?Paoa Blong Toktok Long Narafala Lanwis i Haf Blong Tru Kristin Wosip?
AFTA we Bill mo sikis narafala man oli stap fored long wan man we i stap prij kolosap long olta blong jyos, Bill i talem se: “Taem mi stap lesin long hem i prea long narafala lanwis, mi harem olsem we i gat paoa blong lektrik antap long skae.” ?Ol ekspiryens olsem oli laenap wetem wok blong tabu speret long faswan handred yia? ?Oli makemaot skul ya blong Baebol? Yumi save faenem ol gudfala ansa taem yumi makemgud ol vas long Baebol.
Baebol i soemaot klia se merikel i save kamaot from paoa blong tabu speret bifo sipos wan long ol 12 aposol no aposol Pol i stap long taem ya. Faswan long ol trifala taem we ol man oli toktok long narafala lanwis i hapen long ol 120 disaepol blong Kraes we oli hivap long Jerusalem long Pentekos long yia 33 K.T. (Ol Wok 2:1-4) Tri mo haf yia biaen, taem wan grup blong ol man Itali we oli no sakomsaes oli stap lesin long Pita i toktok, nao oli kasem tabu speret mo oli stat blong “toktok long ol narafala lanwis, oli stap leftemap nem blong God.” (Ol Wok 10:44-48) Mo 19 yia biaen long Pentekos, kolosap long 52 K.T., Pol i stap toktok long wan grup blong ol man Efesas mo hem i putum han blong hem long ol 12 disaepol. Nao olgeta tu oli “tok long ol narafala lanwis, mo oli stap talemaot ol tok we God i givim long olgeta.”—Ol Wok 19:6.
?From Wanem i Gat Paoa Blong Toktok Long Narafala Lanwis?
I no longtaem bifo we Jisas i go antap long heven, hem i talem long ol man we oli stap folem hem, se: “Be taem Tabu Speret i kam kasem yufala, bambae yufala i gat paoa. Nao bambae yufala i mas go talemaot mi long Jerusalem, mo . . . gogo i finisim olgeta ples long wol.” (Ol Wok 1:8) Jisas i soemaot olsem wanem bambae oli mekem bigfala wok ya—tabu speret bambae i givhan long olgeta.
Bifo i no gat ol samting we man i wokem olsem tede we yumi save yusum blong sanem ol mesej long olgeta ples long wol long plante lanwis. Bifo ol man oli mas mekem gud nyus i go long olgeta long fasin blong toktok nomo, from samting ya paoa blong toktok long narafala lanwis bambae i givhan bigwan long olgeta. Olsem long Jerusalem long Pentekos yia 33 K.T. ol Kristin ya long faswan handred yia oli prij long ol man Jyu mo ol man narafala ples we oli joen wetem ol man Jyu blong wosip, ol man blong Patia, Midia, Elam, Krit, Arebia, ol man blong Mesopotemia, Judia, Kapadosia, Pontas, mo long Esia, mo tu ol strenja we oli kam long Rom, oli stap harem ol “bigbigfala wok ya we God i mekem” long prapa lanwis blong olgeta mo oli kasem save long ol tok we oli harem. Kwiktaem tri taosen man oli kam man blong bilif.—Ol Wok 2:5-11, 41.
Ol man oli no luksave se fasin blong toktok long narafala lanwis i wan long ol naen wok blong tabu speret we aposol Pol i tokbaot long leta blong hem we hem i sanem long ol Kristin long Korin. Nating se Pol i tingbaot fasin ya blong toktok long narafala lanwis i olsem we i daon moa long ol narafala paoa we tabu speret i givim, fasin ya i impoten tumas long ol Kristin bifo blong talemaot gud nyus blong Kingdom blong God we i stap long heven. Hem i wan long ol “paoa” we i mekem kongregesen blong ol Kristin long taem ya we i olsem pikinini yet i gru mo i kam strong moa.—1 Korin 12:7-11; 14:24-26.[20]
Ol defren wok blong tabu speret long faswan handred yia, olsem toktok long narafala lanwis, oli soemaot tu se God i no moa yusum kongregesen blong ol man Isrel we i gat 1,500 yia finis olsem ol spesel man blong hem. No gat. Be, naoia hem i agri long nyufala Kristin kongregesen we Pikinini blong Hem we hemia nomo hem i gat i stanemap.—Lukluk Hibrus 2:2-4.[21]
Ol wok blong tabu speret oli impoten tumas blong stanemap nyufala Kristin kongregesen mo blong givhan long hem blong i gru i kam olsem bigman. Pol i eksplenem se afta we ol paoa ya oli mekem prapa wok blong olgeta, bambae oli no moa stap: “Maet sam man oli gat paoa blong talemaot ol tok we God i givim, be fasin ya bambae i finis. Maet sam man oli gat paoa blong tok long ol narafala lanwis, be ol lanwis ya bambae oli no moa yusum. Maet sam man oli save evri samting, be save ya bambae i lus.”—1 Korin 13:8.
