Letem Ol Han Blong Jeova We Oli Blong Olwe Oli Givhan Long Yu
“God we i stap oltaem nomo hem i prapa ples blong yu, mo ol han blong hem we oli blong olwe oli stap aninit long yu.”—DUTRONOME 33:27, American Standard Version.
1, 2. ?From wanem ol man blong Jeova oli save gud we Jeova i stap givhan long olgeta?
JEOVA i kea long ol man blong hem. !Long taem we ol man Isrel oli harem nogud, “samting ya i mekem hem i harem nogud”! Taswe long lav mo kaen fasin hem i “leftemap olgeta mo karem olgeta.” (Aesea 63:7-9) Sipos yumi holemstrong bilif blong yumi long God, yumi save gud we hem i stap givhan long yumi.
2 Profet Moses i talem se: “God blong bifo hem i prapa ples blong haed, mo han blong hem we i stap oltaem nomo, i stap aninit long yu.” (Dutronome 33:27) Narafala translesen i talem olsem: “God we i stap oltaem nomo hem i prapa ples blong yu, mo ol han blong hem we oli blong olwe oli stap aninit long yu.” (American Standard Version) ?Be olsem wanem han blong God i sapotem ol man blong hem?
?From Wanem i Gat Plante Hadtaem?
3. ?Wetaem olgeta we oli obei long Kingdom bambae oli harem gud long “gudfala fasin fri, we i blong ol pikinini blong God”?
3 Taem yumi mekem wok blong Jeova, samting ya i no blokem yumi blong no kasem ol hadtaem we olgeta sinman oli stap kasem. Job, man blong wok blong God i talem se: “Man we i bon long woman, laef blong hem i sot nomo, mo i fulap long ol trabol.” (Job 14:1) Mo long saed blong ‘yia blong yumi,’ man blong raetem ol Sam i talem long God se: “Oltaem mifala i stap kasem trabol, mifala i stap harem nogud nomo.” (Ol Sam 90:10) Laef bambae i stap olsem, gogo kasem taem we ‘ol samting we God i mekem bambae oli fri, oli no moa slef blong fasin rotin, mo bambae oli save kasem gudfala fasin fri, we i blong ol pikinini blong God.’ (Rom 8:19-22, NW) Samting ya bambae i kamaot long taem we Kraes i rul long Wan Taosen Yia. Long taem ya, ol man we oli stap aninit long Kingdom ya oli save fri long sin mo ded from we ded blong Jisas i olsem ransom mo i pemaot olgeta. Nao long en blong Wan Taosen Yia ya, Kraes wetem olgeta we oli king mo pris wetem hem, bambae oli givhan long olgeta man we oli stap obei blong oli kam stret gud olgeta. Nao Setan mo ol rabis enjel blong hem oli mekem las traem. Mo olgeta we oli holemstrong long God gogo laswan traem ya i finis, bambae nem blong olgeta i stap blong olwe long “buk blong laef.” (Revelesen 20:12-15, NW) Nao bambae oli harem gud from we oli fri olgeta, oli pikinini blong God.
4. ?Yumi mas mekem wanem blong no toktok smol from ol trabol we yumi kasem long laef?
4 I nogud yumi stap toktok smol from ol trabol we yumi kasem long laef, be yumi mas trastem Jeova. (1 Samuel 12:22; Jud 16) Yumi save soemaot tangkyu from we Hae Pris blong yumi Jisas i mekem rod finis blong yumi kam long God, “nao hem bambae i sore long yumi, mo long gladhat blong hem, hem bambae i givhan long yumi, stret long taem we yumi trabol.” (Hibrus 4:14-16) Yumi neva mas mekem olsem Adam. Hem i jajem Jeova, se Jeova nao i givim wan nogud waef long hem. Hem i se: “Yes, be woman ya nomo we yu givim long mi blong i stap wetem mi, hem nao i givim frut blong tri ya long mi, nao mi kakae.” (Jenesis 3:12) God i stap givim ol gudfala samting. Hem i no stap givim hadtaem long yumi. (Matyu 5:45; Jemes 1:17) Samtaem ol trabol i kamaot from we yumi no waes no from ol mastik blong narafala man. Mo tu trabol i kam long yumi from we yumi sinman, mo yumi laef long wol ya we i stap long paoa blong Setan. (Proveb 19:3; 1 Jon 5:19) Nating se i olsem, han blong Jeova i stap blong olwe, mo i givhan oltaem long ol man we oli holemstrong long hem mo oli stap prea from we oli trastem hem, mo oli stap mekem ol rul blong hem long Baebol i wok long laef blong olgeta.—Ol Sam 37:5; 119:105.
