?Bambae God i Wet Longtaem Moa?
SAMWE long 3,000 yia bifo finis wan waesman i raetem olsem, se: “Man i rulum ol man blong spolem olgeta nomo.” (Eklesiastis 8:9) Stat long taem ya kam kasem naoia, ol samting oli no stap kamgud nating. Long ol histri i kam, ol man wanwan no ol grup blong man oli stap kasem paoa, be oli bos strong long ol man, mo oli stap ravem olgeta. Be Jeova God i wet, i stap holemtaet longfala tingting blong hem yet.
Taem ol gavman oli sanem plante milyan man blong ded long ol faet, mo oli letem ol kruked fasin long saed blong bisnes i stap, Jeova God hem i wet. Tede, hem i stil wet, hem i gat longfala tingting taem ol man oli spolem gas ya oson (ozone layer) we i kavremap wol antap, mo oli stap mekem doti long win mo solwora. Ating Jeova i harem nogud tumas taem hem i luk ol man i spolem ol gudfala bus mo ol laef samting we oli stap long hem.
?From Wanem God i Gat Longfala Tingting?
Maet wan pija tok i save givhan long yumi blong ansa long kwestin ya. Tingbaot sipos wan man we i wok long wan kampani i stap kam long wok let oltaem. ?Bos blong kampani ya bambae i mekem wanem? I stret blong hem i aotem man ya kwiktaem nomo long wok. Be maet hem i tingbaot proveb blong Baebol we i se: “Man we i slou blong kam kros, hem i fulap long fasin blong luksave. Be man we i no gat longfala tingting, hem i leftemap krangke fasin.” (Proveb 14:29) Taswe fasin luksave i save mekem bos ya i wet lelebet bifo we hem i sakemaot man ya long wok. Maet hem i tingting blong givim taem blong narafala man i save tren blong tekem ples blong hem. Long rod ya kampani i save ron gud moa.
Ating bos ya i wet tu from we hem i sore long man ya. Maet hem i save givim woning nomo long man blong wok ya, blong luk sipos hem i save jenisim fasin blong hem. No maet bos i wantem toktok wetem hem blong luk sipos hem i gat wan trabol we hem i save winim, no sipos hem i no wantem from we tingting blong hem i nogud nomo. Taem bos ya i stap mekem olsem, hem i stap soemaot longfala tingting blong hem. Be longfala tingting blong bos ya bambae i finis. Man blong wok ya i mas jenisim fasin blong hem. Sipos no, bos bambae i sakemaot hem. Rod ya i mekem i gud long kampani mo ol narafala man blong wok we oli stap folem ol rul.
Long sem fasin, Jeova God i gat longfala tingting taem ol man oli mekem nogud. Hem i letem taem i pas, blong i finisim sam kaen problem long wan stret wei. Mo bakegen, longfala tingting ya blong God i givim jans long ol rabis man blong oli save jenisim fasin blong olgeta blong kasem ol blesing blong olwe. Taswe Baebol i enkarajem yumi blong yumi no mas harem nogud long longfala tingting ya blong God. Baebol i se: “Masta blong yumi i gat longfala tingting blong wet long yufala. Nao yufala i mas luk fasin ya blong hem olsem jans blong yufala blong kasem sef ples.”—2 Pita 3:15.
Wan Eksampel
Bifo we Bigfala Wora i ron long taem blong Noa, Jeova God i gat longfala tingting. Long taem ya, wol i fulap long ol raf fasin mo ol nogud fasin. Yumi ridim se: “Nao Jeova i luk we rabis fasin blong man i fulap long wol, . . . nao Jeova i talem se: ‘Bambae mi mi ravemaot ol man we mi mi wokem long graon ya.’ ” (Jenesis 6:5, 7, NW) Taswe Jeova i stap tingbaot wan rod blong finisim ol trabol mo ol rabis fasin long taem ya. Hemia i blong finisim olgeta rabis man. Hem i tekem taem blong mekem. ?From wanem?
From we i no evriwan i rabis man. Noa mo famle blong hem oli stret man long fes blong God. From samting ya, Jeova i wet, i gat longfala tingting. Hem i letem taem long ol stret man ya blong oli mas mekem ol samting i rere blong kasem sef. Mo bakegen, taem ya i givim jans long Noa blong hem i kam “wan prija blong talemaot stret fasin,” hem i givim woning long ol rabis man ya blong oli gat jans blong jenisim fasin blong olgeta. Baebol i talem se: “God i stap wet long olgeta, we tingting blong hem i longfala, be olgeta oli no obei long hem. Nao long bigfala bot ya i gat wan smol kampani, eit man nomo, we God i yusum wora blong sevem olgeta.”—2 Pita 2:5; 1 Pita 3:20.
