Pis Mo Seftaem—?Baebol i Talem Wanem?

Plante man i ting se yumi stap go from wan taem we wol i save joen gud tugeta, ale pis mo seftaem i save kamaot from. Oli ting se wol bambae i kamgud from ol samting ya. Be Baebol i soemaot trufala mining blong ol samting ya we ol man oli stap luk.

TOKTOK long saed blong pis mo seftaem hem i impoten tumas long ol Kristin, from we God i givim tok long aposol Pol blong raetem long wan Kristin kongregesen long faswan handred yia. Ol tok blong hem oli stap long Baebol long 1 Tesalonaeka 5:​3, se: “Taem ol man oli stap talem se [‘Pis mo seftaem,’ NW] long taem ya nao bambae bigfala trabol i save kasem olgeta, i spolem olgeta. Bambae trabol ya i spolem olgeta wantaem nomo, olsem we woman i harem nogud blong bonem pikinini. Mo olgeta bambae oli no save ronwe.” I gat ol impoten kwestin oli kamaot from vas ya.

?Pis Mo Seftaem i Statem Wanem?

Sipos yu ridim ol tok we i stap raonabaot long tok blong Pol antap, yu luksave we ol man ya we oli talem ‘pis mo seftaem’ oli no Kristin we oli stap wekap gud, no gat. Olgeta ya, hemia ol man we i stap slip, i no save wanem i stap hapen. Ol man olsem oli stap long wan denja be oli no luksave. From we oli stap ting se ol samting i gud nomo. Pol i talem long ol tru Kristin, se: “Ol brata mo sista. Long saed blong stret dei mo stret taem blong ol samting ya, i no gat nid blong mi raetem tok i go long yufala.” (1 Tesalonaeka 5:⁠1) Taswe, yumi mas wekap gud blong tingbaot taem ya blong God. ?From wanem? From we Pol i talem se bigfala trabol ya i kam wantaem nomo, hemia “dei blong Jeova,” mo hem i kam “stret olsem man blong stil long naet.”​—⁠1 Tesalonaeka 5:⁠2, NW.

?Oli mekem wanem taem bambae oli talemaot ‘pis mo seftaem’? I klia se bambae oli no toktok nomo. Ol man oli tokbaot pis longtaem finis, from we oli mekem plante faet. Be tok blong Pol i makemaot wan taem we i luk olsem ol nesen bambae oli save wokem pis mo seftaem, i defren olgeta long olgeta fasin blong bifo. Be hem i wan gyamanwan nomo. Hemia pis mo seftaem we i blong lus wantaem nomo, hem i no wan trufala pis mo seftaem.

Jisas tu i tokbaot bigfala trabol ya we wantaem nomo i kam. Hem i se: “Bambae i gat bigfala trabol tumas, we neva man i luk olsem bifo, i stat long taem we God i mekem wol, i kam kasem tede. Yes, mo bambae i no moa gat sam bigfala trabol olsem bakegen samtaem.” Sam handred yia bifo Jisas, profet Daniel tu i tokbaot taem ya olsem se “taem blong harem nogud. Taem olsemia i no bin hapen samtaem, i stat long taem ya we ol nesen i stat i kam kasem taem ya nomo.”​—⁠Matyu 24:21; Daniel 12:⁠1.

Yumi save tokbaot taem ya se taem blong trabol, no taem blong harem nogud. Olsem ol profet tok oli soemaot, long taem ya ol fasin mo evri samting we Setan i bos long hem long wol ya, bambae oli finis. Yes, taem bambae oli talem pis mo seftaem, God i no save agri long olgeta, no gat. !Bambae hem i agensem olgeta!​—⁠Skelem wetem Sefanaea 3:⁠8.

?Wetaem?