Givhan Long Taem Blong Sik
5. ?Olsem wanem Sam 41:1-3 i givhan long olgeta we oli sik?
5 Sik i mekem plante long yumi i harem nogud samtaem. Deved i talem se: “Olgeta we oli stap tingbaot ol puaman oli save harem gud. Sipos oli stap long trabol, Hae God bambae i givhan long olgeta. Hae God bambae i blokem olgeta, i lukaotgud long laef blong olgeta. Hem bambae i mekem olgeta oli stap long graon ya, oli harem gud. Hem bambae i no save letem olgeta oli go long paoa blong ol enemi blong olgeta. Hae God bambae i givhan long olgeta taem oli sik, mo bambae i mekem olgeta oli oraet bakegen.”—Ol Sam 41:1-3.
6, 7. ?Olsem wanem God i givhan long Deved taem hem i stap long sik bed blong hem? ?Mo olsem wanem samting ya i givhan long ol man blong Jeova tede?
6 Wan man we i stap tingbaot ol narafala man, hem i stap givhan long ol man we oli gat nid. “Dei blong trabol” (NW), hemia wan bigfala trabol no i wan hadtaem we i stap longtaem blong i daonem wan man. Be man we i stap halpem ol man i trastem God blong bambae i lukaot long hem taem bodi blong hem i kam slak. Ol narafala man oli save talem se bambae hem i ‘stap long graon ya, i harem gud,’ from Jeova i stap sore long hem. God i halpem Deved “taem hem i kasem wan sik,” ating long taem ya we Absalom, pikinini blong hem, i stap traem blong stilim wok blong king long Isrel.—2 Samuel 15:1-6.
7 From Deved i stap tingbaot ol man we oli no gat nem, hem i harem se God bambae i givhan long hem taem hem i stap long sik bed blong hem. (Ol Sam 18:24-26) Nating se sik blong hem i nogud, hem i sua se God bambae ‘i jenisim bed blong hem.’ (NW) Hemia i no min se sik ya i save finis olsem wan merikel, be bambae God i mekem hem i strong bakegen wetem ol gudfala tingting. Hemia i olsem we Jeova i jenisim bed blong harem sik i kam bed blong harem gud bakegen long sik. I sem mak long yumi ol man blong wok blong God. Sipos yumi stap harem nogud from sik, han blong Jeova we i blong olwe i save givhan long yumi.
Leftemap Tingting We i Foldaon
8. ?Olsem wanem wan Kristin we i sik i soemaot se hem i trastem God?
8 Sik i save mekem tingting i foldaon. I gat wan Kristin we i sik tumas mo samtaem hem i no gat inaf paoa blong rid. Hem i talem se: “Sik ya i mekem mi mi harem nogud long tingting blong mi. Mo mi harem se mi no save mekem wan gudfala samting, mo tu samtaem mi krae.” Be taem hem i save we Setan nao i stap traem daonem hem, hem i faetem tingting ya, mo i luksave se wetem help blong Jeova hem i no save foldaon. (Jemes 4:7) Taem ol narafala man oli tingbaot strong bilif blong Kristin ya, samting ya i leftemap tingting blong olgeta. (Ol Sam 29:11) Nating se hem i stap long haospetal, hem i stap telefon long olgeta we oli sik mo ol narafala man bakegen blong givhan long olgeta long saed blong speret. Blong givhan long hem wan, hem i stap lesin long ol kaset blong Kingdom melodi, mo ol kaset blong Wajtaoa mo Wekap!, mo tu hem i joen wetem ol narafala Kristin. Brata ya i talem se: “Mi mi toktok wetem Jeova oltaem long prea. Mi askem hem blong givim paoa mo lukaot gud long mi mo blong leftemap tingting blong mi, mo blong hem i givhan long mi blong winim ol traem.” Sipos yu yu wan Kristin we yu stap kasem ol sik long bodi, oltaem yu mas trastem ol han blong Jeova we oli blong olwe, blong i givhan long yu.
