Ripot Long Wok Blong Kingdom
Ol Skul Pikinini Long Naejeria Oli Kasem Blesing From We Oli Holemstrong
APOSOL Pol i talem se: “Oltaem, long saed blong yufala, yufala i mas traehad tumas blong yufala i gat pis wetem olgeta man.” (Rom 12:18) Ol skul pikinini blong ol Wetnes blong Jeova long Naejeria oli folem advaes ya, nating se ol man oli mekem nogud long olgeta. From samting ya, Jeova i blesem olgeta.
◻ Wan tija i no laekem ol Wetnes blong Jeova nating. Long wan asembli blong ol skul pikinini long moning, hem i askem ol Wetnes oli kam fored mo i talem se oli mas sing long singsing blong kantri. Be oli no wantem, oli talem se oli wantem givim ona i go long God nomo. Tija ya i tekem olgeta i go afsaed mo i mekem olgeta oli katem gras. Be, ol narafala studen oli gohed long skul wok blong olgeta.
Wan man we i Wetnes i tekem buklet ya School and Jehovah’s Witnesses mo i givim long tija ya, mo i eksplenem from wanem ol Wetnes blong Jeova oli no save joen long samting olsem. Be, tija ya i no wantem lesin mo hem i no wantem tekem buklet ya. I no longtaem hem i mekem panis blong ol pikinini ya i kam strong moa.
Ol yangfala Wetnes oli gohed blong stanap strong long panis ya we oli kasem mo oli gohed blong stap katem gras nating we tija i no stap. Wan dei tija ya i haed mo i lukluk olgeta taem oli stap gohed nomo blong wok mo oli stap singsing long ol sing blong Kingdom. Hem i glad tumas from, nao hem i sanem olgeta oli gobak long skul, mo hem i talem se hem i sapraes long fasin blong olgeta. ?Wanem frut i kamaot from? !Naoia tija ya i stap stadi Baebol wetem ol Wetnes blong Jeova!
Tru ya ol skul pikinini ya oli kasem blesing from we oli holemstrong long Jeova mo ol rul blong hem.—Proveb 10:22.
◻ Rut mo ol fren blong hem oli kasem blesing tu from we oli holemstrong long rul blong Jeova se “oli no man blong wol ya.” (Jon 17:16) Rut we i gat 18 yia, i statem wok blong paenia taem hem i kasem 12 yia nomo. Ol skul tija oli agensem hem mo ol narafala Wetnes from we oli no wantem sing long singsing blong kantri. Wan tija i wantem luk ol papa mama blong ol pikinini ya. Afta we oli yusum buklet ya School blong eksplenem bisnes ya long tija, hem i luksave mo hem i no moa mekem trabol long ol studen ya.
Be wan dei, wan tija we i kam long India i tok strong mo i panisim wan long ol gel ya long fored blong ol narafala studen from gel ya i no sing long singsing blong kantri. Gel ya i no lego bilif blong hem mo tija ya i tekem hem i go long hedmasta blong skul. Taem oli kam long ples blong hedmasta, yangfala Wetnes ya i luk se namba tu hedmasta i stap tu. Hem i sapraes, from hedmasta mo namba tu hedmasta tufala i stat blong laf. Tufala i tanraon long tija ya, mo hedmasta i talem long hem, i se: “Misis, yu no wari long ol gel ya. Nating se bambae yu mas kilim olgeta i ded from, bambae oli no save sing long singsing blong kantri. ?Yu no save samting ya?” Hedmasta ya wetem namba tu hedmasta tufala i tokbaot bilif mo fasin blong stanap strong we ol Wetnes oli gat. Hedmasta i talem long gel ya se hem i sore tumas from panis we hem i kasem long fored blong ol narafala studen. Mo i gohed blong talem se: “Gohed long gudfala bilif blong yu. Mi mi laekem skul blong yu mo gudfala fasin blong yufala blong stanap strong afsaed long skul mo long skul tu.” Biaen, tija ya we hem i agensem ol Wetnes i talem sore long hem, mo i talem se naoia hem i luksave from wanem ol Wetnes oli mekem olsem.
Ol pikinini ya oli folem eksampel blong trifala man Hibru we oli no lego bilif blong olgeta long God blong bodaon long wan aedol, mo tu Daniel, we hem i no obei long oda blong no moa prea long Jeova. Ol man ya oli kasem ol blesing long Jeova from we oli stap holemstrong long ol stret loa blong God.—Daniel, japta 3 mo 6.