Denja Blong Nyuklia—!I Finis Blong Olwe!
GOD i no wantem se olgeta man oli stap wetem fasin fraet ya we i mekem olgeta oli harem nogud. Olsem ‘God ya we i stap haremgud oltaem,’ hem i wantem se olgeta man oli haremgud long pis mo stap sefgud—blong sotem tok ya, hem i wantem se oli hapi. (1 Timote 1:11) I klia nomo se ol man oli no save hapi sipos oli stap long wan wol we i fulap long ol denja blong nyuklia paoa.
“Pis Mo Seftaem”—Wan Gyaman Tok
Yumi mas save se denja blong nyuklia paoa i stap yet. Nating se i gat plante trabol long saed blong politik, mane, mo ol faet bitwin ol grup blong man, i luk olsem se olgeta nesen oli bilif se bambae wan taem we i sefgud i mas kamaot long wol. Oli stap mekem plante samting blong traem daonem denja blong nyuklia stat long 1986, yia we Yunaeted Nesen i talem se Intenasnal Yia blong Pis.
Magasin ya The Bulletin of the Atomic Scientists i bin jenisim klok blong hem—hemia i olsem saen blong soemaot wan nyuklia faet se i kolosap olsem wanem—we i stap 3 menet bifo twelef klok medel naet, i gobak long 17 menet bifo twelef klok medel naet. Long 1989, Stokolm Intenasnal Pis Risej Instityut i talem se “naoia i gat moa hop blong stretem ol trabol long fasin we ol kantri oli no yusum ol tul blong faet, bitim ol narafala yia stat long en blong Namba Tu Bigfala Faet blong Wol.”
Long ol yia we oli jes pas, oli bin givim moa paoa long Yunaeted Nesen blong stretem ol faet we oli stap kamaot plante taem long ol ples long wol. Nating se hem i no stopem ol faet fulwan, ol wok blong hem oli naf blong pulum ol man blong tingting long wan fyuja we i sefgud. I luk olsem se long fyuja hem i save mekem sam moa wok we i save karem frut. Ol toktok long saed blong “pis mo seftaem” we ol man oli stap tokbaot, ating bambae i kam bigfala moa mo i kam strong moa. Maet samtaem i save luk olsem we ol tok blong olgeta oli tru.
!Be lukaotgud! Baebol i givim woning se: “Taem bambae ol man oli talem se: ‘!Pis mo seftaem!’ long taem ya nao, bambae trabol i kam blong spolem ol man ya olgeta. Bambae trabol ya i kam long olgeta wantaem nomo, olsem woman we i gat bel, taem hem i harem nogud blong bonem pikinini. Mo olgeta bambae oli no save ronwe nating.” Olsem nao, ol toktok long saed blong “pis mo seftaem” bambae i makem taem we God bambae i “spolem ol man ya we oli stap [mekem ol nyuklia doti mo ol narafala doti, blong] spolem wol.”—1 Tesalonaeka 5:3, 4, NW; Revelesen 11:18.
Makemgud, Baebol i no talem se ol nesen bambae oli kasem “pis mo seftaem.” Bambae oli tokbaot pis mo seftaem long wan spesel fasin, bambae oli soem strong tingting mo bilif we oli neva bin soem bifo long saed blong wan gudfala fyuja. Bambae i luk olsem we jans blong kasem pis mo seftaem i bitim ol narafala taem bifo. Nating se denja blong ol nyuklia tul blong faet bambae i stap yet, ol nesen bambae oli ting se oli stap sefgud, be bambae hemia i wan gyaman seftaem nomo.
Nating se i olsem, bambae samting ya i no save trikim ol trufala Kristin. !Wetem bigfala intres, bambae oli lukluk biaen long pis mo seftaem blong olgeta man blong luk samting we i moa gud!
Trufala Pis Mo Seftaem
Ol Sam 4:8 i soem se ol man oli save faenem trufala pis mo seftaem long rod ya nomo we Jeova God i mekem: “Taem mi mi ledaon, tingting blong mi i kwaet, nao mi mi slip, from we yu nomo yu stap lukaotgud long mi, nao mi mi sef.” “Pis mo seftaem” we ol man oli talemaot, i gyaman nomo sipos ol tok blong olgeta i no joen wetem Kingdom blong Jeova. Ol tok ya blong olgeta i no save mekem wan gudfala samting i kamaot we i save stap longtaem.
Kingdom blong God we Kraes i rulum bambae i no mekem wok we i hafhaf nomo. Gavman ya blong God bambae i mekem samting we i bitim wok ya blong katem daon namba blong ol nyuklia tul blong faet; bambae hem i finisim olgeta nyuklia tul ya mo olgeta narafala tul blong faet. Ol Sam 46:9 i promes se: “Hem i stap mekem ol faet oli finis long olgeta ples long wol. Hem i stap brekem ol bonara, i stap spolem ol spia, mo i stap bonem ol sil long faea.”
Long sem fasin, ol denja blong nyuklia long ol enjin blong nyuklia paoa we oli no moa wokgud mo ol posen blong ol doti blong nyuklia, bambae oli lus olgeta. Sipos no, bambae ol tok ya oli gyaman nomo se: “Bambae oli sidaon, wanwan, aninit long rop blong frut we oli wokem waen long hem mo aninit long figtri blong olgeta. Bambae i no gat wan samting we i mekem olgeta oli seksek. From we prapa maot blong Jeova blong ol ami i talem olsem.” God i no save gyaman. Yumi no gat wan risen nating blong ting se ol tok blong hem oli no save kamtru.—Maeka 4:4; Taetas 1:2.
?Yu yu laekem blong gat hop blong laef long wan wol we i no moa gat ol denja blong nyuklia paoa blong olwe? Yes, yu save gat hop ya, from we Tok blong God i soemaot klia ol samting we yu mas mekem blong laef long wan wol olsem. Taem yu lanem ol samting ya mo mekem oli wok long laef blong yu, maet wan dei, bambae yu glad blong talem tok ya wetem wan tingting we i spelgud, se: “!Ol denja blong nyuklia—oli finis nao!”
[Tok blong pija long pej 7]
Bambae pis i stap long nyufala wol blong God we i no moa gat denja blong nyuklia nating
[Credit Line]
M. Thonig/H. Armstrong Roberts
[Foto Credit Line blong pija long pej 6]
U.S. National Archives photo