9. ?Wanem eksampel i soemaot se samtaem ol man blong God oli save gat tingting we i stap daon from wari?
9 Tingting i stap daon from wari, hemia wan trabol blong bifo. Job i stap toktok olsem we God i lego hem finis from ol traem we hem i kasem. (Job 29:2-5) Fes blong Nehemaea i soemaot se hem i wari from Jerusalem mo wok blong stanemap stonwol blong hem. Pita tu i krae, tingting blong hem i stap daon from wari taem hem i gyaman se hem i no save Kraes. (Nehemaea 2:1-8; Luk 22:62) Epafrodaetas i harem nogud olsem taem ol Kristin blong Filipae oli harem se hem i kasem sik. (Filipae 2:25, 26) Sam Kristin long Tesalonaeka tu, tingting blong olgeta i stap daon from wari, taswe Pol i talem long ol brata longwe blong oli mas “toktok gud blong leftemap tingting blong olgeta we oli harem nogud from we tingting blong olgeta i stap daon.” (1 Tesalonaeka 5:14, NW) ?So olsem wanem God i givhan long olgeta wanwan?
10. ?Wanem samting i save givhan blong winim tingting we i foldaon from wari?
10 Wanwan man i mas mekem prapa disisin blong hem blong winim nogud tingting from wari.a (Galesia 6:5) Yu mas spel gud mo skelem gud ol wok blong yu, samting ya i save givhan long yu. I nogud blong luk olgeta trabol olsem wan bigfala hip blong trabol. Man we tingting blong hem i foldaon from wari i save traem blong winim ol trabol ya wan bae wan. Samting ya i save givhan long hem. Ol elda long kongregesen oli save givhan tu blong leftemap tingting blong hem. Hemia i tru moa sipos trabol ya i stap spolem hem long saed blong speret. (Jemes 5:13-15) Wan impoten samting se yu mas trastem Jeova, ‘putum olgeta trabol blong yu long hem, from we hem i kea gud long yumi.’ Oltaem yu mas prea wetem olgeta hat blong yu, ale ‘pis blong God i save lukaotgud long hat mo tingting blong yu tru long Jisas Kraes.’—1 Pita 5:6-11, NW; Filipae 4:6, 7, NW.
Jeova i Givhan Long Yumi Blong Winim Soasore
11-13. ?Wanem i save givhan long yumi blong yumi no save bitim mak taem yumi sore from ol fren we oli ded?
11 Narafala trabol we yumi save kasem, hemia taem wan man we yumi laekem hem tumas i ded. Ebraham i krae taem hem i lusum waef blong hem Sera. (Jenesis 23:2) Soasore i kasem Deved taem pikinini blong hem Absalom i ded. (2 Samuel 18:33) !Mo tu man ya we i stret gud olgeta, Jisas, “hem i krae” taem fren blong hem Lasros i ded! (Jon 11:35) Yumi stap harem nogud taem wan fren blong yumi i ded. ?Be wanem samting i save givhan long yumi blong no bitim mak long fasin ya?
12 God i givhan long ol man blong hem blong oli winim ol soasore we oli kasem from bes fren blong olgeta i ded. Tok blong hem i talem se bambae i gat laef bakegen long ded. Taswe “mifala i no wantem we bambae yufala i stap harem nogud from olgeta ya, olsem we ol narafala man ya we tingting blong olgeta i no stap long God, oli stap harem nogud from ol ded man blong olgeta.” (1 Tesalonaeka 4:13; Ol Wok 24:15) Speret blong Jeova i givhan long yumi blong gat pis mo blong gat bilif, blong tingbaot ol nambawan promes long fyuja we i stap long Tok blong hem. Taswe yumi no bitim mak blong harem sore long tingting from ol fren we oli ded finis. Yumi harem gud taem yumi stap ridim Baebol, mo mekem prea long God ya we “i gat olgeta fasin blong leftemap tingting blong man.”—2 Korin 1:3, 4, NW; Ol Sam 68:4-6.
