Trastem Han Blong Jeova Blong i Sevem Yu
“O Jeova, . . . long evri moning yu save kam olsem han blong mifala, yes, yu save sevem mifala long taem blong trabol.”—AESEA 33:2.
1. ?Olsem wanem Jeova i gat bigfala han?
JEOVA i gat bigfala han. From we “God i wan speret,” hem i no gat prapa han olsem mit mo blad. (Jon 4:24) Long Baebol, han i pija blong paoa. Taswe God i stap sevem ol man blong hem, wetem han blong hem. ‘Olsem wan man blong lukaot long sipsip, God i stap lukaot long ol man blong hem. Wetem han blong hem, hem i hivimap ol smol sipsip blong hem, mo hem i holem olgeta kolosap long hem.’ (Aesea 40:11; Ol Sam 23:1-4) Ol man blong Jeova oli harem se oli sefgud long han blong hem from we hem i laekem olgeta.—Lukluk Dutronome 3:24.
2. ?Wanem kwestin we yumi save tingbaot?
2 ?Olsem wanem han blong Jeova i sevem ol man blong hem long taem bifo mo naoia? ?Olsem wanem God i stap givhan long olgeta olsem wan kongregesen? ?From wanem ol man blong hem oli save trastem han blong hem long ol trabol blong olgeta?
Han Blong God i Sevem Man
3. ?Olsem wanem Baebol i tokbaot ol man Isrel taem oli goaot long Ijip?
3 Long 3,500 yia bifo finis, ol man Isrel oli stap kalabus long Ijip. Long taem ya we oli no fri yet long kalabus, God i talem long profet blong hem Moses, se: “Talem long [ol pikinini blong Isrel: ‘Mi mi Jeova, NW]. Bambae mi mi sevem yufala, mi tekemaot yufala long han blong ol man Ijip ya, we oli stap mekem yufala i wok slef, mi mekem yufala i fri. Bambae mi leftemap han blong mi blong panisim olgeta long ol panis we i nogud we i nogud, nao bambae mi sevem yufala, mi mekem yufala i fri.” (Eksodas 6:6) Aposol Pol i tokbaot God long taem ya se, “i leftemap han blong hem” blong mekem ol man Isrel oli kamaot long Ijip. (Ol Wok 13:17, NW) Taem ol man Isrel oli winim Promes Lan long faet finis, ol pikinini blong Kora oli tokbaot faet ya blong God, se: “Ol man blong yu oli no winim graon ya long naef blong faet blong olgeta, no long paoa blong olgeta. Oli winim long paoa [raethan, NW] blong yu mo long han blong yu nomo, mo from we yu mekem oli savegud we yu yu stap wetem olgeta. Hemia i soemaot we yu yu laekem olgeta tumas.”—Ol Sam 44:3.
4. ?Long taem blong ol man Asiria olsem wanem Jeova i givim pei long olgeta we oli trastem hem?
4 Han blong Jeova bakegen i givhan long ol man blong hem taem ol man Asiria oli stap agensem olgeta. Long taem ya profet Aesea i prea long God, se: “O Jeova, plis yu kaen long mifala. Mifala i trastem yu. Long evri moning yu save kam olsem han blong mifala, yes, yu save sevem mifala long taem blong trabol.” (Aesea 33:2) God i ansarem prea ya taem i sanem enjel blong hem blong kilim i ded 185,000 man Asiria long kam blong olgeta. Mo King Senakerib i ronwe long Jerusalem wetem “sem long fes blong hem.” (2 Kronikel 32:21; Aesea 37:33-37) Sipos yu stap trastem han blong Jeova blong i sevem yu, bambae oltaem yu save kasem pei from.
5. ?Olsem wanem bigfala han blong God i givhan long ol Kristin long taem blong Wol Wo Wan?