Yes, Baebol i klia nomo se paoa blong toktok long ol narafala lanwis bambae i finis. ?Be wetaem? Ol Wok 8:18 i soemaot se ol paoa blong merikel we tabu speret i givim oli kamaot ‘taem ol aposol oli putum han blong olgeta long hed blong ol man.’ I klia se taem laswan long ol aposol i ded, bambae ol paoa ya we tabu speret i stap givim oli finis—olsem paoa ya blong toktok long ol narafala lanwis. Olsemia nao taem olgeta ya we oli kasem ol paoa ya long ol aposol oli ded tu, ol paoa ya bambae oli finis. Long taem ya Kristin kongregesen i strong finis mo hem i kasem plante ples finis.
“Ol Narafala Lanwis” Mo Mining Blong Olgeta
Fasin blong stanemap bakegen toktok long narafala lanwis long taem blong yumi “sam man oli ting se samting ya i kamaot from ol man oli no waes mo oli stap mekem blong pulum ae blong ol narafala man, mo ol narafala man oli ting se samting ya i sem mak long fasin blong toktok long narafala lanwis long taem blong ol Aposol.” Tede long ol jyos we ol man oli stap “toktok long ol narafala lanwis” long hem, oltaem oli stat toktok olbaot wantaem nomo long ol tok we oli no gat mining nating. Wan man i talem se: “Mi mi yusum paoa ya we mi gat blong toktok long narafala lanwis taem mi stap mi wan nomo mo mi stap yusum blong tingting dip. . . . Mi mi sem taem mi mekem samting ya long fored blong ol narafala man.” Narafala man i talem se: “Mi harem ol toktok blong mi, mi no kasem save long olgeta, be mi stap harem tang blong mi i stap muf nomo blong toktok.”
?Wanem gudfala mesej i kamaot long ol narafala lanwis olsem, mo olsem wanem fasin blong talemaot mining blong olgeta? Ol man we oli talem se oli save talemaot mining blong ol tok olsem oli stap givim ol defren mining long sem tok blong narafala lanwis. ?From wanem i gat ol defren mining? Oli talem eskyus nomo se, from “God i givim mining blong ol narafala lanwis long wan man mo long narafala man hem i givim narafala mining.” Wan man i talemaot se: “Mi mi faenemaot samtaem we ol mining blong ol tok ya oli no stretgud olgeta.” D.A. Hayes, i talem long buk blong hem The Gift of Tongues, se wan taem wan man i no wantem talemaot mining blong tok blong wan woman we i toktok long narafala lanwis from “hem i yusum ol rabis tok.” !Samting ya i defren long fasin blong toktok long narafala lanwis long faswan handred yia, we i blong givhan long kongregesen!—1 Korin 14:4-6, 12, 18.
Sam man tede oli talem se oli harem ol gudfala mining blong ol tok ya, mo oli rili bilif se God i yusum paoa ya taem hem i “wantem givim wan mesej stret long ol man.” ?Be tede yumi nidim wanem kaen mesej blong God we Jisas Kraes mo ol aposol blong hem oli no givim long yumi? Pol, we i kasem paoa blong tabu speret, i se: “Olgeta tok ya blong Baebol oli kamaot long God fastaem. Hem i putum long tingting blong ol man ya bifo blong oli raetem long buk. Nao ol tok ya i stret gud blong tijim ol man long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim ol man long ol stret fasin. Ol tok ya, God i givim blong bambae ol man blong hem oli save kam waes long olgeta samting, bambae oli gat evri samting blong mekem ol gudfala wok we i stap.”—2 Timote 3:16, 17.
I tru se, Kristin kongregesen i no moa stap olsem wan pikinini, taswe fasin blong God i givim tok no paoa blong mekem merikel, kongregesen i no moa nidim blong pruvum wok blong hem. Baebol i givim woning se: “Sipos mifala, no wan enjel blong heven, no wanem man, bambae i talemaot wan gud nyus long yufala, we i narafala [“i no agri,” The New English Bible] long hemia we mifala i talemaot finis long yufala bifo, be man ya i mas panis.”—Galesia 1:8.
Tede i no moa nidim merikel blong toktok long ol narafala lanwis, mo i no gat pruf long Baebol blong bilivim se hem i haf blong trufala Kristin wosip tede. Naoia we yumi save gat ful Baebol mo i isi blong kasem, yumi gat ol samting we yumi nidim oli stap finis long Tok blong God. Hem i givim save we i stretgud olgeta long saed blong Jeova mo Pikinini blong hem blong lidim man blong kasem laef we i no save finis.—Jon 17:3; Revelesen 22:18, 19.
Mo tu long faswan handred yia, aposol Pol i raetem leta long kongregesen blong Korin blong stretem tingting blong olgeta from wanem paoa blong toktok long ol narafala lanwis i kamaot long ol Kristin blong bifo. I luk olsem we sam oli intres tumas long paoa blong toktok long narafala lanwis, mo oli gat fasin olsem ol pikinini, oli no bigman nating long saed blong speret. Oli ting se i impoten tumas blong “tok long ol narafala lanwis.” (1 Korin 14:1-39) Pol i makemaot se i no evri Kristin long faswan handred yia we oli toktok long narafala lanwis. Oli no nidim samting ya blong oli kasem laef. Mo tu long taem ya bifo taem fasin ya i stap yet, paoa ya blong toktok long ol narafala lanwis i namba tu nomo long fasin blong talemaot ol tok we God i givim. Fasin blong toktok long narafala lanwis i no wan samting we wan Kristin blong bifo no naoia i nidim blong kasem laef we i no save finis.—1 Korin 12:29, 30; 14:4, 5.