From Wanem God i Gat Longfala Tingting Naoia
Tede, i sem mak nomo. Wol i fulap long ol raf fasin. Olsem long taem blong Noa, God i jajem wol ya finis olsem Baebol i talem, i se: “Be skae mo graon we i stap naoia, tok blong God i blokem tufala, tufala i stap wet blong bambae faea i kasem tufala. Tok ya bambae i stap holem tufala, gogo i kasem bigfala Dei we God bambae i jajem ol man we oli no obei long hem, nao oli lus.” (2 Pita 3:7) Taem samting ya i kamaot finis, bambae i no moa gat fasin blong spolem wol ya blong yumi, fasin blong spolem ol man we oli no strong, no fasin griri blong ol man we oli stap kasem paoa.
?Be from wanem God i no finisim ol rabis man ya fastaem? From we i gat ol kwestin blong ansarem, mo tu ol impoten samting we God i mas mekemrere fastaem. Ol trabol blong rabis fasin we Jeova i wantem stretem, oli no isi. Mo Jeova i stap tingbaot blong finisim ol trabol ya olgeta. Mo tu, ol man we hat blong olgeta i stret, hem i wantem sevem olgeta long ol sik mo ded.
Taswe Jeova i sanem wan Sevya blong pemaot yumi long olgeta sin blong yumi. Baebol i tokbaot hem, i se: “God i laekem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” (Jon 3:16) I tekem plante taosen yia blong rerem ol rod blong Jisas i kam mo i givim laef blong hem blong sevem ol man. God i gat longfala tingting long olgeta yia ya, from lav blong hem. !I stret nomo we hem i wet blong sevem yumi olsem!
Jisas i givim laef blong hem olsem ransom blong pemaot ol man kolosap tu taosen yia finis. ?Be from wanem God i stap wet yet? Wan samting se, ded blong Jisas i statem wok blong tijim olgeta man. Ol man oli mas lanem rod ya we God i yusum blong sevem ol man. Taswe hem i givim jans ya blong ol man i save akseptem no sakem. Hem i tekem taem, be hemia i stret taem nomo blong mekem wok ya. Baebol i talem se: “Sam man oli ting se Masta blong yumi [Jeova, NW] i stap tektaem tumas, i no mekem promes blong hem i kamtru kwik, be i no olsem. Hem i stap mekem tingting blong hem i longfala blong wet long yufala, from we hem i no wantem blong ol man oli lus. Hem i wantem blong olgeta man bambae oli tanem tingting blong olgeta from ol sin blong olgeta.”—2 Pita 3:9.
Kwestin Long Saed Blong Gavman
Narafala impoten bisnes tu, i tekem taem blong stretem. God i wantem soemaot wanem kaen gavman i stret blong rulum ol man. Bifo, long garen blong Iden, man i stap aninit long gavman blong God. Be tufala fas papa mama blong yumi oli tanem baksaed long gavman ya. Tufala i jusum blong kam independen long God, tufala i wantem rulum tufala nomo. (Jenesis 3:1-5) Be God i no wokem man blong rulum hem wan. Taswe profet Jeremaea i raetem se: “O Jeova, mi mi save gud we man i kamaot long graon, hem i no naf blong bos long prapa rod blong hem. Man we i stap wokbaot, hem i no naf blong jusumaot rod ya we hem i mas wokbaot long hem.”—Jeremaea 10:23; Proveb 20:24.
Stat long taem we kwestin blong rul olsem gavman i kamaot, Jeova i gat longfala tingting mo i letem taem i pas blong ansarem. Hem i letem plante taosen yia oli pas, blong ol man oli traem ol defrenkaen gavman. ?Wanem i kamaot from? Hem i kam klia nao se ol gavman blong ol man oli no save finisim ol nogud fasin, ol trabol mo ol narafala samting we i stap mekem ol man i harem nogud.
Taswe God i talemaot plan blong hem blong tekemaot olgeta gavman mo putumap gavman blong hem. Taem yumi lukluk histri blong ol man, ?i gat man i save talem se plan ya blong God i no stret? !No gat! Yumi wantem tumas blong luk profet tok blong Baebol i kamtru. Hem i se: “Long taem blong ol king ya, God blong heven bambae i stanemap wan kingdom we neva i save brokdaon. Mo bambae kingdom ya i no save go long han blong narafala nesen. Bambae hem i smasem mo i finisim olgeta narafala kingdom ya, mo hem nomo bambae i stanap olwe.”—Daniel 2:44.
King blong Kingdom ya long heven, hemia Jisas ya we i laef bakegen long ded finis. I tekem taem blong God i mekem hem i rere long wok ya—mo tu blong jusum ol man we oli save rul wetem hem. Long taem ya we hem i mekem olsem, God i stap gat longfala tingting.
