?Jehova Bambae i Ansarem Ol Prea Blong Mi?

1-2. ?From wanem maet yumi save harem se Jehova i no stap ansa long ol prea blong yumi?

“I GUD yu faenem bigfala glad long Jehova, mo bambae hem i givim ol samting we hat blong yu i wantem tumas.” (Sam 37:4) !Hemia wan nambawan promes! ?Be yumi mas ekspektem Jehova blong i givim evri samting we yumi askem, stret long taem we yumi prea from? ?From wanem i gud yumi askem kwestin ya? Traem tingbaot ol eksampol ya. Wan yangfala sista i prea blong hem i save joen long Skul Blong Kingdom Ivanjelis. Be plante yia i pas, oli no invaetem hem yet blong go. Wan yangfala brata i kasem wan bigfala sik mo i askem Jehova blong i mekem hem i kam gud, blong hem i save mekem moa wok long kongregesen. Be helt blong hem i stap kam mowas. Wan Kristin perens i prea blong pikinini blong tufala i stap long trutok, be pikinini ya i disaed blong no moa wosipim Jehova.

² Maet yu tu yu bin askem wan samting long Jehova, be yu no kasem yet. From samting ya, maet yumi ting se Jehova i stap ansarem prea blong ol narafala, be i no blong yu. O maet yu ting se yu bin mekem wan samting i rong. Hemia nao filing blong wan sista, we nem blong hem Janice.b Hem mo hasban blong hem i prea long Jehova, from tufala i wantem tumas blong go wok long Betel. Hem i se: “Mi mi sua se i no longtaem bambae mitufala i go long Betel.” Be plante yia i pas, oli no invaetem tufala yet blong go. Janice i se: “Mi harem nogud mo mi konfius. Mi stap tingting se, mi bin mekem wanem i rong we i mekem Jehova i no glad. Mi bin prea mo talem stret se mitufala i wantem go long Betel, ?be from wanem hem i no ansa long prea blong mi?”

3. ?Bambae yumi tokbaot wanem long stadi ya?

³ Samtaem, maet yumi no sua sipos Jehova i lesin long ol prea blong yumi o nogat. Sam gudfala man blong God bifo tu oli gat tingting olsem. (Job 30:20; Sam 22:2; Hab. 1:2) ?Wanem i save mekem yu sua se Jehova bambae ansarem ol prea blong yu? (Sam 65:2) Bifo we yumi ansarem kwestin ya, fastaem bambae yumi tokbaot: (1) ?Jehova bambae i mekem wanem? (2) ?Jehova i wantem se yumi mekem wanem? (3) ?From wanem maet yumi nidim blong prea from wan narafala samting?

?JEHOVA BAMBAE I MEKEM WANEM?

4. Folem Jeremaea 29:​12, ?Jehova i promes blong mekem wanem?

⁴ Jehova i promes blong lesin long ol prea blong yumi. (Ridim Jeremaea 29:12.) God i lavem yumi from we yumi gohed blong wosipim hem, taswe oltaem bambae hem i lesin long ol prea blong yumi. (Sam 10:17; 37:28) Be hemia i no min se bambae hem i givim evri samting we yumi askem. Maet yumi mas wet go kasem niufala wol, bifo we yumi kasem sam long ol samting ya we yumi prea from.

5. ?Jehova i tingbaot wanem taem hem i stap lesin long ol prea blong yumi? Yu eksplenem.

⁵ Jehova i tingbaot olsem wanem ol prea blong yumi oli joen wetem stamba tingting blong hem. (Aes. 55:​8, 9) Wan haf blong stamba tingting blong Jehova, hemia blong wol ya i fulap wetem ol man mo woman we oli joen gud, mo oli glad blong stap aninit long rul blong hem. Be Setan i talem se ol man bambae oli glad moa sipos oli rulum olgeta wan. (Jen. 3:​1-5) Blong pruvum se devel i wan man blong giaman, Jehova i letem ol man oli rulum olgeta bakegen. Be rul blong ol man i stamba blong plante problem we yumi stap fesem tede. (Pri. 8:9) Yumi kasemsave se Jehova bambae i no tekemaot olgeta problem ya tede. From sipos hem i mekem olsem, maet sam man bambae oli ting se rul blong man i gud, mo i naf blong stretem olgeta problem blong man.

