?Olsem Wanem Jehova i Ansarem Ol Prea Blong Yumi?

1-2. ?Samtaem maet yumi stap tingbaot wanem long saed blong prea?

?SAMTAEM yu stap tingbaot se Jehova i stap ansarem ol prea blong yu? Sipos yes, i no yu wan nomo. Plante brata mo sista tu oli gat sem tingting olsem, speseli taem oli stap fesem ol trabol. Sipos yumi stap safa, maet yumi tu yumi faenem i had blong luksave olsem wanem Jehova i stap ansarem ol prea blong yumi.

² Bambae yumi luk from wanem yumi save sua se Jehova i stap ansarem prea blong ol man blong hem. Mo tu bambae yumi tokbaot ol kwestin ya: ?From wanem samtaem i luk olsem se Jehova i no stap ansarem ol prea blong yumi? ?Wanem ol rod we Jehova i yusum blong ansarem ol prea blong yumi tede?

SAMTAEM JEHOVA I NO ANSAREM OL PREA BLONG YUMI OLSEM WE YUMI EKSPEKTEM

3. ?From wanem Jehova i wantem se yumi prea long hem?

³ Baebol i mekem yumi sua se Jehova i lavem yumi tumas mo se yumi sas long ae blong hem. (Hag. 2:7; 1 Jon 4:10) From samting ya, hem i invaetem yumi blong askem help long hem tru long prea. (1 Pita 5:6, 7) Hem i wantem halpem yumi blong stap klosap long hem mo blong yumi stanap strong taem yumi fesem ol hadtaem.

4. ?Olsem wanem yumi save se Jehova i stap ansarem prea blong ol man blong hem? (Yu luk pija tu.)

⁴ Plante taem long Baebol, yumi ridim se Jehova i stap ansarem prea blong ol man blong hem. ?Yu save tingbaot wan eksampol? Wan eksampol hemia blong King Deved. Long laef blong hem, hem i fesem plante enemi mo oltaem hem i prea long Jehova blong i givhan long hem. Wan taem, hem i plis long Jehova se: “O Jehova, yu harem prea blong mi, yu lesin long mi taem mi plis long yu blong yu halpem mi. Plis yu ansa long mi from we oltaem yu yu holem promes blong yu, mo yu gat stret fasin.” (Sam 143:1) Jehova i ansarem prea blong Deved blong tekemaot hem long ol enemi blong hem. (1 Saml. 19:10, 18-20; 2 Saml. 5:17-25) From samting ya, Deved i save talem wetem strong tingting se: “Jehova i stap klosap long olgeta we oli stap singaot i go long hem.” Yumi tu yumi save sua long samting ya.—Sam 145:18.

5. ?Oltaem Jehova i ansarem prea blong ol man blong hem olsem wei we oli ekspektem? Talem wan eksampol. (Yu luk pija tu.)

⁵ Maet Jehova i no ansarem ol prea blong yumi olsem we yumi ekspektem. Hemia nao samting we i hapen long aposol Pol. Hem i askem God blong i tekemaot ‘wan samting we i olsem wan ropnil we i stap stikim hem.’ Long tri defren taem, Pol i prea mo i talemaot stret problem we hem i stap fesem. ?Olsem wanem, Jehova i ansarem ol prea ya? Yes, be i no olsem we Pol i wantem. Jehova i no tekemaot problem ya, be hem i givim paoa we hem i nidim blong gohed long wok blong Hem.—2 Kor. 12:7-10.

6. ?From wanem samtaem i luk olsem se Jehova i no stap ansarem ol prea blong yumi?

⁶ Yumi tu, maet samtaem yumi kasem ansa blong ol prea blong yumi long wan rod we yumi no ekspektem. Be yumi sua se Jehova i save beswan rod blong halpem yumi. Antap moa, hem “i save mekem plante moa samting i bitim olgeta samting we yumi askem no tingbaot.” (Efes. 3:20) From samting ya, hem i save ansarem ol prea blong yumi long taem o long rod we yumi no ekspektem.