Blesing Naoia From Longfala Tingting Blong God
Tede, plante milyan man long 212 kantri oli kasem blesing from longfala tingting blong God. Oli joen tugeta from we oli wantem obei long God, mo oli stap mekem wok blong gavman blong hem we i stap long heven. Taem oli mit wanples long Haos-Kingdom oli lanem olsem wanem oli save mekem ol rul blong Baebol i wok long laef blong olgeta. Olgeta oli stap aninit long ol gavman blong ol man from we God i letem ol gavman ya oli wok yet. Be oli no joen long ol politik blong wol ya we i stap seraotem ol man.—Matyu 22:21; Rom 13:1-5.
Fasin joen gud blong olgeta i soemaot we Jeova i save mekem ol man oli joen gud. Hemia ol man we oli wantem lanem blong laekem hem mo mekem wok blong hem. Ating yu mitim olgeta taem oli stap mekem sem wok ya we Jisas hem wan i statem. Hemia wok blong talemaot gud nyus blong Kingdom blong God. Jisas i tokbaot wok ya, se bambae hem i kasem big blong hem, i se: “Nao bambae ol man oli stap talemaot gud nyus ya se God i king blong olgeta man [gud nyus blong kingdom, NW]. Bambae oli talemaot long olgeta ples long wol, blong oli wetnes blong hem long fes blong olgeta man. Nao biaen, bambae Lasdei i save kam.”—Matyu 24:14.
!Hem i Kolosap!
Ol samting ya oli pruvum se God i wokem finis kolosap olgeta samting blong mekem rod long stret gavman blong hem. Nao bambae i no longtaem, gavman ya i save rulum wol ya. Afta we Jisas i stap tokbaot ol trabol we i stap kamaot naoia from we ol gavman blong ol man oli no naf, hem i se: “Ale, taem ya i olsem. Taem yufala i luk we ol samting ya oli kamtru, bambae yufala i save se nyufala wol ya we God i king long hem, bambae i no longtaem hem i kamtru.”—Luk 21:10, 11, 31.
I no longtaem, God bambae i tekemaot ol rabis man long wol ya. Tok blong man blong raetem ol Sam bambae i kamtru, hem i se: “Olgeta we oli trastem Hae God bambae oli tekem graon ya i blong olgeta, be ol man nogud, Hae God bambae i ronemaot olgeta. Bambae i no longtaem, ol man nogud oli lus. Bambae yu save lukaot olgeta, be bambae yu no save faenem olgeta.” (Ol Sam 37:9, 10) Traem tingbaot wan wol we i no gat rabis fasin. ?Hu bambae i lukaot long olgeta samting long taem ya? Baebol i talem se: “Bambae wan king [Jisas Kraes we i king long heven] i rul long stret fasin, mo bambae ol prins [olgeta we hem i jusumaot olgeta long wol], oli rul olsem prins blong folem fasin blong loa nomo. Mo wok blong prapa stret fasin i mas kam pis, mo kwaet fasin, mo fasin blong harem i sef gud blong olwe. Mo ol man blong mi oli mas stap long wan ples blong pis, mo long ol haos we oli no save fraet nating long hem, mo long ol ples blong spel we i no gat trabol long olgeta.”—Aesea 32:1, 17, 18.
Gavman blong God long heven bambae i finisim ol rabis samting we i stap kamaot from ol nogud fasin blong ol man. Mo bambae hem i givim ol gudfala rul long olgeta ya we oli stap trastem hem, blong oli save laef mo wok wanples. Baebol i tokbaot fasin ya, se: “Wael dog bambae i stap smoltaem wetem smol sipsip, mo bambae lepad i slip kolosap long pikinini blong nani, mo pikinini blong buluk mo yangfala laeon mo anamol we i fatfat gud, bambae oli stap tugeta. Mo wan smol boe nomo bambae i lidim olgeta . . . Bambae oli no mekem nogud nating, mo oli no mekem trabol nating long olgeta ples long tabu hil ya blong mi, from we bambae wol ya i fulap tru long save blong Jeova olsem we ol wora oli kavremap solwora.”—Aesea 11:6-9.
!Ol fasin ya oli nambawan! Oli kamaot from we God i gat longfala tingting nomo. Taswe i nogud blong toktok smol from God i wet longtaem tumas. I moa gud yu tekem jans ya blong kam sabjek blong Kingdom blong hem, taem we God i stap wet yet. Yu save lanem ol stret fasin blong hem long Baebol mo jenisim fasin blong yu blong laenap wetem. Joen wetem olgeta ya we oli joen gud aninit long God. Nao bambae yu save kasem blesing blong olwe from longfala tingting blong God.