?Wosip Blong Mama God Ya i Stap Yet?

LONG taem blong ol faswan Kristin, plante man oli wosip yet long mama god ya. Aposol Pol i luk we ol man Efesas long Esia Maena oli wosip long hem tu. Fastaem hem i prij long ol man Atens, we olgeta tu oli wosip long woman god ya. Afta hem i talem long ol man Efesas se “God ya [we] hem i mekem wol ya,” we hem i laef i stap, hem i no “olsem ol samting ya we ol man oli wokem long gol no selva no ston. !Hem i no wan samting we man i save wokem long gudhan blong hem, no long waes blong hem, no gat!” Bighaf blong ol man Efesas oli mekem wosip long mama god ya, Atemis. Taswe long tingting blong olgeta, Pol i bitim mak long tok ya blong hem. Samfala we oli winim mane from ol pija blong woman god ya we oli wokem long selva, oli mekem ol man oli girap, oli rao long Pol. Oli stap singaot long tu ful haoa se: “!Hurei long Atemis blong Efesas!”​—⁠Ol Wok 17:​24, 29; 19:​26, 34.

Atemis Blong Efesas

Ol man Gris oli wosip long woman god we nem blong hem Atemis tu. Be Atemis blong ol man Efesas i no sem mak. Atemis blong Gris hem i wan vajin woman god blong lukaot long ol man we oli ronem ol anamol blong kilim olgeta mo blong lukaot long ol woman taem oli karem pikinini. Be Atemis blong Efesas hem i woman god we i givim paoa long ol man mo woman blong karem plante pikinini, mo i mekem garen i karem plante kakae. Ol man oli ting se bigbigfala haos prea blong hem long Efesas i wan long ol seven bigfala samting blong sapraes long wol ya long taem bifo. Oli ting se pija blong hem i foldaon long heven. Pija blong hem i soemaot klia mining blong hem, from we hem i gat fulap titi oli laen long jes blong hem. Oli defren, oli luk olsem ol eg nomo. Plante man oli talem se ol titi ya oli luk defren from we oli saen blong ol eg we oli joen long wan string, no oli saen blong bol blong buluk. Nating we mining blong olgeta i olsem wanem, be i klia se oli saen blong seks.

Wan buk (The New Encyclopædia Britannica) i talem se fastaem, pija blong woman god ya “oli wokem long gol, wud, selva, mo blakston.” Wan pija blong Atemis blong Efesas we oli wokem samwe biaen long 100 K.T.,a oli mekem fes, han, mo leg blong hem oli blak.

Ol man oli karem pija blong Atemis, nao oli wokbaot long ol rod blong soemaot hem. R. B. Rackham we hem i skul gud long Baebol, hem i talem se: “Insaed long haos prea [blong Atemis] i gat . . . ol pija mo olta blong hem, mo ol tabu tul we oli wokem long gol mo selva. Taem oli mekem ol bigfala lafet, oli wokbaot wetem olgeta, oli go long taon mo oli kambak, blong soem olgeta.” Plante handred taosen man oli aot long ol ples blong Esia Maena, oli wokbaot i kam long ol lafet ya. Oli pem ol smol pija blong woman god ya, mo oli ona long hem se hem i hae, hem i nambawan woman blong olgeta, kwin, vajin, “mo hem i harem mo i ansarem ol prea blong olgeta.” From ol samting ya, tingting blong Pol mo ol Kristin bifo i mas strong blong leftemap “God ya [we] hem i mekem wol ya” i go antap long ol man god mo ol woman god we oli wokem long “gol no selva no ston.”

Fastaem Mama God, Afta “Mama Blong God”

Aposol Pol i bin talem long ol elda long Kristin kongregesen long Efesas se fasin blong apostasib bambae i kam antap. Hem i givim woning se ol man blong apostasi bambae oli girap, “oli gyaman nomo blong lidim ol man blong Jisas oli biaen long olgeta, oli go krangke.” (Ol Wok 20:​17, 28-30) Long taon ya Efesas, i gat wan bigfala denja i stap oltaem. Man i save lego tru wosip, i save gobak long wosip blong mama god ya. ?Samfala oli mekem olsem?

