Wok Blong Pulum Man Olsem Fis
“Jisas i talem long Saemon, i se ‘Yu no fraet. Yu yu man blong pulum fis, be i stat naoia, bambae yu yu man blong pulum man.’ ”—LUK 5:10.
1, 2. (a) ?Wanem kaen fasin blong pulum fis we i stap long histri blong man? (b) ?Wanem nyufala fasin blong pulum fis we i kamaot kolosap 2,000 yia bifo?
LONG plante taosen yia finis, ol man oli stap kasem ol fis long ol solwora, ol bigfala wora, mo ol reva blong kakae. Ol fis long Nael reva oli stampa kakae blong ol man Ijip bifo. Long taem blong Moses, taem ol wora blong Nael oli kam blad, ol man Ijip oli trabol tumas, i no from we oli sot long wora nomo be tu from we ol fis oli ded, samting ya i spolem stampa kakae blong olgeta. Biaen, long hil ya Sinae, taem Jeova i givim Loa long ol man Isrel, hem i se i gat sam fis we oli save kakae be i gat sam narafala fis we oli no klin, oli no mas kakae. Samting ya i soemaot se ol man Isrel bambae oli kakae fis taem oli kasem Promes Lan, taswe sam long olgeta bambae oli kam man blong pulum fis.—Eksodas 7:20, 21; Levitikas 11:9-12.
2 Be, kolosap 2,000 yia finis, ol man oli lanem wan narafala fasin blong pulum fis. !Hemia fasin blong pulum fis long saed blong speret, ol man blong pulum fis mo ol man we oli olsem fis bambae oli haremgud long hem! Fasin ya blong pulum fis i stap gohed yet tede, mo plante milyan man long olgeta ples long wol oli haremgud from.
“Pulum Man”
3, 4. ?Hu ya tufala man blong pulum fis we tufala i soemaot bigfala intres long Jisas Kraes?
3 Long yia 29 K.T., Jisas, we Hem nao i statem nyufala fasin ya blong pulum fis, Jon Baptaes i bin baptaesem hem long reva Jodan. Sam wik biaen, Jon i soemaot Jisas long tu disaepol blong hem, i se: “!Olgeta! Man ya, hem i olsem smol sipsip blong God.” !Wan long ol disaepol ya, nem blong hem Andru, wantaem nomo i talem long brata blong hem Saemon Pita, i se: “E, mifala i faenem Mesaea”! Andru mo Saemon tufala i man blong pulum fis, tufala i mekem olsem wan bisnes blong tufala.—Jon 1:35, 36, 40, 41; Matyu 4:18.
4 Samtaem afta, Jisas i stap prij long plante hif man kolosap long Lugun blong Galili, i no longwe nating long ples we Pita mo Andru tufala i stap long hem. Hem i stap talem long ol man i se: “Yufala i mas tanem tingting blong yufala from ol sin blong yufala, from we [kingdom blong heven, NW], hem i kam kolosap nao.” (Matyu 4:13, 17) Yumi save se Pita mo Andru tufala i wantem tumas blong harem mesej blong hem. Be, ating tufala i no save se samting we Jisas bambae i talem long tufala i save jenisim laef blong tufala blong olwe. Mo tu, samting we Jisas bambae i talem long tufala mo bambae i mekem long fes blong tufala i gat wan impoten mining long yumi tede.
5. ?Olsem wanem Pita, man ya blong pulum fis i save mekem wok blong Jisas?
5 Yumi ridim se: “Wan taem, Jisas i stap stanap long so blong bigfala lugun ya, nem blong hem, Lugun blong Genesaret. Nao ol man oli stap kam plante raonabaot long hem, oli stap lesin long tok blong God. Nao hem i luk tu bot i stap long sanbij we ol man blong pulum fis oli livim tufala i stap, nao oli stap wasem ol net blong olgeta.” (Luk 5:1, 2) Bifo, ol man we oli mekem bisnes blong pulum fis oli stap pulum fis long naet, mo long dei oli klinim net blong olgeta. Jisas i wantem yusum wan bot blong olgeta blong mekem se taem hem i prij bambae ol man oli save harem hem. “Nao Jisas i klaem long wan long tufala bot ya, we i blong wan man, nem blong hem Saemon. Nao i askem long Saemon blong i pusumaot bot ya lelebet, blong i stap drif kolosap long so. Nao Jisas i sidaon long bot ya, i stap tijim ol man.”—Luk 5:3.
