Yusumgud Kristin Fasin Fri Blong Yu
“Yufala i friman finis, mo fasin blong yufala i mas soemaot samting ya . . . from we yufala i man blong wok blong God.”—1 PITA 2:16.
1. ?Wanem fasin fri we Adam i lusum, mo wanem fasin fri we bambae God i givim bakegen long ol man?
TAEM faswan papa mama blong yumi oli mekem sin long garen blong Iden, tufala i no holem wan gudfala samting we ol pikinini blong tufala oli save kasem—hemia fasin fri long sin mo long ol rabis fasin. From samting ya, yumi evriwan i slef long ol rabis fasin mo ded. Be yumi glad se Jeova i wantem givim wan gudfala fasin fri bakegen long ol man we oli stap holemstrong long hem. Tede, ol man we hat blong olgeta i stret “oli stap wet, we oli wantem tumas blong luk we God bambae i soemaot ol pikinini blong hem,” from samting ya “God bambae i mekem ol pikinini blong hem oli fri olgeta long sin, panis ya bambae i finis, nao olgeta samting ya we God i mekem bambae oli fri olgeta, olsem ol pikinini blong hem.”—Rom 8:19-21.
‘Makemaot Olgeta Blong Oli Prij’
2, 3. (a) ?Hu ya “ol pikinini blong [God]”? (b) ?Wanem gudfala samting oli stap haremgud from, mo God i givim wanem wok long olgeta?
2 ?Hu ya “ol pikinini blong [God]”? Hemia ol brata blong Jisas we tabu speret i makemaot olgeta blong bambae oli rul wetem hem long Kingdom blong heven. Sam long olgeta ya oli stap laef long faswan handred yia. Oli akseptem trutok ya blong mekem man i fri we Jisas i stap tijim olgeta long hem, mo stat long Pentekos long yia 33 K.T., oli kasem gudfala jans ya we Pita i tokbaot, i se: “Yufala, God i bin jusumaot yufala blong yufala bambae i laen blong hem. Yufala i olsem ol pris blong King. Yufala i olsem ol man blong wan ples nomo, we yufala i tabu man blong God. Yufala i olsem ol man we God i tekem yufala i blong hem nomo.”—1 Pita 2:9a; Jon 8:32.
3 Blong kam man we i blong God nomo—!hem i wan gudfala blesing ya! Mo tede olgeta we tabu speret i makemaot olgeta olsem pikinini blong God oli haremgud long blesing ya. Be i gat ol wok we oli mas mekem from haenem we oli kasem. Pita i tokbaot wan long ol wok ya, hem i gohed i se: “God i mekem olsem long yufala, blong bambae yufala i save talemaot ol gudfala wok blong hem. Hem i singaot yufala finis blong yufala i aot long tudak, yufala i kam long gudfala laet blong hem.”—1 Pita 2:9b.
4. ?Olsem wanem ol Kristin we tabu speret i makemaot olgeta oli mekem wok ya blong fasin fri?
4 ?Ol Kristin we tabu speret i makemaot olgeta oli talemaot ol gudfala wok blong God? Yes. Aesea i talem wan profet tok we i stret long ol Kristin we tabu speret i makemaot i stat long 1919, i se: “Speret blong Hae Masta Jeova i stap long mi, from we Jeova i makemaot mi finis blong go talemaot wan gud nyus long ol kwaet man. Hem i sanem mi mi go blong kavremapgud ol soa blong olgeta we oli sore tumas long hat blong olgeta, mo blong talemaot fasin fri long ol man we oli kam slef finis, mo blong talemaot long ol man kalabus we ae blong olgeta i save opengud. Blong talemaot yia ya we Jeova i makem blong soemaot gladhat blong hem long ol man, mo dei ya we God blong yumi i makem blong givimbak.” (Aesea 61:1, 2) Tede, ol Kristin we tabu speret i makemaot olgeta, oli folem eksampel blong Jisas, olsem we vas blong Baebol antap i stap tokbaot hem, oli wok strong blong talemaot gud nyus blong fasin fri long ol narafala man.—Matyu 4:23-25; Luk 4:14-21.