5 Long taem blong Wol Wo Wan, bigfala han blong God i sevem ol tabu Kristin. Long 1918, ol enemi oli agensem olgeta long hedkwota blong Hed-Kampani. Mo oli putum sam brata we oli savegud olgeta long presin. Ol tabu Kristin oli fraet tumas long ol man blong wol we oli gat bigfala paoa, ale ol Kristin ya oli no moa mekem tumas wok blong wetnes. Be oli stap prea blong stanap strong bakegen mo blong God i fogivim olgeta from we oli no moa prij mo fasin fraet. God i ansa long prea blong olgeta. Nao ol brata ya oli kamaot long kalabus, mo smoltaem biaen kot i faenemaot se oli no gat poen. Long 1919, oli holem wan asembli we oli tokbaot plante trutok, mo God i kafsaedem tabu speret blong hem long olgeta tabu Kristin ya. Nao oli gat paoa, oli no fraet blong mekem wok blong God blong fulumap profet tok blong Joel 2:28-32.—Revelesen 11:7-12.
Hem i Givhan Insaed Long Kongregesen
6. ?Olsem wanem yumi save se i gat rod blong winim ol traem insaed long kongregesen?
6 God i stap sapotem ogenaesesen blong hem, mo wetem han blong hem, hem i kipim ol man i stap insaed long ogenaesesen ya. Ol samting oli no save ron gud olgeta insaed long eni kongregesen, from we ol man oli no stret gud olgeta. (Rom 5:12) From samting ya, sam man blong Jeova oli faenem se samtaem oli save kasem traem insaed long kongregesen. Hemia wan eksampel: Gaeas hem i “holem wok i strong” taem hem i stap tekem ol brata oli kam long haos blong hem, be Diotrefes hem i no mekem olsem. Hem i traem sakemaot olgeta we oli stap tekem ol brata i go long haos blong olgeta. (3 Jon 5, 9, 10) Nating se i olsem, Jeova hem i halpem Gaeas mo ol narafala we oli stap mekem i gud long ol brata, blong sapotem wok blong prij. Fasin blong dipen mo prea long God i givhan long yumi blong holemstrong long ol gudfala wok. Mo yumi wet long hem nomo blong i stretem wan trabol we i traem bilif blong yumi.
7. Ol Kristin long Korin oli winim wanem traem blong holemstrong long promes we oli mekem finis long God?
7 Tingbaot sipos yu joen wetem kongregesen blong Korin long faswan handred yia. Long taem ya, i hadwok blong joengud from ol smosmol grup, mo kongregesen i agri wetem fasin nogud long saed blong seks, we i spolem speret blong kongregesen. (1 Korin 1:10, 11; 5:1-5) Oli stap ripotem ol brata blong olgeta long ol kot blong ol man blong wol blong oli jajem bisnes blong olgeta. Mo sam oli stap raorao from ol narafala samting olsem. (1 Korin 6:1-8; 8:1-13) Oli stap agensem olgeta, oli jelas, oli stap kros, mo ol samting oli paspas, mekem se laef i had tumas. Sam long olgeta oli agensem mo daonem fasin blong toktok blong Pol. (2 Korin 10:10) Nating se i olsem, i gat sam we oli stap joengud long kongregesen yet. Oli stap holemstrong long promes we oli mekem finis long God.
8, 9. ?Wanem samting yumi mas mekem sipos yumi kasem ol traem insaed long kongregesen?
8 Sipos i gat ol traem i kamaot olsem, yumi no mas lego ol man blong God. (Lukluk Jon 6:66-69.) Yumi mas gat longfala tingting. Yumi mas save se fasin blong yumi wanwan i no sem mak. Sam man i tekem plante taem blong oli save “putum nyufala laef” olsem prapa klos blong olgeta, olsem fasin sore long man, kaen, tingting daon, kwaet fasin, mo longfala tingting. Taswe ol man blong God oli mas gat lav mo fasin blong fogivim ol narafala man.—Kolosi 3:10-14.
