Yumi Obei Long Ol Tijing Blong Jeova

“Hae God, [Jeova, NW] plis yu tijim mi long ol samting we yu wantem blong mi mi mekem, nao bambae mi obei long yu, mi holem ol trutok blong yu. Yu mekem mi blong mi wantem tumas blong mekem ol wok blong yu nomo.”​—⁠OL SAM 86:⁠11.

1, 2. ?Wanem samting i pulum ol Wetnes blong Jeova blong oli no tekem blad transfyusen?

“ATING ol Wetnes blong Jeova oli raet taem oli no wantem tekem ol meresin we blad i stap long ol. From we ol blad transfyusen oli save givim plante sik long man.”​—⁠Franis medikol magasin Le Quotidien du Médecin, Desemba 15, 1987.

² Ol Wetnes blong Jeova oli no tekem blad transfyusen longtaem bifo we ol man oli save se samting ya i save mekem i nogud long bodi blong man, mo i save karem ded tu. Maet sam man oli save ting se oli mekem olsem from laki nomo. Be i no from laki we ol Wetnes blong Jeova oli no tekem blad. Rul ya i no kamaot long wan skul we i narakaen. Mo oli no obei long rul ya from we oli fraet blong kasem blad we i nogud. No gat. Ol Wetnes oli no wantem tekem blad from we oli strong blong obei long Bigfala Tija blong olgeta​—⁠God.

3. (a) ?Deved i ting se hem i dipen long Jeova olsem wanem? (b) ?From we Deved i trastem God, hem i wet long wanem samting?

³ Bifo, King Deved i save se hem i dipen long God. Nao hem i strong blong letem God i tijim hem mo blong ‘holem ol trutok blong hem.’ (Ol Sam 86:11) Wan dei, Deved i kasem advaes ya se sipos hem i lukaot gud blong no kafsaedem blad blong man long fes blong God, bambae ‘sol blong hem i save stap long basket blong laef wetem Jeova.’ (1 Samuel 25:​21, 22, 25, 29) Yes, God i save lukaot gud long laef blong Deved, i olsem man we i rolemgud wan sas samting blong lukaot gud long hem, blong i no gat wan samting i spolem hem. Deved i folem waes advaes ya. Hem wan i no traem faenem wan rod blong sevem laef blong hem. Be, hem i trastem Hemia we i holem laef blong hem long han blong hem. Hem i talem se: “Yu bambae yu soem rod ya long mi we i blong go kasem laef. Nao taem mi mi stap wetem yu, bambae mi harem mi glad tumas, tingting blong mi bambae i fulap long glad oltaem nomo.”​—⁠Ol Sam 16:11.

4. ?From wanem Deved i wantem we Jeova i tijim hem?

⁴ Deved i gat tingting ya. Taswe hem i no traem faenemaot wanem ol loa blong God we hem i save obei long olgeta, mo wanem ol loa we hem i nidim, no gat. Hemia nao tingting blong hem: “Hae God, [Jeova, NW] plis yu tijim mi long ol fasin blong yu. Plis yu lidim mi mi go long rod we i sef.” “Hae God, [Jeova, NW] plis yu tijim mi long ol samting we yu wantem blong mi mi mekem, nao bambae mi obei long yu, mi holem ol trutok blong yu. Yu mekem mi blong mi wantem tumas blong mekem ol wok blong yu nomo. God, [Jeova, NW] yu yu Masta blong mi. Bambae mi stap presem yu long olgeta tingting blong mi.” (Ol Sam 27:11; 86:​11, 12) Ating samtaem Deved i harem we i no isi blong wokbaot long trutok long fored blong God, mo hem i mas livim sam samting we hem nomo i wantem. Be Deved i wantem we God i tijim hem long stret rod, mo hem i wantem folem rod ya.

Ol Tijing Long Blad

5. ?Deved i save wanem long saed blong tingting blong God long blad?

