!Lukaot Long Ol Gyaman Tija!

Ol Stampa Poen blong Jud

OL MAN blong Jeova oli mas “agens long ol fasin we i nogud” mo “holemstrong ol fasin we i gud.” (Rom 12:⁠9) Jud, wan man blong raetem Baebol, i raetem wan leta blong halpem ol narafala blong mekem olsem. Hem i raetem leta ya long Palestaen, samwe long 65 K.T.a

Jud i talem se hem i “man blong wok blong Jisas Kraes” mo hem i “brata blong Jemes.” Ol man oli save gud Jemes ya we i brata blong Jisas Kraes. (Mak 6:3; Ol Wok 15:​13-21; Galesia 1:19) Jud tu i brata blong Jisas. Be maet hem i gat tingting se i no nid blong talemaot se hem i famle wetem Jisas, from we Kraes i no moa wan man. Hem i gobak long heven finis olsem wan speret we God i givim hae nem long hem. Leta blong Jud i tok klia, i givim sam gudfala advaes we oli save givhan long yumi blong “holemstrong ol fasin we i gud” mo blong lukaot long ol gyaman tija.

“Faet Strong Blong Holem Trutok”

Fastaem, Jud i wantem raetem leta ya i go long sam Kristin blong tokbaot rod we God i stap yusum blong sevem olgeta. Be hem i luk we i gat nid blong leftemap tingting blong olgeta, from we olgeta oli ‘mas faet strong blong holem trutok ya we oli bilif long hem finis.’ (Ol vas 1-4) ?From wanem oli mas mekem olsem? Oli mas mekem olsem from we sam rabis man oli go insaed long kongregesen mo oli stap ‘tanem gladhat blong God, oli mekem i olsem eskyus blong olgeta blong mekem ol rabis fasin blong olgeta.’ Olgeta oli rong bigwan from we oli gat tingting se oli save brekem loa blong God mo stil oli save stap long medel blong ol man blong hem. Taswe, neva yumi mas tingting olsem. I moa gud we oltaem yumi mekem ol fasin we oli stret, mo yumi gat tangkyu long God from we blad blong Jisas i wasemaot olgeta sin blong yumi.​—⁠1 Korin 6:​9-11; 1 Jon 1:⁠7.

Sam Woning Blong Yumi

Yumi mas blokem sam tingting, sam kaen fasin, mo sam man. (Ol vas 5-16) From we sam man Isrel we oli kamaot long Ijip oli slak long bilif, God i smasem olgeta. Ol enjel we oli livim prapa ples blong olgeta long heven, God i “lokem olgeta long ples blong tudak [long saed blong speret]. Nao oli stap wet long bigfala Dei ya we God bambae i jajem olgeta.” From we ol man blong Sodom mo Gomora oli mekem bigfala trabol long saed blong seks, God i panisim olgeta “long faea we i no save ded samtaem.” From samting ya, yumi mas gohed nomo blong mekem God i glad long yumi mo neva bambae yumi lego “rod ya . . . we i blong go kasem laef.”​—⁠Ol Sam 16:11.

Jif blong ol enjel, Maekel, hem i neva mekem rabis toktok agens long Setan. Be long saed blong ol man we oli agensem God, oli tok nogud long “olgeta we God i leftemap olgeta.” (NW) Yes, oli agens long olgeta we Jeova mo Kraes i putumap olgeta blong oli elda. !Neva bambae yumi daonem ol man we God i putumap!

Ol man we oli agensem God oli folem ol rabis eksampel blong Ken, Balam, mo Kora. Olgeta oli mekem bigfala trabol long saed blong speret mo oli olsem ol bigfala ston daon long solwota. Mo oli kolosap sem mak long ol klaod we i no gat wota long hem, mo long sam tri we oli ded from we oli no gat rus nating, oli no save karem gudfala frut nating. Ol gyaman tija ya oli man blong mekem toktok, oli toktok konkon oltaem, mo oli stap “tok swit long narafala man, sipos oli ting se long fasin ya oli save win.”

Stanap Strong Agens Long Olgeta

Afta, Jud i givim advaes long saed blong ol nogud man we i traem pulum ol Kristin. Advaes blong hem se yumi mas stanap strong agens long olgeta. (Ol vas 17-25) Baebol i talem se: “Long taem ya we wol bambae i finis i no longtaem, bambae i gat ol man we oli save laf long fasin blong yufala.” Ol Kristin tede oli mas stanap strong agens long ol kaen man olsem, oli no mas lesin long ol nogud tok blong ol. Blong blokem ol nogud man ya, yumi mas “hadwok blong kam strong moa long fasin blong bilif” blong yumi. Yumi mas prea wetem paoa blong tabu speret blong God, mo yumi mas traehad blong stap oltaem long lav blong God. Long semtaem, bambae yumi stap wet we Jisas i soemaot fasin sore blong hem long yumi.

I luk olsem we ol gyaman tija ya we oli agensem God, oli mekem we bilif blong sam man i no strong, oli gat ol narafala tingting. (Skelem wetem 2 Pita 2:​1-3.) ?Ol man ya oli nidim wanem nao? Olgeta oli mas kasem help long saed blong speret, mekem se oli aot long “faea,” no fasin blong lus blong olwe. (Matyu 18:​8, 9) Be ol man we oli fasgud long God oli no save fraet long wan trabol olsem. Jeova bambae i lukaot gud long olgeta, blong oli no “foldaon” long sin, mo oli no lus wetem ol gyaman tija.

[Futnot]

[Bokis blong pija long pej 30]

Bigfala Ston Daon: Jud i talem se taem ol Kristin ‘oli mekem gudfala lafet ya blong olgeta blong soemaot we oli laeklaekem olgeta,’ oli mas lukaot long ‘olgeta we i olsem bigfala ston daon we sip i save brok long hem.’ (Jud 12) Ol nogud man ya oli gyaman nomo se oli laekem ol Kristin, taswe oli olsem bigfala ston daon we sip i save brok long hem. Maet ston olsem i save mekem sip i rek no i save kilim man we i stap swim i ded. Ating long ol bigfala kakae olsem, ol Kristin we oli gat mane oli singaot long ol Kristin we oli pua. Wan ‘Papa blong Jyos,’ Chrysostom, (347?–407 K.T.) i talem se: “Olgeta oli mekem wan kakae tugeta: Ol rijman oli saplae long ol kakae mo oli singaot ol puaman mo olgeta we i no gat wan samting, oli kam wanples blong kakae.” Nating se ol lafet ya oli olsem wanem, be woning we Jud i givim i halpem olgeta we oli fasgud long God blong oli lukaot gud long ol gyaman tija, “bigfala ston daon” we i save kilim man i ded long saed blong speret. Baebol i no talem se ol Kristin oli mas mekem lafet blong soemaot se oli laeklaekem olgeta mo i no gat lafet olsem tede. Be ol man blong Jeova oli rere nomo blong givhan long ol brata blong olgeta taem oli gat nid, mo oli glad blong frengud tugeta.