!Man Ples No Man Narafala Kantri God i Welkamem Yu!

“Hem i stat long wan man nomo, nao i mekem olgeta man blong wol, mo i putum olgeta oli stap long evri ples long wol.”​—⁠OL WOK 17:⁠26.

1. ?Tede long plante kantri, wanem tingting blong ol man long saed blong akseptem ol man i kam insaed long kantri blong olgeta?

OL RIPOT i soemaot se long plante kantri ol man oli stap wari moa long namba blong ol man blong ol narafala kantri we oli wantem kam stap laef long nyufala kantri mo ol refuji.a Plante milyan man oli wantem tumas blong ronwe long Esia, Afrika, Yurop, mo long Amerika. Maet sam oli ronwe from ol man oli kam pua, faet i kamaot long kantri blong olgeta, no ol man oli ronem olgeta. ?Ol kantri oli welkamem olgeta ya? Magasin ya Time i talem se: “Taem laen blong ol man long Yurop i stat blong jenis i meksap, sam kantri oli faenem se oli no rili laekem fasin blong ol man blong ol narafala kantri, olsem oli ting se oli laekem fastaem.” Magasin ya i tokbaot 18,000,000 refuji we ol kantri oli “no wantem” olgeta i se: “Tingting ya se kantri i no mas meksemap ol fasin blong hem i stap yet.”

2, 3. (a) ?Baebol i givim wanem tingting long saed blong ol man? (b) ?From wanem yumi save harem gud taem yumi jekem ol vas long Baebol we i tokbaot ol wok blong God wetem ol man?

² Yumi no save wanem bambae i kamaot long saed ya, be Baebol i soemaot se God i welkamem ol man long evri nesen​—⁠nating se wan man ples we i bon long kantri, no hem i stap long kantri we hem i no bon long hem, no hem i wan refuji. (Ol Wok 10:​34, 35) Sam man maet oli askem se: ‘?Be from wanem yu talem olsem? ?Bifo God i jusum ol man Isrel nomo blong oli man blong hem, no?’

³ I gud yumi luk olsem wanem God i stap tingbaot ol man ya bifo. Bambae yumi lukluk gud tu long sam profet tok we oli laenap wetem ol wok we ol trufala man blong wosip tede oli save mekem. Sipos yumi tingtingbak long profet tok ya bambae yu harem gud from we hem i save givim ful save long yu. Hem i soemaot tu, ol fasin we God i save soemaot long ol man wanwan we “oli kamaot long olgeta kala mo long olgeta laen, mo long olgeta kantri, mo long olgeta lanwis” biaen long bigfala trabol.​—⁠Revelesen 7:​9, 14-17.

‘Ol Nesen Bambae Oli Blesem Olgeta’

4. ?Olsem wanem ol kantri oli stat blong seraot, be wanem samting God i mekem?

⁴ Afta long Bigfala Wora we i ron, ol man long wol oli kamaot long famle blong Noa, mo olgeta ya oli trufala man blong wosip long God. Be fasin joengud ya i jenis kwiktaem nomo. I no longtaem biaen, sam man we oli no obei long wil blong God, oli stat blong wokem wan haos we i hae we i hae. Samting ya i mekem se ol lanwis oli seraotem ol man mo ol nesen. (Jenesis 11:​1-9) Be, trufala wosip i gohed yet go kasem Ebraham. God i blesem man blong bilif ya Ebraham mo i mekem promes se pikinini blong hem bambae i kam wan bigfala nesen. (Jenesis 12:​1-3) Nesen ya hem i Isrel bifo.

5. ?From wanem yumi save harem gud from wok blong God wetem Ebraham?

⁵ Jeova i no tingbaot Isrel nomo, from plan blong hem i go long olgeta man. Yumi luksave samting ya long promes we God i mekem long Ebraham, i se: “Bambae ol man blong ol narafala kantri oli save prea long mi blong mi blesem olgeta, olsem we bambae mi blesem olgeta ya. Be bambae mi mi mekem i gud tumas long olgeta ya we bambae oli kamaot biaen long yu, from fasin ya nomo we yu yu mekem tede, we yu obei long tok ya blong mi.” (Jenesis 22:18) Long plante handred yia, God i wok wetem Isrel long wan spesel rod, hem i givim ol Loa olsem blong kantri long olgeta, hem i mekemrere rod blong ol pris blong oli mekem sakrafaes long tempel blong hem, mo i givim Promes Lan blong oli stap long hem.