⁵ I gud blong makem se taem Deved i pikinini, oli tijim hem long loa blong God long saed blong blad. Loa ya i no wan tok haed blong skul. Taem oli bin ridim Loa long ol man Isrel, Deved i harem tok ya, se: “Sol blong bodi i stap long blad, mo mi ya, mi mi putum hem i stap long olta from yufala, blong tekemaot ol sin long sol blong yufala. From we blad i save tekemaot sin from sol we i stap long hem. Hemia nao from wanem mi mi talem finis long ol pikinini blong Isrel, se: ‘I no gat wan sol long yufala we i save kakae blad, mo ol strenja we i stap long medel blong yufala, oli no mas kakae blad.’ ”​—⁠Levitikas 17:​11, 12; Dutronome 4:10; 31:11.

6. ?Olsem wanem ol man blong God oli nidim we God i gohed blong tijim olgeta long saed blong blad?

⁶ Taem God i yusum Isrel olsem kampani blong hem, olgeta we oli wantem mekem hem i glad oli mas kasem tijing long saed blong blad. Olgeta boe mo olgeta gel Isrel evriwan we oli bon oli kasem tijing olsem. ?Be olsem wanem nao taem God i tekem kongregesen blong ol Kristin oli kam man blong hem, mo i mekem olgeta oli kam “Isrel blong God”? ?Tijing ya i stap gohed yet? (Galesia 6:16) Yes. Tingting blong God long blad i no jenis. (Malakae 3:⁠6) Bifo, taem God i no stanemap kontrak blong Loa yet, hem i makem finis tingting blong hem long ol nogud fasin blong yusum blad. Mo biaen, taem Loa i finis, tingting blong hem long blad i no jenis.​—⁠Jenesis 9:​3, 4; Ol Wok 15:​28, 29.

7. ?From wanem i impoten se God i tijim yumi long blad?

⁷ Respek long blad i impoten tumas blong ol tru Kristin. Ating sam man oli save talem se: ‘Yufala i stap bitim mak, no?’ ?Be wanem samting i impoten tumas blong ol tru Kristin? !Hemia nao sakrafaes blong Jisas! Mo aposol Pol i talem se: “From we blad blong Kraes i ron, God i mekem yumi ya we yumi joen long Kraes, yumi friman finis. Hem i fogivim yumi finis from ol sin blong yumi. Man, gladhat blong God, hem i bigfala tumas.” (Efesas 1:⁠7) Wan Baebol (The Inspired Letters, we Frank C. Laubach i transletem) i tanem vas ya olsemia: “Blad blong Kraes i pem from yumi finis mo naoia yumi blong hem nomo.”

8. ?Olsem wanem “bigfala kampani” i dipen long blad blong kasem laef?

⁸ Olgeta we oli wantem laef i stap taem “bigfala trabol” bambae i finis mo oli wantem kasem ol blesing blong God long Paradaes long wol, oli dipen long blad we Jisas i kafsaedem. Revelesen 7:​9-14 i tokbaot olgeta, i se: “Hemia ol man ya we [oli kamaot long bigfala trabol, NW]. Oli wasem klos blong olgeta finis blong mekem oli waet long blad blong Smol Sipsip ya we i ded.” Traem tingbaot ol tok ya. Hem i no talem se olgeta we oli sef tru long trabol ya, oli jes ‘tekem Jisas long laef blong olgeta’ mo ‘oli bilif long hem’ nomo. I tru se ol samting ya oli impoten. Be vas ya i go dip moa taem hem i talem se oli “wasem klos blong olgeta finis blong mekem oli waet long blad blong Smol Sipsip ya [Jisas] we i ded.” Hemia nao from we blad blong hem i olsem ransom blong pemaot yumi.

9. ?From wanem i impoten tumas we yumi obei long Jeova long saed long blad?

⁹ Ol Wetnes blong Jeova oli tinghae tumas long gudfala ransom ya. Samting ya i givhan long olgeta blong oli no yusum blad long wan fasin we i nogud. Oli mekem olsem, nating se wan dokta i strong blong talem se transfyusen i save sevem laef blong olgeta. Ating dokta i bilif se ol gudfala samting we transfyusen i save mekem long man, oli bitim ol trabol we blad i save mekem tu. Be man we i Kristin i no save fogetem wan trabol we i bigwan moa. Yes, sipos hem i yusum blad long wan fasin we i no stret, bambae God i no moa save agri long hem. Bifo, Pol i tokbaot olgeta ya we oli ‘kasem save long ol trutok finis, oli girap, oli stap gohed blong mekem ol sin.’ ?From wanem ol sin olsem oli nogud olgeta? From we man olsem “i stap tingnogud long Pikinini blong God,” mo hem “i stap luk blad ya olsem we i no wan tabu samting.”​—⁠Hibrus 9:​16-24; 10:​26-29.