Wan buk (New Catholic Encyclopedia) i talem se: “Fulap man oli wokbaot i kam long Efesas, from we oli ting se hem i wan tabu taon. Oli ting se oli bin berem [aposol] Jon long taon ya. . . . Wan narafala tijing we Kaonsel blong Efesas i agri long hem (431), i joenem Tabu Vajin Meri wetem St. Jon. Jyos ya we Kaonsel i hivap long hem, oli kolem Jyos blong Meri.” Wan narafala buk blong ol Katolik (Théo​—⁠Nouvelle encyclopédie catholique) i tokbaot “wan tijing we yumi save bilif long hem,” se Meri i go wetem Jon long Efesas, nao hem i stap long ples ya gogo laef blong hem i finis. ?Sipos Meri i stap long Efesas long taem bifo, from wanem samting ya i wan bigfala samting long yumi tede?

Wan buk (The New Encyclopædia Britannica) i ansarem kwestin ya: “Wosip long mama blong God i kam bigwan taem Kristin Jyos i kam bigfala jyos blong kantri aninit long rul blong Constantine. Long taem ya, fulap hiten man oli joen long skul ya. . . . Oli strong long skul blong olgeta from we plante taosen yia finis ol man oli wosip long ‘bigfala mama’ god ya mo ‘vajin we i olsem God.’ Samting ya i stat longtaem bifo long ol olfala skul blong ol man Babilon mo Asiria.” ?Yu ting se i gat wan ples we i moa stret bitim Efesas blong mekem wosip blong mama god ya i joen wetem “Kristin wosip”?

Taswe long 431 K.T. long Efesas, namba tri kaonsel blong ol skul we oli talem se oli Kristin, oli putum nem ya “Theotokos” long Meri. Hemia i wan Grik tok we i min se “i bonem God,” no “Mama blong God.” Wan buk (New Catholic Encyclopedia) i talem se: “I klia se nem ya we Jyos i putum [long Meri] i givhan bigwan plante handred yia biaen blong mekem se tijing mo ona long Meri i kam bigwan moa.”

Kaonsel ya i bin hivap long wan ples we oli kolem “Jyos blong Vajin Meri.” Sam ston blong olfala jyos i stap yet long ples we taon ya Efesas i stap long hem bifo. Mo tu, i gat wan narafala jyos long ples ya, we oli talem se hemia haos we Meri i laef mo i ded long hem bifo. Long 1967, Pop Pol 6 i visitim ol jyos ya we oli yusum blong wosip long Meri long Efesas.

Taem aposol Pol i visitim Efesas long faswan handred yia, hem i luk we taon ya i fulap long hiten wosip blong mama god ya. Yes, Efesas i stampa taon blong tanem hiten wosip ya i kam wosip blong Meri olsem “Mama blong God.” From wosip we sam skul oli mekem long Meri, long rod ya nao, wosip blong mama god ya i stap yet long ol kantri blong Krisendom.c

Wosip Blong Mama God Ya i Stap Yet

Wan buk (Encyclopædia of Religion and Ethics) i talemaot tok ya blong wan man we i stadi long Baebol, nem blong hem W. M. Ramsay. Hem i se: “Afta long 400 K.T., ona we ol man oli givim long Vajin Meri long Efesas hem i [wan nyufala] wei blong mekem hiten wosip blong ol man Anatolia bifo, long saed blong Vajin Mama, i gohed.” Wan narafala buk (The New International Dictionary of New Testament Theology) i talem se: “Nating we ol Katolik tijing long saed blong ‘mama blong God’ mo ‘kwin blong heven’ oli kamaot biaen long taem blong Nyutesteman, be tijing ya i stat longtaem bifo long ol kantri blong Is. . . . Long wosip we oli givim long Meri i gat plante tijing we oli kamaot long hiten wosip blong bifo, long saed blong mama blong God.”

I no sam tijing nomo we oli sem mak long wosip ya long taem bifo, be plante tumas tijing oli sem mak nomo. Plante pija blong Vajin Meri wetem pikinini blong hem mo plante pija blong ol hiten woman god bifo, olsem Isis, oli kolosap sem mak. Plante handred pija mo aedol blong Blak Madonna we oli stap long ol Katolik jyos long ol ples long wol, oli sem mak olsem pija blong Atemis bifo. Wan buk (Théo​—⁠Nouvelle encyclopédie catholique) i tokbaot ol Blak Vajin ya, i se: “I luk olsem we oli yusum ol aedol ya blong seftem wosip we oli givim long Diana [Atemis] . . . no Sibel i go long Meri.” Long ‘Asamsen Dei’ plante man oli wokbaot long rod blong soemaot ol aedol blong Vajin Meri. Long taem bifo tu, oli wokbaot long rod blong soemaot ol pija blong Sibel mo Atemis.