6. ?Olsem wanem plan blong God wetem Isrel bifo i save givhan long olgeta man?

⁶ Loa blong God long Isrel i gud long ol man long olgeta kantri, from hem i mekem sin blong man i kam long klia ples, mo i soemaot se ol man oli nidim wan sakrafaes we i stret gud olgeta blong kavremap sin blong ol man. Sakrafaes i blong wan taem nomo mo hem i blong olwe. (Galesia 3:19; Hibrus 7:​26-28; 9:9; 10:​1-12) ?Be olsem wanem yumi sua se Laen blong Ebraham​—⁠we olgeta nesen bambae oli askem God blong blesem olgeta from​—⁠bambae i kam blong kasem ol mak ya? Loa blong Isrel i givhan long saed ya tu. Loa ya i blokem ol man Isrel blong oli no mared wetem ol man Kenan, we oli gat ol rabis fasin mo kastom, olsem kastom blong bonem ol laef pikinini long faea. (Levitikas 18:​6-24; 20:​2, 3; Dutronome 12:​29-31; 18:​9-12) God i talem se oli mas finisim ol man Kenan wetem fasin blong olgeta. Samting ya i save mekem ol man Isrel, mo tu ol man narafala ples we oli stap wetem olgeta oli harem gud, hem i blong mekem Isrel i klin mo i rere blong Laen ya i kamaot long hem.​—⁠Levitikas 18:​24-28; Dutronome 7:​1-5; 9:5; 20:​15-18.

7. ?Wanem samting bifo i soemaot se God i stap welkamem ol strenja?

⁷ Taem Loa ya i kamaot mo God i stap lukluk Isrel olsem wan spesel nesen blong hem, hem i stap soemaot fasin sore long olgeta we oli no man Isrel. Hem i mekem olsem taem Isrel i aot long kalabus long Ijip i stap go long prapa ples blong hem. “Mo i gat ol narafala man tu oli go wetem [ol man Isrel] we oli plante tumas.” (Eksodas 12:38) Tija ya, C. F. Keil i tokbaot olgeta ya olsem “bigfala hif blong ol man blong ol narafala kantri . . . wan meks kampani blong ol man, hif blong man blong ol defren nesen.” (Levitikas 24:10; Namba 11:⁠4) Maet plante long olgeta oli man Ijip we oli akseptem trufala God.

Welkamem Ol Man Narafala Kantri

8. ?Olsem wanem ol man Gibeon oli faenem ples blong stap long medel blong ol man blong God?

⁸ Taem ol man Isrel oli folem oda blong God blong ronemaot ol rabis nesen we oli stap long Promes Lan, God i protektem wan grup blong ol man blong ol narafala kantri, hemia ol man Gibeon, we oli stap long not blong Jerusalem. Oli sanem sam man blong olgeta oli go luk Josua blong trikim hem blong hem i mekem pis wetem olgeta. Biaen taem Josua i faenemaot trik ya blong olgeta, hem i givim oda se ol man Gibeon oli mas wok olsem “man blong karem wud mo wora long ol man blong God mo long olta blong Jeova.” (Josua 9:​3-27) Tede, plante man blong ol narafala kantri tu oli akseptem ol smol wok blong oli kam haf blong wan nyufala kampani blong ol man.

9. ?Olsem wanem eksampel blong Rehab mo famle blong hem i enkarajem yumi long saed blong ol man blong ol narafala kantri we oli stap wetem ol man Isrel?