6, 7. ?Wanem merikel long saed blong pulum fis we Jisas i mekem, mo hem i talem wanem?
6 Taem Jisas i stap tijim ol hif man ya be hem i tingbaot wan samting moa: “Taem Jisas i finisim ol tok blong hem, hem i talem long Saemon, i se ‘I gud yufala i tekem bot ya i go longwe, long dip wora, yufala i sakem net blong yufala, blong pulum sam fis.’ ” Tingbaot, ol man ya blong pulum fis oli traem pulum fis finis long naet. Taswe, Pita i ansa, i se: “Masta, mifala i stap hadwok tumas long samting ya, kam kasem delaet, we mifala i no pulum wan fis nating. Be from we yu yu talem olsem, mi save go sakem net.” ?Wanem samting i kamaot taem oli mekem olsem? “Oli kasem fis long net blong olgeta, we i plante we plante. Nao from we net blong olgeta kolosap i brok, oli singaot long ol fren blong olgeta long narafala bot, blong oli kam givhan long olgeta. Mo taem narafala bot ya i kam, oli fulumap tufala bot ya we kolosap tufala i draon.”—Luk 5:4-7.
7 Jisas i wokem wan merikel. Long ful naet i no gat fis long solwora ya. Be naoia i gat fulap fis long hem. Merikel ya i jenisim tingting blong Pita. “Nao taem Saemon i luk samting ya, hem i nildaon long Jisas, i talem se ‘Masta, plis yu gowe long mi, from we mi mi man nogud.’ Hem i tok olsem from we i sapraes tumas long ol fis ya we oli pulum, we i plante tumas. Mo olgeta fren blong hem tu, wetem tufala pikinini ya blong Sebedi, Jemes mo Jon, we tufala i mekem kampani wetem Saemon long wok ya, olgeta evriwan oli sapraes tumas long samting ya.” Jisas i mekem tingting blong Pita i stap kwaet mo i talem ol tok ya we oli mekem laef blong Pita i jenis. “Yu no fraet. Yu yu man blong pulum fis, be i stat naoia, bambae yu yu man blong pulum man.”—Luk 5:8-10.
Ol Man Blong Pulum Man Olsem Fis
8. ?Olsem wanem fo man blong mekem bisnes blong pulum fis oli ansa long Jisas taem hem i askem olgeta blong “pulum man”?
8 Jisas i tokbaot ol man olsem fis, mo hem i askem man ya we i man blong pulum fis we i gat tingting daon blong hem i finis long wok ya blong hem mo blong mekem wan kaen wok blong pulum fis we i bigwan moa—hemia wok blong pulum ol man. Pita, mo brata blong hem Andru, tufala i agri taem Jisas i askem tufala. “Wantaem nomo, tufala i livim ol net blong tufala, tufala i biaen long hem.” (Matyu 4:18-20) Afta Jisas i singaot Jemes mo Jon, taem tufala i stap wokemgud net blong tufala long bot. Hem i askem tufala tu blong tufala i kam man blong pulum ol man olsem fis. ?Tufala i mekem wanem? “Nao wantaem nomo, tufala i girap, tufala i livim papa blong tufala i stap long bot, nao tufala i biaen long Jisas.” (Matyu 4:21, 22) Jisas i soemaot se hem i gat gudhan blong pulum ol man olsem fis. Long taem ya hem i kasem fo man finis.
9, 10. ?Wanem bilif Pita mo ol fren blong hem oli soemaot, mo olsem wanem oli kasem trening long wok blong pulum fis long saed blong speret?