Halpem Ol Narafala Blong Kasem Save

10. ?Wanem stampa tingting i pulum yumi blong no tekem blad?

¹⁰ Man we i tinghae long sakrafaes blong Jisas i lukaot gud blong no mekem sin. Man olsem i no wantem sakem praes blong blad blong Jisas we i save sevem laef. Naoia we yumi tingbaot ol samting ya finis, yumi luksave se yumi mas tangkyu long God from laef. Nao fasin tangkyu ya i mekem we yumi no save agensem wan stret loa blong hem nating. Mo yumi mas sua se God i givim ol loa ya from we hem i tingbaot yumi tumas, hem i wantem we yumi harem gud blong olwe. (Dutronome 6:24; Proveb 14:27; Eklesiastis 8:12) ?Olsem wanem nao long ol pikinini blong yumi?

11-13. ?Sam Kristin papa mama oli gat wanem tingting we i no stret long ol pikinini blong ol mo long blad? ?From wanem?

¹¹ Taem ol pikinini blong yumi oli bebi nomo no oli yangfala tumas blong kasem save long ol samting, oli klin mo stret long tingting blong Jeova. ?From wanem? From we yumi wosip long hem. (1 Korin 7:14) I tru se long wan Kristin famle, maet sam pikinini oli no kasem save long loa blong God long blad, mo oli no mekemap maen blong olgeta yet blong obei long loa ya. ?Be olsem wanem? ?Yumi traehad blong tijim olgeta long bigfala samting ya? Ol Kristin papa mama oli mas tingbaot impoten samting ya. ?From wanem? From we ating sam papa mama oli mestem, oli no gat stret tingting long ol pikinini blong ol mo long blad. Maet tingting blong samfala i olsem: Oli harem se oli no rili gat tumas kontrol antap long ol pikinini blong ol we oli no bigwan yet, blong blokem wan tranfyusen. ?From wanem oli gat rong tingting olsemia?

¹² ?Plante kantri oli gat loa mo oli gat sam ogenaesesen we gavman i stanemap, blong oli protektem ol pikinini we papa mama i no kea long olgeta, no oli spolem olgeta. Ol papa mama we oli Wetnes blong Jeova oli no wantem se man i givim blad long boe no gel blong olgeta we oli laekem tumas. Be hemia i no min se oli no kea long olgeta, no oli spolem olgeta. No gat. Semtaem, oli askem se ol dokta oli yusum sam narafala meresin we oli save givim. Taem yumi tingbaot ol bigfala trabol we transfyusen i save mekem, i stret blong talem se papa mama i no spolem no mekem nogud long pikinini blong olgeta taem oli no wantem givim blad long olgeta. Oli gat raet blong skelem ol trabol we wan meresin i save mekem long olgeta, mo oli gat raet blong jusum wanem meresin oli save tekem.a Be sam dokta oli strong yet, oli go lukaot ol jaj long kot blong fosem man we i no wantem transfyusen, i kasem transfyusen ya.

¹³ Sam papa mama oli luksave se i isi blong ol dokta oli kasem help blong kot blong putum transfyusen long pikinini blong olgeta. From samting ya, maet oli ting se bisnes ya i no stap long han blong olgeta. Oli ting se papa mama i no save mekem wan samting. !Tingting ya i rong!​—⁠Proveb 22:⁠3.

14. ?Deved mo Timote oli kasem wanem tijing taem oli yang yet?

¹⁴ Yumi makem finis se taem Deved i pikinini yet, hem i kasem tijing long ol rod blong God. Samting ya i givhan long hem. Nao hem i savegud se laef i wan presen we God i mekem, mo blad i minim laef. (Skelem wetem 2 Samuel 23:​14-17.) Timote tu i kasem tijing long tingting blong God, i stat ‘taem hem i pikinini yet.’ (2 Timote 3:​14, 15) Yes, Deved mo Timote oli yangfala yet, oli no bigman. Be oli naf blong olgeta nomo i talem se wil blong God i olsem wanem. Sem mak nao, bifo we ol yangfala Kristin oli kam bigman, oli mas kasem save long ol rod blong God.

