?Bambae Hu i Kasem Sef Long “Hadtaem”?
“Olgeta we oli singaot long nem blong Jeova bambae oli stap sef.”—JOEL 2:32.
1. ?Olsem Daniel mo Malakae oli talem, wanem ol fasin we ol man we oli save kasem sef long “hadtaem” oli mas gat?
PROFET Daniel i stap lukluk i kam long taem blong yumi, taem hem i raetem se: “Nao tru ya, bambae i gat hadtaem. Hadtaem olsem i no bin hapen samtaem, i stat long taem we wan nesen i stanap fastaem, i go kasem taem ya. Nao long taem ya, bambae ol man blong yu oli kasem sef, olgeta we nem blong olgeta i stap finis long buk.” (Daniel 12:1) !Ol tok ya oli mekem yumi haremgud! Bambae Jeova i tingbaot ol man we hem i agri long olgeta, olsem we Malakae 3:16 i stap tokbaot i se: “Long taem ya, olgeta we oli fraet gud long Jeova oli stap toktok tugeta, wanwan long fren blong hem. Mo Jeova i stap harem toktok ya mo i lesin gud. Nao oli stat raetem tok long buk blong rimemba we i stap long fored blong hem, blong rimemba long olgeta we oli fraet gud long Jeova, mo olgeta we oli tingbaot nem blong hem.”
2. ?Wanem frut i save kamaot from man i stap tingbaot nem blong Jeova?
2 Fasin blong tingbaot nem blong Jeova i lidim man blong kasem stret save long saed blong God, Kraes mo olgeta plan blong hem long saed blong Kingdom. Nao, ol man blong hem oli lanem blong stap ona long hem, givim laef blong olgeta long hem blong fren gud wetem hem, mo blong laekem hem ‘long olgeta tingting blong olgeta, mo long olgeta maen blong olgeta mo long olgeta paoa blong olgeta.’ (Mak 12:33; Revelesen 4:11) Tru long sakrafaes blong Jisas Kraes, Jeova i givim nambawan presen, long olgeta man we tingting blong olgeta i stap daon blong oli save kasem laef we i no save finis. Taswe ol man olsem bambae oli save talem bakegen ol tok blong ami blong heven, taem oli presem God long taem we Jisas i bon, oli se: “Long heven antap we antap, olgeta oli stap leftemap nem blong God. Mo long wol ya, pis i stap wetem ol man we God i glad long olgeta.”—Luk 2:14.
3. ?Bifo pis i save kamaot long wol, wanem wok we Jeova i mas mekem fastaem?
3 Pis ya i kolosap moa, bitim we ol man oli stap tingbaot. Be fastaem jajmen we Jeova bambae i mekem long rabis wol ya i mas kamaot. Profet blong hem Sefanaea i talem se: “Bigfala dei blong Jeova i kolosap. Hem i kolosap, mo hem i hareap tumas.” ?Wanem kaen dei ya? Profet i gohed blong talem se: “Noes blong dei blong Jeova i nogud. I gat wan strongfala man i stap singaot bigwan. Dei ya hem i dei blong kros, wan dei blong bigfala trabol mo blong ol man i harem nogud, wan dei blong hariken mo dei blong spolem olgeta samting, wan dei blong tudak mo ples i no klia, wan dei blong ol klaod mo ol bigfala klaod, wan dei blong pupu i krae mo dei blong ol saen we oli mekem man i fraet, agens long ol strongfala taon mo agens long ol kona blong ol haos we oli hae. Mo bambae mi mi mekem bigfala trabol long ol man, mo bambae oli wokbaot olsem ol blaenman. From we oli stap mekem sin agens long Jeova.”—Sefanaea 1:14-17; lukluk tu Habakuk 2:3; 3:1-6, 16-19.
4. ?Tede hu ya oli wantem kam blong save God mo mekem wok blong hem?
