Ripot Long Wok Blong Kingdom

Oli Letem Laet Blong Olgeta i Saenaot Long India

LONG India, 11,524 hapi Wetnes oli stap talemaot gud nyus blong Kingdom. (Matyu 24:14) Ol 1,066 man we oli tekem baptaes long tiokratik yia 1991 oli stap talemaot Kingdom, oli stap letem laet blong olgeta i saenaot long ol narafala. !Olgeta oli glad tumas blong luk we 28,866 man oli kam long Memoriol blong ded blong Kraes!

◻ Plante man oli harem mesej blong Kingdom fastaem taem wan man i tekem jans blong prij long olgeta. Eksampel, wan Wetnes i storeyan long saed blong Kingdom long ol man we hem i wok wetem olgeta, we oli man blong wokem haos. Wan man we i wok wetem hem hem i laekem ol samting we hem i harem, mo hem i letem laet blong hem i saenaot long ol famle blong hem mo ol fren blong hem. Olgeta tu oli glad blong pasem gudfala mesej blong Kingdom i go long ol narafala. Ripot i talem se afta we sam yia i pas, ‘bitim 30 man oli kam long trutok.’ Jeova i blesem brata ya mo ol nyufala brata blong hem long saed blong speret from we oli letem laet blong olgeta i saenaot.

◻ Wan yangfala brata long narafala kongregesen i letem laet blong hem i saenaot taem hem i tekem jans blong prij long ol studen long skul. Sam long olgeta oli intres long hop blong Kingdom, mo plante taem hem i eksplenem Baebol long olgeta go kasem medel naet. Wan long olgeta we hem i Katolik, hem i tekem disisin blong hem long saed blong trutok nating we pris i givim woning long hem se bambae hem i kasem strong trabol sipos i gohed blong joen wetem Wetnes ya. Be studen ya i luksave se hem i stap lanem trutok blong Baebol from ol Wetnes, mo hem i gohed blong kasem ol save ya. Biaen hem i tekem baptaes mo naoia hem i olsem wan man blong givhan long kongregesen. !Hem i haremgud tumas long hop we hem i kasem from nambawan laet blong trutok!​—⁠Rom 12:⁠12.

◻ Narafala we hem i lesin long yangfala Wetnes ya ol man oli savegud hem, hem i no bilif long God, mo hem i stap laf long olgeta we oli stap talem se God i stap. Be wan dei hem tu i joen long storeyan blong olgeta mo hem i askem plante kwestin. Hem i sapraes taem hem i kasem ol stret ansa long ol kwestin blong hem mo hem i luksave se Baebol hem i Tok blong God. Hem i gohed gud long save blong hem long saed blong Baebol mo biaen hem i tekem baptaes. Papa blong hem we hem i Hindu hem i agensem hem, hem i sakemaot hem long haos. Be yangfala man ya i stanap strong long trutok mo hem i kasem blesing taem tu stret brata blong hem mo tu fren blong hem oli kam long trutok mo tekem baptaes. Wan brata blong hem naoia hem i wok long hedkwota long India.

◻ Wan lida blong ol studen tu i joen long ol storeyan wetem yangfala Wetnes ya. Hem i stap smok mo dring alkol bitim mak. Wan taem, hem i wantem faetem tu studen we tufala i lanem trutok from Wetnes ya. Tufala i bin akseptem trutok, nao tufala i no wantem joen long wan ‘straek’ long kolej mo tufala i no wantem givim blad long wan kampein we lida blong olgeta i ogenaesem. Naoia yangfala man ya i glad blong karem laet olsem wan Wetnes blong Jeova.

◻ Studen we fastaem hem i letem laet blong hem i saenaot hem i givhan long 15 fren blong hem blong givim laef blong olgeta long Jeova mo tekem baptaes from we hem i tekem jans blong prij long olgeta.

I gud tumas blong luk se long bigfala kantri ya plante man oli stap akseptem hop blong Baebol long saed blong nyufala wol blong God mo oli stap joen long bigfala famle long olgeta ples long wol we Jeova God i stap hivimap blong laef blong olwe aninit long Kingdom blong hem.