6. ?From wanem yumi mas trastem se oltaem Jehova bambae i mekem samting long rod we i stret mo i soemaot lav?

⁶ Ol man oli askem sem samting, be maet Jehova i ansa long ol defdefren rod. Eksampol, taem King Hesekia i kasem wan bigfala sik, hem i askem strong long Jehova blong i mekem hem i kam gud. Ale, Jehova i hilim hem. (2 King 20:​1-6) Be taem aposol Pol i krae i go long Jehova blong i tekemaot “ropnil we i stap stikim” hem, we maet hemia wan problem blong helt, Jehova i no tekemaot problem ya. (2 Kor. 12:​7-9) Mo tu, tingbaot eksampol blong aposol Jemes mo Pita. King Herod i wantem kilim tufala i ded. Ale, kongregesen i prea from Pita mo maet from Jemes tu. Nating se i olsem, oli kilim Jemes i ded, be Pita wan enjel i sevem hem. (Wok 12:​1-11) Maet yumi stap tingbaot se: ‘?From wanem Jehova i sevem Pita be i no sevem Jemes?’ Baebol i no talem.c Be yumi save sua se Jehova i ‘neva mekem samting we i no stret.’ (Dut. 32:4) Mo yumi save se Jehova i glad long Pita mo Jemes. (Rev. 21:14) Samtaem, Jehova i ansarem ol prea blong yumi long rod we yumi neva ekspektem. Be from we yumi trastem se oltaem Jehova bambae i ansarem ol prea blong yumi long rod we i stret mo i soemaot lav, yumi no save komplen from rod we hem i yusum blong ansa long yumi.—Job 33:13.

7. ?Yumi no mas mekem wanem, mo from wanem?

⁷ Yumi no mas komperem situesen blong yumi wetem situesen blong ol narafala. Eksampol, maet yumi askem stret long Jehova wan samting we yumi wantem, be hem i no ansa. Biaen, yumi harem se wan narafala i askem sem samting ya mo Jehova i ansarem prea blong hem. Hemia nao samting we i hapen long wan sista we nem blong hem Anna. Hasban blong hem Matiu i kasem kansa, mo hem i prea blong hasban blong hem i save kam gud. Long sem taem ya, tu olfala Kristin sista tu i kasem kansa. Anna i prea strong from Matiu mo tufala sista ya. Tufala sista ya i kam gud, be Matiu i ded. Long stat, Anna i stap tingting se maet tufala sista ya i kam gud from we Jehova i givhan long tufala. Mo sipos i olsem, ?from wanem Jehova i no ansa long prea blong hem blong mekem hasban blong hem i kam gud? I tru, yumi no save talem stret from wanem tufala sista ya i kam gud. Be yumi save se Jehova bambae i finisim olgeta samting we i mekem yumi safa, mo hem i wantem tumas blong mekem ol fren blong hem oli laef bakegen.—Job 14:15.

8. (1) Folem Aesea 43:​2, ?olsem wanem Jehova i sapotem yumi? (2) ?Olsem wanem prea i halpem yumi taem yumi fesem ol trabol? (Luk video ya Prea i Halpem Yumi Blong Fesem Ol Hadtaem.)

⁸ Oltaem Jehova bambae i sapotem yumi. Papa blong yumi Jehova we i lavem yumi, i no wantem luk we yumi safa. (Aes. 63:9) Be hem i no blokem yumi long ol trabol we oli olsem reva mo faea. (Ridim Aesea 43:2.) Hem i promes se bambae hem i halpem yumi blong “pastru” long olgeta, mo bambae hem i no letem ol trabol ya oli mekem yumi harem nogud blong olwe. Mo tu, Jehova i givim tabu spirit blong hem blong halpem yumi blong stanap strong. (Luk 11:13; Fil. 4:13) From samting ya, yumi save sua se oltaem bambae hem i givim stret samting we yumi nidim blong stanap strong, mo gohed blong wosipim hem.d

?JEHOVA I WANTEM SE YUMI MEKEM WANEM?