⁹ Maet i gud blong save se God i no welkamem ol grup blong ol man blong ol narafala kantri nomo, be God i welkamem ol man wanwan tu. Tede sam nesen oli welkamem ol man ya nomo blong ol narafala kantri we oli gat haenem, no oli gat plante mane, no oli skul gud. Be Jeova i no mekem olsem, bambae yumi luk long samting we i kamaot bifo long store blong ol man Gibeon. Hem i mekem olsem wetem wan woman Kenan we hem i no gat haenem nating. Baebol i talem nem blong hem se “Rehab i wan woman blong rod.” From bilif blong hem long trufala God, hem mo ol famle blong hem oli sef taem Jeriko i foldaon. Nating we Rehab i wan woman blong narafala kantri, ol man Isrel oli akseptem hem blong stap wetem olgeta. I gud yumi save folem fasin blong bilif we hem i gat. (Hibrus 11:​30, 31, 39, 40; Josua 2:​1-21; 6:​1-25) Mo tu hem i kam bubu blong Mesaea.​—⁠Matyu 1:​5, 16.

10. ?Fasin blong ol man Isrel blong akseptem ol man blong ol narafala kantri i dipen long wanem?

¹⁰ Olgeta we oli no man Isrel oli save stap long Promes Lan sipos oli stap traehad blong mekem trufala God i glad long olgeta. God i talem long ol man Isrel blong oli no joen wetem ol man we oli no stap wosip long Jeova, mo speseli blong no wosip wetem olgeta. (Josua 23:​6, 7, 12, 13; 1 King 11:​1-8; Proveb 6:​23-28) Be plante we oli stap we oli no man Isrel oli stap obei long ol stampa loa blong ol man Isrel. Oli mekem sakomsaes long sam narafala, mo Jeova i welkamem olgeta olsem memba blong kongregesen blong hem.​—⁠Levitikas 20:2; 24:22; Namba 15:​14-16; Ol Wok 8:27.b

11, 12. (a) ?Olsem wanem ol man Isrel oli mas tingting long ol man blong ol narafala kantri we oli stap wosip long God? (b) ?From wanem yumi mas kamgud moa blong folem eksampel blong Jeova?

¹¹ God i wantem se ol man Isrel oli folem fasin blong hem, long saed blong ol man blong ol narafala kantri we oli stap wosip long hem. Hem i se: “Strenja ya we i stap wetem yufala, bambae yufala i mekem i gud long hem, olsem yufala i stap mekem long ol man ples blong yufala. Mo yu mas laekem hem, olsem we yu stap laekem yu wan. From we yufala tu bifo, yufala i kam olsem strenja long kantri blong Ijip.” (Levitikas 19:​33, 34; Dutronome 1:16; 10:​12-19) Hemia i olsem wan lesen blong yumi folem, nating se yumi no stap aninit long Loa ya. I isi blong yumi foldaon long nogud tingting mo agensem ol man blong ol narafala laen, nesen, no defren fasin blong laef. Taswe i gud blong askem yumi wanwan se: ‘?Mi mi stap traehad blong lego ol nogud tingting olsem, mo folem eksampel blong God?’

¹² Ol man Isrel oli luk long ae blong olgeta se God i stap welkamem ol man. King Solomon i prea se: “Long man we i strenja tu, we i no blong ol man blong yu ol man Isrel, be hem i rili aot long wan kantri farawe, i kam from nem blong yu . . . mo hem i rili kam blong mekem prea long haos ya. Ale, yu we yu stap long heven, . . . plis yu lesin. . . . Long fasin ya, bambae olgeta man long wol oli save nem blong yu, blong oli save fraet gud long yu.”​—⁠1 King 8:​41-43; 2 Kronikel 6:​32, 33.

13. ?From wanem God i rere blong mekem sam jenis wetem Isrel?

¹³ Taem Jeova i stap yusum yet nesen blong Isrel olsem ol man blong hem mo i protektem hem blong bambae Mesaea i kamtru long hem, God i stap tokbaot ol impoten jenis we bambae oli kamaot. Bifo taem Isrel i agri long kontrak blong Loa, God i talem se olgeta oli save kam “wan kingdom blong pris mo wan tabu nesen.” (Eksodas 19:​5, 6, NW) Be long plante handred yia ol man Isrel oli no stap holemstrong long God. Taswe Jeova i talem se bambae hem i mekem wan nyufala kontrak. “Ol man Isrel” we oli stap long kontrak ya bambae God i fogivim mastik mo sin blong olgeta. (Jeremaea 31:​33, 34) Nyufala kontrak ya i wet nomo blong Mesaea i kam, nao sakrafaes blong hem bambae i klinim sin blong plante man.​—⁠Aesea 53:​5-7, 10-12.