13 Bilif long laef bakegen long ded i save mekem yumi harem gud olsem Job, man ya we i fas gud long God. Hem i se: “Plis yu haedem mi long Seol, plis yu livim mi mi stap haed gogo kasem taem we bambae kros blong yu i finis, plis yu makem dei we bambae yu yu save tingbaot mi bakegen. ?Sipos wan man we i strong gud i ded, hem i save laef bakegen? Evri dei long wok kalabus ya we mi mas mekem, bambae mi mi wet gogo kasem taem we bambae mi mi fri bakegen. Yu bambae yu singaot long mi, nao mi bambae mi ansa long yu. Bambae yu yu wantem tumas we wok blong ol han blong yu i kambak.” (Job 14:13-15) Yumi no stap harem nogud tumas taem wan gudfala fren blong yumi i go long wan narafala kantri, from we yumi save se bambae yumi luk hem bakegen. Sipos yumi stap tingbaot ded blong wan Kristin we i holemstrong long God long sem fasin, bambae soasore blong yumi i godaon. Sipos hem i gat hop blong laef long wol ya, bambae hem i wekap long slip blong ded, i girap bakegen long wol ya taem Kraes i rul long Wan Taosen Yia. (Jon 5:28, 29; Revelesen 20:11-13) Mo sipos yumi gat hop blong laef blong olwe long wol ya, yumi save mekem welkam long olgeta we yumi laekem tumas, taem oli stanap oli laef bakegen long ded.
14. ?Olsem wanem tu Kristin woman i winim soasore blong tufala taem ol man blong tufala oli ded finis?
14 Wan sista, hasban blong hem i ded finis. Hem i save se hem i mas gohed blong yusum laef blong hem blong mekem wok blong God. Hem i bisi, hem i ‘mekem plante long wok blong Masta’ mo tu hem i wokem wan blangket wetem 800 smolpis blong kaliko. (1 Korin 15:58, NW) Hem i talem se: “Hemia wan gudfala projek, from we oltaem mi stap wok mi save lesin long kaset blong Kingdom melodi mo ol kaset blong Baebol, mekem se tingting blong mi i wok oltaem.” Hem i glad blong tingbaot wan visit we wan elda mo waef blong hem i visitim hem. Elda ya i yusum Baebol blong soemaot se God i rili kea long ol wido. (Jemes 1:27) Wan narafala Kristin woman i no sore long hem wan taem man blong hem i ded. Hem i soemaot tangkyu blong hem long ol fren we oli stap givhan long hem mo hem i intres long ol narafala man. Hem i talem se: “Mi mi prea plante taem long Jeova mo mi kam kolosap moa long hem.” Yes, yumi save stanap strong long ol han blong Jeova we oli blong olwe.
Hem i Givhan Taem Yumi Mekem Mastik
15. ?Wanem tingting we Deved i gat, olsem yumi ridim long Sam 19:7-13?
15 Nating se yumi laekem loa blong Jeova, yumi stap mekem mastik samtaem. Samting ya i save mekem yumi harem nogud, olsem Deved bifo. Hem i laekem loa blong God, mo ol tok blong hem, ol oda blong hem, mo ol stret fasin blong hem, bitim we hem i laekem gol. Hem i talem se: “Oli stap givim save long mi we mi mi man blong wok blong yu. Yu yu stap givim pei long mi, from we mi stap obei long olgeta. Hae God, i no gat man i save luk ol sin we i blong hem nomo. Plis yu mekem mi mi fri long ol sin ya we i stap haed. Plis yu blokem mi blong mi no mekem stronghed blong mi blong mekem ol fasin nogud, mo yu no letem ol fasin ya i kam bos long mi. Nao bambae mi mi kam stret gud, mi aot long paoa blong fasin nogud, mi fri.” (Ol Sam 19:7-13) Yumi traem jekemgud ol tok ya.