7. ?From wanem maet samtaem yumi mas jenisim samting we yumi prea from? Talem wan eksampol.

⁷ Maet samtaem yumi nidim blong jenisim samting we yumi prea from, taem yumi kasemsave moa long wil blong Jehova. Traem tingbaot eksampol blong Martin Poetzinger. Smoltaem afta we Brata Poetzinger i mared, oli putum hem long rabis kalabus blong ol Nasi. Fastaem, hem i askem long Jehova blong i save kamaot long rabis kalabus ya, mo lukaot long waef blong hem mo gohed long wok blong prij. Be afta we tu wik i pas, hem i no luk eni saen we i soemaot se Jehova bambae i letem hem i gofri. Taswe hem i stat blong prea se: “Plis yu soemaot long mi samting we yu wantem mi blong mekem.” Biaen hem i stat blong tingbaot samting we ol narafala brata long kalabus ya oli stap gotru long hem. Plante long olgeta oli wari tumas from ol waef mo ol pikinini blong olgeta. Ale, brata Poetzinger i prea se: “Tangkiu Jehova from niufala asaenmen blong mi, plis halpem mi blong mi leftemap tingting mo mekem ol brata blong mi oli kam strong.” !Mo hemia nao samting we hem i mekem long ol naen yia we hem i stap long rabis kalabus ya!

8. ?Wanem samting we yumi mas tingbaot taem yumi prea?

⁸ Yumi mas tingbaot se Jehova i gat wan plan, mo bambae hem i mekem ol samting we hem i wantem oli kamtru long stret taem. Plan ya, hemia blong finisim fulwan ol samting we oli mekem ol man oli safa tede, olsem ol naturol disasta, sik, mo ded. Jehova bambae i yusum Kingdom blong hem blong mekem plan blong hem i kamtru. (Dan. 2:44; Rev. 21:3, 4) Be go kasem taem ya, Jehova i letem Setan i rulum wol.b (Jon 12:31; Rev. 12:9) Sipos Jehova i kwik blong stretem ol problem we ol man oli fesem tede, hemia bambae i mekem ol man oli ting se rul blong Setan nao i beswan. Taem yumi stap wet blong Jehova i mekem ol promes blong hem oli kamtru, hemia i no min se hem i lego yumi stap we hem i no givhan long yumi. Naoia bambae yumi tokbaot sam rod we Jehova i yusum blong halpem yumi.

OL ROD WE JEHOVA I YUSUM BLONG ANSAREM OL PREA BLONG YUMI TEDE

9. ?Olsem wanem Jehova i halpem yumi taem yumi mas mekem wan desisen? Talem wan eksampol.

⁹ Hem i givim waes long yumi. Jehova i promes blong givim waes long yumi blong mekem ol gudfala desisen. Yumi nidim waes blong Jehova blong mekem ol gudfala desisen we bambae i afektem laef blong yumi, olsem desisen ya blong stap singel o mared. (Jem. 1:5) Tingbaot ekspiriens blong wan sista nem blong hem Maria.c Hem i stap mekem wok blong fultaem paenia taem hem i mitim wan brata. Hem i talem se: “Taem frensip blong mitufala i stap kam strong moa, mitufala i stat blong laeklaekem mitufala moa. Mi save se mi mas mekem wan desisen, so mi prea plante long saed ya. Mi save se mi nidim help blong Jehova, be mi save se Jehova i no save mekem desisen long bihaf blong mi.” Maria i prea from waes mo i luksave se Jehova i ansarem prea blong hem. ?Hem i mekem samting ya olsem wanem? Hem i mekem risej long ol buk blong yumi mo hem i faenem ol stret atikol we oli halpem hem blong faenem ol ansa blong ol kwestin we hem i gat. Mo tu, hem i lesin gud long ol waes advaes we mama blong hem i givim long hem. Ol advaes ya oli givhan long Maria blong skelem gud filing blong hem. Mo biaen hem i naf blong mekem wan waes desisen.