9 Wan brata we i stap longtaem long wok blong Jeova i talem se: “Wan samting we i impoten moa long mi hemia se, mi mas stap kolosap long ogenaesesen blong Jeova. From ol ekspiryens blong mi bifo finis, mi luksave se i no waes blong trastem tingting blong ol man. Tingting ya i mekem se mi wantem tumas blong stap wetem trufala ogenaesesen ya. I no gat narafala rod bakegen we man i save mekem Jeova i glad mo blesem hem.” ?Yu yu glad long jans ya we yu gat blong joen wetem ol man blong Jeova mo mekem wok blong hem? (Ol Sam 100:2) Sipos yu mekem olsem, bambae yu no save letem wan samting i tekemaot yu long ogenaesesen blong God, no spolem fasin fren gud blong yu wetem God, from we bigfala han blong hem i sevem ol man we oli stap laekem hem.
Hem i Givhan Taem Ol Traem i Kasem Yumi
10. (a) ?Olsem wanem prea i save givhan long ol man blong God blong fesem ol traem? (b) ?Wanem tingting Pol i givim long 1 Korin 10:13 we i save givhan long yumi?
10 From we yumi wanwan i stap joen long ogenaesesen blong God, hem i save givhan taem yumi kasem traem. Eksampel: Hem i halpem yumi blong holemtaet long bilif blong yumi taem yumi kasem ol traem. Yumi mas prea olsem Jisas, se: “Yu no letem ol samting oli kam traem mifala tumas, yu blokem Setan i no kam spolem mifala.” (Matyu 6:9-13) Yumi wantem obei long God. Mo yumi stap askem hem blong hem i no letem ol traem oli winim yumi. Hem i givim waes long yumi blong winim ol traem ya, taem yumi askem hem. (Jemes 1:5-8) Ol man blong Jeova oli save sua se hem i stap givhan long olgeta, from we Pol i talem se: “Ol samting ya we oli stap traem yufala, oli sem mak nomo long olgeta samting we oli stap traem olgeta man. Be God i stap holem promes blong hem. Mo hem i no save letem wan samting bambae i traem yufala, we i strong tumas long yufala. Be stret long taem ya we samting olsem i traem yufala. God bambae i mekem rod blong yufala, blong yufala i winim samting ya.” (1 Korin 10:13) ?Wanem stampa blong ol samting blong traem? ?Mo olsem wanem God i wokem rod blong winim traem ya?
11, 12. ?Wanem ol traem we ol man Isrel i foldaon long hem, mo wanem samting yumi save lanem from?
11 Traem i kam taem sam samting i kamaot we i pulum yumi blong agensem God. Pol i talem se: “Mo olgeta samting ya i olsem wan saen, we i blong wekemap yumi. I nogud yumi stap wantem ol rabis fasin, olsem we olgeta ya bifo [ol man Isrel] oli stap mekem. I nogud yumi stap prea long ol narafala god, olsem we sam long olgeta ya bifo oli stap mekem. Baebol i tokbaot olgeta, i se ‘Ol man ya oli go sidaon blong kakae mo blong dring mo biaen oli girap blong go pleplei olbaot.’ I nogud yumi stap mekem ol fasin nogud ya wetem gel olsem we sam long olgeta ya bifo oli stap mekem. Nao long wan dei nomo i gat twantetri taosen blong olgeta oli ded. I nogud yumi stap traem Hae God ya, olsem we sam long olgeta ya bifo oli stap mekem. Nao ol snek oli kilim olgeta oli ded. Mo i nogud yumi stap tok smosmol agens long God, olsem we sam long olgeta ya bifo oli stap mekem. Nao enjel blong kilim man i kam kilim olgeta oli ded from.”—1 Korin 10:6-10.