5, 6. (a) ?Wanem samting i kamaot from we ol Kristin we tabu speret i makemaot olgeta oli traehad long wok blong prij? (b) ?Wanem wok mo blesing we bigfala kampani i glad long hem?
5 From we oli wok strong long wok blong prij, wan bigfala hif blong ol narafala sipsip oli kamaot long wol long ol lasdei ya. Oli kamaot long olgeta nesen blong oli joen wetem ol Kristin we tabu speret i makemaot olgeta blong mekem wok blong Jeova, mo trutok i mekem olgeta ya oli fri tu. (Sekaraea 8:23; Jon 10:16) Oli olsem Ebraham, oli kam stret man from bilif blong olgeta mo oli kam frengud wetem Jeova God. Oli olsem Rehab, oli kam stret man mo oli save kasem sef from—long taem blong Amageden. (Jemes 2:23-25; Revelesen 16:14, 16) Mo tu from haenem we oli kasem oli gat wok ya blong talemaot ol gudfala wok blong God long ol narafala man. Taswe Jon i luk se oli stap presem Jeova, “Nao oli singaot bigfala, oli talem se ‘God ya blong yumi, we i stap sidaon long bigfala jea blong hem, wetem Smol Sipsip ya, tufala ya nao i wokem rod blong sevem mifala.’ ”—Revelesen 7:9, 10, 14.
6 Las yia, namba blong bigfala kampani i bitim fo milyan, mo kampani ya wetem ol Kristin we tabu speret i makemaot olgeta, tufala tugeta i spenem kolosap wan taosen milyan haoa blong talemaot ol gudfala samting blong Jeova long olgeta ples long wol. Hemia nambawan rod blong yusumgud fasin fri blong olgeta long saed blong speret.
“Ona Long Hed Gavman”
7, 8. ?Wanem wok long saed blong ol haeman i kamaot from Kristin fasin fri, mo wanem tingting yumi no mas gat?
7 Kristin fasin fri blong yumi i mekem se yumi gat ol narafala wok tu blong mekem. Pita i tokbaot sam long olgeta, i se: “Yufala i mas ona long olgeta man. Yufala i mas laekem tumas olgeta Kristin man. Yufala i mas onagud long God. Mo yufala i mas ona long hed gavman blong yufala.” (1 Pita 2:17) ?Tok ya “ona long hed gavman” i minim wanem?
8 “Hed gavman” i minim ol man we oli stap rul. Tede, long wol tingting blong no ona long ol haeman i kam antap bigwan, mo i isi blong samting ya i spolem ol Kristin man. Maet wan Kristin i save ting se hem i no nidim blong ona long “hed gavman,” from “olgeta man blong wol oli stap long paoa blong Setan.” (1 Jon 5:19) Maet ol tok ya oli save mekem se hem i no wantem obei long sam loa we hem i no glad long olgeta mo sipos ol man oli no askem hem blong pem ol takis, maet hem i no save pem. Be fasin ya i agensem rul blong Jisas se, “samting we i blong Sisa, yufala i givimbak long Sisa.” Man olsem i stap ‘yusum fasin ya we hem i friman, blong haedem sam fasin we i no stret.’—Matyu 22:21; 1 Pita 2:16.
9. ?Wanem tufala risen blong obei long ol haeman?
