Pulum Fis Olsem Man Long Olgeta Ples Long Wol
“Mi mi no gat raet blong tok flas from we mi stap talemaot gud nyus blong Kraes. Hemia i wok blong mi we mi mas mekem. Sipos mi no moa talemaot gud nyus ya, hemia bigfala trabol blong mi ya, bambae mi harem nogud tumas from.”—1 KORIN 9:16.
1, 2. (a) ?Hu oli mekem wok ya we i stap long 1 Korin 9:16, mo from wanem yu ansa olsem? (b) ?Wanem wok ol Wetnes blong Jeova oli agri blong mekem?
?LONG ol yia we oli ron biaen long 1900, hu olgeta we oli mekem wok ya we Pol i stap tokbaot antap? ?Hu ya olgeta milyan man long wol we oli stap go blong pulum ol man mo ol woman we “oli luksave se oli nidim ol samting long saed blong speret”? (Matyu 5:3, NW) ?Hu olgeta we oli save go long kalabus mo oli save ded, mo oli stap harem nogud long plante kantri, from we oli mekem oda ya blong Kraes long Matyu 24:14 i kamtru?
2 Ol store we oli stap oli soemaot se: ol Wetnes blong Jeova oli mekem olsem. Long las yia nomo bitim fo milyan Wetnes oli stap go long ol haos wanwan blong “talemaot gud nyus” long 211 kantri mo teritori mo long bitim 200 lanwis. Olgeta ya oli no wan kampani blong ol spesel misinari we oli langud. No gat, ol Wetnes blong Jeova oli harem se hemia i wok blong olgeta blong prij mo tijim ol man long ol haos wanwan mo long evri jans we oli gat blong mekem olsem. ?From wanem oli harem se oli mas talemaot bilif blong olgeta long ol narafala man? From oli luksave se i gat wok i stap long olgeta we oli kasem save.—Esikel 33:8, 9; Rom 10:14, 15; 1 Korin 9:16, 17.
Wok Blong Pulum Man Olsem Fis, Hem i Wan Bigfala Wok
3. ?Wok ya blong pulum man olsem fis i mas bigfala olsem wanem?
3 Bigfala wok ya blong pulum man olsem fis i no gat mak blong stopem, olsem ol reva no ol wora no solwora we oli stap gat prapa mak blong olgeta. Be, olsem Jisas i talem, wok ya i mas kasem “olgeta man long wol.” (Mak 13:10) Bifo we Jisas i go antap long Papa blong hem, hem i talem long ol disaepol blong hem, i se: “Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Speret. Mo yufala i mas tijim olgeta blong oli folem olgeta tok ya we mi mi givim finis long yufala. Mo yufala i mas save, bambae mi mi stap wetem yufala oltaem, gogo wol ya i finis.”—Matyu 28:19, 20.
4. (a) ?Wanem samting we i mekem ol man Jyu we ol folem Jisas oli sek? (b) ?Wanem tingting blong ol Wetnes blong Jeova long wok blong prij?
4 Long ol man Jyu we oli folem Jisas, oda ya we Jisas i givim maet i mekem olgeta oli sek. Hem i talem long ol disaepol we oli man Jyu se naoia bambae oli mas go long ol Hiten man we oli “doti” long olgeta nesen mo tijim olgeta. Oli mas jenisim tingting blong olgeta blong agri long oda ya mo mekem. (Ol Wok 10:9-35) Oda ya i klia nomo. Jisas i talem wan parabol long olgeta se “garen ya, hemia wol ya.” Taswe, ol Wetnes blong Jeova tede oli luk fulwol ya olsem ples we oli mas pulum fis long hem. I no save gat tabu olsem “20 kilomita blong solwora” we i save blokem oda ya we God i givim long olgeta. Samtaem oli mas waes blong mekem wok ya long ol kantri we oli no letem ol man oli fri long saed blong wosip. Nating se i olsemia, be oli harem se hem i impoten blong oli pulum man olsem fis. ?From wanem? From ol samting we oli stap kamaot long wol mo ol profet tok blong Baebol we oli stap kamtru oli soemaot se yumi stap long laswan haf long bigfala wok ya blong pulum man olsem fis.—Matyu 13:38; Luk 21:28-33.
Gohed Long Bigfala Wok Blong Pulum Fis
5. ?Wanem kaen man oli lesin long bigfala wok ya blong pulum man olsem fis?