12 Ol man Isrel oli stap wantem tumas ol rabis fasin. Taem God i givim ol pijin long olgeta, olgeta oli stap tekem mo kakae long fasin griri nomo. (Namba 11:19, 20, 31-35) Bifo i no longtaem, oli bin mekem wosip long narafala god. Oli letem traem i winim olgeta from Moses i no stap wetem olgeta. Oli wosipim wan buluk we oli wokem long gol. (Eksodas 32:1-6) Plante taosen long olgeta oli ded from we oli slip wetem ol woman Moab. Hemia wan traem we i winim olgeta. (Namba 25:1-9) Bakegen ol man Isrel oli letem traem i winim olgeta taem oli stap tok smosmol long panis we Kora, Detan mo Abiram oli mas kasem from we oli agensem Moses. Nao God i sanem faea i kakae 14,700 long olgeta ya i ded. (Namba 16:41-49) Ol store ya oli givhan long yumi blong luksave se ol traem ya oli no bigfala tumas, ol man Isrel oli save winim olgeta. Oli save mekem olsem sipos oli soemaot bilif mo fasin tangkyu long God from we hem i kea gud long olgeta mo i givim gudfala Loa long olgeta. Nao han blong Jeova i save sevem olgeta. I sem mak long yumi tu.
13, 14. ?Olsem wanem Jeova i soemaot rod blong ol man blong hem taem oli fesem ol traem?
13 Yumi ol Kristin, yumi fesem plante traem we i sem mak long ol narafala man. Be yumi save stanap strong long God sipos yumi prea blong askem hem blong givhan long yumi, blong yumi save winim ol traem ya. God i no save letem ol traem i traem yumi bitim ol mak blong yumi. Sipos yumi stap tru long Jeova, bambae yumi save mekem wil blong hem. Hem i save soemaot rod long yumi, mo i givim paoa long yumi blong winim traem. Taem ol man oli kilim yumi, maet yumi wantem lego bilif blong yumi from we yumi no wantem kasem kil no ded from. Tingting olsem i save traem yumi. Be sipos yumi trastem bigfala han blong Jeova, oltaem nomo hem i save mekem bilif blong yumi i strong mo givim paoa long yumi blong winim ol traem, mo holemstrong long bilif blong yumi. Olsem aposol Pol i talem, i se: “Plante taem, mifala i gat trabol, be neva se tingting blong mifala i foldaon. Sam taem, mifala i no save rod, be neva se mifala i lus olgeta. Ol man oli stap ronem mifala, be neva se mifala i no gat fren blong mifala. Ol man oli stap kilim mifala, be neva se mifala i ded olgeta.”—2 Korin 4:8, 9.
14 Jeova i givhan long ol man blong hem wetem tabu speret blong hem. Tabu speret ya blong hem i mekem olgeta oli tingtingbak bakegen mo tu i tijim olgeta. Hem i givhan long yumi blong tingbaot ol poen long Baebol we i save givhan long yumi, mo olsem wanem blong wokem olgeta long laef blong yumi blong winim ol traem. (Jon 14:26) Ol man blong Jeova we oli gat strong bilif oli savegud from wanem i gat ol traem. From samting ya oli no save folem ol rong rod. Taem oli kasem traem we oli save ded from, be God i soemaot rod long ol blong oli save winim. (Revelesen 2:10) Jeova i givhan long ol man blong hem tru long tabu speret blong hem, be tu hem i yusum ol enjel blong hem blong givhan long ogenaesesen blong hem.—Hibrus 1:14.
Hem i Givhan Long Yumi Wanwan
15. ?Yumi lanem wanem from Sing Blong Solomon?