Paoa We Toktok Long Narafala Lanwis Tede i Stanap Long Hem
Sam man oli bilif se tede ol lida blong ol karismatik jyos oli stampa blong mekem ol memba blong ol sipsip blong olgeta oli toktok long narafala lanwis. Samtaem samting ya i kamaot from filing blong man mo oli wari long laef. Cyril G. Williams i tokbaot long buk ya Tongues of the Spirit se, i luk olsem “plante taem hem i makem wan man se hem i hae moa long narafala long grup” mo man olsem i kasem “haenem mo paoa insaed long wan grup mo tu long tingting blong hem nomo.” Stampa tingting se, maet man i wantem kam haf blong wan grup blong ol man we i hae moa we oli stap toktok long ol narafala lanwis we ol man oli no save haremsave.
Taem Donald P. Merrifield i stap olsem bigman blong Yunivesiti blong Loyola yet, hem i talem se “fasin blong toktok long narafala lanwis hem i save kam olsem wan ekspiryens we ol man oli no bos long filing mo tingting blong olgeta, no, sam man oli talem se hem i wan ekspiryens wetem ol rabis speret.” Haeman blong jyos Todd H. Fast i se: “I gat plante defren tingting long saed blong fasin blong toktok long narafala lanwis. Devel i gat plante rod blong traem trikim yumi.” Baebol i givim woning se Setan wetem ol rabis enjel blong hem oli save gat paoa long man mo bos long toktok blong olgeta. (Ol Wok 16:17, 18) Jisas i agensem wan rabis speret we i stap pusum wan man blong singaot bigwan mo foldaon long graon. (Luk 4:33-35) Pol i givim woning se “Setan, be hem i save tanem fasin blong hem, blong mekem ol man oli luk hem olsem we hem i wan enjel blong laet.” (2 Korin 11:14) Tede olgeta we oli stap lukaot paoa blong toktok long narafala lanwis we God i no moa givim long ol man blong hem, oli rili mekem se Setan i save trikim olgeta, from yumi save finis se, bambae Setan i yusum “ol narnarafala merikel mo gyaman saen mo samting blong sapraes.”—2 Tesalonaeka 2:9, 10.
Toktok Long Narafala Lanwis—Mo Trufala Kristin Wosip
Ol Kristin blong faswan handred yia we oli kasem paoa blong toktok long narafala lanwis oli yusum paoa ya blong tokbaot ol gudgudfala samting we God i mekem. I impoten blong talem mining blong ol tok ya i klia blong evri man oli save kasem save long mesej blong hem mo i save givhan long olgeta. (1 Korin 14:26-33) Pol i talem se: “Sipos tok blong yufala i paspas from we yufala i stap tok long ol narafala lanwis ya, bambae i no gat man we i save wanem samting we yufala i stap talem. Ol tok ya blong yufala bambae i blong nating nomo.”—1 Korin 14:9.
Speret blong God i givim paoa long ol Kristin bifo blong toktok long narafala lanwis, be hem i no mekem olgeta oli tok olbaot no i hadwok blong talem mining blong olgeta, no gat. Tabu speret i givim tok we i blong mekem gud nyus i go kwiktaem long “olgeta man long wol” olsem Pol i talem.—Kolosi 1:23.
Long saed blong ol las dei blong wol ya, Jisas Kraes i talem se: “Yufala i mas mekem olsem from we gud nyus ya [long saed blong Kingdom we i stanap finis] i mas go long olgeta man long wol fastaem.” (Mak 13:10) Olsem long faswan handred yia, olgeta man oli mas harem mesej blong Kingdom ya. Samting ya i save kamtru from we naoia oli tanem Baebol maet fulwan no haf nomo i kam long ol narafala lanwis, kolosap 2,000 lanwis finis. Sem speret ya we i pusum ol Kristin bifo blong prij strong mo blong gat strong tingting blong mekem wok ya naoia i givhan long bigfala wok mo nambawan wok blong prij we kongregesen blong ol Wetnes blong Jeova tede i stap mekem. Oli yusum maot blong olgeta mo oli yusum ol teknik blong tede blong wokem ol buk blong mekem ol trutok blong Baebol i go long ol man, olgeta oli stap toktok long “klin lanwis.” Mesej ya i go finis long bitim 200 kantri mo long ol aelan. Ol Wetnes blong Jeova nomo oli olsem ol man we tabu speret blong God i pusum olgeta blong talemaot ol gudfala samting we God i mekem.—Sefanaea 3:9; 2 Timote 1:13.
[Tok Blong Pija Long Pej 7]
Wok blong prij long ol haos wanwan, long Japan
Wok blong prij long ol sip wanwan, long Colombia
Daon: Baebol stadi, long Gwatemala
Daon: Wok blong prij afsaed long taon long Netelan