5 Plante long ol Kristin we God i makemaot olgeta blong oli kasem Kingdom oli bin “pulum olgeta olsem fis” oli aot long ol nesen bifo long 1935, blong fulumap namba blong olgeta. Taswe, stat long 1935, ol Wetnes blong Jeova oli stap lukaotem ol man we oli gat fasin daon, “ol man we tingting blong olgeta i stap daon” we “bambae oli tekem graon ya i blong olgeta.” (Ol Sam 37:11, 29) Olgeta ya oli man we “oli sore mo oli krae from olgeta rabis fasin we ol man oli mekem.” Olgeta oli stap sapotem rul blong Kingdom blong God naoia bifo we “bigfala trabol” i spolem rabis fasin blong Setan mo ol nogud fasin long wol ya mo ol man we oli stap mekem wosip long Setan oli go long “bigfala faea” blong oli lus blong olwe.—Esikel 9:4; Matyu 13:47-50; 24:21.
6, 7. (a) ?Wanem samting i kamaot long 1943 blong givhan long wok blong prij? (b) ?Wanem frut i kamaot from?
6 ?Olsem wanem, bigfala wok blong pulum fis i gohed gud? I gud yumi luk ol samting we oli bin kamaot finis. Bifo long 1943, taem Namba Tu Bigfala Faet Blong Wol i stap gohed yet, ol Kristin brata we tabu speret i makemaot olgeta we oli stap long hedkwota blong ol Wetnes blong Jeova long Bruklin, Nyu Yok, oli luksave se wan bigfala wok blong pulum man olsem fis i mas kamaot yet. ?Nao, oli mekem wanem?a—Revelesen 12:16, 17.
7 Long 1943 Watchtower Sosaete i stanemap wan skul blong misinari we nem blong hem Giled (Hibru, “Bigfala Wetnes”, Jenesis 31:47, 48) we i stat blong trenem handred misinari evri sikis manis blong oli save sanemaot olgeta olsem ol man blong pulum fis long olgeta ples long wol. Long taem ya, i gat 126,329 Wetnes nomo we oli stap mekem wok blong pulum ol man olsem fis long 54 kantri. !Ten yia afta namba ya i gru kwiktaem i kasem 519,982 Wetnes long 143 kantri! Tru ya, Giled Skul i trenem ol man mo ol woman we oli no save fraet blong pulum ol man olsem fis, oli rere blong go long ol ples we i defren long ples blong olgeta mo blong oli langud blong pulum fis long ol nyufala ples ya. From samting ya, plante taosen man we hat blong olgeta i stret oli lesin long olgeta. Ol misinari ya, mo ol Wetnes long ples we oli stap long hem we oli wok tugeta, oli putum wan faondesen blong wan gudfala namba blong ol man we i stap gru naoia.
8, 9. (a) ?Ol eksampel blong hu yumi save makem long saed blong misinari wok? (b) ?Olsem wanem ol misinari oli luk frut we i kamaot long garen blong olgeta? (Lukluk tu long 1992 Yearbook of Jehovah’s Witnesses.)
8 Plante man we oli stap holemstrong we oli kamaot long Giled bifo oli stap wok yet long ol ples we oli sanem olgeta i go long hem, nating se naoia oli bitim 70 no 80 yia finis. Eksampel ya i soemaot samting we i stap kamaot long laef blong ol misinari ya, hemia, Eric Britten we i gat 82 yia mo woman blong hem, Christina, tufala i tren long namba 15 klas blong Giled skul long 1950 mo naoia oli stap wok yet long Brasil. Taem tufala i go blong wok long Brasil, i gat smol namba nomo blong ol Wetnes we i no bitim 3,000 long kantri ya. !Naoia i gat bitim 300,000! Tru ya, ‘hemia we i olsem nating nomo i kam wan strongfala nesen’ long Brasil, from we wok blong pulum man olsem fis i karem frut.—Aesea 60:22.
9 ?Olsem wanem long ol misinari long Afrika? Plante long olgeta oli jenisim fasin blong laef blong olgeta we i defren olgeta blong oli save laef olsem ol man Afrika mo oli laekem ol man long Afrika. Olsem ol brata ya, John mo Eric Cooke mo ol waef blong tufala Kathleen mo Myrtle, we naoia oli stap wok long Saot Afrika. John mo Eric tufala i finis long namba eit klas long Giled long 1947. Tufala i wok long ol kantri olsem Angola, Simbabwe, Mosambik, mo Saot Afrika. Sam misinari oli ded long Afrika from ol sik, mo sam narafala oli ded from faet mo from ol man oli ronem olgeta, olsem Alan Battey mo Arthur Lawson, tufala i ded long faet we i kamaot i no longtaem long Laebiria. Be, ol wora long Afrika oli karem plante fis. Naoia i gat bitim 400,000 Wetnes oli stap long bigfala ples ya.