15, 16. (a) ?Long sam ples, kot i talem wanem long saed blong raet blong ol yangfala? (b) ?Wanem samting i mekem we wan yangfala i kasem blad?

¹⁵ Long sam ples, taem ol yangfala oli naf blong tingtinggud, loa i givim raet long olgeta we i sem mak long ol bigman. Sipos wan yangfala i no moa yang tumas, no hem i naf blong tingtinggud olsem ol bigman, no sipos hem i gat tufala fasin ya, loa i save letem hem i mekem ol prapa disisin blong hem. Nao hem i save jusum wanem meresin hem i wantem no i no wantem. Long ol kantri we i no gat loa long saed ya, ol jaj no ofisa oli save respektem tingting blong wan yangfala we i naf blong eksplenem klia prapa disisin blong hem long blad. Mo tu, taem wan yangfala i no save ekplenem klia ol bilif blong hem, mo tingting blong hem i no strong inaf yet, bambae kot ya i save luk yangfala ya olsem wan bebi nomo. Ale, maet bambae kot ya nomo i mekem disisin.

¹⁶ Wan yangfala man i stadi Baebol long plante yia finis, be i no baptaes yet. Hem i gat kansa, nao hem i stap long haospetal. Seven wik nomo i stap bifo we hem i olfala i naf blong i gat “raet blong blokem wan meresin blong hem wan.” Nating se kolosap nomo hem i save kasem raet ya, haospetal i putum long kot blong fosem hem blong tekem wan transfyusen. Oli wantem mekem olsem, nating se yangfala ya mo ol papa mama blong hem oli no wantem. Jaj i wantem mekemgud wok blong hem, nao hem i kam askem sam kwestin long yangfala ya, olsem wanem long bilif blong hem long saed blong blad. Biaen, hem i askem sam stampa kwestin olsem hemia: ?Wanem nem blong ol faswan faef buk long Baebol? Yangfala man ya i no save givim nem blong olgeta, mo hem i no save eksplenem klia from wanem hem i no wantem tekem blad. Ale, jaj ya i harem nogud, nao hem i givim raet long haospetal blong mekem transfyusen long hem. Nao hem i talem se: “Hem i no wantem tekem blad transfyusen, be hem i no save from wanem. Hem i no kasem save long ol prapa bilif blong skul blong hem.”

17. ?Wan yang gel we i gat 14 yia, hem i strong olsem wanem long saed blong blad? ?Wanem frut i kamaot from?

¹⁷ Be sipos wan yangfala i savegud ol rod blong God mo i folem ol trutok blong Hem, bambae kot i save tanem disisin blong hem. Olsem nao, wan yangfala Kristin gel i kasem sem sik ya kansa we yangfala we yumi jes tokbaot i kasem tu. Gel ya i stap long wan haospetal, mo wan hae dokta i agri wetem papa mama blong hem blong givim meresin ya kimoterapi long hem, mo oli jenisim meresin ya lelebet blong i no nidim blad wetem. Be yet, haospetal i putum long kot. Biaen, jaj i talem se: “Gel ya, D. P. i tok strong nao i talem se bambae hem i traem faenem enikaen rod blong no kasem blad transfyusen. Hem i ting se sipos hem i kasem wan blad transfyusen, hemia oli stilim bodi blong hem, mo fasin ya i olsem we wan man i fosem hem stret. Hem i askem long kot se ‘plis, Kot ya i respektem tingting blong mi mo i letem mi mi stap gohed long [haospetal], mo Kot i no talem se mi mas kasem blad transfyusen.’ ” Ol Kristin tijing we hem i kasem, oli halpem hem long bigfala trabol ya.​—⁠Lukluk bokis.

18. (a) ?Wan yang gel i gat strong tingting olsem wanem long saed blong blad? (b) ?Jaj i mekem wanem disisin long saed long meresin we hem i mas tekem?