4 Be i gud tumas, plante milyan man tede oli kam blong save God mo mekem wok blong hem. I gat profet tok long saed blong ol Kristin we tabu speret i makemaot olgeta, we oli haf blong nyufala kontrak, i se: “ ‘From we olgeta evriwan bambae oli save mi, i stat long man we i smol moa long olgeta, i go kasem man we i hae moa.’ Hemia nao tok blong Jeova blong ol ami.” (Jeremaea 31:34) Olgeta ya oli lidim wok blong talemaot gud nyus long taem blong yumi. Mo naoia taem plante long olgeta we tabu speret i makemaot oli stap finisim laef blong olgeta long wol ya, “wan bigfala hif blong man” blong ol “narafala sipsip” oli kam blong ‘mekem wosip long hem long dei mo long naet’ long tempel blong hem. (Revelesen 7:9, 15; Jon 10:16) ?Yu yu wan long olgeta we yu stap haremgud long ol wok olsem?
Olsem Wanem “Ol Gudgudfala Samting” Oli Kam Insaed
5, 6. ?Bifo we olgeta nesen oli lus from oli seksek, wanem wok we i mas gohed blong sevem ol man?
5 Yumi luk tok profet blong Jeova long Hagae 2:7, long saed blong haos wosip long saed blong speret. Hem i talem se: “Mo bambae mi mi mekem olgeta nesen oli seksek, nao bambae ol gudgudfala samting blong olgeta nesen oli mas kam insaed. Mo bambae mi mi fulumap haos ya wetem glori.” Profet tok blong Baebol i soemaot se “olgeta nesen oli seksek” hemia i stap tokbaot jajmen blong Jeova long olgeta nesen. (Neham 1:5, 6; Revelesen 6:12-17) Profet tok blong Jeova long Hagae 2:7 bambae i kamtru long fulmak blong hem taem hem i seksekem ol nesen blong oli no moa stap—oli finis olgeta. ?Be olsem wanem long “ol gudgudfala samting blong olgeta nesen”? ?Olgeta ya oli mas wet long seksek ya blong oli kam insaed? No gat.
6 Joel 2:32 i talem se “olgeta we oli singaot long nem blong Jeova bambae oli stap sef. From we long hil ya Saeon mo long Jerusalem, bambae i gat ol man we oli stap sef, olsem Jeova i talem finis, mo long medel blong olgeta we oli stap laef, we Jeova i stap singaot olgeta.” Jeova i singaot olgeta blong oli kamaot long olgeta nesen, mo olgeta oli singaot long nem blong hem wetem bilif long sakrafaes blong Jisas bifo seksek ya i kasem fulmak blong hem long taem blong bigfala trabol. (Lukluk Jon 6:44; Ol Wok 2:38, 39.) I gud tumas, bigfala hif blong ol man, we naoia namba blong olgeta i bitim fo milyan, oli “kam insaed” long haos wosip blong Jeova bifo we hem i ‘seksekem olgeta nesen’ long Amageden.—Revelesen 7:9, 10, 14.
7. ?Man i mas mekem wanem blong ‘singaot long nem blong Jeova’?
7 ?Olsem wanem ol man we oli laef long taem ya oli singaot long nem blong Jeova? Long Jemes 4:8 i soemaot long yumi, i se: “Yufala i mas kam stap kolosap long God, nao hem bambae i kam stap kolosap long yufala. Yufala man nogud, yufala i mas wasem han blong yufala. Yufala we i gat tu tingting, yufala i mas mekem tingting blong yufala i klin.” Olgeta we oli hop se oli blong bigfala hif blong ol man we bambae oli laef tru long Amageden oli no mas gat tu tingting, oli mas mekem olsem ol Kristin we tabu speret i makemaot olgeta we oli lidim olgeta. Sipos yu hop blong stap laef, yu mas dring long Tok blong Jeova we i save mekem man i klin, mo yu mas mekem ol stret rul blong hem i wok long laef blong yu. Yu mas mekemap tingting blong yu blong givim laef blong yu long Jeova, mo tekem baptaes long wora blong soemaot samting ya. Yu yu stap singaot long Jeova from bilif sipos yu stap wetnes long saed blong hem tu. Taswe, long Rom japta 10, vas 9 mo 10, Pol i talem se: “Sipos long maot blong yufala, yufala i talemaot we Jisas i . . . Masta blong yufala, mo sipos long tingting blong yufala, yufala i bilif we God i bin mekem hem i laef bakegen long ded, God bambae i sevem yufala. From we taem yumi bilif long hem long tingting blong yumi, God i stap mekem yumi kam stret man long fes blong hem. Mo taem yumi talemaot tok ya long maot blong yumi, God i stap sevem yumi.” Afta, long vas 13, aposol ya i talem bakegen profet tok blong Joel, we i makem se “olgeta we oli singaot long Hae God, oli talem nem blong hem [Jeova, NW], hem bambae i sevem olgeta.”