Evriwan i Joen
10. ?From wanem mo olsem wanem ol paenia oli mekem wan gudfala wok?
10 Be, i mas klia se taem ol namba blong ol misinari long narafala ples i kasem sam taosen, ol man ples pablisa mo ol paeniab oli kam plante taosen. Oli mekem bigfala wok blong prij long olgeta ples long wol. Long 1991 i gat bitim 550,000 medel namba blong ol paenia mo ol man blong goraon. Hemia wan gudfala namba taem yumi tingbaot ol Wetnes ya we oli holemstrong mo oli traehad blong joen long bigfala wok blong pulum man olsem fis, oli mekem 60 go kasem 140 haoa long wok blong prij long evri manis. Plante oli traehad mo oli spenem olting blong olgeta blong mekem wok ya. ?From wanem? From we oli laekem Jeova, God blong olgeta wetem ful hat, tingting, sol, mo paoa blong olgeta mo oli laekem ol man we oli stap raonabaot long olgeta olsem we oli laekem olgeta nomo.—Matyu 22:37-39.
11. ?Wanem samting i soemaot se speret blong Jeova i wok long medel blong ol man blong hem?
11 ?Olsem wanem long tri mo haf milyan narafala Wetnes we oli no prij fultaem be oli givim taem blong olgeta blong mekem wok blong Jeova, taem oli gat jans blong mekem? Sam long olgeta ya oli waef, mo tu ol mama we oli stap lukaot long ol smol pikinini blong olgeta, be oli givim taem blong olgeta blong mekem bigfala wok blong pulum man olsem fis. Plante hasban no papa oli wok fultaem blong kasem mane. Be, oli tekem taem long ol wiken mo ol naet blong tijim trutok long ol man we oli no bin save olgeta bifo. Mo tu i gat bigfala hif blong ol man mo woman we oli no mared mo ol yangfala we oli joen long wok blong prij mo ol man oli laekem trutok from gudfala fasin blong olgeta. ?I gat narafala skul we i gat bitim fo milyan man blong hem oli stap wok fri nomo long evri manis blong talemaot gud nyus blong Kingdom? No gat. !I klia nomo se speret blong Jeova i stap wok!—Ol Sam 68:11; Ol Wok 2:16-18; lukluk Sekaraea 4:6.
Ol Samting Blong Givhan Blong Mekem i Gru
12. ?From wanem mo hamas man oli lesin long trutok?
12 Bigfala wok blong prij i karem plante frut long evri yia. Long 1991 bitim 300,000 nyufala Wetnes oli baptaes taem oli draon fulwan long wora. !Namba ya i stret olsem bitim 3,000 kongregesen we oli gat 100 Wetnes oli stap long olgeta wanwan! ?Olsem wanem samting ya i save kamaot? Yumi tingbaot tok blong Jisas we i talem, i se: “I no gat man i save kam long mi, sipos Papa blong mi we i sanem mi, hem i no pulum hem i kam. . . . Ol profet bifo oli bin raetem tok se ‘God ya bambae i tijim olgeta.’ Man we i harem tok blong Papa blong mi mo i lan long hem, hemia man we i save kam long mi.” Taswe, i no from hadwok blong man nomo se bigfala wok blong pulum man olsem fis i mekem man i lesin. Jeova i lukluk hat blong man mo i pulum hem i kam kolosap long hem, hemia olgeta we oli stret long lukluk blong hem.—Jon 6:44, 45; Matyu 10:11-13; Ol Wok 13:48.
13, 14. ?Wanem gudfala tingting we plante Wetnes oli soemaot?
13 Be, ol man blong pulum fis oli tul we Jeova i yusum blong pulum ol man i kam long hem. Taswe, i impoten se oli mas soem gudfala fasin long ol man long teritori we oli stap mekem wok blong pulum fis. I gud tumas blong luk se plante long olgeta oli lesin long tok blong Pol long ol man Galesia, i se: “Bambae yumi no kam slak blong mekem ol gudfala fasin, from we sipos yumi no lego, bambae long stret taem blong hem, yumi save kasem kakae from ol hadwok ya blong yumi.”—Galesia 6:9.