9 Ol Kristin oli mas ona long ol haeman mo oli mas stap aninit long olgeta—nating se oli no save mekem evri samting we ol haeman oli askem long olgeta. (Ol Wok 5:29) ?From wanem? Long 1 Pita 2:14, 15, Pita i soemaot tri risen hem i talem se: “Mo yufala i mas obei long ol gavman we [God] i sanem blong givim panis long ol man blong brekem loa, mo blong presem ol man blong folem stret fasin.” Fasin fraet long panis i wan risen blong pusum yumi blong obei long ol gavman. !Sipos wan long ol Wetnes blong Jeova i pem faen no i go long kalabus from fasin blong brekem loa olsem, stil, no sam narafala fasin blong brekem loa, samting ya i wan bigfala sem! !Tingbaot, sam man bambae oli glad blong mekem pablisiti long samting olsem! Be tu, taem yumi gat gudnem from yumi stap obei long gavman, ol haeman we oli gat gudfala tingting oli presem yumi from. Oli save givim fasin fri moa long yumi blong talemaot gud nyus. Mo tu from ‘ol stret fasin blong yumi bambae yumi blokem ol krangke tok blong ol man we oli no gat save.’ (1 Pita 2:15b) Hemia i namba tu risen blong obei long ol haeman.—Rom 13:3.
10. ?Wanem bigfala risen blong obei long ol haeman?
10 Be i gat wan narafala risen we i bigfala moa. Ol haeman ya oli stap long ples blong olgeta from we Jeova i letem olgeta. Olsem Pita i talem, ol haeman blong politik Jeova i “sanem olgeta,” mo “hemia wan samting we God i wantem” se ol Kristin oli mas stap aninit long olgeta. (1 Pita 2:15a) Aposol Pol i talem se: “Ol gavman oli stap holem nem from wan samting nomo, from we God nomo i letem olsem long olgeta.” Taswe, tingting we i stanap long Baebol i pusum yumi blong obei long ol haeman. Sipos yumi no wantem stap aninit long olgeta yumi stap “agens long ol fasin we God i stanemap.” (Rom 13:1, 2, 5) ?Olsem wanem, yumi wantem agensem fasin we God i stanemap? !Man we i mekem olsem hem i no yusumgud Kristin fasin fri blong hem!
‘Laekem Ol Brata’
11, 12. (a) ?Wanem narafala wok long saed blong ol brata blong yumi we i kamaot from Kristin fasin fri? (b) ?Hu ya yumi mas tingbaot olgeta, mo from wanem?
11 Pita i talem tu se wan Kristin i mas “laekem olgeta evriwan long kampani blong ol brata.” (1 Pita 2:17, NW) Hemia i wan narafala wok we i kamaot from Kristin fasin fri. Plante long yumi oli stap long wan kongregesen. Mo yumi evriwan i haf blong bigfala kampani, no wan ogenaesesen blong ol brata long olgeta ples long wol. Yumi waes blong yusumgud fasin fri blong yumi taem yumi soemaot lav long olgeta ya.—Jon 15:12, 13.
12 Aposol Pol i tokbaot wan grup blong ol Kristin we yumi mas soemaot lav long olgeta. Hem i talem se: “Yufala i mas ona long ol man we i stap lidim yufala, mo yufala i mas obei long ol tok blong olgeta. Olgeta ya oli stap lukaot long Kristin laef blong yufala, we oli no save spel, mo bambae oli mas talemaot long God we oli holem wok ya blong olgeta olsem wanem. Yufala i mas mekem olgeta oli harem gud long wok ya blong olgeta. Sipos yufala i stap mekem olgeta oli harem nogud long wok ya, fasin ya bambae i no givhan long yufala nating.” (Hibrus 13:17) Olgeta we oli stap lidim ol man insaed long kongregesen, oli ol elda. I tru we ol man ya oli no stretgud olgeta. Be, oli holem wok ya from we Hed Kampani nomo i givim long olgeta. Oli soem eksampel long yumi mo oli stap tingbaot yumi, mo oli stap lukaot long laef blong yumi. !Hem i wan bigfala wok ya! (Hibrus 13:7) Be i gud, olsem plante kongregesen oli gat tingting blong wok tugeta wetem ol elda, mo ol elda oli haremgud taem oli wok wetem olgeta. I hadwok long ol elda taem ol man wanwan oli no wantem joengud wetem olgeta. Ol elda oli save gohed blong mekem wok blong olgeta, be olsem aposol Pol i talem, oli stap “harem nogud.” !Tru ya, yumi no wantem mekem ol elda oli harem nogud! Yumi wantem se oli haremgud taem oli stap mekem wok blong olgeta blong givhan long yumi.