Ol nem we oli givim long Meri i mekem se yumi tingbaot ol hiten mama god blong bifo. Bifo oli singaot Ista se “Tabu Vajin,” “Gudfala Woman,” mo “mama we i gat sore mo i lesin long ol prea.” Oli singaot Isis mo Astate se “Kwin blong Heven.” Sibel, oli singaot hem se “Mama blong Olgeta we oli Kasem Blesing.” Tede oli jenisim ol nem ya lelebet nomo, nao oli putum olgeta long Meri.

Kaonsel blong Vatikan Namba 2 i pulum ol man blong wosip long “Tabu Vajin.” Ol man oli save se Pop Jon Pol 2 i givim bigfala ona long Meri. Long ol trep blong hem, hem i no mestem wan jans blong go long ol olta we oli wokem blong wosip long Meri. Mo hem i go luk Blak Madonna long taon ya Jestorova, long Polan. Hem i putum ful wol long han blong Meri. Taswe yumi no sapraes we wan buk (The New Encyclopædia Britannica) i tokbaot “Mama God ya” olsem, i se: “Nem ya, oli putum long ol aedol bifo we oli kolem ‘Vines blong Ston Ej,’ mo oli putum long Vajin Meri tede.”

I no ol wosip we ol Katolik oli givim long Meri nomo we i soemaot se wosip blong mama god ya i stap yet tede. Sam woman we oli mekem ol grup blong leftemap ol woman nomo oli raetem sam buk long saed blong wosip blong ol mama god ya. Oli ting se ol man oli daonem ol woman tumas mo oli bos long olgeta long raf fasin. Mo oli bilif se wosip blong ol woman god i soemaot se ol man oli wantem se wol ya i kamgud moa mo i no raf tumas. Mo i luk olsem we oli bilif tu se wol blong tede bambae i kam moa gud mo i gat moa pis sipos oli lesin moa long ol woman.

Be wosip blong mama god ya long taem bifo i no mekem pis i kamaot long wol. Mo bambae i no mekem pis long wol tede tu. Fulap man tede, mo plante milyan man we oli joen wetem ol Wetnes blong Jeova, oli respektem mo laekem Meri from we hem i gudfala woman blong faswan handred yia we hem i gat bigfala blesing. Hem i bonem Jisas mo i lukaot long hem. Be ol Wetnes blong Jeova oli save se bambae Meri i no sevem wol ya. Mo oli no bilif se grup ya we oli kolem Kampani Blong Mekem Ol Woman Oli Fri, oli save mekem pis long wol, nating we sam samting we oli traehad blong kasem oli oraet nomo. Ol Wetnes blong Jeova oli trastem God ya we Pol i talem long ol man Atens mo long ol man Efesas se “God ya, hem i mekem wol ya, mo olgeta samting we oli stap long hem.” (Ol Wok 17:24; 19:​11, 17, 20) God ya we i gat Olgeta Paoa, we nem blong hem Jeova, hem i promes blong mekem wan nyufala wol we “stret fasin nomo bambae i stap long hem.” Yumi save bilif fulwan se promes ya bambae i kamtru.​—⁠2 Pita 3:13.

Baebol i tokbaot prapa ples blong ol woman long fored blong God mo ol man. Narafala haf blong magasin ya bambae i storeyan long samting ya.

[Ol futnot]

[Tok Blong Pija Long Pej 5]

ASTORET—Woman god blong seks mo wo long Kenan

[Credit line]

Musée du Louvre, Paris

[Tok Blong Pija Long Pej 6]

ATEMIS—Woman god blong seks long Efesas

[Credit line]

Musei dei Conservatori, Rome

[Tok Blong Pija Long Pej 7]

“MAMA BLONG GOD” long Krisendom

[Credit line]

Chartres Cathedral, France