Ol Man Isrel Long Heven

14. ?Wanem nyufala “Isrel” we Jeova God i akseptem mo olsem wanem?

¹⁴ Kristin Grik haf blong Baebol i givhan long yumi blong save olsem wanem samting ya i kamtru. Jisas i Mesaea ya, we ded blong hem i fulumap Loa mo i putum faondesen, blong God i fogivim sin blong ol man. Blong kasem blesing ya, i no nid blong kam wan man Jyu we i sakomsaes long saed blong bodi. No gat. Aposol Pol i talem se long nyufala kontrak, “prapa fasin blong man Isrel, hem i samting we i kamaot long tingting blong man. Mo prapa sakomsaes, hem i samting blong tingting blong man, we Speret blong God i mekem long hem, i no wan samting we Loa ya we oli raetem finis i save mekem.” (Rom 2:​28, 29; 7:⁠6) Olgeta we oli bilif long sakrafaes blong Jisas, God i fogivim sin blong olgeta, mo hem i agri long olgeta se oli ‘man Jyu long saed blong speret,’ oli kam insaed long wan nesen long saed blong speret, hemia “Isrel blong God.”​—⁠Galesia 6:⁠16.

15. ?From wanem i no dipen long kantri mo laen blong kam haf blong Isrel long speret?

¹⁵ Yes, blong kam insaed long Isrel long speret samting ya i no dipen long wanem kantri no laen yu kamaot long hem. Sam long ol man Isrel long speret, olsem ol aposol blong Jisas, oli rili man Jyu. Sam narafala, olsem Konilyas kapten blong soldia blong ol man Rom we oli no mekem sakomsaes long hem. (Ol Wok 10:​34, 35, 44-48) Pol i tokbaot Isrel long speret i se: “From ol samting ya, naoia i no moa gat tok ya long yumi, se sam man oli hiten man mo sam oli man Isrel, sam oli sakomsaes mo sam oli no sakomsaes. Naoia i no moa gat tok long yumi se sam man oli no skul gud mo sam oli man bus olgeta, sam oli slef, mo sam oli friman.” (Kolosi 3:11) Olgeta we God i makemaot olgeta wetem tabu speret blong hem oli kam “wan laen we God i jusumaot, wan kampani blong pris we i king, wan tabu nesen, wan pipol we i blong God nomo.”​—⁠1 Pita 2:9, NW; lukluk Eksodas 19:​5, 6.

16, 17. (a) ?Long plan blong God wanem wok blong Isrel long saed blong speret? (b) ?From wanem i stret blong tingbaot olgeta we oli no blong Isrel blong God?

¹⁶ ?Long plan blong God, wanem fyuja blong ol man blong Isrel long speret? Jisas i givim ansa i se: “Yufala we i smol kampani blong ol sipsip, yufala i no fraet, from we Papa blong yufala hem i glad tumas blong givim kingdom long yufala.” (Luk 12:32, NW) Olgeta we tabu speret i makemaot olgeta, oli “man blong heven,” bambae oli joen blong kasem ol gudgudfala samting wetem Sipsip ya long rul blong hem long Kingdom. (Filipae 3:20; Jon 14:​2, 3; Revelesen 5:​9, 10) Baebol i soemaot se olgeta ya “oli kamaot long olgeta laen blong ol man Isrel” mo “God i pemaot olgeta finis, i tekemaot olgeta long ol narafala man, nao oli fri, oli olsem ol fas kakae blong garen, oli blong givim i go long God mo long Smol Sipsip ya.” Namba blong olgeta i kasem 144,000. Ale, afta we Jon i talem namba blong olgeta ya we God i makemaot olgeta, Jon i tokbaot narafala grup blong man​—⁠“wan bigfala hif blong man, we olgeta i plante tumas, i no gat man i save kaontem olgeta. Ol man ya oli kamaot long olgeta kala mo long olgeta laen, mo long olgeta kantri, mo long olgeta lanwis.”​—⁠Revelesen 7:​4, 9; 14:​1-4.