14 Plante Wetnes we oli holemstrong oli prij long plante yia, taem oli stap luklukgud ol samting we oli kamaot long wol. Oli bin luk rul blong Nasi, Fasis, mo ol narafala kaen gavman we oli stap fosem ol man, oli stanap mo oli foldaon bakegen. Sam long olgeta oli luk plante faet we oli kamaot biaen long 1914. Oli bin luk ol lida blong wol we oli trastem Ligofnesen mo Yunaeted Nesen. Oli bin luk ol man oli blokem wok blong Jeova mo biaen oli luk se long plante kantri wok blong Jeova i gohed bakegen. Ol Wetnes blong Jeova oli no stop blong mekem gudfala wok blong pulum ol man olsem fis taem oli laef tru long ol samting ya. !Hemia wan gudfala store long saed blong fasin fasgud long God!—Matyu 24:13.
15. (a) ?Wanem samting i givhan long yumi blong jenisim fasin blong laef blong yumi blong mekem wok long olgeta ples long wol? (b) ?Olsem wanem ol buk oli givhan long wok long ples blong yu?
15 I gat ol narafala samting we oli givhan blong mekem namba blong ol Wetnes i gru olsem long olgeta ples long wol. Wan se gudfala tingting blong ol man blong pulum fis long saed blong ol nid blong teritori. Ol Wetnes blong Jeova oli kasem moa save long tingting blong ol man we oli kam long kantri wetem defren kastom, skul, mo ol lanwis. Mo ful kongregesen long wol i givhan bigwan blong mekemrere ol Baebol mo ol buk we oli tokbaot Baebol long bitim 200 lanwis. Baebol ya New World Translation of the Holy Scriptures, we oli wokem fulwan no haf nomo, i stap long 13 lanwis, olsem lanwis Jek mo Slovak. Buklet ya !Yu Yu Save Harem Gud Blong Olwe Long Wol! naoia i stap long 198 lanwis, olsem lanwis blong ol man Albania go kasem lanwis olsem Zulu. Mo oli wokem 72 milyan kopi blong hem. Buk ya Man We i Hae Moa Long Ol Narafala Man, naoia oli wokem i kam long 69 lanwis. Buk ya Mankind’s Search for God, naoia oli tanem i wokem long 29 lanwis, buk ya i tijim ol man blong oli luksave stat mo ol bilif blong ol bigfala skul blong wol mo i halpem bigfala wok blong pulum man olsem fis.
16. ?Sam man oli mekem wanem blong givhan long ol ples we oli gat nid?
16 ?Wanem narafala samting we i mekem bigfala wok blong pulum fis i gohed? Plante taosen man oli rere blong folem “man Masedonia i stap stanap, i stap askem” olgeta. Pol i rere blong kamaot long Esia Maena blong go long Masedonia long Yurop taem God i singaotem hem, sem mak plante Wetnes oli go long ol narafala ples mo ol teritori we i gat bigfala nid blong talemaot Kingdom, mo tu taem oli nidim ol elda mo ol man blong givhan. Oli mekem olsem ol man blong pulum fis taem oli faenem se i no moa gat fis long wora we oli stap pulum fis long hem, oli go long ol wora we i no gat plante bot long hem mo i gat plante fis long hem.—Ol Wok 16:9-12; Luk 5:4-10.
17. ?Wanem eksampel yumi gat long ol man we oli lesin long ‘man Masedonia we i stap askem’ olgeta?
17 I no longtaem skul blong Giled i tekem sam studen long ol defren kantri long Yurop we oli lanem Engglis mo oli rere blong mekem wok long ol narafala kantri mo long ol ples we fasin blong laef i defren. Sem mak, plante brata we oli no mared oli go long Skul Blong Trenem Ol Man Blong Givhan Mo Ol Elda blong oli trengud long tu manis mo biaen oli sanem olgeta i go long ol narafala kantri blong givhan long ol kongregesen mo ol seket. Naoia i gat ol ples blong pulum fis long hem long ol teritori we oli open naoia long Is Yurop mo long ol ples ya we Rasia i stap rulum bifo.—Lukluk Rom 15:20, 21.
18. (a) ?From wanem ol paenia oli gat frut oltaem long wok blong olgeta? (b) ?Olsem wanem oli save givhan long ol narafala man insaed long kongregesen?
