!Kolosap i No Moa Gat Sik Mo Ded!

INO gat wan man we i glad taem hem i sik, mo ol man oli no wantem ded. Wan medikol tija i talem se: “Ol man oli lukaot ol defren kaen rod blong save laef longtaem moa. Histri i soemaot we ol man oli traem faenemaot samting ya long olgeta taem mo olgeta ples. Hemia from we man i no wantem ded . . . Man ya, nem blong hem Ponce de Leon, i wan nomo blong olgeta hif blong man we oli spenem laef blong olgeta blong lukaot wan rod blong save laef longtaem moa. Ol dokta oli traem blokem sik mo ded. Long fasin ya nao, oli traem mekem man i stap laef longtaem moa.”

Taem sam fren blong yumi no memba blong famle blong yumi i ded, samting ya i spolem tingting mo filing blong yumi. Taswe yumi traem mekem sam samting blong trabol ya i no spolem tumas tingting mo filing blong yumi. Wan buk, (Funeral Customs the World Over) i talem se: “Olgeta kampani blong man oli mekem seremoni blong berem ol dedman blong olgeta, sipos oli fri blong mekem. Nating we oli man bus mo oli gat smol mane, no oli gat bigfala save mo plante mane, be evriwan i mekem olsem. . . . Dip long tingting blong olgeta, oli harem se oli mas mekem seremoni blong berem ol dedman. Long tingting blong olgeta, i ‘stret’ blong mekem olsem. Be sipos oli no mekem, oli harem we samting ya i ‘rong,’ i no stret nating. Nao oli ting se oli mas sore mo oli mas sem from. Samting ya i tru moa taem oli lusum wan famle no wan fren blong olgeta, wan man we oli laekem no oli save gud hem. . . . [Hemia prapa fasin blong man], hem i mekem seremoni blong berem ol dedman.”

Stampa Blong Sik Mo Ded

Yumi harem gud tumas long tingting ya se bambae sik mo ded tufala i finis. ?Be olsem wanem nao? ?Yumi save bilif long samting ya? Yes. Bilif ya i gat wan stampa we i stret, i no save mestem mo yumi save trastem hem. Hemia Tok blong God​—⁠Baebol.

Buk ya i eksplenem klia stampa blong ol trabol blong man. Hem i talem se God i bin wokem faswan man, nem blong hem Adam. Ale, hem i putum hem i stap long wan paradaes, wan garen we i stap samples long Medel Is. Taem God i wokem hem, Adam i stret gud olgeta. Hem i no save wanem ya sik mo ded. Smoltaem biaen, wan woman we i stret gud olgeta i joen long hem. Nao tugeta, oli harem gud from we oli save laef blong olwe long wol ya.​—⁠Jenesis 2:​15-17, 21-24.

Be nambawan plan ya i lus kwiktaem. ?From wanem? From we Adam i tingbaot hem nomo, nao hem i jus blong mekem ol samting we hem nomo i wantem. Hem i no moa wantem dipen long God. Ale, hem i mekem olsem. Nao hem i mas wok had, i harem nogud long bodi blong hem, i sik, mo biaen i ded. (Jenesis 3:​17-19) Adam i jus blong harem nogud long laef blong hem. From samting ya, ol pikinini blong hem oli kasem sem laef nomo. Rom 5:12 i talem se: “Bifo, fastaem olgeta, wan man nomo i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded, from we olgeta oli mekem sin.” Rom 8:22 i ademap tok ya, i se: “Yumi save finis, we i kam kasem naoia, olgeta samting ya we God i mekem i stap krae, from we olgeta i stap harem nogud.”

?Long Wol No Long Heven?

Adam mo Iv oli lusum hapi laef blong olgeta. Be Baebol i strong blong talem long yumi se kolosap bambae ol man we oli obei long hem oli save kamgud bakegen. Revelesen 21:​3, 4 i talem se: “!Yu luk! Naoia God i mekem ples blong hem wetem ol man. Hem bambae i stap oltaem wetem olgeta, nao olgeta bambae oli man blong hem. God bambae i kampani wetem olgeta, mo hem bambae i God blong olgeta. Hem bambae i ravemaot wora blong ae blong olgeta. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.” Long sem fasin, wan profet blong bifo i tokbaot taem ya we “bambae i no gat wan man ples we i save talem se: ‘Mi mi sik.’ ”​—⁠Aesea 33:24.