‘Lukaot, Lukaot, Lukaot’
8. (a) ?Olsem profet Sefanaea i talem, wanem samting ol man oli mas mekem blong Jeova i sevem olgeta? (b) ?Tok ya “maet” long Sefanaea 2:3 i givim wanem woning long yumi?
8 Long buk blong Sefanaea, japta 2, vas 2 mo 3, yumi luk wanem yumi mas mekem blong Jeova i sevem yumi, hem i se: “Bifo we bigfala kros blong Jeova i kamtru long yufala, bifo we dei blong kros blong Jeova i kamtru long yufala, yufala i mas lukaot Jeova, yufala olgeta kwaet man blong wol we tingting blong yufala i stap daon, we yufala i obei long ol jajmen blong hem. Yufala i mas lukaot stret fasin, yufala i mas lukaot tingting daon. Maet bambae yufala i haed long dei blong kros blong Jeova.” Makem tok ya “maet.” Hem i no talem se, taem yu sef yu sef blong olwe. Blong yumi stap sef long dei ya, samting ya i dipen nomo sipos yumi stap gohed blong mekem trifala samting ya. Yumi mas lukaot Jeova, lukaot stret fasin, mo lukaot tingting daon.
9. ?Olsem wanem olgeta we oli lukaot tingting daon oli save kasem blesing from?
9 !Pei blong fasin blong lukaot tingting daon i gud tumas! Long Ol Sam 37, vas 9 kasem 11, yumi ridim se: “Olgeta we oli trastem Hae God bambae oli tekem graon ya i blong olgeta, . . . Bambae i no longtaem, ol man nogud oli lus. . . . Ol man we tingting blong olgeta i stap daon, bambae oli tekem graon ya i blong olgeta. Bambae oli harem gud, from we oli stap long pis, mo oli gat plante samting.” ?Olsem wanem long fasin blong lukaot stret fasin? Vas 29 i talem se: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.” Mo long saed blong olgeta we oli stap lukaot Jeova, vas 39 mo 40 i talem long yumi se: “Hae God i stap sevem ol stret man, i stap lukaotgud long olgeta long taem blong trabol. Oltaem hem i stap halpem olgeta, i stap sevem olgeta. Hem i stap tekemaot olgeta long han blong ol man nogud, from we oli stap luk long hem blong hem i blokem olgeta i sevem olgeta.”
10. ?Hu ol man ya we oli no wantem lukaot Jeova mo lukaot tingting daon?
10 Ol skul blong Krisendom oli no stap lukaot Jeova. Ol lida blong olgeta oli no moa yusum hae nem blong hem, oli mekem flas fasin ya blong tekemaot nem blong hem long ol Baebol blong olgeta. Oli wantem wosip long wan Masta no God we i no gat nem mo ona long Triniti we i wan hiten tijing nomo. Antap moa, Krisendom i no stap lukaot stret fasin. Plante memba blong hem oli gat no oli agri long ol rabis fasin. Oli no stap lukaot tingting daon olsem Jisas i mekem. Olsem oli mekem samtaem long televisin, olgeta oli glad blong soemaot ol flas fasin blong laef blong olgeta mo plante taem rabis fasin blong olgeta tu. Ol pasta blong olgeta oli stap haremgud long ol mane we sipsip blong olgeta oli stap pem olgeta long hem. Olsem tok blong Jemes 5:5 i talem, ‘oli gat isi laef, oli kasem ol samting blong mekem olgeta i harem gud.’ Taem dei blong Jeova i stap kam kolosap moa, bambae oli faenemaot se ol tok ya i stret long olgeta, se: “Ol sas samting bambae oli no givhan long olgeta long dei blong kros.”—Proveb 11:4.