9 Man we i mekem bisnes blong pulum fis i stap salem ol fis, be wan man we i pulum fis long saed blong speret i no save mekem olsem. Taswe, ol disaepol blong Jisas oli soemaot bigfala bilif taem oli livim wok blong olgeta blong folem Jisas. Oli save se wok blong pulum fis long saed blong speret i save karem frut. Jisas i save mekem wora we i no gat fis long hem i kam fulap wetem ol fis. Sem mak, taem oli sakem net blong olgeta i godaon long ol wora olsem nesen blong Isrel, ol disaepol oli save se, God bambae i givhan long olgeta blong oli pulum ol man. Wok blong pulum fis long saed blong speret i stat long taem ya, mo Jeova i stap gohed yet blong mekem se oli stap kasem plante man from.
10 Bitim tu yia finis, Jisas i stap trenem ol disaepol blong hem blong oli pulum ol man olsem fis. Wan taem hem i givim ol oda mo i sanem olgeta oli go fastaem blong prij. (Matyu 10:1-7; Luk 10:1-11) Taem wan man i salem Jisas mo oli kilim hem i ded, ol disaepol oli sek from. ?Ded blong Jisas i mekem se wok blong pulum ol man olsem fis i stop? Ol samting we oli kamaot biaen bambae oli soemaot sipos i olsem no no gat.
Pulum Ol Fis Long Solwora Blong Man
11, 12. ?Afta we hem i laef bakegen long ded, Jisas i wokem wanem merikel we i joen long wok blong pulum fis?
11 Biaen long ded blong Jisas afsaed long Jerusalem mo afta we hem i laef bakegen long ded, ol disaepol oli gobak bakegen long Galili. Long wan taem seven long olgeta oli stap wanples kolosap long Lugun blong Galili. Pita i talem se bambae hem i go pulum fis mo olgeta narawan oli joen wetem hem. Olsem oltaem, oli stap sakem net blong olgeta long naet. Be, long ful naet ya, oli no kasem wan samting. Nao long moning, oli luk wan man i stanap long so mo i singaot long olgeta, i se: “?Ol fren, yufala i pulum sam fis?” Olgeta oli ansa long hem se “No gat.” Nao hem i talem long olgeta, i se: “ ‘Ale, yufala i traem sakem net long raet saed blong bot. Bambae yufala i save pulum sam.’ Ale, oli sakem net ya i go, nao oli no save pulum bakegen, from we i fulap we i fulap long ol fis.”—Jon 21:5, 6.
12 !Wan sapraes long olgeta! Ating ol disaepol oli tingbaot wan merikel bifo long saed blong wok blong pulum fis, taswe wan long olgeta i luksave man ya we i stanap long so. “Man ya blong Jisas we Jisas i laekem hem tumas, hem i talem long Pita, i se ‘!Hemia Masta blong yumi ya!’ Mo taem Saemon Pita i harem tok ya se ‘Hemia Masta blong yumi ya,’ hem i putum klos blong hem bakegen, from we i tekemaot klos blong hem blong i pulum net, nao i jyamdaon long wora. Mo ol narafala man blong Jisas oli tekem bot ya i kam long so, we oli stap pulum net ya we i fulap long ol fis i kam biaen. Olgeta oli no stap longwe long so, i olsem handred mita nomo.”—Jon 21:7, 8.
13. ?Afta we Jisas i go antap long heven, wanem plan blong bigfala wok blong pulum fis i stat?
13 ?Merikel ya i soemaot wanem? I soemaot se wok blong pulum man olsem fis i no finis yet. Jisas i makemaot samting ya taem hem i talem tri taem long Pita—mo tok blong hem i go tu long ol narafala disaepol—blong oli givim kakae long ol sipsip blong hem. (Jon 21:15-17) Yes, wok blong givim kakae long saed blong speret i stap yet long fyuja. Bifo we Jisas i ded, hem i mekem promes ya, se: “Nao bambae ol man oli stap talemaot gud nyus ya se God i king blong olgeta man. Bambae oli talemaot long olgeta ples long wol, blong oli wetnes blong hem long fes blong olgeta man.” (Matyu 24:14) Nao long faswan handred yia profet tok ya i stat blong kamtru. Ol disaepol blong Jisas oli save stat blong sakem net blong olgeta i go long wora we ol man olsem fis i stap long hem, mo ol net ya we bambae oli pulum oli no save emti.—Matyu 28:19, 20.