13. ?Wanem ol rod we yumi save givhan long ol elda?
13 ?Wanem samting yumi save mekem blong givhan long ol elda? Yumi save givhan blong lukaotem mo klinim Haos-Kingdom. Narafala samting se yumi visitim ol sikman mo givhan long olgeta we oli no save wokbaot. Mo tu, yumi save traehad blong stap strong long saed blong speret, blong yumi no save kam olsem wan hevi samting long olgeta. Wan impoten samting blong givhan se yumi save lukaot blong kongregesen i stap klin long saed blong fasin mo speret. Yumi save mekem olsem sipos yumi gat klin fasin, mo yumi stap talemaot ol bigfala sin long ol elda taem yumi luk.
14. ?Olsem wanem yumi save givhan long ol elda taem oli stretem wan man?
14 Samtaem, ol elda oli mas putumaot sam man we oli no wantem tanem tingting blong olgeta long ol rabis fasin blong olgeta, blong mekem kongregesen i stap klin. (1 Korin 5:1-5) Samting ya i mekem se kongregesen i stap klin. Mo tu maet i save givhan long man we i mekem rabis fasin. Samtaem, fasin stretem olsem i givhan long man we i mekem sin blong i tingtinggud. ?Olsem wanem, sipos hemia we oli putumaot hem long kongregesen i wan gudfala fren blong yu no hem i wan famle blong yu? Sipos hem i papa no mama blong yumi, no sipos hem i pikinini boe no pikinini gel blong yumi. ?Yumi respektem samting ya we ol elda oli mekem? Maet i hadwok blong mekem. !Be i nogud blong yusum fasin fri blong yumi blong agensem disisin we ol elda oli mekem, mo gohed blong joen long saed blong speret wetem wan man we hem i mekem kongregesen i doti! (2 Jon 10, 11) Ol man blong Jeova evriwan oli wokgud from we oli stap givhan long ol samting ya. Taswe, ogenaesesen blong Jeova i stap klin, nating se wol ya i no klin nating.—Jemes 1:27.
15. ?Sipos wan man i mekem wan bigfala sin, wanem samting yumi mas mekem kwiktaem?
15 ?Olsem wanem sipos yumi mekem wan bigfala sin? King Deved i tokbaot ol man we Jeova i glad long olgeta, i se: “?Wanem man i gat raet blong go antap long hil blong Hae God? ?Wanem man i save go insaed long tabu ples ya blong hem? Man we tingting blong hem i klin mo laef blong hem i stret, we i no save mekem wosip long ol gyaman god mo i no save mekem ol gyaman promes.” (Ol Sam 24:3, 4) Sipos, yumi no moa gat ‘tingting we i klin mo laef we i stret’ maet from sam risen, yumi mas mekem wan samting kwiktaem. !Laef blong yumi blong olwe i stap long wan trabol ya!
16, 17. ?Sipos wan man i mekem wan bigfala sin, from wanem hem i no mas traem blong stretem bisnes ya hem wan?
16 Sam man oli traem blong haedem ol bigfala sin blong olgeta, maet oli gat tingting se: ‘Mi bin talemaot long Jeova finis mo mi tanem tingting blong mi finis long ol sin ya. ?From wanem mi mas talemaot long ol elda?’ Maet man ya i sem no i fraet long samting we ol elda maet oli save mekem long hem. Hem i mas tingbaot se, nating se Jeova nomo i save mekem yumi klin from ol sin blong yumi, fastaem Hem i givim wok blong mekem kongregesen i stap klin long ol elda. (Ol Sam 51:2) Oli stap long kongregesen blong mekem ol man oli haremgud bakegen mo blong “stap stretem ol tabu man blong hem.” (Efesas 4:12, NW) Sipos yumi no go luk ol elda blong oli givhan long yumi long saed blong speret, samting ya i olsem wan man we i sik be i no wantem go luk ol dokta.