11. ?Hu ya man blong brekem loa, mo olsem wanem hem i hivimap plante fol long saed blong blad?
11 Long seken leta blong aposol Pol long ol man Tesalonaeka, hem i talem se long faswan handred yia, tingting blong sam Kristin i no stap kwaet, oli stap ting se dei ya blong Jeova i kam long olgeta. Be Pol i givim woning se fastaem bigfala apostasia i mas kamaot, mo “Man blong Brekem Loa” i mas kamtru long klia ples. (2 Tesalonaeka 2:1-3) Nao long taem blong yumi, yumi luksave bigfala apostasi mo olsem wanem ol lida blong Krisendom oli man blong brekem loa long ae blong God. Long ol las dei ya stat long 1914, ol lida blong skul oli hivimap plante fol long saed blong blad long fes blong God from we oli sapotem fasin blong ‘tanem ol naef blong wokem garen oli kam naef blong faet.’ (Joel 3:10) Mo tu oli stap gohed blong tijim ol gyaman bilif, olsem bilif long sol we i no save ded, pegatri, fasin blong harem i soa long helfaea, fasin blong baptaesem ol pikinini, Triniti, mo ol narafala samting olsem tu. ?Olsem wanem long olgeta taem Jeova bambae i mekem ol jajmen blong hem i kamtru? Proveb 19:5 i se: “Man we i stap talem ol gyaman tok bambae i no save ronwe long panis blong hem.”
12. (a) ?Wanem “skae” mo “graon” we bambae i no longtaem oli finis? (b) ?Wanem samting yumi lanem long saed blong bigfala trabol we bambae i spolem rabis wol ya?
12 Long 2 Pita 3:10 yumi ridim se: “Be Dei blong Masta blong yumi bambae i kam, olsem we man blong stil i kam, we i kam long taem we yumi no save. Mo long bigfala Dei ya, bambae i gat bigfala noes, nao skae bambae i lus. Bigfala faea we i hot tumas bambae i bonem ol sta gogo oli ronaot, mo wol tu, wetem evri samting blong hem bambae i stap long klia ples nomo blong God i jajem.” Kruked fasin blong ol man blong rulum man we i kavremap olgeta man olsem skae i kavremap wol, wetem olgeta samting we oli mekem fasin blong laef blong man i nogud tede, bambae oli finis olgeta long wol ya blong God. Ol faktri mo ol bisnesman we oli stap salem ol nogud tul blong faet, ol man blong stil, ol man blong skul we oli gat tu fes mo ol lida blong olgeta, ol man we oli stap sapotem ol rabis fasin, raf fasin mo fasin blong brekem loa—olgeta evriwan bambae oli finis. Long taem blong kros blong Jeova bambae oli ronaot. Be long vas 11 mo 12, Pita i talemaot wan woning long ol Kristin i se: “From we skae mo wol wetem olgeta samting ya bambae oli lus olsem, yufala i mas lukluk gud long laef blong yufala. Yufala i mas tabu, yufala i man blong God, mo yufala i mas mekem ol fasin we hem i wantem. Yufala i mas stap wet long Dei blong God bambae i kamtru, we yufala i stap wok blong mekem i kamtru kwik.”
!Maekel i Faet!
13, 14. ?Hu ya bigfala Man blong leftemap hae rul blong Jeova, mo olsem wanem hem i mekem wok blong hem stat long 1914?
13 ?Olsem wanem bambae ol man oli save stap sef long “hadtaem” ya we Jeova bambae i mekem? Bambae God i yusum Jif blong ol enjel, Maekel, blong givhan long ol man blong oli save stap sef. Nem blong hem i min se “?Hu i Olsem God?” I stret nomo, se Hem nao i leftemap hae rul blong Jeova, hem i stap talemaot we Jeova nomo i trufala God we i gat raet blong rul olsem King mo Hae Masta long heven mo wol.
