?God i Lesin Taem Yu Prea?

BOS blong wan kampani i stap tingting sipos hem i save putum wan man blong lukaotem bisnes no hem nomo bambae i lukaot long hem. Long sem fasin, Hae Rula blong heven mo wol i save jusum sipos hem i save kam insaed long wan bisnes no no gat. Baebol i tijim yumi se God i bin jusum se hem nomo bambae i lukluk long ol prea blong yumi, mo taswe hem i talem se yumi sanem ol prea long hem.​—⁠Ol Sam 66:19; 69:⁠13.

Samting ya we God i jusum i soemaot se hem i intres long ol prea blong ol man blong hem. Hem i leftemap tingting blong olgeta, blong oli talemaot evri tingting mo wari blong olgeta long hem. Hem i se: “Oltaem yufala i mas stap prea,” “mekem tingting blong yufala i longfala. Mo yufala i mas stap prea oltaem,” “yufala i mas putum ol trabol blong yufala long [Jeova, NW],” “putum ol trabol blong yufala long [God].”​—⁠1 Tesalonaeka 5:17; Rom 12:12; Ol Sam 55:22; 1 Pita 5:⁠7.

Sipos God i no wantem lesin long prea blong ol man blong hem, bambae hem i no save mekem wan rod blong oli prea long hem, mo hem i no save enkarajem olgeta blong oli yusum. Rod ya we God i jusum blong ol man oli save toktok long hem, hem i wan risen blong mekem ol man oli trastem hem se hem i stap lesin long olgeta. Yes, hem i stap lesin long ol prea blong ol man blong hem.

Yumi no mas fogetem se Baebol i talem klia se God i stap lesin long ol prea. Eksampel, aposol Jon i raetem se: “Mo taem yumi kam long fes blong God long prea, tingting blong yumi i strong olsem. Yumi bilif se sipos yumi askem samting long hem we i stret long tingting blong hem, hem bambae i harem prea blong yumi.” (1 Jon 5:14) King Deved i tokbaot Jeova God olsem Man blong “ansa long ol prea” mo hem i talem se: “Hem i harem voes blong mi.”​—⁠Ol Sam 55:17; 65:⁠2.

Prea i save givhan long man we i stap prea, be Baebol i soemaot se i gat samting i hapen taem wan stret man i prea. I gat wan man i stap lesin long hem. Man ya hem i God.​—⁠Jemes 5:​16-18.

Ol Prea We God i Harem

Baebol i tokbaot plante man we God i harem mo i ansa long prea blong olgeta. Ekspiryens blong olgeta i soemaot klia se ol gudfala samting we oli kamaot from prea, i bitim we man i harem gud from we hem i talemaot mo i luksave ol tingting blong hem nomo. Hem i go moa long hadwok we i laenap wetem ol prea.

Eksampel, taem King Deved i faenemaot nogud plan blong Absalom blong kam king blong ol man Isrel, hem i prea se: “!O Jeova, plis, tanem advaes blong Ahitofel [man blong givim advaes long Absalom] i kam krangke advaes!” Hem i no askem wan smol samting ya, long taem ya ol “advaes blong Ahitofel . . . i olsem taem wan man i askem tok blong trufala God long hem. Advaes blong Ahitofel i olsemia nao.” Biaen Absalom i no wantem harem ol tok blong Ahitofel blong hem i sakemaot King Deved. ?From wanem? “Jeova hem wan i givim tok blong spolem ol advaes blong Ahitofel nating se oli gud, blong Jeova i mekem trabol i kamaot long Absalom.” I klia se, God i harem prea blong Deved.​—⁠2 Samuel 15:31; 16:23; 17:⁠14.

I sem mak, taem Esekaea i askem God blong tekemaot sik blong hem, blong hem i kamgud bakegen. ?Samting ya i kamaot from Esekaea i wantem harem gud nomo taem hem i prea? No gat. Mesej we Jeova i givim long Esekaea, tru long profet blong hem Aesea, i se: “Mi bin harem prea blong yu. Mi mi luk ol wora blong ae blong yu. Hemia noa mi mi mekem yu yu kamgud bakegen.”​—⁠2 King 20:​1-6.

Daniel i no kasem kwik ansa long prea blong hem, nao enjel blong Jeova i leftemap tingting blong hem se: “Ol tok blong yu mi bin harem.” Ol prea blong ol narafala man olsem Hana, ol disaepol blong Jisas, mo Konilyas kapten blong ol soldia, God i ansa long olgeta long fasin we man i no save mekem. Baebol i talem klia se ol prea we oli laenap wetem wil blong God, God i stap harem olgeta, i lesin long olgeta, mo i ansa long olgeta.​—⁠Daniel 10:​2-14; 1 Samuel 1:​1-20; Ol Wok 4:​24-31; 10:​1-7.

?Be olsem wanem God i stap ansa long ol prea blong ol man blong hem tede?