¹⁸ Wan yang gel we i gat 12 yia, i gat sik blong blad (leukemia), nao hem i stap long haospetal. Wan kampani we i protektem ol pikinini i putum long kot blong bambae yangfala ya i save gat blad transfyusen. Biaen, jaj i jajem bisnes ya mo i finisim tok blong hem olsem: “Yang gel ya L., i talem klia long kot se sipos ol dokta oli wantem givim blad transfyusen long hem, bambae hem i faet wetem olgeta paoa blong hem blong no kasem transfyusen ya. Hem i talem​—⁠mo mi bilif long hem​—⁠se bambae hem i singaot bigwan, hem i faet, hem i pulumaot stik we i stap long han blong hem mo hem i traem spolem blad we i stap long basket antap long bed blong hem. Mi no wantem mekem wan didisin we i save givim hadtaem olsemia long pikinini ya . . . Long saed blong pikinini ya nao, haospetal i rong, from we oli tingbaot sik blong hem nomo, be oli no tingbaot filing mo bilif blong hem.

Papa Mama​—⁠Tijimgud Olgeta

19. ?Ol papa mama oli mas mekem wanem blong givhan long ol pikinini blong olgeta?

¹⁹ Ol ekspiryens olsemia oli olsem wan bigfala mesej blong ol papa mama we oli wantem se famle blong olgeta i folem loa blong God long blad. Bifo, Ebraham i fren blong God from we God i save se olfala ya bambae ‘i save talem strong long ol pikinini blong hem mo long olgeta we bambae oli kamaot biaen long hem, blong oli obei long hem [God], mo blong oli mekem ol fasin nomo we oli stret mo oli gud.’ (Jenesis 18:19) Samting ya i tru tu long ol Kristin papa mama tede. Ating yu yu wan papa no wan mama. ?Be yu stap tijim ol pikinini blong yu long ol rod blong Jeova? ?Bambae ol pikinini blong yu oli rere oltaem ‘blong givim ansa long ol man. Sipos man i askem long olgeta from wanem olgeta i putum tingting blong olgeta i stap long Kraes, bambae olgeta i rere blong talemaot, be long kwaet fasin, we i gat ona long hem’?​—⁠1 Pita 3:15.

20. ?Yumi wantem we pikinini blong yumi i gat save mo bilif long wanem bigfala samting long saed blong blad? (Daniel 1:​3-14)

²⁰ I tru se yumi mas talem long ol pikinini blong yumi ol trabol mo ol sik we transfyusen i save givim long man. Be taem yumi tijim ol pikinini long nambawan loa blong God long blad, yumi no mas mekem olgeta oli fraet long blad. Traem tingbaot. Maet wan jaj we i askem long wan gel from wanem hem i no wantem gat blad transfyusen. ?Wanem bambae i kamaot sipos gel ya i talem se hem i fraet long blad no hem i talem se blad i save karem bigfala trabol long hem? Ating jaj i save talem se gel ya i no bigwan inaf, nao tingting blong hem i no strong, mo hem i fraet long blad i bitim mak. Long tingting blong jaj, i olsem we gel ya i fraet we dokta i katem hem, nao bambae hem i krae mo i traem blokem dokta, nating se papa mama blong hem oli agri nomo blong dokta i katem. Antap long samting ya, yumi makem finis wanem stampa risen we i pulum ol Kristin blong no tekem blad transfyusen. I no from we blad i nogud, be from we God i givim laef long yumi, mo hem i talem se blad i tabu. Ol pikinini blong yumi oli mas save samting ya. I tru, oli mas save ol trabol we blad i save mekem long bodi blong olgeta, from we maet ol tok olsem oli save givhan. Be tingting blong yumi i long saed blong skul fastaem.

21. (a) ?Papa mama we oli wantem save tingting blong ol pikinini blong olgeta long saed blong blad mo Baebol, oli mas ansa long wanem kwestin? (b) ?Olsem wanem ol papa mama oli save halpem ol pikinini blong ol long saed blong blad?