9. Folem Jemes 1:​6, 7, ?from wanem yumi mas trastem se Jehova bambae i halpem yumi?

⁹ Jehova i wantem se yumi trastem hem. (Hib. 11:6) Samtaem, maet yumi harem se ol problem we yumi fesem oli had tumas. Mo maet yumi stat blong gat tingting ya se Jehova bambae i halpem yumi o nogat. Be Baebol i talem se Jehova i save givim paoa long yumi blong “klaem i go narasaed long wan stonwol.” (Sam 18:29) Taswe, i bitim we yumi gat tu tingting, yumi mas prea wetem strong bilif mo trastem se Jehova bambae i ansarem ol prea blong yumi.—Ridim Jemes 1:​6, 7.

10. Tokbaot wan eksampol olsem wanem blong yumi wok folem ol prea blong yumi.

¹⁰ Jehova i wantem se yumi wok folem ol prea blong yumi. Eksampol, maet wan brata i askem long Jehova blong i halpem hem blong i save askem blong i spel long wok, blong hem i save joen long wan bigfala asembli. ?Olsem wanem Jehova bambae i ansarem prea ya? Maet hem i mekem se brata ya i gat strong tingting blong go toktok long bos blong hem. Be, brata ya i mas wok folem prea blong hem tu blong go toktok wetem bos blong hem. Maet hem i save askem wan narafala wokman blong i tekem ples blong hem. Mo sipos i nidim, maet hem i save spel nating se bambae oli no pem hem.

11. ?From wanem yumi mas prea oltaem from wan samting?

¹¹ Jehova i wantem se yumi gohed blong prea from wan samting. (1 Tes. 5:17) Jisas i talem se sam long ol samting we yumi askem, bambae yumi no kasem stret long taem we yumi askem. (Luk 11:9) !Taswe, yumi no mas givap! I gud yumi gohed blong prea oltaem. (Luk 18:​1-7) Taem yumi gohed blong prea from wan samting, yumi soemaot long Jehova se samting ya i rili impoten long yumi. Mo tu, yumi soemaot se yumi bilif we Jehova i naf blong halpem yumi.

?FROM WANEM MAET YUMI NIDIM BLONG PREA FROM WAN NARAFALA SAMTING?

12. (1) ?Wanem faswan kwestin we yumi mas askem long saed blong samting we yumi prea from, mo from wanem? (2) ?Olsem wanem blong meksua se ol prea blong yumi oli soemaot respek long Jehova? (Luk bokis ya “?Ol Samting We Mi Askem Oli Soemaot Se Mi Respektem Jehova?”)

¹² Sipos yumi no kasem samting we yumi prea from, maet yumi save askem ol trifala kwestin ya. Faswan, ‘?Samting we mi prea from i stret?’ Plante taem, yumi ting se samting we yumi askem i gud long yumi. Be ol samting we yumi askem maet oli no save givhan long yumi blong longtaem. Sipos yumi prea from wan problem, maet i gat wan rod blong stretem problem ya we i gud moa i bitim wanem we yumi askem. Mo sam long ol samting we yumi askem, maet oli no laenap wetem wil blong Jehova. (1 Jon 5:14) Traem tingbaot eksampol blong perens ya we yumi tokbaot long stat. Oli bin askem Jehova blong i mekem se pikinini blong tufala i stap long trutok. I luk olsem se samting we tufala i askem i stret nomo. Be Jehova i no save fosem eni man blong i wosipim hem. Hem i wantem se yumi evriwan, inkludum ol pikinini, yumi jusum blong wosipim hem. (Dut. 10:​12, 13; 30:​19, 20) Taswe, i moa gud we perens ya i askem Jehova blong i halpem tufala blong kasem hat blong pikinini ya, olsem nao hem i save lavem Jehova mo kam fren blong hem.—Prov. 22:6; Efes. 6:4.