¹⁷ Maet sam man oli save ting se: ‘?Olsem wanem long plante milyan man we oli no haf blong Isrel long speret, olsem bigfala hif blong man we bambae oli pastru long bigfala trabol? ?Wanem wok oli stap mekem wetem smolhaf blong ol man blong Isrel long speret we oli stap yet?’c

Profet Tok Long Saed Blong Ol Man Narafala Kantri

18. ?Wanem samting i mekem se Isrel i aot long Babilon mo i gobak?

¹⁸ Lukluk bak long taem ya we Isrel i stap aninit long kontrak blong Loa be hem i no holemstrong long hem, yumi faenemaot se God i wantem letem ol man Babilon oli spolem ol man long Isrel. Long 607 B.K.T., ol man Isrel oli go long kalabus blong 70 yia. Biaen God i pemaot nesen ya. Serubabel i lidim smolhaf blong ol man Isrel oli gobak long ples blong olgeta. Ol haeman blong Media mo Pesia we oli winim Babilon long faet, oli givhan long olgeta ya we oli gobak, oli givim kakae long olgeta. Buk blong Aesea i bin tokbaot ol samting ya we oli kamtru. (Aesea 1:​1-9; 3:​1-26; 14:​1-5; 44:​21-28; 47:​1-4) Mo Esra i tokbaot histri blong ol man Isrel taem oli gobak.​—⁠Esra 1:​1-11; 2:​1, 2.

19. ?Long saed blong Isrel we i gobak, wanem profet tok we i soemaot se ol man blong ol narafala kantri oli haf blong hem?

¹⁹ Taem Aesea i stap tokbaot ol man blong God se bambae oli aot mo oli gobak, hem i talem profet ya we i impoten olsem se: “Tru ya, ol nesen bambae oli go long laet blong yu, mo ol king bambae oli go long laet blong yu we i saen bigwan.” (Aesea 59:20; 60:⁠3) Hemia i no minim nomo se God i stap welkamem wanwan man blong ol narafala kantri, olsem Solomon i askem long prea blong hem. Aesea i stap talemaot wan jenis we i narakaen. “Ol nesen” bambae oli wok wetem ol pikinini blong Isrel: “Bambae ol man blong ol narafala kantri oli bildimap ol stonwol blong yu, mo bambae ol king blong olgeta oli talemaot tok blong yu. From we long kros blong mi bambae mi mi smasem yu, be long gladhat blong mi, bambae mi mi sore long yu.”​—⁠Aesea 60:⁠10.

20, 21. (a) ?Wanem samting yumi faenem tede we i stret long fasin blong ol man Isrel we oli go kalabus mo oli aot long kalabus? (b) ?Olsem wanem ol ‘pikinini boe mo pikinini gel’ biaen oli kam haf blong Isrel long speret?

²⁰ Plante samting we oli kamaot bifo ol man Isrel oli go kalabus mo oli aot long kalabus oli gobak, oli laenap wetem ol samting we oli kamaot tede long Isrel long speret. Bifo long Faswan Bigfala Faet Blong Wol, smolhaf blong ol Kristin we tabu speret i makemaot oli no laenap fulwan wetem wil blong God. Oli holem sam tingting mo fasin blong ol jyos long Krisendom. Nao, long taem blong faet mo speseli taem ol haeman blong skul oli fosem ol man blong oli agensem olgeta we oli stap lidim smolhaf blong Isrel long speret, oli putum olgeta long kalabus from gyaman ripot. Afta long faet, long 1919, olgeta ya we tabu speret i makemaot we oli stap long prapa kalabus oli aot long kalabus mo oli fri. Samting ya i soemaot se ol man blong God oli aot long kalabus long Bigfala Babilon, ol gyaman skul blong wol. Ol man blong God oli go blong bildimap mo stap long paradaes long saed blong speret.​—⁠Aesea 35:​1-7; 65:​13, 14.