²¹ Ating yu yu gat pikinini. ?Be yu yu sua se olgeta oli agri long ol stampa tijing blong Baebol long saed blong transfyusen? ?Oli save eksplenem olgeta? ?Oli rili bilif long tingting ya olsem prapa tingting blong God? ?Oli bilif strong se i nogud olgeta sipos oli brekem loa blong God, nao oli save lusum hop blong kasem laef we i no save finis? Ol papa mama we oli waes, bambae oli mas lukluk bakegen ol tijing ya wetem ol pikinini blong olgeta, oli mas mekem olsem nating se oli yang tumas no kolosap oli bigman finis. Ol papa mama oli mas askem ol kwestin long pikinini blong olgeta olsem we wan jaj no wan ofisa blong haospetal i save mekem. Ol papa mama oli no mas pulum pikinini blong i talem ol ansa olsem nasiviru. I moa impoten we oli save wanem samting oli bilif long hem, mo from wanem. I tru, taem oli stanap long kot, bambae ol papa mama no narafala man oli save tokbaot ol trabol we blad i save givim long man, mo ol narafala meresin we oli save tekem ples blong hem. Be bambae wan jaj no wan ofisa i laekem moa blong harem pikinini i talemaot prapa tingting blong hem. Bambae oli traem save sipos hem i kasem save gud long trabol ya mo ol jus we hem i save mekem, mo sipos hem i gat prapa tingting blong hem mo strong bilif tu.​—⁠Skelem wetem 2 King 5:​1-4.

22. ?Sipos yumi letem God i tijim yumi long blad, wanem samting bambae i kamaot blong olwe?

²² Yumi evriwan i nidim blong laekem mo holem strong tingting blong God long blad. Revelesen 1:5 i tokbaot Kraes olsem hemia we “i laekem yumi tumas, mo long ded blong hem, we blad blong hem i ron, hem i tekemaot ol sin blong yumi, i mekem yumi fri.” Yumi mas tinghae long blad blong Jisas. From fasin ya nomo, God i save fogivim ol sin blong yumi blong olwe. Rom 5:9 i talem klia se: “From we blad blong Kraes i ron, hem i mekem yumi kam stret man finis long fes blong God. Oraet, be from we hem i ded olsem, i klia moa se hem bambae i sevem yumi, nao bambae God i no jajem yumi.” Olsem nao, i waes we yumi mo ol pikinini blong yumi, yumi lanem ol tijing blong Jeova long blad. !Yumi mas strong blong wokbaot long rod blong hem blong olwe!

[Futnot]

Ol Stampa Poen

◻ ?Yumi mas tingbaot ol tijing we Jeova i givim long yumi olsem wanem?

◻ ?From wanem i impoten we yumi obei long loa blong God long saed blong blad?

◻ ?From wanem i impoten tumas we ol yangfala oli naf blong talemaot klia mo strong wanem tingting blong olgeta long blad?

◻ ?Ol Kristin papa mama oli save mekem wanem blong halpem ol pikinini blong ol, blong oli kasem stret save long loa blong Jeova long blad?

[Bokis blong pija long pej 19]

KOT I SEK LONG HEM

?Wanem tingting blong kot long saed blong gel ya, D.P., we haf 17 i tokbaot?

“Gel ya i gat 14 yia nomo. Be Kot i sek from we taem hem i ansa, hem i kwaet mo waes, tok blong hem i gat paoa mo i no fraet. Hem i save harem nogud tumas from sik ya kansa we hem i save ded from . . . Be taem yangfala gel ya i stanap long Kot, hem i soemaot se tingting blong hem i strong mo hem i save tingtinggud olsem wan bigman. Tingting blong hem i klia long bigfala trabol we hem i stap fesem. Hem i stap long olgeta miting we Kot i mekem. Hem i agri finis long wan plan blong stretem sik blong hem. Hem i eksplenemgud olsem wanem hem i save fesem bigfala trabol ya. Mo hem i askem long Kot samting ya: Yufala i respektem disisin blong mi . . .

“Kot i respektem disisin blong hem from we hem i tingtinggud olsem wan bigman, mo tu from we hem i save talemaot plante risen blong disisin ya blong hem. Sipos hem i kasem wan meresin we hem i no wantem, olsem blad transfyusen, bambae speret blong hem, tingting blong hem, filing blong hem oli save kasem trabol. Bambae Kot i respektem jus blong hem long meresin we hem i wantem tekem.”

[Tok Blong Pija Long Pej 18]

Ating wan jaj no wan haospetal ofisa i wantem save se yangfala Kristin i bilif long wanem, mo from wanem hem i bilif olsem