17 Sam man we oli traem blong winim ol trabol blong olgeta nomo, oli faenemaot se sam manis no sam yia biaen, voes blong hat blong olgeta i jajem olgeta yet. I moa nogud se, olgeta we oli haedem bigfala sin blong olgeta oli stap foldaon bakegen long sin ya mo samtaem oli mekem sem sin tri taem bakegen. Taem ol elda oli save long samting ya, oli faenemaot se man ya i mekem olsem tu no tri taem finis. !Taswe i gud moa blong folem advaes blong Jemes! Hem i se: “?I gat wan long yufala we i sik? I gud hem i singaot ol elda blong jyos blong oli kam luk hem. Nao ol elda ya oli save prea long hem, mo oli save kafsaedem oel i go long hem long nem blong Masta blong yumi.” (Jemes 5:14) Go luk ol elda taem i gat taem yet blong oli givhan long yu blong yu haremgud bakegen. Sipos yumi stap wet longtaem tumas, maet yumi kam stronghed finis long rod ya blong sin.—Eklesiastis 3:3; Aesea 32:1, 2.
Lukluk Blong Yumi Mo Spel
18, 19. ?From wanem wan pris i laekem ol Wetnes blong Jeova?
18 Long faef yia bifo, wan pris blong Katolik long Itali i tokbaot ol Wetnes blong Jeova long wan magasin.a Hem i talem se: “Mi, mi laekem ol Wetnes blong Jeova. Mi wantem talemaot samting ya. . . . Ol Wetnes blong Jeova we mi save olgeta oli gat gudfala fasin, oli toktokgud wetem ol man . . . mo oli save pulum tingting blong man blong oli toktok. ?Wetaem bambae yumi save se trutok i nidim fasin we i stret blong talemaot? ?Wetaem bambae yumi save se ol man we oli stap talemaot trutok oli no mas hafhaf long tingting blong olgeta, oli no mas gat ol nogud smel, hea blong olgeta i no mas olbaot mo klos blong olgeta i no mas olbaot?”
19 Ol tok ya i soem se, pris ya i glad, long klos mo fasin blong ol Wetnes. I klia se, ol Wetnes we pris ya i save olgeta oli lesin long advaes long plante yia finis we “slef ya we i stret mo waes” i stap givim. (Matyu 24:45, NW) Baebol i talem se klos blong woman i no mas “pulum ae blong man, mo i no blong flas.” (1 Timote 2:9) Tede, advaes ya i stret tu long ol man. ?Yu ting se i stret we ol man blong Kingdom blong God oli lukgud taem ol man afsaed oli lukluk olgeta?
20. ?From wanem wan Kristin i mas tingtinggud long klos blong hem oltaem?
20 Sam man maet oli agri se long taem blong ol miting mo wok blong prij, oli mas lukaotgud long klos blong olgeta, be oli ting se i no gat rul long Baebol we i tokbaot ol narafala taem. ?Olsem wanem, yumi save stop samtaem blong yumi no stap olsem man blong Kingdom blong God? I tru se taem mo ples we yumi save stap long hem oli no sem mak. Sipos yumi givhan blong bildim wan Haos-Kingdom, bambae yumi putum klos we i defren long ol klos we yumi putum taem yumi go long miting long Haos-Kingdom ya. Taem yumi spel, bambae yumi putum klos we i defren, hemia ol klos blong spel. Be long eni ples we ol man afsaed oli save lukluk yumi, klos blong yumi oltaem i mas stret mo hem i no blong flas.
21, 22. ?Olsem wanem oli givhan long yumi blong agensem ol nogud samting we yumi save lukluk no harem taem yumi spel, mo wanem tingting blong yumi long saed blong ol advaes ya?