Ol Ansa Long Ol Prea

Ol prea we yumi bin tokbaot, God i ansarem olgeta long fasin we ol man oli save tingting hevi long olgeta, mo tu wetem ol merikel. Be plis tingbaot, long saed blong ol man long Baebol, i no isi blong oli luksave ansa blong plante prea blong olgeta. From we ol man blong God oli prea blong God i givhan long olgeta blong oli holemstrong long stret fasin mo gat fasin luksave, ale oli save folem stret rod. Long ol Kristin, God i stap ansarem ol prea we oli mekem from ol samting long saed blong speret, i no long ol samting we yu save luk no ol merikel.​—⁠Kolosi 1:⁠9.

Taswe yu no mas harem nogud taem God i ansarem prea blong yu long fasin we i defren i no olsem we yu wantem. Eksampel, maet God i wantem givim “paoa ya we i bigfala tumas i blong God” long yu blong yu winim wan traem bitim we hem i tekemaot traem ya. (2 Korin 4:7; 2 Timote 4:17) Yumi no mas ting nating long paoa ya blong God no yumi stap ting se God i no rili ansa long ol prea blong yumi.

Tingbaot Jisas Kraes, Pikinini blong God. Taem hem i stap wari blong i no ded olsem wan man blong tok nogud long God, Jisas i prea i se: “Papa, sipos yu save letem, plis yu tekemaot kap ya, blong bambae mi mi no dring long hem.” ?God i lesin long prea ya blong hem? Yes God i harem, olsem Hibrus 5:⁠7 i talem. Jeova i no blokem Pikinini blong hem blong i no ded long pos, olsem we i mas kamaot. Be, “wan enjel i aot long heven i kam, nao i kamtru long Jisas, i mekem hem i strong bakegen.”​—⁠Luk 22:​42, 43.

?Ansa ya i bigwan mo i wan merikel? !Long tingting blong yumi, hem i olsem wan merikel! Be long saed blong Jeova God, stampa blong paoa ya, hem i no wan merikel. Mo tu taem Jisas i stap laef bifo long heven, hem i save se ol enjel oli stap kamtru long ol man bifo. Taswe long tingting blong Jisas enjel ya we i kamtru long hem, hem i no wan bigfala merikel be i defren long tingting blong yumi. Taem Jisas i no laef olsem man yet Hem i save enjel ya. Nating se i olsem, enjel ya, i givhan long Hem blong i kam strong blong winim traem we i stap long fored blong Hem.

Tede taem God i ansa long ol prea blong ol man blong hem, oltaem hem i stap givim paoa we oli nidim blong oli winim ol traem. Samting ya i save kamaot taem sam Kristin fren blong yumi oli enkarajem yumi. ?Bambae yumi sakem tok blong ol fren blong yumi we oli wantem givhan long yumi, maet from we oli no kasem ol ekspiryens olsem yumi, ale yumi ting se oli no naf blong enkarajem yumi? Jisas i save gat tingting olsem long enjel ya we i kam long hem. Be Jisas i no mekem olsem, hem i akseptem fasin ya we Jeova i yusum blong ansa long prea blong hem mo hem i naf blong mekem wil blong Papa blong hem. Yumi wantem akseptem paoa we God i givim olsem we hem i ansa long ol prea blong yumi. Tingbaot tu, taem man i stanap strong longtaem olsem wetem longfala tingting, plante taem, hem i kasem fulap blesing biaen.​—⁠Eklesiastis 11:6; Jemes 5:⁠11.

Trastem God Se Hem i Stap Lesin

Bilif blong yu long paoa blong prea i no mas foldaon sipos God i no ansarem prea blong yu kwiktaem. Prea blong harem gud long tingting no blong gat moa responsabiliti long wok blong God, i tektaem blong God i ansa long olgeta from we hem i save wanem i stret mo i gud long yumi. (Luk 18:​7, 8; 1 Pita 5:⁠6) Sipos yu stap prea from prapa wari blong yu, yu mas prea oltaem long God blong soem se yu wantem samting ya tumas, mo tingting blong yu i klin mo i tru. Jekob i gat tingting ya, taem hem i stap gohed blong faet wetem wan enjel, hem i talem long hem se: “!Yu mas blesem mi fastaem!” (Jenesis 32:​24-32) Olsem nao, yumi mas trastem God se sipos yumi stap askem oltaem long hem, bambae hem i blesem yumi long prapa taem blong hem.​—⁠Luk 11:⁠9.

Laswan samting, hem i wan bigfala presen long yumi taem Hae God i stap lesin long yumi. ?From samting ya, yumi lesin gud taem Jeova God i talem ol loa long Tok blong hem long yumi? Sipos ol prea blong yumi oli pulum yumi blong kam kolosap moa long God ya we i Wokem yumi, bambae yumi wantem tingting dip long evri samting we hem i talem long yumi.

[Tok Blong Pija Long Pej 6]

God i stap lesin long ol prea. ?Yumi stap lesin long Tok blong hem?