?From Wanem God i Stap Wet Yet?
LUK fes blong wan pikinini we i hanggri. Hem i bunbun mo bel blong hem i solap. Tingbaot we hem i nidim kakae tumas, mo luk we hem i stap karem wan emti dis. Maet mama blong hem i stap lukluk hem. Hem tu i slak, mo fes blong hem i soemaot se i no gat hop nating. Ating yu yu sore tumas, yu wantem krae, be yu holemtaet wora blong ae blong yu.
Long ples blong Sahel, samting olsem i stap kamaot long plante milyan man. Ples ya, kakae i stap sot long hem. Hem i kavremap 6 milyan skwea kilomita long Afrika, i stat long Senegal long wes i gohed long 4,800 kilomita kasem Itiopia long is, hemia long Red Si. Hem i stap daon lelebet long draeples blong Sahara. I tru we kakae i stap sot tu long narafala kantri olsem. Wol Helt Ogenaesesen i ripotem se i gat samwe long 1.1 taosen milyan man raon long wol we oli sik tumas from kakae i sot no oli no stap kasem gudfala kakae.
Hanggri i wan smol haf nomo blong ol trabol we ol man oli stap kasem. Ol man oli mekem doti long wol mo yumi evriwan i kasem trabol from. Politik i sapotem ol nogud fasin mo faet we i kilim plante man i ded mo i mekem plante man i harem nogud. ?From wanem God i letem ol samting olsem i kamaot? ?Hem i kea long yumi?
!God i Kea!
I gat plante samting we i pruvum se Hemia we i Wokem yumi i kea long yumi. Hem i mekem ol samting long wol oli stap wok tugeta blong yumi save harem gud from. Lukluk pija blong sugabag we hem i go long flaoa blong wan frut tri. Sugabag ya i dipen long flaoa. Hem i stap kakae swit wora we i stap insaed long flaoa. Mo tri i dipen long paoda blong flaoa we sugabag i stap karem long bodi blong hem i go long flaoa blong hem. Nao from paoda ya, flaoa i kam frut. Olgeta frut tri oli no mekem olsem. Be God nao i mekem se sam tri mo sugabag oli save wok tugeta olsem. From gudfala fasin ya blong God, yumi save kakae frut we yumi harem gud long hem.
Sugabag i wan bebet we i stap wok long oda. Wan hip blong sugabag i bitim 30,000. Sam sugabag oli gat wok blong lukaot long haos, sam narafala oli klinim haos mo oli mekem se freswin i go insaed. Mo sam narafala oli stap hivimap ol swit wora we oli tekem long flaoa, sam oli stap givim kakae long ol pikinini sugabag, mo sam narafala oli stap lukaotem ol swit wora. God nao i mekem se yumi save kasem hani we i swit taem yumi kakae, from hadwok blong ol sugabag.
Olsem ya nao, ol sugabag mo ol tri oli wok gud tugeta, mo kampani blong sugabag tu i wok gud wanples. Hemia i wan merikel ya. Be hemia wan pruf nomo blong soemaot se God i gat stret fasin mo hem i save mekem ol laef samting oli wok tugeta. Mo hem i mekem plante samting olsem. From samting ya, “God i no gat fasin olbaot, be hem i wan God blong pis.” (1 Korin 14:33, NW) ?Be from wanem nao hem i letem ol man oli stap long fasin olbaot, mo oli stap kasem trabol long plante yia finis? ?Sipos God i kea long yumi, from wanem hem i wet longtaem blong stretem ol trabol naoia? God i gat longfala tingting. ?Be from wanem?
Tok blong God, Baebol, i ansa long ol kwestin ya. Nambawan buk ya i talemaot long yumi se God i gat gudfala risen blong gat longfala tingting olsem. ?From wanem risen? ?Mo i longtaem yet blong God bambae i wet olsem?