15 Olgeta we oli stap joen long ogenaesesen blong Jeova, hem i stap halpem olgeta wanwan long ol prapa trabol blong olgeta. Maet wan Kristin i wantem faenem narafala Kristin we i save mared long hem. (1 Korin 7:39) Be sipos hem i harem nogud from we hem i no faenem wan olsem, i gud blong tingbaot King Solomon, hemia king blong ol man Isrel. Hem i no save maredem wan woman Sulamaet we hem i laekem, from we woman ya i wantem maredem wan man blong lukaot long sipsip we i gat fasin daon. Tok blong king long bisnes ya, maet yumi save talem se hemia ‘Singsing Blong Solomon Long Lav We i No Gat Frut.’ Sipos yumi traehad blong mared long wan we yumi laekem be hem i no wantem, samting ya i save mekem yumi krae. Be sipos Solomon i winim trabol olsem, yumi save winim tu. Speret blong God i save givhan long yumi blong gat longfala tingting mo ol narafala fasin tu blong soemaot we yumi fasgud long God. Mo Tok blong God i givhan long yumi blong akseptem se man i no save gat filing long enikaen man nomo. (Sing Blong Solomon 2:7; 3:5) Nating se i olsem, Sing Blong Solomon i soemaot se yu gat rod blong faenem wan man no wan woman we i gat bilif mo i rili laekem yu. Mo tu “gudfala singsing ya” i gat bigfala mining. Hemia lav we Gudfala Man blong Lukaot long Sipsip, Jisas Kraes, i gat long “woman” blong hem hemia 144,000 tabu Kristin.—Sing Blong Solomon 1:1; Revelesen 14:1-4; 21:2, 9; Jon 10:14.
16. ?Famle i save kasem wanem trabol?
16 Nating se sam man oli mared long olgeta we oli gat bilif, be “oli gat trabol long laef blong olgeta.” (1 Korin 7:28) Bambae i gat taem blong oli wari. Oli mas lukaot gud long hasban, waef mo ol pikinini blong olgeta. (1 Korin 7:32-35) Maet sik i save mekem bigfala baden mo trabol long famle. Maet i hadwok blong Kristin papa i givim ol samting we famle i nidim blong laef from trabol long ekonomi, no from we ol man oli ronem olgeta. Maet sam papa mama oli go kalabus, oli no moa save stap wetem ol pikinini blong olgeta. No maet wan long olgeta i harem nogud long bodi blong hem no i ded from ol man i kilim hem. Be long ol traem olsem, yumi save winim mo holemstrong long bilif blong yumi yet, sipos yumi rili trastem han blong Jeova blong i sevem yumi.—Ol Sam 145:14.
17. ?Aesak mo Rebeka i kasem wanem trabol insaed long famle?
17 Samtaem yumi save kasem ol traem we i stap longtaem. Tingbaot, maet pikinini boe i save mekem ol Kristin papa mama blong hem i harem nogud from we hem i mared long wan we i no gat bilif. Samting olsem i kamaot long famle blong olfala Aesak mo woman blong hem Rebeka. Pikinini boe blong tufala ya Esao we i gat 40 yia, hem i mared long tufala woman long laen blong Het. Samting ya i “mekem Aesak mo Rebeka, tufala i harem nogud tumas.” Taswe, “Rebeka i talem long Aesak, i se ‘Tufala woman ya blong Esao, . . . !Mi mi taedgud long tufala! !Sipos Jekob [narafala pikinini blong tufala] i tekem wan gel we i kamaot biaen long Het bakegen, ating i moa gud bambae mi mi ded!’ ” (Jenesis 26:34, 35; 27:46) Taswe maet evri dei nomo, Rebeka i harem nogud tumas from we trabol ya i stap gohed. (Lukluk 2 Pita 2:7, 8.) Nating se i olsem, han blong Jeova i mekem se Aesak mo Rebeka i winim traem ya blong tufala. Mo tufala i holemtaet long fasin frengud blong tufala wetem God.
18. ?Wanem traem we C. T. Russell i winim wetem help blong God?