16. ?From wanem yumi mas lukaot gud long fasin flas?
16 Ol nogud samting we yumi mekem from flas, oli moa nogud i bitim ol sin we yumi mekem from mastik. God i no moa wantem Sol olsem wan king from we hem i flas, taem hem i mekem sakrafaes long hem. God i talem long hem blong i smasemgud ol man Amalek mo ol ting blong olgeta. Hem i no mekem olsem, hem i letem King Egag blong Amalek i stap laef mo i tekem ol gudfala samting blong olgeta. (1 Samuel 13:8-14; 15:8-19) God i panisim King Usaea wetem leprosi from we hem i flas, hem i wantem mekem wok blong ol pris. (2 Kronikel 26:16-21) Wan taem, kat we buluk i stap pulum blong karem bokis blong kontrak blong Loa i go long Jerusalem kolosap i kafsaed. Nao God i kilim ded Usa from we hem i no tinghae long bokis ya we i tabu. Hem i traem blong holem. (2 Samuel 6:6, 7) Taswe sipos yumi no save wanem samting yumi mas mekem, no yumi gat raet blong mekem wan samting, yumi mas gat tingting daon mo toktok wetem olgeta we oli gat fasin luksave. (Proveb 11:2; 13:10) Sipos yumi gat flas tingting, i gud yumi prea long God blong askem hem blong givhan long yumi blong winim fasin ya long fyuja.
17. ?Olsem wanem fasin blong haedem sin i save spolem man? ?Mo olsem wanem God i save fogivim sin blong yumi mo givhan long yumi?
17 Ol sin we yumi traem haedem oli save mekem yumi harem nogud. Long Sam 32:1-5, Deved i traem blong haedem sin blong hem. Mo hem i talem se: “Hae God, taem mi mi no talemaot ol sin blong mi long yu, mi slak we mi slak, from we evri dei nomo, mi stap krae kasem tudak. Long dei mo long naet, yu stap panisim mi. Paoa blong mi i lus olgeta, olsem wora we bigsan i bonem, nao i drae olgeta.” Deved i kam slak taem hem i traem blong haedem sin blong hem. Mo hem i lusum paoa olsem wan tri we i lusum wora long taem blong bigsan mo draetaem. Hem i harem nogud long tingting blong hem mo long bodi blong hem, mo hem i lusum glad, from hem i no talemaot sin blong hem. Be hem i mas mekem, blong God i save fogivim sin blong hem mo givhan long hem. Taswe Deved i talem se: “Man we Hae God i fogivim hem from ol sin blong hem, mo we i tekemaot ol samting nogud ya blong hem, hem i save harem gud. . . . Ale, mi talem se ‘Bambae mi talemaot sin blong mi long Hae God.’ . . . Nao yu yu fogivim mi from olgeta sin blong mi.” Help we ol Kristin elda oli givim from lav i save mekem man i kam strong bakegen long saed blong speret.—Proveb 28:13; Jemes 5:13-20.
18. ?Olsem wanem trabol we i kamaot from sin i save stap longtaem, mo olsem wanem yumi save harem gud bakegen?
