Wan Kwestin

?Sekaraea, we i papa blong Jon Baptaes, sora blong hem i kam fas tu taem hem i no save toktok, olsem we Luk 1:62 i traem blong soemaot?

Sam man oli talem se sora blong Sekaraea i fas tu. Yumi ridim store long Baebol se: “Nao oli wantem putum nem blong [pikinini ya] se Sekaraea, olsem nem blong papa blong hem. Be mama blong hem i talem se ‘No gat. Yumi mas putum nem blong hem, Jon.’ Nao olgeta oli tok long hem, oli se ‘?Olsem wanem? !Yu yu no gat wan famle blong yu nating we i tekem nem ya!’ Nao oli mekem saen long papa blong pikinini ya, blong save wanem nem hem i wantem putum long hem. Sekaraea i mekem saen blong oli tekem pepa i kam, nao hem i raetem se ‘Nem blong hem, Jon.’ Nao olgeta evriwan oli sapraes tumas.”​—⁠Luk 1:​59-63.

Long haf ya i no talem stret se sora blong Sekaraea i fas blong smoltaem.

Bifo long taem ya, enjel Gabriel i talemaot se bambae Sekaraea i gat wan pikinini boe mo hem i mas putum nem blong hem Jon. Olfala Sekaraea i no bilivim tok ya. Nao enjel ya i talem long hem se: “Oraet, from samting ya, bambae yu yu no save toktok. Bambae yu no save talem wan samting, gogo kasem dei ya we promes ya bambae i kamtru.” (Luk 1:​13, 18-20) Enjel ya i talem se voes nomo blong Sekaraea bambae i lus, i no sora blong hem we bambae i sat.

Store ya i gohed i se: “Taem hem i kamaot [long haos blong God], hem i no save toktok long olgeta [we oli stap wet long hem], hem i no save talem wan samting, i stap mekem saen nomo long han blong hem. Nao oli save, se taem hem i stap long tabu ples ya insaed, hem i luk wan samting olsem drim we God i soemaot long hem.” (Luk 1:22) Grik tok we oli yusum blong talem “no save toktok” i save karem mining olsem se hem i no save toktok, no hem i no save harem, no tufala wantaem. (Luk 7:22) ?Olsem wanem long Sekaraea? Traem tingbaot wanem samting i kamaot taem hem i kam gud bakegen. “Nao i stat long taem ya, Sekaraea i save toktok bakegen, nao hem i stap presem God.” (Luk 1:64) Samting ya i soemaot se Sekaraea i no save toktok.

?From wanem, ol narafala man “oli mekem saen long papa blong pikinini ya, blong save wanem nem hem i wantem putum long hem”? Sam man blong transletem Baebol oli tanem tok ya se “long lanwis blong ol saen” no “yusum ol saen lanwis.”

Sekaraea, we hem i no save toktok stat long taem ya we enjel i talem long hem, samtaem hem i mas yusum ol saen, olsem wan saen lanwis, blong talemaot tingting blong hem. Eksampel, hem “i stap mekem saen nomo long han blong hem” long olgeta we oli stap long tempel. (Luk 1:​21, 22) Biaen, taem hem i askem wan pepa, hem i mas yusum saen long han blong hem. (Luk 1:63) I stret nomo, se ol man we oli stap raonabaot long hem long taem ya we hem i no save toktok, oli save mekem saen tu wetem han blong olgeta.

I gat narafala risen from wanem Sekaraea i yusum ol saen olsem Luk 1:62 i talem. Elisabet i talemaot prapa tingting blong hem long saed blong nem blong pikinini boe ya blong hem. Taswe, maet oli no wantem agensem hem, nao oli yusum gudfala rod blong traem faenem tingting blong Sekaraea. Oli save mekem saen wetem hed no wetem han blong olgeta blong luk sipos hem i agri no no gat. Oli no raetemdaon kwestin blong Sekaraea i ridim. Samting ya i soemaot se maet hem i harem ol tok blong woman blong hem. Taswe wan fasin blong sakem hed no wan saen we i kolosap sem mak i save givim mining long Sekaraea se, ‘Oke, yumi evriwan (wetem yu, Sekaraea) yumi harem tok blong hem, ?be wanem prapa tingting blong yu long saed blong nem blong pikinini ya?’

Mo wantaem nomo wan merikel i kamaot, samting we bifo i nogud i kam gud bakegen. “Nao i stat long taem ya, Sekaraea i save toktok bakegen.” (Luk 1:64) I no nid blong talem se hem i save harem toktok bakegen sipos we sora blong hem i no fas.