18 Narafala samting blong givhan long wok blong pulum fis long olgeta ples long wol hemia Paenia Skul, hemia skul we ol fultaem paenia oli stap go long hem. Long tu wik oli stadigud long buk ya Shining as Illuminators in the World (Saenaot Olsem Ol Laet Long Wol), buk ya oli wokem blong trenem ol paenia blong oli gat gudhan long minista wok blong olgeta taem oli stadi long ol haf ya olsem “Lukaot Rod Blong Lav,” “Folem Eksampel Blong Jisas,” mo “Kamgud Long Fasin Blong Tijim Man.” !Ol kongregesen oli haremgud blong gat ol man ya we oli gat gudhan long wok blong pulum ol man olsem fis long ol haos wanwan we oli save trenem plante man long bigfala wok ya blong pulum fis!—Matyu 5:14-16; Filipae 2:15; 2 Timote 2:1, 2.
?Yumi Save Kamgud Moa?
19. ?Olsem wanem yumi save kamgud moa long minista wok blong yumi olsem aposol Pol?
19 Olsem Pol, yumi wantem tingbaot gud saed blong ol samting, mo yumi stap lukluk i go fored. (Filipae 3:13, 14) Hem i save laef olsem ol defren kaen man mo long ol ples blong olgeta. Hem i save olsem wanem blong faenem rod blong toktok mo olsem wanem blong askem mo givim ansa long ol fasin blong ol man ples mo folem kastom blong olgeta. Yumi save statem ol Baebol stadi sipos yumi wekapgud blong luksave fasin blong man taem hem i harem mesej blong Kingdom mo jenisim tok blong yumi blong i stret wetem ol nid blong ol man blong haos. Yumi gat plante samting blong givhan long yumi blong mekem Baebol stadi, taswe yumi save givim wan samting we i stret long wan man olsem. Fasin blong luksave wanem i stret long ol man wanwan mo fasin blong wekapgud, tufala i impoten tu blong mekem wok blong pulum fis i karem frut.—Ol Wok 17:1-4, 22-28, 34; 1 Korin 9:19-23.
20. (a) ?From wanem wok blong pulum ol man olsem fis i impoten naoia? (b) ?Wanem prapa wok blong yumi wanwan naoia?
20 ?From wanem bigfala wok blong pulum fis i impoten naoia? From ol samting we oli stap kamaot naoia oli soemaot se ol profet tok blong Baebol oli stap kamtru, mo i klia se wol ya blong Setan i stap go blong kasem nogud en. ?From samting ya, yumi ol Wetnes blong Jeova yumi mas mekem wanem? Trifala haf blong stadi long magasin ya oli makem wok blong yumi blong yumi gat gudhan blong kasem frut long wok ya mo yumi strong long wok blong pulum man olsem fis long ples we yumi stap long hem. Yumi gat ol gudfala tok long Baebol se Jeova bambae i no fogetem gudfala wok we yumi stap mekem blong pulum man olsem fis. Pol i talem se: “Oltaem God i stap mekem i stret nomo. Mo hem i no save fogetem ol wok ya we yufala i mekem. Hem bambae i stap tingbaot we yufala i laekem hem tumas, mo we yufala i givhan finis long ol narafala Kristin man, mo we yufala i stap givhan long olgeta yet. Mo mifala i wantem tumas we tingting blong yufala bambae i stap strong oltaem, nao bambae yufala i save kasem ol samting ya we yufala i putum tingting blong yufala i stap strong long hem.”—Hibrus 6:10-12.
[Ol futnot]
a Lukluk Revelation—Its Grand Climax At Hand! pej 185 mo 186, we Watchtower Bible and Tract Society of New York, Inc., i wokem.
b “Paenia pablisa . . . i wan Wetnes blong Jeova we i wok fultaem.”—Webster’s Third New International Dictionary.
?Yu Yu Tingbaot?
◻ ?From wanem ol Wetnes blong Jeova oli luk fulwol olsem ples blong mekem wok blong pulum man olsem fis long hem?
◻ ?Olsem wanem Giled skul i givim blesing long wok blong pulum fis?
◻ ?Wanem ol samting we oli givhan blong mekem ol Wetnes blong Jeova oli gat gudhan?
◻ ?Olsem wanem yumi wanwan yumi save kamgud moa long Kristin minista wok blong yumi?
[Bokis blong pija long pej 20]
FRUT WE I KAMAOT FROM WOK BLONG PULUM FIS LONG OLGETA PLES LONG WOL
Yia Ples Ol Wetnes
1939 1,1 71,509
1943 54 126,329
1953 143 519,982
1973 208 1,758,429
1983 205 2,652,323
1991 211 4,278,820
[Tok Blong Pija Long Pej 21]
Wok blong wetnes i stap gohed yet long medel blong ol man blong pulum fis long Galili