I No Gat Wan Samting i Save Stopem Olgeta

Wan man we leg blong hem i nogud i stap sidaon evri dei long get blong tempol, i stap askem mane long ol man. Wan dei, long aftenun, man ya i luk Pita mo Jon i stap go insaed long tempol, nao i singaot se: ‘Plis, yutufala i givim smol mane long mi.’ Pita i se: ‘Mi gat wan samting we i moa gud i bitim mane. !Long nem blong Jisas, mi mi talem long yu se, yu girap, yu wokbaot!’ !Pita i holem han blong hem, i leftemap hem, nao man ya i wokbaot! Ol man we oli luk merikel ya oli glad tumas, mo plante long olgeta oli bilif.

Be ol pris mo ol Sadusi oli kros tumas. Oli holemtaet tufala aposol ya, oli tekem tufala i go long kot, mo oli askem se: ‘?Hu i givim paoa long yutufala blong hilim man?’ Pita i talem se: ‘Jisas Kraes ya we yufala i kilim hem i ded.’ Ol lida blong skul oli singaot bigwan, se: ‘!Yutufala i no moa tokbaot Jisas!’ Be tufala aposol i talem se: ‘Mitufala i mas tokbaot hem. Mitufala i no save stop.’

Oli letem Pita mo Jon i gofri, nao tufala i go lukaot ol narafala disaepol blong talemaot samting we i hapen. Nao oli prea long Jehova se: ‘Plis yu givhan long mifala blong mifala i no fraet blong gohed blong mekem wok blong yu.’ Jehova i givim tabu spirit long olgeta, nao oli gohed blong prij mo mekem ol sikman oli kam gud, mo plante moa man oli bilif. Nao ol Sadusi oli jalus, oli arestem ol aposol, mo oli sakem olgeta long kalabus. Be long naet, Jehova i sanem wan enjel blong openem doa blong kalabus. Enjel ya i talem long ol aposol se: ‘Yufala i gobak long tempol mo yufala i tijim ol man long ples ya.’

Long nekis moning, ol gad oli kam talem long ol lida blong skul long kot ya Sanhedrin, se: ‘!Doa blong kalabus i lok, be ol man we mifala i arestem olgeta oli no moa stap! !Naoia oli stap tijim ol man long tempol!’ Ale oli arestem ol aposol bakegen, mo oli tekem olgeta oli go long kot ya Sanhedrin. Hae pris i talem se: ‘!Mifala i givim oda long yufala finis se bambae yufala i no moa tokbaot Jisas!’ Be Pita i ansa se: “Mifala i mas obei long God we i rula blong mifala, i bitim we mifala i obei long ol man.”

Ol lida blong skul oli kros we oli kros, mo oli wantem kilim ol aposol oli ded. Be wan Farisi we nem blong hem Gamaliel, i stanap mo i talem se: ‘!Yufala i lukaot! Maet God i stap wetem ol man ya. ?Yufala i wantem faet agensem God?’ Oli folem advaes blong hem, ale oli wipim ol aposol, mo oli givim oda long olgeta bakegen se oli no moa prij, nao oli lego olgeta oli gofri. Be ol aposol oli no stop. Oli gohed wetem strong tingting blong talemaot gud nius, insaed long tempol mo long haos blong ol man.