21 Narafala ples blong tingbaot hemia taem blong spel blong mekem sam samting. Ol man—speseli ol yangfala—oli nidim spel. Hem i no wan sin, mo i no westem taem blong mekem plan blong spel wetem famle. Jisas tu i askem ol disaepol blong hem blong oli “save spel smol.” (Mak 6:31) Be yu mas lukaotgud se fasin blong spel i no openem doa long ol rabis fasin we i save spolem yu long saed blong speret. Yumi laef long wan wol we ol samting we yumi save lukluk no harem taem yumi spel oli tokbaot ol nogud fasin long saed blong seks, ol bigfala faet, fasin fraet, mo fasin blong wok wetem ol rabis speret. (2 Timote 3:3; Revelesen 22:15) Slef ya we i stret mo waes i luksave ol trabol ya mo oltaem hem i givim woning long yumi blong agensem olgeta. ?Yu ting se ol tok ya oli blokem fasin fri blong yu? ?Yu yu glad se ogenaesesen blong Jeova i stap lukaot long yu taem hem i talemaot ol trabol ya long yu oltaem blong yu luksave?—Ol Sam 19:7; 119:95.
22 Yu no mas foget se fasin fri blong yumi i kamaot long Jeova, mo yumi mas lukaot olsem wanem yumi yusum fasin fri ya. Sipos yumi no harem ol gudfala advaes ya mo yumi mekem wan disisin we i rong, yumi no save talem se i fol blong narafala man. Aposol Pol i talem se: “Yumi evriwan i mas talemaot olgeta fasin blong yumi long fes blong God.”—Rom 14:12; Hibrus 4:13.
Wet Long Fasin Fri Blong Ol Pikinini Blong God
23. (a) ?Naoia wanem ol blesing we yumi stap kasem from fasin fri? (b) ?Wanem ol blesing we yumi stap wet from?
23 Tru tumas God i stap blesem yumi. Yumi fri long ol gyaman skul mo gyaman bilif. Yumi talem tangkyu from ransom sakrafaes, yumi save kam long Jeova wetem voes blong hat we i klin, yumi fri long sin mo ded long saed blong speret. Mo i no longtaem “God bambae i soemaot ol pikinini blong hem.” Long Amageden, ol man bambae oli luksave se ol brata blong Jisas we oli stap long Kingdom long heven oli man blong spolem ol enemi blong Jeova. (Rom 8:19; 2 Tesalonaeka 1:6-8; Revelesen 2:26, 27) Biaen, bambae i klia se ol pikinini ya blong God oli stap givim blesing we i kamaot long jea blong God long ol man. (Revelesen 22:1-5) Nao, ol pikinini ya blong God bambae oli blesem ol man we oli holemstrong bilif, wetem nambawan fasin fri blong ol pikinini blong God. ?Yu yu wantem luk dei ya? Sipos yes, yusum Kristin fasin fri blong yu long rod we i waes. !Naoia yu mas kam wokman blong God, mo bambae yu haremgud long gudfala fasin fri blong olwe!
[Futnot]
a Biaen pris ya i tekemaot ol tok blong hem, from ol man oli fosem hem blong mekem olsem.
Tingtingbak
◻ ?Olsem wanem ol Kristin we tabu speret i makemaot olgeta mo ol narafala sipsip oli stap leftemap nem blong Jeova?
◻ ?From wanem ol Kristin oli mas ona long ol haeman?
◻ ?Wanem samting wan Kristin i save mekem blong givhan long ol elda?
◻ ?Long saed blong klos, from wanem ol Wetnes blong Jeova oli defren long plante man long wol?
◻ ?Wanem samting yumi mas ronwe long hem taem yumi spel blong lukluk no harem sam samting?
[Tok Blong Pija Long Pej 17]
Yumi mas laekem ol elda mo givhan long olgeta
[Tok Blong Pija Long Pej 18]
Klos blong wan Kristin i mas stret, i no blong flas, hem i mas stret long samting we hem i stap mekem