18 Trabol blong man we i mekem sin i save stap longtaem. Olsem Deved, hem i slip wetem Batsiba, mo i mekem plan blong kilim hasban blong hem. Ale biaen hem i maredem Batsiba we hem i gat bel finis. (2 Samuel 11:1-27) God i sore long Deved from promes blong Kingdom, mo from Deved i tanem tingting blong hem long sin ya, mo tu from we Deved i bin sore long olgeta we oli stap mekem nogud long hem. Nating se i olsem Deved i stap kasem trabol insaed long prapa famle blong hem from sin we hem i mekem. (2 Samuel 12:1-12) Pikinini ya we hem i givim long Batsiba i ded. Mo Amnon pikinini blong hem i repem haf sista blong hem Tema. Biaen, brata blong Tema, Absalom, i kilim Amnon i ded. (2 Samuel 12:15-23; 13:1-33) Absalom i sakem doti long nem blong Deved from we hem i slip wetem ol waef blong Deved. Hem i traem blong kam king, be oli kilim hem i ded. (2 Samuel 15:1 kasem 18:33) Taswe frut i stap kamaot yet from sin we hem i mekem. Tingbaot wan man we kongregesen i sakemaot hem from we hem i mekem sin. Maet biaen, hem i tanem tingting blong hem from sin blong hem, mo hem i kambak bakegen long kongregesen. Be i tekem plante yia blong winim ol nogud filing we hem i gat from sin we hem i mekem, mo tu blong hem i gat wan gudfala nem olsem bifo. !Be naoia, man ya i save harem gud from we Jeova i stap fogivim hem mo i stap givhan long hem wetem ol han blong hem we oli blong olwe!
Givhan Long Yumi Taem Yumi Slak
19. ?Olsem wanem speret blong God i givhan long yumi blong winim ol bigfala traem?
19 Taem yumi kasem ol bigfala traem, maet yumi no gat waes mo paoa blong winim traem ya. Long taem olsem, speret blong God “i stap givhan long yumi, we yumi no gat paoa, from we yumi no save wanem fasin i stret blong yumi folem blong prea. Tabu Speret ya, hem nomo i stap prea long God oltaem from yumi, hem i stap krae we i no gat ol tok we i naf blong talem tok blong hem.” (Rom 8:26) Maet Jeova i mekem we ol fasin blong laef blong yumi i jenis, nao traem ya i finis tu. Sipos i olsem, yumi mas soemaot fasin tangkyu from. I gat narafala rod we han blong Jeova i save sevem yumi. Sipos yumi prea from waes fasin, Jeova i save givim speret blong hem blong soemaot long yumi wanem yumi mas mekem blong winim traem, mo i save givim paoa long yumi blong yumi save winim. (Jemes 1:5-8) Jeova i mekem we yumi stanap strong taem yumi ‘harem nogud from plante samting we oli stap kam blong traem yumi.’ Mo biaen, bilif blong yumi i kam strong moa.—1 Pita 1:6-8.
20. ?Sipos yumi letem ol han blong Jeova we oli blong olwe oli givhan long yumi, olsem wanem yumi save harem gud from?
20 Yumi neva mas les blong toktok wetem God long prea. Deved i talem olsem: “Hae God, oltaem nomo mi stap luk long yu, mo yu yu stap sevem mi long ol trabol. Plis yu luk long mi, yu sore long mi, from we mi mi no gat fren blong mi, mo mi no moa strong. Plis yu tekemaot ol samting we i stap mekem mi mi wari tumas, mo yu sevem mi long ol trabol blong mi. Yu tingbaot mi we mi trabol tumas, mi harem nogud, mo yu fogivim mi from olgeta sin blong mi.” (Ol Sam 25:15-18) Olsem Deved, yumi save harem gud from God i sevem yumi, i kea long yumi, mo i fogivim yumi, sipos yumi rili letem ol han blong Jeova we oli blong olwe oli givhan long yumi.
[Futnot]
a Long saed blong sik long tingting, lukluk Wekap! (Engglis) blong Oktoba 22, 1987, pej 2-16, mo Novemba 8, 1987, pej 12-16.
?Olsem Wanem Yu Yu Ansa?
◻ ?Olsem wanem Jeova i givhan long ol man blong hem we oli sik?
◻ ?Sipos tingting blong yumi i stap daon from wari, wanem samting yumi mas mekem blong winim?
◻ ?Wanem samting i save givhan long yumi blong no bitim mak taem yumi sore long ol fren we oli ded finis?
◻ ?Olsem wanem olgeta we oli stap haedem sin blong olgeta oli save harem gud bakegen?
◻ ?Olsem wanem Jeova i givhan long ol man blong hem taem oli kasem ol bigfala traem?
[Tok Blong Pija Long Pej 17]
Yumi save harem gud sipos yumi bilif long laef bakegen long ded, olsem Job