14. ?Long wanem fasin ol man blong Jisas oli kasem blesing from wok blong pulum man, bifo ol man oli spolem Jerusalem?
14 Bifo we Jisas i go antap long jea blong Papa blong hem long heven, hem i talem long ol man blong hem, i se: “Be taem Tabu Speret i kam kasem yufala, bambae yufala i gat paoa. Nao bambae yufala i mas go talemaot mi long Jerusalem, mo long olgeta ples long Judia mo Sameria, gogo i finisim olgeta ples long wol.” (Ol Wok 1:8) Taem tabu speret i kamdaon long ol disaepol long Pentekos long yia 33 K.T., bigfala wok blong pulum fis long saed blong speret i stat blong kavremap wol. Long dei ya blong Pentekos nomo, oli pulum tri taosen man, mo i no longtaem biaen “namba blong ol man nomo we oli bilif, kolosap i kasem faef taosen man.” (Ol Wok 2:41; 4:4) Namba ya i stap gohed blong gru. Baebol i talem long yumi i se: “Mo oltaem, Hae God i stap joenem plante man moa long kampani blong olgeta, ol man mo woman we oli stap bilif long Jisas.” (Ol Wok 5:14) I no longtaem, ol man Sameria oli lesin long gud nyus, mo afta ol man blong ol narafala nesen tu we oli no sakomsaes. (Ol Wok 8:4-8; 10:24, 44-48) Samwe 27 yia afta long Pentekos, aposol Pol i raet i go long ol Kristin blong Kolosi se gud nyus ya “oli talemaot finis long olgeta man long wol.” (Kolosi 1:23) I klia se ol disaepol blong Jisas oli pulum fis long ol wora we i longwe moa long Galili. Oli sakem net blong olgeta i go long medel blong ol man Jyu we oli stap long ol ples we Rom i rul long hem, mo tu long ol solwora we maet oli ting se i no gat fis long hem olsem ol man we oli no man Jyu oli stap long hem tu. Mo ol net we oli pulum oli fulap long ol man. Long saed blong ol Kristin long faswan handred yia, profet tok blong Jisas long Matyu 24:14 i kamtru bifo we ol man oli spolem Jerusalem long yia 70 K.T.
Fasin Blong Pulum Man Olsem Fis Long “Dei Blong Masta”
15. ?Long buk blong Revelesen, profet tok i tokbaot wanem wok blong pulum fis i stap yet, mo wetaem hem i kamtru?
15 Be, plante wok i stap yet long fyuja. Kolosap long en blong faswan handred yia, Jeova i soemaot ol samting we bambae oli kamtru long “dei blong Masta,” long Jon, laswan aposol blong Jisas we i laef yet. (Revelesen 1:1, 10, NW) Wan impoten samting we hem i luk se, wok ya blong talemaot gud nyus long olgeta ples long wol. Yumi ridim se: “Nao mi luk i gat wan narafala enjel i stap flae antap long skae, i stap talemaot gud nyus ya we i blong oltaem nomo, i no save finis. Enjel ya i stap talemaot gud nyus ya long olgeta man long wol, long olgeta blong evri kala mo laen mo lanwis mo kantri.” (Revelesen 14:6) Enjel i lidim ol man blong Jeova blong oli talemaot gud nyus long olgeta ples we man i stap long hem, i no long ol kantri ya nomo we Rom i stap rulum. Wan bigfala wok olsem blong pulum fis bambae i kamaot long olgeta ples long wol, mo long dei ya blong yumi, yumi luk se vison blong Revelesen i stap kamtru.