10. Folem Filipae 4:13, ?Jehova bambae i mekem wanem blong halpem ol man blong hem? Talem wan eksampol. (Yu luk pija tu.)

¹⁰ Hem i givim paoa long yumi blong stanap strong. Jehova bambae i givim paoa we yumi nidim blong stanap strong long ol trabol, olsem we hem i mekem long aposol Pol. (Ridim Filipae 4:13.) Traem luk olsem wanem Jehova i halpem wan brata we nem blong hem Benjamin, blong i stanap strong long ol defren hadtaem we hem i fesem. Taem Benjamin i yangfala, hem mo ol famle blong hem oli laef long wan refuji kamp long Afrika. Benjamin i talem se: “Mi prea oltaem long Jehova mo mi askem hem blong i givim paoa long mi blong mekem samting we i stret long ae blong hem. Jehova i ansa long ol prea blong mi taem hem i mekem mi gat pis long tingting, i givim strong tingting blong mi gohed blong prij, mo ol buk we oli givhan long mi blong kam klosap long hem.” Hem i gohed blong eksplenem se: “Taem mi ridim ol ekspiriens blong ol brata mo sista mo luk olsem wanem Jehova i halpem olgeta blong stanap strong, hemia i mekem mi tu mi gat strong tingting blong stanap strong.”

11-12. ?Wetaem Jehova i yusum ol brata mo sista blong ansarem ol prea blong yumi? (Yu luk pija tu.)

¹¹ Hem i yusum ol Kristin brata mo sista. Long naet bifo we Jisas i ded, hem i prea strong long Jehova. Hem i plis long Jehova blong i no letem ol narafala oli ting se hem i stap tok nogud long God. Be Jehova i no mekem olsem, hem i halpem Jisas taem i sanem wan enjel i kam blong mekem hem i strong bakegen. (Luk 22:42, 43) Jehova i save halpem yumi tu taem hem i yusum wan brata o sista blong ring o visitim yumi blong leftemap tingting blong yumi. Yumi evriwan i save tekem janis blong talem ol gudfala toktok long ol brata mo sista blong yumi.—Prov. 12:25.

¹² Traem tingbaot ekspiriens blong wan sista we nem blong hem Miriam. Sam wik afta we hasban blong Miriam i ded, hem i stap hem wan, i harem nogud, mo tingting blong hem i foldaon. Evri dei, hem i stap krae mo i nidim blong toktok long wan man. Hem i talem se: “Mi no gat paoa blong ringim eni man, so mi prea long Jehova. Taem mi stap gohed blong krae mo prea, fon blong mi i ring. Hemia wan elda mo hem i wan gudfala fren.” Elda ya mo waef blong hem i leftemap tingting blong Miriam. Miriam i sua fulwan se Jehova i yusum brata ya blong kolem hem.

13. Tokbaot wan eksampol we i soemaot olsem wanem Jehova i save yusum ol man we oli no wosipim hem, blong ansa long ol prea blong yumi.

¹³ Hem i save yusum ol man we oli no wosipim hem. (Prov. 21:1) Samtaem Jehova i save yusum sam man we oli no wosipim hem, blong ansa long prea blong ol man blong hem. Eksampol, Jehova i pulum King Ataksekses blong i letem Nehemaea i gobak long Jerusalem blong givhan blong bildim bak taon. (Neh. 2:3-6) Tede tu, Jehova i save yusum ol man we oli no wosipim hem blong givhan long yumi taem yumi gat nid.

14. ?Olsem wanem ekspiriens blong Soo Hing i givhan long yu? (Yu luk pija tu.)