²¹ Samting ya i stret long tok blong Aesea se: “Evriwan long olgeta oli kam wanples. Oli kam long yu. Long ples we i longwe ol pikinini boe blong yu oli stap kam, mo ol pikinini gel blong yu we bambae oli stap long saed blong yu. Long taem ya bambae yu luk mo bambae yu kam saen gud, mo hat blong yu bambae i seksek mo i kam bigwan, from we bambae yu kasem ol sas samting blong solwora. Bambae yu kasem ol rij samting blong ol nesen.” (Aesea 60:​4, 5) Long ol yia we i kam biaen, ‘ol pikinini boe mo ol pikinini gel’ oli stap gohed yet blong kam insaed, tabu speret i makemaot olgeta blong oli fulumap ol laswan ples long Isrel long speret.

22. ?Olsem wanem “ol man blong ol narafala kantri” oli kam blong wok wetem Isrel long speret?

²² ?Olsem wanem long ‘ol man blong ol narafala kantri we bambae oli bildimap stonwol blong yu’? Samting ya tu i kamaot long taem blong yumi. Taem ol fulnamba blong 144,000 oli kam insaed finis, nao wan bigfala hif blong ol man long olgeta nesen oli stat kam blong wosip wetem Isrel long speret. Olgeta nyuwan ya oli gat hop blong laef foreva long paradaes long wol. Nating se bambae oli mekem wok blong God long ples we i defren, oli glad blong givhan long smolhaf blong ol Kristin we tabu speret i makemaot, blong oli talemaot gud nyus blong Kingdom.​—⁠Matyu 24:⁠14.

23. ?Olsem wanem “ol man blong ol narafala kantri” oli givhan long olgeta we God i makemaot?

²³ Tede bitim 4,000,000 man “blong ol narafala kantri,” wetem olgeta ‘man blong heven,’ oli stap wosip long Jeova. Plante long olgeta ya, oli man mo woman, yangfala mo olfala, we oli stap mekem fultaem wok olsem ol paenia. Long bitim 66,000 kongregesen, ol man blong ol narafala kantri oli stap gat ol responsabiliti olsem ol elda mo ol man blong givhan. Smolhaf blong smol kampani oli glad long samting ya, taem oli luk se ol profet tok blong Aesea oli stap kamtru, se: “Ol strenja bambae oli stanap, mo bambae oli lukaot long ol kampani blong sipsip blong yufala. Mo ol strenja bambae oli wokem garen blong yufala, mo oli lukaot long ol rop blong yufala we yufala i stap mekem waen long frut blong hem.”​—⁠Aesea 61:⁠5.

24. ?Olsem wanem yumi save harem gud from wok we God i stap mekem wetem Isrel mo ol narafala man long bifo?

²⁴ Taswe long wanem kantri long wol we yu stap long hem olsem man ples, no yu stap long kantri we yu no bon long hem, no yu wan refuji, yu gat gudfala jans blong kam, man blong ol narafala kantri long saed blong speret, Hae God bambae i glad blong welkamem yu. Hem bambae i welkamem yu mo givim ol gudfala wok long yu blong mekem naoia mo blong olwe.

[Ol futnot]

?Yu Yu Save Poen Ya?

◻ ?Olsem wanem God i givim hop se Hem bambae i akseptem olgeta man long olgeta nesen?

◻ ?Nating se Isrel i wan spesel nesen blong God, be wanem i soemaot se ol man oli save kam long Hem?

◻ ?Long profet tok, olsem wanem God i soemaot se ol man narafala kantri bambae oli joen long Isrel?

◻ ?Taem ol man Isrel bifo oli go kalabus mo oli aot long kalabus long Babilon, samting ya i laenap wetem wanem we i kamaot biaen, mo olsem wanem “ol man blong ol narafala kantri” oli haf blong profet tok ya?

[Tok Blong Pija Long Pej 9]

King Solomon i prea long saed blong ol man blong ol narafala kantri we bambae oli wosip long Jeova