Mesej
Wan Help Blong Ol Komiti Blong Hed-Kampani
Ol memba blong Hed-Kampani blong ol Wetnes blong Jeova, we naoia oli 12, oli gohed blong mekem wok blong olgeta long stret fasin. Oli tangkyu tumas long ol gudfala memba blong “bigfala kampani” (NW) we namba blong olgeta i stap go antap, from we oli wok strong blong sapotem olgeta. (Revelesen 7:9, 15) From we raonabaot long wol namba ya i go antap tumas, i luk olsem se i stret taem blong givim sam moa help long Hed-Kampani. Taswe oli tekem disisin blong askem sam man we bighaf blong olgeta oli blong bigfala kampani, blong oli givhan long olgeta, oli joen long ol miting blong evri Komiti blong Hed-Kampani. Hemia ol komiti ya: Komiti blong lukaot long ol Betel (Personnel Committee), Komiti blong prentem magasin mo buk (Publishing Committee), Komiti we i lukaot long wok blong prij (Service Committee), Komiti we i rere olgeta miting mo asembli (Teaching Committee) mo Komiti we i mekemrere ol save blong ol buk mo magasin (Writing Committee). Olsemia nao, seven no eit moa memba bambae oli joen long ol miting blong ol komiti ya wanwan. Ol man ya bambae oli save wok aninit long han blong ol memba blong Hed-Kampani. Bambae oli save joen long ol toktok mo mekem defren wok we komiti i givim long olgeta blong mekem. Bambae nyufala plan ya i stat long Mei 1, 1992.
Long plante yia finis, namba blong ol Wetnes we God i makemaot olgeta wetem tabu speret, i godaon. Be namba blong bigfala kampani i go antap tumas, i bitim samting we mifala i tingbaot fastaem. (Aesea 60:22) !Yumi tangkyu tumas long Jeova from samting ya! Taem oli glad blong tekem nyufala nem ya ol Wetnes blong Jeova long 1931, namba blong ol pablisa blong Kingdom i kasem 39,372. Bighaf blong olgeta oli brata blong Kraes we God i makemaot olgeta. (Aesea 43:10-12; Hibrus 2:11) Sikiste yia biaen, long 1991, raonabaot long wol namba blong ol pablisa i kasem 4,278,820. Mo i gat 8,850 nomo we oli talem se God i makemaot olgeta. Olsem Baebol i talem finis, “bigfala kampani” (NW) tede i bitim namba blong “smol kampani” (NW) we i stap yet long wol, olsem i gat 1 memba blong smol kampani blong 480 memba blong bigfala kampani. (Luk 12:32; Revelesen 7:4-9) Blong lukaot long ol wok long saed blong Kingdom we oli kam plante moa oltaem, smol kampani i nidim mo i laekem tumas we bigfala kampani i joen mo i sapotem olgeta.
Olsem Wajtaoa ya i eksplenem finis, i gat wan grup blong man we i wok tede wetem Isrel long saed blong speret. Grup ya i olsem ol Netinim mo ol pikinini boe blong ol man blong wok blong Solomon we oli aot long kalabus long Babilon, oli kambak wetem sam man Jyu. Ol man ya we oli no man Isrel oli bitim namba blong ol man Livae we oli gobak wetem olgeta. (Esra 2:40-58; 8:15-20) Olgeta we oli “givim” olgeta tede oli blong bigfala kampani. Ol Kristin man ya oli bigman long saed blong speret. Oli gat bigfala ekspiryens from ol wok we oli mekem blong lukaot long ol brenj, blong goraon long ol kongregesen, mo blong lukaot long ol 66,000 kongregesen we oli stap long olgeta ples long wol.
I no longtaem, oli bin mekem ol Skul blong Kingdom Wok raonabaot long wol, blong trenemgud ol elda mo ol man blong givhan. Long Amerika nomo, 59,420 elda oli go long ol skul ya. Olsem nao, ol miting ya oli givhan long “ol elda” ya blong mekem ol bigfala wok blong olgeta long fasin we i moa gud.—1 Pita 5:1-3; lukluk Efesas 4:8, 11.
Sam blong olgeta we oli “givim” olgeta, oli stap wok plante yia finis long hedkwota blong ol Wetnes blong Jeova long Bruklin. Olgeta ya blong bigfala kampani oli bigman long saed blong speret, oli naf gud mo oli gat bigfala ekspiryens. Nao, Hed-Kampani i askem sam blong ol elda ya blong oli joen long ol miting blong ol komiti blong Hed-Kampani. Oli no jusum olgeta nomo we oli wok long plante yia finis. Be oli jusum olgeta we oli bigman long saed blong speret, oli gat ekspiryens, mo oli naf gud blong givhan gud long sam spesel wok. Nating se oli wok long wan komiti olsem, be samting ya i no mekem olgeta oli hae moa long narafala. No gat. Olsem Jisas i talem long ol man blong hem, i se: “Yufala evriwan i brata.” (Matyu 23:8) Be bambae God i putum plante wok long han blong ol elda ya, taswe ‘God i wantem blong ol man ya oli mekem plante samting’ bakegen.—Luk 12:48.
Yumi glad tumas blong luk we ogenaesesen blong Jeova tede i gohed gud. Long ol ten yia we oli pas finis, namba blong ol pablisa i go antap kolosap long 100%. Samting ya i laenap long profet tok long saed blong Bigfala Deved, Jisas Kraes, we i talem se: “Bambae gavman blong hem i kam bigwan moa oltaem mo i gat pis gogo i no save finis.” (Aesea 9:7, King James Version) Long sem fasin we ol Netinim oli wok wetem ol pris blong bildimap bakegen ol stonwol blong Jerusalem, sem mak tede profet tok long saed blong ogenaesesen blong Jeova i stap kamtru, i se: “Mo ol strenja bambae oli bildimap ol stonwol blong yu.” (Aesea 60:10; Nehemaea 3:22, 26) Yumi save talem tangkyu long ol Netinim tede from we oli stap wok strong blong bildimap tru wosip, oli stap givhan long “ol pris blong Jeova” long olgeta wok we ogenaesesen blong Jeova raonabaot long wol i stap givim long olgeta.—Aesea 61:5, 6.