14 !Revelesen japta 12, vas 7 kasem 17, i tokbaot ol bigfala samting we bambae oli kamaot long ‘dei blong Masta’ stat long 1914! (Revelesen 1:10) Jif blong ol enjel, Maekel, i sakemaot enemi ya Setan long heven i kamdaon long wol. Biaen, olsem Revelesen japta 19 vas 11 kasem 16 i stap tokbaot, “Man we yu save bilif strong long hem, we hem i tru” bambae i “purumpurumbut long frut ya blong rop blong mekem wora blong hem i kamaot blong mekem waen. . . . olsem we God ya we i gat olgeta paoa, hem i kros tumas, nao kros blong hem i kasem olgeta.” Nem blong strongfala man ya blong faet long heven hem i “King blong ol king, mo Masta blong ol masta.” Biaen, Revelesen japta 20, vas 1 mo 2, i tokbaot wan strongfala enjel we i sakem Setan i go insaed long hol ya we i dip we i dip mo i fasem hem long ples ya gogo wan taosen yia i pas. I klia se, Baebol i stap tokbaot Man ya we i stap leftemap hae rul blong Jeova, Masta Jisas Kraes, we Jeova i putumap hem long jea blong king long heven long 1914.
15. ?Olsem wanem Maekel bambae i “stanap” i no longtaem, long wan fasin we i spesel?
15 Olsem Daniel 12:1 i stap talem, Maekel i stap “stanap” long saed blong ol man blong Jeova stat long taem we hem i kam King long 1914. Be i no longtaem bambae hem i “stanap” long wan wei we i spesel tumas—olsem Man we Jeova i yusum blong finisim ol rabis fasin long wol mo blong Sevem ol man blong God long wol. Jisas i soemaot se “hadtaem” ya bambae i bigwan tumas, long tok blong hem long Matyu 24:21, 22 i se: “Long taem ya, bambae i gat bigfala trabol tumas, we neva man i luk olsem bifo, i stat long taem we God i mekem wol, i kam kasem tede. Yes, mo bambae i no moa gat sam bigfala trabol olsem bakegen samtaem. Be Hae God i tingbaot finis blong katem taem blong trabol ya. Sipos no, bambae i no gat man i save stap laef. Be hem i katem taem ya blong bambae i sevem ol man we hem i jusumaot olgeta finis, se oli man blong hem.”
16. ?Hu ol man we bambae oli stap sef long taem blong bigfala trabol?
16 !Yumi glad tumas se bambae i gat sam man we oli save stap sef long taem ya! Be olgeta ya oli no olsem ol man Jyu we oli stap agensem Jeova mo oli no save ronwe long taem blong trabol long Jerusalem long yia 70 K.T., we sam long olgeta oli go olsem ol slef long Rom. Be, olgeta we oli ronwe long “taem blong en” bambae oli olsem Kristin kongregesen we i bin ronwe long Jerusalem taem trabol i stat. Bambae oli prapa man blong God, plante milyan long bigfala hif blong ol man wetem sam blong olgeta we tabu speret i makemaot olgeta we oli stap laef yet long wol. (Daniel 12:4) Bigfala hif blong ol man ya “oli winim ol trabol ya finis.” ?From wanem? From we “oli wasem klos blong olgeta finis blong mekem oli waet long blad blong Smol Sipsip ya we i ded.” Oli bilif long paoa blong blad blong Jisas mo soemaot bilif ya taem oli stap mekem wok blong God. Olsem naoia, Jeova, we “i stap sidaon long bigfala jea blong hem,” i mekem haos tapolen blong hem i pas antap long olgeta blong protektem olgeta, mo Smol Sipsip ya, Jisas Kraes, i lidim mo i lukaotgud long olgeta blong oli go long springwora blong laef.—Revelesen 7:14, 15.
17. ?Wanem wok bigfala hif blong ol man i mas mekem blong oli save stap sef long dei ya blong bigfala trabol?
