!Yumi Tingbaot Oltaem Profet Tok Blong God!

Ol Stampa Poen Blong Seken Pita

PROFET tok blong Jeova no mesej blong hem i olsem wan laet we i saen long tudak, mo ol tru Kristin oli mas ona gud long hem. Samting ya i no isi wok taem sam gyaman tija oli traem pulum ol man blong oli tanem baksaed long trutok. Be God i save halpem yumi. Mo tu, dei blong Jeova i stap kolosap finis naoia, taswe yumi mas holemtaet tok blong God.

Jeova i lidim aposol Pita blong raetem seken leta blong hem. Taswe leta ya i save halpem yumi blong tingtinggud long profet tok we God i mekem. Maet Pita i raetem leta ya taem hem i stap long Babilon raonabaot long yia 64 K.T.a Long leta ya, hem i store plante long trutok blong God, mo hem i talem bakegen long ol Kristin se dei blong Jeova bambae i kam olsem wan stilman. Mo hem i halpem olgeta we oli ridim leta ya blong oli no letem ol man we oli agensem loa blong God oli pulum olgeta i aot long trutok. Dei blong Jeova i kam kolosap finis long yumi, taswe leta blong Pita i save givhan gud long yumi.

Yumi Trastem Profet Tok Blong God

From we yumi Kristin, yumi mas strong blong mekem ol gudfala fasin blong God oli wok long laef long yumi mo yumi mas lesingud long profet tok blong God. (1:​1-21) Sipos yumi no wantem kam slak no sipos yumi wantem karem frut oltaem, ‘yumi mas traehad oltaem blong mekem fasin blong yumi i kam gud moa. Yumi gat fasin blong bilif ale yumi mas joenem long stret fasin. Yumi gat stret fasin, ale yumi mas joenem long waes. Yumi gat waes, ale yumi mas joenem long fasin blong blokem ol samting we yumi nomo i wantem. Yumi save blokem ol samting olsem, ale yumi mas joenem long paoa blong holem wok longtaem. Yumi gat paoa blong holem wok longtaem, ale yumi mas joenem long fasin blong prea long God oltaem. Yumi gat fasin blong prea long God oltaem, ale yumi mas joenem long fasin blong laekem tumas ol brata blong yumi. Yumi gat fasin blong laekem ol brata blong yumi, ale yumi joenem long fasin blong laekem tumas olgeta man.’ Taem bodi blong Jisas i jenis, i kam narafala, Pita i luk mo i harem ol tok we God i talem long saed blong Jisas. Taswe ol man oli save trastem moa ol profet tok we God i mekem. (Mak 9:​1-8) Yes, yumi mas lesingud long ol profet tok ya.

Yumi Wajaot Long Ol Gyaman Tija

Sipos yumi putum tingting blong yumi i stap strong long profet tok we God i givim, bambae yumi agensem oltaem ol gyaman tija mo ol narafala nogud man. (2:​1-22) Pita i givim woning se bambae ol gyaman tija oli kamaot insaed long kongregesen. Long taem bifo, Jeova i jajem ol enjel we oli brekem loa blong hem, hem i finisim rabis wol we i stap longtaem blong Noa mo ol taon blong Sodom mo Gomora. Long sem fasin, bambae hem i panisim gud ol gyaman tija. Ol gyaman tija oli no ona long ol man we God i putumap mo oli pulum ol man we oli no strong oli go krangke. Ating i moa gud we ol gyaman tija ya oli ‘no save rod blong stret fasin samtaem, i bitim we oli save long rod ya be biaen oli tanraon, oli gobak, oli livim tabu loa we God i givim long hem. Fasin ya i nogud moa.’

!Dei Blong Jeova i Stap Kam!

From we yumi lesingud long profet tok mo yumi stap long ol las dei, yumi no mas kam slak taem ol man oli jikim mesej blong yumi se Jisas i stap finis. (3⁠:​1-18) Ol man ya oli no wantem luksave se God ya we i gat plan blong smasem rabis wol ya i smasem finis rabis wol we i stap long taem blong Noa. Yumi no mas tingting se God i slak from we hem i gat longfala tingting, no gat. Jeova i wantem we ol man oli tanem tingting blong olgeta from sin blong ol. Rabis wol ya bambae i lus long “dei blong Jeova,” (NW). Mo bambae ‘wan nyufala heven mo wan nyufala wol we stret fasin nomo i stap long hem,’ bambae i tekem ples blong hem. Mo tu, ‘yumi mas traehad blong mekem we long fes blong God, laef blong yumi i klin gud, i no gat poen i stap long yumi. Nao long fasin ya, yumi gat pis wetem God.’ Bambae yumi no letem ol gyaman tija oli lidim yumi, be bambae yumi gohed nomo blong kam bigman long saed blong speret, ale yumi save gud long Jisas Kraes.

Yumi mas tingtinggud long ol tok we Pita i raetem, mo ol tok ya oli mas kasem hat blong yumi. Yumi mas wajaot oltaem long ol gyaman tija mo stap wekap nomo long saed blong speret from we dei blong Jeova i kolosap nao. Mo oltaem bambae yumi lesingud long profet tok we God i givim.

[Futnot]

[Bokis blong pija long pej 29]

Hem i Sakem Olgeta i Go Long Tataros: “Taem ol enjel ya bifo oli mekem sin, [Jeova] i no letem olgeta oli go fri nomo. Hem i sakem olgeta oli go long [Tataros]. Long ples ya, hem i fasem olgeta long jen, nao oli stap long tudak, oli stap wet long Dei ya we hem bambae i jajem olgeta.” (2 Pita 2:⁠4) Long wan kastom store blong ol man Gris, (Iliad, we Homer i raetem) oli talem se ol god we oli no gat tumas paoa olsem Kronus mo ol narafala speret we oli gat paoa blong Titan, oli stap kalabus long Tataros, wan ples aninit long graon. Be Tataros we Baebol i tokbaot i no olsem. Ol rabis enjel we oli bin kamdaon long taem blong Noa, God i sakem olgeta i go long ples ya. God i daonem gud olgeta, mo i olsem we oli stap long kalabus nomo. (Jenesis 6:​1-8; 1 Pita 3:​19, 20; Jud 6) From we oli mekem i nogud, ol enjel ya oli no moa save kasem laet blong God long saed blong speret, mo God i putumaot olgeta long famle blong hem. Taswe oli stap “long ples blong tudak.” Bigfala trabol nomo i stap long fored blong olgeta we oli agensem God. Tataros i olsem wan faswan ples we olgeta oli stap long hem, nao biaen, bifo we Taosen Yia Rul blong Kraes i stat, God bambae i sakem Setan mo ol rabis devel blong hem long wan bigfala hol. Long en blong Taosen Yia Rul blong Kraes, God bambae i smasem gud olgeta, nao bambae i no moa gat wan long olgeta i stap.​—⁠Matyu 25:41; Revelesen 20:​1-3, 7-10, 14.

[Image]

Gyaman God Sus i putum ol god we oli no strong long Tataros

[Credit line]

National Archaeological Museum, Athens, Greece