13. Folem Hibru 4:​16, ?wetaem Jehova bambae i halpem yumi? Yu eksplenem.

¹³ Nambatu, ‘?Hemia i stret taem blong Jehova i ansarem prea blong mi?’ Maet yumi wantem se Jehova i ansarem ol prea blong yumi kwiktaem. Be Jehova i save stret taem blong halpem yumi. (Ridim Hibru 4:16.) Taem yumi no kasem ansa blong yumi kwiktaem, maet yumi ting se ansa blong Jehova hem i ‘No.’ Be maet stret ansa hemia se ‘Not yet.’ Traem tingbaot bakegen eksampol blong yangfala brata ya we i prea blong hem i save kam gud long sik blong hem. Sipos Jehova i bin mekem wan merikel blong hem i kam gud, Setan i save talem se brata ya i gohed blong wosipim Jehova nomo from we Jehova i hilim hem. (Job 1:​9-11; 2:4) Mo tu, Jehova i makemaot wan stret taem finis blong finisim olgeta kaen sik. (Aes. 33:24; Rev. 21:​3, 4) Be go kasem taem ya, yumi no save ekspektem se Jehova bambae i mekem wan merikel blong finisim fulwan ol sik. Taswe, i moa gud we brata ya i askem long Jehova blong i givim paoa mo pis long tingting, blong hem i save stanap strong mo gohed blong wosipim Jehova nating se hem i sik.—Sam 29:11.

14. ?Yu lanem wanem long ekspiriens blong Janice?

¹⁴ Tingbaot ekspiriens blong Janice, we i bin prea blong go wok long Betel. Faef yia i pas, hem i jes kasemsave se Jehova i ansa long prea blong hem, be long wan defren rod. Hem i se: “Jehova i yusum taem ya blong tijim mi mo halpem mi blong gat ol gudfala fasin. Mi nidim blong trastem Jehova moa. Mi nidim blong kam gud moa long fasin blong stadi mi wan. Mo mi lanem se mi save stap glad nomata wanem wok mi mekem blong Jehova.” Biaen oli invaetem Janice mo hasban blong hem, blong mekem wok blong eria elda. Taem Janice i tingtingbak, hem i se: “Jehova i ansa long ol prea blong mi long ol rod we mi neva tingbaot. I tekem plante taem blong mi kasemsave se ansa we Jehova i givim, i wan nambawan presen. Mi mi glad tumas se mi gat janis ya blong haremsave se Jehova i lavem mi mo i kaen long mi.”

15. Taem yumi prea, ?from wanem i moa gud blong no talem stret samting we yumi wantem? (Mo tu, yu luk ol pija.)

¹⁵ Nambatri, ‘?Mi mas prea from wan narafala samting?’ I tru se taem yumi prea, yumi save talem stret samting we yumi wantem. Be samtaem i moa gud yumi no talem stret samting we yumi wantem, olsem nao yumi save faenemaot samting we Jehova i wantem yumi blong mekem. Traem tingbaot eksampol blong singel sista ya we i bin prea blong go long Skul Blong Kingdom Ivanjelis. Hem i wantem go long skul ya blong hem i save prij long ples we i gat moa nid. Taswe taem hem stap prea blong oli invaetem hem long skul ya, hem i save askem long Jehova tu blong i halpem hem blong i luksave ol narafala janis we hem i gat blong mekem moa long wok blong prij. (Wok 16:​9, 10) Biaen, hem i save wok folem prea blong hem taem i askem long eria elda sipos i gat wan kongregesen klosap we i nidim moa paenia. O hem i save raet i go long wan branj ofis blong askem se weples i nidim moa pablisa.e

16. ?Yumi save sua long wanem?

¹⁶ Olsem we yumi bin lanem, yumi save trastem se Jehova bambae i ansarem ol prea blong yumi long rod we i stret mo we i soemaot lav. (Sam 4:3; Aes. 30:18) Samtaem, maet hem i ansarem ol prea blong yumi long rod we yumi no tingbaot. Be bambae Jehova i neva tanem baksaed long ol prea blong yumi. Hem i lavem yumi tumas. Mo bambae hem neva lego yumi. (Sam 9:10) Taswe, i gud yumi gohed blong “trastem hem oltaem,” mo talemaot hat blong yumi long hem tru long prea.—Sam 62:8.