17 !Taem oli stap lukaot Jeova, stret fasin, mo tingting daon, ol milyan man insaed long bigfala hif blong man, oli no mas letem lav we oli gat fastaem long trutok i kam kolkol! ?Sipos yu yu wan long olgeta man ya we oli olsem sipsip, wanem samting yu mas mekem? Long Kolosi japta 3, vas 5 kasem 14, hem i talem se: “Yufala i tekemaot olfala laef ya blong yufala finis, wetem ol fasin blong hem.” Askem long God blong hem i givhan long yu, traehad blong ‘putum nyufala laef ya blong yu, olsem prapa klos blong yu. Nyufala laef ya, God nomo i stampa blong hem.’ Wetem tingting daon, bildimap mo gohed strong long wok blong presem Jeova mo talemaot ol bigfala plan blong hem blong ol narafala man oli save. Nao, ating yu save stap sef long “hadtaem” ya, hemia dei ya blong “kros blong Jeova.”
18, 19. ?Olsem wanem fasin blong stanap strong gogo olgeta samting i finis i impoten blong man i kasem sef?
18 !Dei ya i kolosap! Hem i stap kam kwik nomo long yumi. Wok blong hivimap ol man long bigfala hif blong ol man i stap gohed samwe long 57 yia finis. Sam long olgeta oli ded finis mo oli stap wet blong bambae oli laef bakegen. Be folem profet tok blong Revelesen yumi save se bigfala hif blong ol man bambae i kamtru long bigfala trabol ya olsem wan grup mo olgeta bambae oli olsem ol faswan man blong stap long “nyufala wol.” (Revelesen 21:1) ?Bambae yu yu stap long taem ya? Yes yu save stap, from Jisas i talem long Matyu 24:13 i se: “Man we i stanap strong gogo olgeta samting ya i finis, bambae God i sevem hem.”
19 Ol hadtaem we ol man blong Jeova oli stap kasem long olfala wol ya maet oli save gohed blong kam strong moa. Mo taem bigfala trabol ya i kamtru long wol, maet yu save kasem hadtaem moa. Be yu mas stap kolosap long Jeova mo ogenaesesen blong hem. !Yu mas stap wekap! “ ‘From samting ya, yufala i wet long mi go kasem dei ya we bambae mi girap blong go tekem pei blong mi. From we jajmen blong mi, se mi mi mas hivimap ol nesen blong mekem ol kingdom oli kam wanples, blong mi kafsaedem ol strong tok blong mi i godaon long olgeta, yes, olgeta strong kros blong mi. From we strong tingting ya blong mi i olsem faea we bambae i kakae olgeta ples long wol.’ ”—Sefanaea 3:8.
20. ?Naoia we “hadtaem” ya i stap kam kwik, wanem samting yumi mas mekem?
20 Blong protektem yumi mo blong leftemap tingting blong yumi, Jeova i givim wan “klin lanwis” long ol man blong hem, hemia bigfala mesej blong Kingdom we i stap kam, nao “oli save singaot nem blong Jeova, blong mekem wok blong hem, we solda blong wan i joen long solda blong narawan.” (Sefanaea 3:9) Naoia “hadtaem” ya i stap kam kwik, taswe yumi mas gat strong tingting blong wok strong, mo yumi mas halpem ol narafala man we tingting blong olgeta i stap daon blong oli ‘singaot long nem blong Jeova’ blong oli stap sef.
[Futnot]
a Apostasi i minim fasin blong lego tru wosip mo agens long hem.
?Yu Yu Rimemba?
◻ ?Wanem samting Jeova bambae i mekem bifo we pis i kamaot long wol?
◻ ?Wanem samting man i mas mekem blong hem i stap sef, olsem Joel i talem?
◻ ?Olsem wanem ol man we tingting blong olgeta i stap daon oli save stap sef long taem blong kros blong Jeova, olsem Sefanaea i talem?
◻ ?Hu ya “Man blong Brekem Loa,” mo olsem wanem hem i hivimap fol long saed blong blad?
◻ ?Fasin blong stanap strong gogo olgeta samting i finis i impoten olsem wanem long saed blong kasem sef?