18 Sore tumas long wan memba blong famle we i baptaes finis i no moa gohed long wok blong God. (Lukluk 2 Timote 2:15.) Sam oli winim ol traem ya taem hasban no waef blong olgeta i no moa stap long trutok, olsem Charles T. Russell we i fas presiden blong Watch Tower Sosaete. Waef blong hem i no moa wantem joen long Sosaete, mo i livim hem long 1897. Hemia afta we tufala i mared long 18 yia finis. Hem i askem blong seraot folem loa long 1903, mo hem i kasem long 1908. Charles T. Russell i harem nogud, taswe long leta we hem i raetem long woman blong hem smoltaem bifo, hem i se: “Long saed blong yu, mi mi prea strong long Masta. . . . Bambae mi no putum hevi baden long yu from we mi mi sore tumas, no mi no save talemaot olgeta filing blong mi blong mekem yu yu sore long mi. Hemia wan filing blong mi nomo: Evritaem, taem mi luk ol klos blong yu mo ol narafala samting blong yu hem i mekem mi mi tingtingbak long fasin blong yu bifo—yu yu fulap long lav mo sore mo long fasin blong givhan—hemia fasin blong Kraes. . . . O yu tingbaot long prea wanem samting bambae mi save talem: Yu mas save we mi mi harem nogud we mi harem nogud tumas. Be i no from we mi stap mi wan nomo olwe, be from we yu foldaon, yu yu lus blong olwe, olsem long lukluk blong mi.” Nating se Russell i harem nogud olsem, God i stap givhan long hem gogo kasem taem we hem i finis long laef blong hem long wol ya. (Ol Sam 116:12-15) Jeova i givhan oltaem long ol man blong hem we oli stap holemstrong long hem.
Long Olgeta Trabol
19. ?Taem ol trabol i stap, yumi save tingbaot wanem?
19 Ol man blong Jeova oli save se hem i “God blong sevem man,” mo tu hem i “stap karem ol hevi samting blong yumi.” (Ol Sam 68:19, 20) Taswe yumi ol wanwan Kristin we yumi givim laef blong yumi finis long God mo yumi stap joen long ogenaesesen blong hem, yumi no mas letem tingting blong yumi i harem nogud from ol trabol. Tingbaot se “God, hem i sefples blong yumi, hem i paoa blong yumi. Oltaem hem i rere blong givhan long yumi long taem blong trabol.” (Ol Sam 46:1) Oltaem yumi save kasem pei taem yumi trastem hem. Deved i talem se: “Mi mi prea long Hae God, nao hem i ansa long mi, i tekemaot olgeta fraet long mi. . . . Taem ol man oli stap spolem mi, mi singaot i go long Hae God, nao hem i harem mi, i tekemaot mi long olgeta trabol blong mi.”—Ol Sam 34:4-6.
20. ?Wanem ol kwestin we i stap blong tingbaot?
20 I tru ya, Papa blong yumi long heven i stap sevem ol man blong hem long ol trabol. Hem i givhan long ogenaesesen blong hem long wol, mo hem i givhan tu long kongregesen mo long ol bisnes blong yumi wanwan. Taswe, “Hae God bambae i no save lego yumi ya we yumi ol man blong hem.” (Ol Sam 94:14) Be yumi save tingbaot ol narafala rod we Jeova i stap givhan long olgeta man blong hem wanwan. ?Olsem wanem Papa blong yumi long heven i givhan long ol man blong hem we oli sik, tingting blong olgeta i stap daon oltaem from wari, oli harem nogud from famle i ded, mo oli harem nogud from ol mastik blong olgeta? Olsem we yumi luk finis se long ol trabol olsem, yumi save trastem bigfala han blong Jeova.
?Olsem Wanem Yu Yu Ansa?
◻ ?Olsem wanem han blong Jeova i sevem ol man long ol taem blong bifo?
◻ ?Olsem wanem Jeova i givhan long ol man blong hem insaed long kongregesen tede?
◻ ?Olsem wanem God i givhan long ol prapa bisnes blong yumi wanwan?
◻ ?Yumi mas mekem wanem taem ol trabol oli stap longtaem?
[Tok Blong Pija Long Pej 9]
God “i leftemap han blong hem” blong tekemaot ol man Isrel long Ijip