Toktok Long Narafala Lanwis—Fasin Ya i Gru Moa
WAN man we i toktok long wan narafala “lanwis we ol man oli no save long hem,” i talem se, “Wan paoa i kontrolem tang blong mi mo ol tok oli kam kamaot olsem reva. !Mi glad tumas from! Mi harem olsem we mi klin olgeta. Stat long taem ya mi mi defren.”
Hemia nao tok blong wan man we hem i fastaem blong hem blong tok long wan narafala “lanwis we ol man oli no save long hem.” Maet sam man oli save askem se, ‘?Hem i olsem wanem?’ Hem i tokbaot wan fasin we ol man oli stap mekem no hem i wan bilif blong sam jyos we i gat ol man mo ol woman oli stap talem se tabu speret blong God i givim paoa long olgeta blong oli toktok long narafala lanwis no ol lanwis we oli no save, oli defren olgeta.
Hem i wan samting we i gru moa insaed long ol skul. Bifo ol man oli ting se fasin ya i stap kamaot long Pentekostal jyos nomo, be naoia fasin ya blong toktok long narafala lanwis i bitim ol skul we i stap long hem fastaem i go long ol narafala skul tu olsem Baptis, Episkopalian, Luteran, Metodis, Presbyterian, mo Roman Katolik. Sam man oli talem se taem man i stap mekem samting ya hem i save haremgud bitim mak, muvmuf olbaot, hem i save luk olsem we i stap drim no i stap aninit long paoa blong wan drag we i kwaetem hem. Sam man oli talem se hem i wan ekspiryens we man i no save kontrolem ol filing mo tingting blong hem. Fasin blong tok long narafala lanwis i blong pulum man from i olsem we man i save gat wan narakaen paoa i haed long hem.
?From Wanem Ol Man Oli Wantem Toktok Long Narafala Lanwis?
Cyril G. Williams i talem long buk blong hem Tongues of the Spirit se, maet i gat wan “filing we man i no kasem wan mak i joen wetem tingting blong wantem ‘toktok long narafala lanwis.’ ” Hem i tokbaot fasin ya blong toktok long narafala lanwis olsem wan ‘meresin’ we i gat “paoa blong mekem man i no moa wari” mo “mekem tingting blong man i stap kwaet.” Ol trabol insaed long jyos, wari long tingting, man i no kasem mak long wok blong hem, fasin soasore from ded, ol rao long famle, no sik insaed long famle, oli samting blong mekem man i toktok long fasin ya.
Sem mak, John P. Kildahl i talem long buk blong hem The Psychology of Speaking in Tongues se, “wari i wan samting we man i mas gat fastaem blong hem i save toktok long narafala lanwis.” Sam man we oli mekem dip stadi long fasin ya mo oli toktok wetem sam man we oli toktok long narafala lanwis, oli faenemaot se “bitim 85% long ol man we oli stap toktok long narafala lanwis oli bin wari long laef blong olgeta, nao biaen oli toktok long narafala lanwis.” Eksampel, wan mama i wantem toktok long narafala lanwis blong hem i save prea from pikinini boe blong hem we i kasem sik ya kansa. Wan man i no save mekem disisin long wan wok we oli wantem givim long hem ale hem i stat blong toktok long narafala lanwis. Wan woman i stat blong toktok long narafala lanwis afta long wan wik we hasban blong hem i joen long wan ogenaesesen blong givhan long ol man blong winim trabol blong alkol.
?Man i Harem Olsem Wanem?
Wan narafala man we i fastaem blong hem blong toktok long narafala lanwis i talem se: “Mi harem olsem ful bodi blong mi i gat faea i laet long hem, nao i olsem mi fiva mo mi swet bigwan mo bodi blong mi i seksek mo ol han mo leg blong mi oli kam slak.” Oltaem fasin blong toktok long narafala lanwis i joen wetem sam fasin we oli narakaen mo sam man oli fraet tumas from. Eksampel, “kolosap wan gel i ded from spet blong hem i blokem rod blong pulum win, taem hem i slip long wan jea, nek blong hem i stap long bak blong jea mo leg blong hem i stap long floa, ol leg blong hem oli stret nomo.” Long wan miting blong jyos “wan man i jyam i tantanem hem wan, stat long wan en blong jyos go kasem narasaed long en blong hem.”
Tija William J. Samarin i raetem se, “Long sam man, fasin blong toktok long narafala lanwis i olsem wan mak we hem i kasem blong hem i save baptaes long tabu speret.” Sipos oli no mekem samting ya, “oli harem se oli no naf.” Oli gat tingting tu se “samting ya i olsem wan ansa long prea blong olgeta mo wan samting blong soemaot se God i laekem olgeta mo i akseptem olgeta.” Sam narafala man oli talem se fasin ya i mekem se oli haremgud, oli glad, oli gat pis, mo oli “haremsave paoa” mo “ol man oli save tinghae long olgeta.”
?Fasin blong toktok olsem i soemaot se hem i wok blong tabu speret? ?Ekspiryens olsem i makemaot man se hem i trufala Kristin? ?Tede fasin blong toktok long narafala lanwis i haf blong wosip we God i laekem? Man i mas tingtinggud long ansa blong ol kwestin ya. ?From wanem? From we yumi wantem se God i glad mo i blesem wosip blong yumi.