16, 17. ?Long taem blong yumi wetaem wok blong pulum fis long saed blong speret i stat, mo olsem wanem Jeova i blesem?
16 ?Olsem wanem wok blong pulum man olsem fis i stap gohed long ol yia biaen long 1900? Fastaem, ol man blong pulum man olsem fis oli no plante. Afta we Faswan Bigfala Faet Blong Wol i finis, i gat samwe long fo taosen man nomo oli stap talemaot gud nyus, olgeta ya oli man mo woman we oli wok strong mo oli haf blong ol Kristin we tabu speret i makemaot olgeta. Oli sakem ol net blong olgeta long ol ples we Jeova i mekem rod i open blong oli go long hem, mo oli pulum plante man. Afta long Namba Tu Bigfala Faet Blong Wol, Jeova i lidim olgeta long nyufala wora olsem ol ples blong pulum man olsem fis long hem. Ol misinari we oli go long Wajtaoa Baebol Skul blong Giled oli lidim wok ya long plante ples. Ol kantri olsem Japan, Itali, mo Spen, we i luk olsem se i no gat fis no man long hem, be oli kasem plante man long olgeta. I no longtaem yumi bin lanem olsem wanem wok blong pulum ol man olsem fis long Is Yurop i karem plante frut.
17 Tede, long plante kantri ol net oli fulap long fis we kolosap oli brobrok. Bigfala frut long wok blong hivimap ol man i mekem se oli stanemap ol nyufala kongregesen mo ol seket. Oltaem oli wokem ol nyufala Haos-Kingdom mo Haos Asembli blong givhan long ol man ya. Mo i mas gat plante elda mo ol man blong givhan blong oli lukaotgud long namba ya we i stap gru. Long 1919 olgeta we oli holemstrong bilif oli statem bigfala wok ya. Taswe, Aesea 60:22 i kamtru. Yumi luk se ‘man ya we i smolwan i kam taosen man finis,’ taem fo taosen man blong pulum man olsem fis long 1919 oli kam plante bitim fo milyan man tede. Mo i no finis yet long ples ya.
18. ?Olsem wanem yumi save folem gudfala eksampel long wok blong pulum fis long saed blong speret long faswan handred yia?
18 ?Wanem mining blong ol samting ya long yumi? Baebol i talem se taem Jisas i askem Pita, Andru, Jemes, mo Jon blong oli kam man blong pulum man olsem fis, “nao oli livim olgeta samting blong olgeta, oli biaen long Jisas, oli man blong hem.” (Luk 5:11) !Wan gudfala eksampel, oli bilif mo oli givim laef blong olgeta blong mekem wok ya! ?Yumi save gat tingting olsem olgeta ya, mo yumi rere blong mekem wok blong Jeova nating se yumi mas livim plante samting? Plante milyan man oli talem se oli save mekem olsem. Long faswan handred yia, ol disaepol blong Jisas oli pulum ol man long olgeta ples we Jeova i letem. Nating se long medel blong ol man Jyu no ol Hiten man, be oli gohed nomo blong mekem wok ya blong pulum fis. I gud yumi tu, yumi prij long olgeta man, yumi no stop no yumi fraet from kala no kastom blong ol man.
19. ?Wanem samting yumi mas mekem sipos ol wora we yumi stap pulum man long hem oli no gat fis?
19 ?Olsem wanem sipos ples we yumi stap wok long hem i no karem frut? Yu no mas letem tingting blong yu i foldaon. Tingbaot, Jisas i fulumap net blong ol disaepol blong hem afta we oli sakem net long ful naet be oli no kasem wan samting. Sem samting i save kamaot long saed blong speret. Wan eksampel, long Aelan ol Wetnes oli holemstrong blong mekem wok olsem long plante yia mo oli no kasem plante frut from. Be, i no longtaem i pas ol samting oli jenis. Long 1991 Yearbook of Jehovah’s Witnesses, ripot i soemaot se long en blong tiokratik yia long 1990, Aelan i kasem ol nyufala namba blong pablisa long ol 29 manis we i pas. Maet ples we yu stap wok long hem bambae i kasem semkaen frut olsem. !From we Jeova i stap letem, yu mas gohed blong pulum ol man olsem fis!