From ol samting we oli stap kamaot long wol, plante man oli hop se bambae ol kantri oli joen gud long pis mo seftaem. ?Olsem wanem? ?Hemia i min se profet tok blong Pol i kamtru finis? Olsem magasin ya i stap talemaot oltaem se, stat long 1914 yumi stap luk ol profet tok blong Baebol oli stap kamtru blong soemaot we Jisas i kambak finis, i stap long heven long paoa blong Kingdom. (Matyu, japta 24, 25; 2 Timote 3:​1-5; Revelesen 6:​1-8) Jisas i soemaot se ol man we oli laef oli luk stat blong ol trabol ya, bambae oli no ded evriwan, nao dei blong Jeova i save kam. Long taem ya, bigfala trabol i kam wantaem mo ol rabis man bambae oli lus.​—⁠Luk 21:​29-33.

Aposol Pol i talemaot wan spesel taem tu. Hem i talem se: “Taem oli stap tokbaot pis mo seftaem, wantaem nomo trabol i kam long olgeta.” (The New English Bible) Ol tok ya blong Pol i soemaot klia se bigfala trabol i kam “taem oli stap tokbaot.” Ol man oli no save wetaem man blong stil i kam long naet. Long sem fasin, bigfala trabol bambae i kam taem ol man oli no tingbaot. Long taem ya, plante man oli stap tingbaot pis mo seftaem. Naoia yumi no save talem stret se, ol tok blong Pol long pis mo seftaem i kasem mak blong hem finis. Mo tu yumi no save talem stret se, ol tok long pis mo seftaem i save kasem wanem mak yet. Be tok ya pis mo seftaem, we i kamaot plante tede, i pulum ol Kristin blong stap wekap oltaem.

Ol Wol Paoa Oli Puspusum Olgeta

Taem profet Daniel i tokbaot taem ya blong harem nogud, hem i talemaot wan spesel taem. Hem i talem se tu bigfala paoa oli stap agensem tufala. Nao long en blong fasin ya, taem ya blong harem nogud i save kamaot. Fasin ya blong no laekem mo agensem tufala i stat longtaem finis i kam. Tufala paoa ya hemia “king blong not” mo “king blong saot.” (Daniel 11:​5-43) Stat long en blong Namba Tu Wol Wo, tufala paoa ya hemia “king blong saot” we i kapitalis, mo “king blong not” we i komunis.

Profet Daniel i talem se tufala paoa ya bambae i no laeklaekem tufala nating. So, ol 45 yia we i pas finis i makem gud samting ya. Tufala i stap agens long tufala, olsem ol man blong resling oli stap puspusum olgeta blong save se hu nao bambae i win. Tede, fasin ya blong tufala i stap godaon. Las yia long Mei, Foren Minista blong Rasia i talemaot se ‘Kol Wo’ i finis, hemia fasin we tufala kantri i raorao oltaem. Long Jun, nyuspepa ya Time i tokbaot wan miting we Amerika mo Rasia tufala i gat, se: “Tufala kantri i agri blong no bitim mak blong wokem ol tul blong faet mo testem ol nyuklia bom blong tufala. Long sam yia bifo, sipos tufala kantri i agri long wan no tu samting olsem nomo, ating ol man oli sapraes tumas. Naoia oli agri long plante samting, be ol man oli no sapraes.”

Taem i mas pas blong yumi luk sipos tu bigfala paoa ya i rili save stap fren no no gat. Be wan samting i klia se, taem ya we Jisas i tokbaot i stap kam. Mo ol samting we oli stap kamaot long wol tede i soemaot se yumi stap kolosap long ol samting we aposol Pol mo profet Daniel i tokbaot. Nating se ol jyos we oli talem se oli Kristin oli stap wok insaed long ol bigfala jenis long saed blong politik, samting ya i no save givim pis blong olwe long ol man. Be i klia se olgeta ya oli stap go wetem ol nesen blong wol long bigfala trabol.

[Tok Blong Pija Long Pej 6]

Taem i mas pas blong soemaot sipos tu bigfala paoa ya i save stap olsem fren blong longtaem

[Credit line]

USSR Mission to the UN