man Rom, mo ol man Isrel, nao oli mekem kampani blong oli agensem Mesaea. (Ol Sam 2:​1, 2; Luk 23:​1-12) Blong ansarem prea blong olgeta, Jeova i mekem se tabu speret i kam fulap long olgeta, nao oli talemaot tok blong God, we tingting blong olgeta i strong. Ol disaepol ya oli no askem long God we i rul long olgeta blong hem i finisim trabol we oli stap kasem. No gat. Oli askem long hem blong mekem tingting blong olgeta i strong blong gohed long wok blong prij, nating we oli stap kasem trabol.

21. ?Hu ya Banabas? ?Wanem ol gudfala fasin we hem i soemaot?

²¹ Olgeta ya we oli bilif long Jisas, oli stap letem we olgeta samting blong olgeta, oli blong olgeta evriwan. I no gat man we i sot long wan samting. (4:​32-37) Wan man we hem i givim plante samting blong hem, hem i man Livae we hem i bon long aelan ya Saepras, nem blong hem Josef. Ol aposol oli givim wan narafala nem long hem, se Banabas, we i min se “Man blong leftemap tingting blong man.” Ating oli givim nem ya from we hem i givhan gud long ol narafala man, mo hem i gat gud hat, i kea long ol narafala man. Tru ya, yumi evriwan i wantem soemaot ol gudfala fasin ya tu.​—⁠Ol Wok 11:​22-24.

Gyaman Fasin i Kam Long Klia Ples

22, 23. ?Ananaeas mo Safaera, tufala i mekem wanem sin? ?Store blong tufala i lanem yumi long wanem samting?

²² Ananaeas mo woman blong hem, Safaera, tufala i lego Jeova, tufala i no moa ona long hem olsem we hem i rul long tufala. (5:​1-11) Tufala i salem wan pis graon, nao tufala i mekem olsem we tufala i givim olgeta mane blong hem i go long ol aposol. Be tufala i holem haf mane blong graon ya, i blong tufala nomo. Tabu speret i givim save long Pita, nao Pita i luksave gyaman fasin blong tufala. Biaen, tufala i foldaon long graon, tufala i ded wantaem. !Hemia i wan bigfala woning long ol man we oli letem Setan i pulum olgeta blong mekem gyaman fasin!​—⁠Proveb 3:32; 6:​16-19.

²³ Biaen long samting ya, ol man we hat blong olgeta i nogud, oli fraet blong joen wetem ol disaepol. Be plante narafala man oli bilif, nao oli joen long kampani blong olgeta. (5:​12-16) Mo tu, taem ol sikman mo olgeta we oli gat ol devel oli stap long olgeta, oli bilif long paoa blong God, ‘ol aposol oli mekem olgeta oli gud bakegen.’

Yumi Mas Obei Long God, Yumi No Save Obei Long Ol Man Nomo

24, 25. ?From wanem ol lida blong ol man Isrel oli mekem bigfala trabol long ol aposol? ?Ol aposol ya we oli gat bigfala bilif oli putum wanem mak we ol man blong Jeova oli mas kasem?

²⁴ Nao hae pris wetem ol Sadusi oli traem blokem wok blong ol aposol, from we wok ya i karem bigfala frut. Ale oli girap, oli holem olgeta, nao oli putum olgeta long kalabus. (5:​17-25) Be long naet ya, wan enjel blong God i kam, i openem doa blong kalabus ya, blong oli gofri. Nao taem i brok delaet, ol aposol oli go insaed long haos blong God, oli stap tij. Yes, ol man oli save mekem bigfala trabol long ol man blong Jeova, be oli no save blokem wok blong olgeta.

²⁵ Be taem oli tekem ol aposol oli kam stanap long fes blong ol man long bigfala Kaonsel ya Sanhedrin, oli mekem i strong long olgeta. (5:​26-42) Oli tok strong long olgeta se oli no moa save tij, be ol aposol oli talem se: “Mifala i mas obei long God [we hem nomo i rul long mifala, NW], mifala i no save obei long ol man nomo.” Taem oli talem tok ya, oli putum wan mak we ol disaepol blong Jisas oli mas kasem. Mo ol Wetnes blong Jeova tede oli kasem mak ya tu. Ale wan long olgeta man long Kaonsel ya, we hem i wan tija blong Loa, nem blong hem Gameliel, i girap, i givim woning long olgeta long Kaonsel. Ale, ol haeman long Kaonsel ya oli singaot ol aposol, oli wipim olgeta, nao oli tok strong long olgeta blong bambae oli no moa prij. Nao oli letem olgeta i gofri.

26. ?Olsem wanem wok blong ol aposol i laenap wetem wok blong ol Wetnes blong Jeova tede?

²⁶ Ol aposol oli harem i gud tumas from we God i luk olgeta olsem we oli naf blong kasem sem long fes blong ol man from nem blong Jisas. “Mo evri dei, insaed long haos blong God, mo insaed long ol haos blong ol man, oli stap tijim ol man, mo oli stap talemaot gud nyus ya.” Olgeta ya oli mekem wok blong God, we oli stap go long evri haos wanwan. Sem mak long ol Wetnes blong Jeova tede. Olgeta oli kasem tabu speret blong hem from we oli obei long hem mo oli talem se: “!Jeova nomo i rul long mifala!”

[Futnot]

?Bambae Yu Yu Ansa Olsem Wanem?

◻ ?Long taem bifo mo naoia Jisas i givim wanem wok long ol man blong hem?

◻ ?Long Pentekos 33 K.T. wanem i hapen?

◻ ?Olsem wanem Pita i yusum faswan ki we Jisas i givim long hem long saed blong speret? ?Mo wetaem?

◻ ?Store blong Ananaeas mo Safaera i lanem yumi long wanem samting?

◻ ?Taem oli tok strong long ol aposol se oli no moa save prij, ol aposol oli putum wanem mak we ol Wetnes blong Jeova oli mas kasem?