?Yu yu save tingbaot wan wol we i no gat haospetal mo beregraon i stap long hem? ?Yu yu save tingbaot se bambae yu save laef blong olwe, mo bambae yu yu fri, yu no moa soa mo yu no moa ded? Yes, ol promes blong God oli kasem ol dip filing we i stap insaed long yumi. ?Be olsem wanem yumi save sua se nambawan plan ya i blong wol ya nomo​—⁠i no blong heven? Yu yu save makem ol vas we oli stap fastaem long Revelesen 21:​3, 4. Faswan vas blong Revelesen 21 i tokbaot “nyufala heven wetem yufala wol.” Nao Baebol i talem se God bambae i stap wetem ol man, mo bambae olgeta ya oli kam man blong hem. Long buk blong Aesea, promes ya se bambae i no moa gat man i sik, i gohed i se: “Ol man we oli stap long graon ya, bambae God i tekemaot rong blong olgeta.”

!Olsem nao, ol promes ya oli tokbaot laef long wol nomo! Ol promes ya oli leftemap tingting blong yumi. Mo oli laenap wetem prea we Jisas i mekem long Papa blong hem. Hem i talem se: “ ‘Yu mekem Kingdom blong yu i kam. Yu mekem ol samting we yu yu wantem oli kamaot long wol, olsem we oli kamaot finis long heven.”​—⁠Matyu 6:​10, NW.

?From Wanem Taem Ya i Kolosap?

Ol Wetnes blong Jeova oli halpem milyan man finis blong oli bilif se kolosap ol samting ya bambae oli kamtru. ?From wanem oli sua long samting ya? ?Wanem stampa blong bilif ya? Oli bilif olsem from we plante samting oli soemaot we yumi stap laef long “ol las dei” blong ol fasin blong wol ya, hemia ogenaesesen blong wol ya. (2 Timote 3:​1-5, NW) Ol disaepol blong Jisas oli askem wan saen long hem blong bambae oli save wetaem ol fasin blong wol ya oli finis. Long ansa blong hem, Jisas i tokbaot olgeta samting we oli stap hapen long wol, i stat long Faswan Bigfala Faet Blong Wol long 1914.a Biaen hem i ademap tok ya, i se: “Taem we yufala i luk ol samting ya, bambae yufala i save we mi, mi Pikinini blong Man, kolosap mi kamtru, olsem we mi stap long doa nomo. Tru mi talem long yufala, ol man we oli stap laef [long taem ya, NW], bambae oli no save ded evriwan, gogo olgeta samting ya bambae oli kamtru.” Olsem nao, sam man we oli laef i stap long 1914, bambae oli laef yet blong luk en blong ol fasin nogud blong wol ya.​—⁠Matyu 24:​33, 34.

Long taem ya, bambae Jeova God i askem long Pikinini boe blong hem Kraes Jisas, blong i girap, i spolem olgeta stampa samting we oli mekem man i harem nogud long tingting mo bodi blong hem. Bambae i no moa gat ol nogud samting ya long naesfala wol ya. Baebol i tokbaot dei ya we bambae God i tekemaot ol rabis fasin. Hem i talem se dei ya i “faet long bigfala Dei blong God ya we i gat olgeta paoa” long Amageden.​—⁠Revelesen 16:​14, 16.

Plante man we oli fraet gud long God oli save stap laef taem bambae bigfala trabol ya i finis. Yes, bambae oli laef i stap blong luk rul blong Jisas Kraes. Rul ya bambae i karem pis long wol. (Revelesen 7:​9, 14; 20:⁠4) Rul blong hem bambae i kamaot long heven. Be olgeta man long wol bambae oli kasem ol nambawan frut we oli mas kamaot from rul blong Jisas Kraes. Hemia ol man we oli laef i stap long wol afta Amageden mo ol milyan milyan man we biaen bambae oli laef bakegen long ded. Promes ya bambae i kamtru: “Be yumi save, Kraes i mas stap king fastaem, gogo God i winim olgeta enemi blong Kraes, i putum olgeta oli stap daon, aninit long leg blong Kraes. Mo laswan blong ol enemi ya we God bambae i winim olgeta, hemia samting ya ded.”​—⁠1 Korin 15:​25, 26.

Tru ya, yumi save strong blong talem se “!Kolosap i no moa gat sik mo ded!” Hemia i no olsem wan drim. Hemia i strong promes blong Jeova God, “we i no save gyaman.” ?Olsem wanem? ?Bambae yu yu trastem promes ya? !Sipos yu mekem olsem, bambae yu yu save harem gud blong olwe!​—⁠Taetas 1:⁠2.

[Futnot]

[Tok Blong Pija Long Pej 7]

Kolosap bambae i no moa gat sik mo ded. Bambae ol man oli gat gudfala bodi mo laef we i no save finis