¹⁴ Wan sista we nem blong hem Soo Hing i luksave se Jehova i halpem hem tru long dokta blong hem. Boe blong hem i safa from i gat sik long tingting. Hem i bin kasem wan rabis aksiden, taswe Soo Hing mo hasban blong hem i lego wok blong tufala blong lukaot long hem. From samting ya, oli gat problem long saed blong mane. Soo Hing i talem se hem harem se hem i no moa save gohed blong stanap strong long ol hadtaem ya. Ale, hem i talemaot hat blong hem long Jehova mo i askem hem blong i halpem hem. Dokta blong olgeta i talem se bambae i faenem wan rod blong givhan long olgeta. From samting ya, oli kasem wan help we i kam long gavman mo oli faenem wan ples we i no sas tumas blong oli save stap long hem. Afta long samting ya, Soo Hing i talem se: “Mifala i luksave olsem wanem Jehova i halpem mifala. I tru nomo se hem i ‘man blong harem ol prea.’”—Sam 65:2.

I NIDIM BILIF BLONG LUKSAVE MO AKSEPTEM SE JEHOVA I STAP ANSAREM OL PREA BLONG YUMI

15. ?Wan sista i mekem wanem blong luksave se Jehova i stap ansarem ol prea blong hem?

¹⁵ Samtaem, Jehova i stap ansarem ol prea blong yumi long wan rod we yumi no luksave. Be rod we Jehova i yusum blong ansarem ol prea blong yumi, hemia nao stret samting we yumi nidim blong gohed blong holemstrong long hem. Taswe, yu mas traehad blong luksave se Jehova i stap ansarem ol prea blong yu. Wan sista we nem blong hem Yoko i harem se Jehova i no stap ansarem ol prea blong hem, be biaen hem i raetemdaon long wan notbuk, ol samting we hem i stap askem long Jehova. Samtaem biaen, hem i luklukbak long notbuk blong hem mo i faenemaot se Jehova i bin ansarem plante long ol prea blong hem, iven sam long olgeta we hem i no moa tingbaot. Wanwan taem i gud yumi stop mo tingbaot olsem wanem Jehova i stap ansarem ol prea blong yumi.—Sam 66:19, 20.

16. ?Olsem wanem yumi save soemaot bilif taem yumi prea? (Hibru 11:6)

¹⁶ Yumi soemaot bilif long Jehova i no long prea nomo, be tu taem yumi akseptem ol defren rod we hem i yusum blong ansa long ol prea blong yumi. (Ridim Hibru 11:6.) Traem tingbaot eksampol blong Mike mo waef blong hem Chrissy. Tufala i wantem tumas blong go wok long Betel. Mike i talem se: “Blong plante yia, mitufala i fulumap fom mo prea long Jehova bakegen mo bakegen from samting ya, be oli neva invaetem mitufala.” Nating se i olsem Mike mo Chrissy i save se Jehova i save beswan rod blong yusum tufala long wok blong hem. Tufala i gohed blong mekem wok blong paenia long ples we i gat nid mo blong sapotem ol konstraksen projek. Tede, tufala i mekem wok blong eria elda. Mike i talem se: “I no oltaem we Jehova i ansarem ol prea blong yumi long rod we yumi ekspektem, be hem i stap ansa long ol prea mo long rod we i beswan.”

17-18. Folem Ol Sam 86:6, 7, ?yumi save sua long wanem samting?

¹⁷ Ridim Ol Sam 86:6, 7. Deved we i raetem Sam ya, i sua se Jehova i stap harem mo ansa long ol prea blong hem. Yu tu yu save sua long samting ya. Ol eksampol we yumi bin tokbaot long stadi ya, i mekem yumi sua se Jehova i save givim waes mo paoa we yumi nidim blong stanap strong. Hem i save yusum ol brata mo sista, o olgeta we oli no wosipim hem blong halpem yumi.

¹⁸ I no oltaem we Jehova i stap ansarem ol prea blong yumi olsem we yumi wantem. Be nating se i olsem, yumi sua se bambae hem i ansarem olgeta. Bambae hem i givim samting we yumi nidim mo long stret taem we yumi nidim. Taswe yu mas gohed blong prea mo bilif se Jehova bambae i harem yu, mo yu trastem se bambae hem i lukaotgud long yu naoia, mo i “givim samting we olgeta laef samting oli wantem tumas, nao oli harem gud” long niufala wol we i stap kam.—Sam 145:16.