20. ?Wetaem yumi mas joen long wok blong pulum man olsem fis?
20 Long Isrel, ol man blong pulum fis oli stap go blong pulum fis long naet, taem olsem ol man oli stap haremgud mo oli slipgud long bed. Ol man ya blong pulum fis oli no stap go pulum fis long taem we oli laekem, oli goaot long taem ya we oli save se bambae oli kasem plante fis. Sem mak, yumi mas savegud teritori blong yumi blong luksave wetaem i stret blong yumi go pulum fis, olsem se taem bighaf blong ol man oli stap long haos blong olgeta mo oli save lesin long yumi. Maet long aftenun bifo we san i godaon, no long ol wiken, no long sam narafala taem bakegen. Nating se yumi jusum wanem taem blong mekem wok ya, be yumi mas traehad blong faenem ol man we hat blong olgeta i gud.
21. ?Wanem samting yumi mas tingbaot sipos eria blong yumi oli stap wokem plante taem?
21 ?Olsem wanem sipos yumi stap wokem eria blong yumi oltaem? Ol man we oli mekem bisnes blong pulum ol fis long wol oli stap toktok smol se i no moa gat ples blong go pulum fis long hem. ?Be olsem wanem, ples we yumi stap pulum fis long saed blong speret long hem i finis? !No gat! Plante ples i stap karem plante frut nating se yumi wok long hem plante taem. Sam oli karem gudfala frut moa from we yumi stap wokem oltaem. Be, taem yumi visitim ol haos oltaem, sipos i no gat man long haos yumi mas makem haos ya mo visitim olgeta biaen. Lanem ol defren rod blong toktok. Mo tingbaot se bambae i no longtaem wan long yumi bambae i kam bakegen, taswe yu no tekem tumas taem blong hem sipos hem i lesin long yu no yu mekem man blong haos i harem nogud. Traem blong prij long rod mo tekem jans blong prij. Sakem ol net blong yu long saed blong speret long evri jans we yu gat mo long evri rod we yu save mekem.
22. ?Wanem bigfala wok we yumi stap haremgud long hem naoia?
22 Tingbaot, long rod ya blong pulum man olsem fis, man blong pulum fis mo fis tufala i save kasem blesing from. Sipos ol man we yumi kasem oli stanap strong, bambae oli save kasem laef blong olwe. Pol i leftemap tingting blong Timote, i se: “Oltaem yu mas mekem fasin ya, nao bambae yu save sevem yu, wetem ol man we oli stap lesin long yu.” (1 Timote 4:16) Jisas nao i faswan blong trenem ol man blong hem long fasin blong pulum fis long saed blong speret, mo hem i stap lukaot long wok ya yet. (Lukluk Revelesen 14:14-16.) !Hemia wan bigfala jans we yumi gat blong stap wok aninit long hem blong mekem wok blong pulum ol man olsem fis! I gud yumi gohed oltaem blong sakem ol net blong yumi taem Jeova i letem. I no gat bigfala wok we i bitim wok blong pulum man.
?Yu Yu Tingbaot?
◻ ?Wanem wok Jisas i trenem ol man blong hem blong oli mekem?
◻ ?Olsem wanem Jisas i soemaot se wok blong pulum fis long saed blong speret i no finis yet taem hem i ded?
◻ ?Olsem wanem Jeova i blesem wok blong pulum fis long saed blong speret long faswan handred yia?
◻ ?Olsem wanem wok blong pulum fis i kasem frut long “dei blong Masta”?
◻ ?Olsem wanem yumi wanwan i save kasem moa frut long wok blong yumi olsem ol man blong pulum man olsem fis?
[Tok Blong Pija Long Pej 11]
Afta we Jisas i laef bakegen long ded, ol aposol blong hem oli mekem wok blong pulum fis olsem man i kam bigwan moa